សិស្សបោះគ្រាប់បែកផ្សែងលើរថភ្លើងដើម្បីមើលរថភ្លើងឈប់បន្ទាន់ – តើជាការបំផ្លាញឬគ្រាន់តែចង់ឃើញ?

ថ្ងៃព្រហស្បតិ៍ 06/06/2019 | 16:03 ល្ងាច

Train Otaku ជាក្រុមមនុស្សដែលមានចំណាប់អារម្មណ៍ពិសេសចំពោះរថភ្លើង។ ពួកគេចូលចិត្តថតរូបរថភ្លើង ញ៉ាំបាយប្រអប់លើរថភ្លើង រហូតដល់ចាំឈ្មោះស្ថានីយរថភ្លើងនីមួយៗនៅលើផ្លូវដែលរថភ្លើងបានឆ្លងកាត់។

ថ្មីៗនេះមានសិស្សវិទ្យាល័យ ៤ នាក់ ត្រូវចាប់ខ្លួនដោយសារទម្លាក់គ្រាប់បែកផ្សែងលើរថភ្លើង។ នេះជាកម្មភាពបង្កផលប៉ះពាល់ធ្ងន់ធ្ងរ និងមានគ្រោះថ្នាក់។ ទង្វើរបស់សិស្សទាំង ៤ នាក់នេះពិតជាល្ងង់ខ្លៅព្រោះ “ចង់មើលឃើញរថភ្លើងឈប់បន្ទាន់តើយ៉ាងណា”។

ហើយមិនមែនជាលើកទីមួយទេដែលក្រុមសិស្សបានប្រព្រឹត្តទង្វើខុសឆ្គងខាងលើនេះ។

រូបភាព FNN

នៅថ្ងៃទី ៨ ខែកុម្ភៈមានសិស្ស ៤ នាក់នៅសាលាឯកជនមួយនៅ Tokyo តាមដានរថភ្លើងដែលកំពុងធ្វើដំណើរតាមផ្លូវ Chiyoda បន្ទាប់មកទម្លាក់គ្រាប់បែកផ្សែងលើរថភ្លើងដែលកំពុងនៅលើស្ពានឆ្លងកាត់ទន្លេ Arakawa ស្ថិតតំបន់ Adachi ភាគឦសាននៃទីក្រុង Tokyo។ លទ្ធផលរថភ្លើងត្រូវបង្ខំឈប់ជាបន្ទាន់ និងបង្កការរំខានជាច្រើន។ សិស្សទាំងនេះប្រើទូរស័ព្ទដើម្បីថតវីដេអូហើយចែករំលេកលើប្រព័ន្ធអ៊ុីនធឺណែត បច្ចុប្បន្នវីដេអូត្រូវបានលុប។

ថ្ងៃបន្ទាប់មកសិស្សទាំងនេះធ្វើសកម្មភាពដូចនេះនៅ Hachioji ខាងលិច Tokyo ចំពោះរថភ្លើងដែលកំពុងធ្វើដំណើរលើខ្សែ Chuo ជាផ្លូវដែលមានមនុស្សច្រើនកុះករបំផុតនៅ Tokyo។ ថ្ងៃទី ១៥ ខែកុម្ភៈសិស្សទាំង ៤ នាក់ត្រូវចាប់ខ្លួនដោយសារតែរារាំងពាណិជ្ជកម្ម។ ប៉ូលីសរកឃើញក្នុងទូរស័ព្ទរបស់ជនសង្ស័យមានវីដេអូតាំងពីមួយខែមុន ថតឡើងវិញសកម្មភាពកាត់ខ្សែរថភ្លើងរបស់ជនសង្ស័យ និងសិស្ស ២ នាក់ទៀតនៅស្ថានីយ៍ Mitaka ធ្វើអោយរថភ្លើងនេះយឺត ៦ នាទី។

នៅថ្ងៃទី ៧ ខែ ឧសភាប៉ូលីសបានចាប់ខ្លួនជនសង្ស័យចំនួន ៤ នាក់ជាផ្លូវការពីបទរារាំងពាណិជ្ជកម្មជាលើកទី ២។

ក្នុងថ្ងៃទី ២៩ ខែឧសភាកន្លងទៅសិស្សទាំង ៤ នាក់ បានសារភាពកំហុសជាមួយនឹងហេតុផល “ខ្ញុំចង់មើលឃើញទិដ្ឋភាពរថភ្លើងឈប់បន្ទាន់”។ ប៉ុន្តែមិនស្មានថាភាពចង់ដឹងចង់ឃើញរថភ្លើងរបស់ក្មេងទាំងនេះបានបង្កការរំខានអ្នកដទៃជាង ៣០០,០០០ នាក់។ Tokyo Metro កំពុងពិចារណាប្តឹង និងទាមទារសំណងពីគ្រួសារជនសង្ស័យ។

ទោះបីជាចំណង់ចំណូលចិត្តក៏ត្រូវបញ្ឈប់ដែរ ត្រូវស្គាល់អោយច្បាស់រវាងភាពចង់ដឹងចង់ឃើញ និងអ្វីជាការបំផ្លាញ។ ពិតជាសំណាងក្នុងករណីនេះគ្មាននរណាមានរបួស ប៉ុន្តែស្មានមិនដល់គំនិតរបស់ប្អូនៗអាចបង្កគ្រោះថ្នាក់ដល់មនុស្សជាច្រើន។

ប្រភព News TV – Asahi

Sacchan