ជប៉ុន ផលិតស្រោមមុខដូចមនុស្សពិតៗ អាចឲ្យធ្វើការកុម្ម៉ង់បាន

ថ្ងៃអាទិត្យ 16/12/2018 | 10:02 ព្រឹក

របាំងមុខ ឬស្រោមមុខ ដែលផលិតឡើងដោយក្រុមហ៊ុនតូចមួយ នៅតំបន់ជនបទនៃប្រទេសជប៉ុន កំពុងក្លាយជាតម្រូវការយ៉ាងខ្លាំងចំពោះផ្នែកឧស្សាហកម្មបច្ចេកវិទ្យា កម្សាន្ត(Entertainment) មិនថាតែក្នុងស្រុកនោះទេ ថែមទាំងទទួលបានការចាប់អារម្មណ៍ខ្លាំងនៅក្រៅស្រុក រហូតដល់ប្រទេសអារ៉ាប៊ីសាអ៊ូឌីតផងដែរ។

ជាមួយនឹងតម្លៃ ៣សែនយ៉េន(២ ៦៥០ដុល្លារ) ស្រោមមុខផលិតឡើងពីជ័រ និងប្លាស្ទិក ប្រើប្រាស់បុគ្គលិកត្រឹមចំនួន ៥នាក់ ពួកគេនឹងធ្វើអោយដូចទៅនឹងស្ថានភាបផ្ទៃមុខជាក់ស្តែងរបស់មនុស្ស មិនថាតែស្នាមជ្រីវជ្រួញ និងស្នាមលើស្បែកមុខឡើយ។

លោក Osamu Kitagawa ដែលជាស្ថាបនិកក្រុមហ៊ុន គាត់បានបានចាប់ផ្ដើមគំនិតនេះឡើង ពេលដែលគាត់កំពុងធ្វើការអោយក្រុមហ៊ុនផលិតម៉ាស៊ីនបោះពុម្ពមួយ។

ប៉ុន្តែលោកត្រូវចំណាយពេល ២ឆ្នាំ ដើម្បីធ្វើការពិសោធន៍មុនពេលដែលគាត់រកឃើញពីវិធីបង្កើតចេញជាផ្ទៃមុខ 3D ចេញពីរូបថតដែលមានគុណភាពខ្ពស់ ដើម្បីបង្កើតស្រោមមុខ ហើយចាប់ផ្ដើមលក់ចេញនៅក្នុងឆ្នាំ២០១១។

ក្រុមហ៊ុនរបស់លោក Kitagawa តែងទទួលបានការបញ្ជាទិញប្រហែល ១០០ស្រោមមុខជារៀងរាល់ឆ្នាំពីក្រុមហ៊ុនដែលស្ថិតនៅខេត្ត Shiga ដែលជាឧស្សាហកម្មផ្នែកកម្សាន្ត, យានយន្ត, បច្ចេកវិទ្យា និងក្រុមហ៊ុនសន្តិសុខ ភាគច្រើនគឺស្ថិតក្នុងប្រទេសជប៉ុនផ្ទាល់។

ជាក់ស្ដែង ក្រុមហ៊ុនរថយន្តជប៉ុនមួយបានបញ្ជាទិញស្រោមមុខសម្រាប់មនុស្សកំពុងដេកលក់ ដើម្បីចង់ដឹងថាបច្ចេកវិទ្យាសម្គាល់ផ្ទៃមុខមនុស្សរបស់ពួកគេ អាចចាប់អ្នកបើកបរដេកលក់ពេលកំពុងបើកបរបានដែរឬទេ នេះបើតាមការបញ្ជាក់របស់លោក Kitagawa។

លោក Kitagawa ដែលមានវ័យ៦០ឆ្នាំហើយនោះ បានបញ្ជាក់បន្ថែមថា លោកបានទទួលការបញ្ជាទិញពីស្ថាប័នមួយដែលមានទំនាក់ទំនងជាមួយនឹងរដ្ឋាភិបាលប្រទេសអារ៉ាប៊ីសាអ៊ូឌីតដើម្បីបង្កើតនូវទម្រង់មុខរបស់ ស្តេច និងម្ចាស់ក្សត្រី ។ គាត់បន្តថា គាត់ធ្វើការជាមួយអតិថិជនគឺមានការប្រុងប្រយ័ត្នខ្លាំងណាស់ដើម្បីធានាអោយផលិតផលរបស់លោក មិនត្រូវបានប្រើប្រាស់សម្រាប់គោលបំណងខុសច្បាប់ និងបង្កឲ្យមានគ្រោះថ្នាក់ដល់សន្តិសុខនោះទេ គឺក្នុងគោលដៅបង្កើតស្រោមមុខឲ្យដូចមុខមនុស្សពិតប្រាកដ ១០០ភាគរយ ។