ស្ពានយោល Akashi Kaikyo មានប្រវែងវែងជាងគេនៅលើពិភពលោក

ថ្ងៃព្រហស្បតិ៍ 28/03/2019 | 15:06 ល្ងាច

ប្រជាជនជប៉ុនមានឈ្មោះល្បីខាងផ្នែកស្ថាបត្យកម្មសំណង់ដែលមានកម្រិតខ្ពស់នៅក្នុងពិភពលោក ជាមួយនឹងស្ពានយោល Akashi Kaikyo គឺជាមោទនភាពនៃប្រជាជនជប៉ុន។

ស្ពាន Akashi Kaikyo មានឈ្មោះជាភាសាអង់គ្លេសថា Pearl Bridge ស្ពានយោលមានរចនាដូចជាខ្សែអង្រឹងឆ្លងកាត់ឈូង Akashi ភ្ជាប់ Maiko នៅ Kobe ជាមួយ Iwaya នៃកោះ Awaji ហើយជាផ្នែកមួយនៃផ្លូវល្បឿនលឿន Honshu – Shikoku។

ការសាងសង់ដ៏អស្ចារ្យនេះត្រូវបានចាប់ផ្តើមនៅខែមេសាឆ្នាំ ១៩៨៦ ហើយសម្ពោធអោយដំណើរការនៅខែឧសភាឆ្នាំ ១៩៩៨ បន្ទាប់ពីជាង ១២ ឆ្នាំស្រាវជ្រាវ និងសាង់សង់។

ដំបូងក្រុមវិស្វករគ្រោងសាងសង់ស្ពានមួយរួមទាំងប្រព័ន្ធផ្លូវដែកប៉ុន្តែនៅពេលគម្រោងចាប់ផ្តើមមានការលំបាកមួយចំនួនធ្វើអោយវាមានតែផ្លូវថ្នល់ប៉ុណ្ណោះ។

ស្ពាន Akashi Kaikyo មានប្រវែងសរុប ៣៩១១ ម៉ែត្រ និង កម្ពស់ ២៨២,៨ ម៉ែត្រ។ ប្រាក់ចំណាយសរុបត្រូវបានប៉ាន់ប្រមាណចំនួន ៥ ពាន់លានដុល្លារ។

ស្ពាន Akashi Kaikyo ត្រូវបានសាងសង់ឡើងយ៉ាងពិសេសអាចទប់ទល់នឹងខ្យល់បក់ដល់ទៅ 286km/h ជាមួយនឹងរញ្ជួយដីខ្លាំង 8.5 Richter ក៏ដូចជាកម្លាំងទឹកហូរកាត់សមុទ្រ Akashi។

ក្រៅពីនេះស្ថាបត្យកម្មស្ពាននេះត្រូវបានរចនាអាចទប់ទល់នឹងកត្តាគ្រោះធម្មជាតិដ៏អាក្រក់ក្នុងប្រទេសដូចជា ខ្យល់ព្យុះ និងរញ្ជួយដីជាដើម។

មុនពេលស្ពាន Akashi Kaikyo ត្រូវបានសាងសង់ ភ្ញៀវឆ្លងកាត់សមុទ្រ Akashi ដោយសាឡាងចំណាយពេល ៣ ម៉ោង។ ការធ្វើដំណើរឆ្លងសមុទ្របែបនេះជារឿយៗមានព្យុះពិតជាគ្រោះថ្នាក់ណាស់។ នៅឆ្នាំ ១៩៩៥ មានគ្រោះថ្នាក់មួយបានកើតឡើង សាឡាងពីរត្រូវលិចធ្វើអោយក្មេងចំនួន ១៦៨ បាត់បង់ជីវិត។ បន្ទាប់ពីស្ពាន Akashi Kaikyo ចាប់ដំណើរការជួយអោយកាត់បន្ថយពេលលវេលាធ្វើដំណើររវាង Honshu និង Shikoku ប្រហែលចំណាយពេល ១ ម៉ោង ៣០ នាទី។ ស្ពាន Akashi Kaikyo មានសារៈសំខាន់យ៉ាងខ្លាំងសម្រាប់សេដ្ឋកិច្ចព្រោះផ្តល់ភាពងាយស្រួលដល់ការធ្វើដំណើរ និងការដឹកជញ្ជូន។