នៅសុខៗ លិចបាត់កោះតូចមួយរបស់ជប៉ុន

ថ្ងៃអាទិត្យ 04/11/2018 | 13:41 ល្ងាច

ថ្មីៗនេះកោះតូចមួយដែលមានចម្ងាយប្រហែល ៥០០ម៉ែត្រ ពីសារ៉ូហ៊្វូតស៊ូ(Sarufutsu) ភាគខាងជើងកោះ ហុកកៃដូ ប្រទេសជប៉ុន បានលិចទាំងស្រុងហើយ បើតាមសារព័ត៌មានជប៉ុន Asahi Shimbun បានរាយការណ៍។

បើតាមសេចក្ដីរាយការណ៍ បានចុះផ្សាយបន្ទាប់ពីទទួលបានពីអ្នកនិពន្ធ Hiroshi Shimizu ដែលគ្រោងធ្វើដំណើរទៅកាន់កោះនេះ ដើម្បីចងក្រងជាសៀវភៅ តែលោកមិនអាចរកឃើញកោះ អ៊ីសានបេហាណាគីតាកូជីម៉ា (Esanbehanakitakojima ) ឡើយ។ ឆ្មាំសមុទ្រជប៉ុន នឹងបើកប្រតិបត្តិការស្វែងរកកោះនេះផងដែរ។

លោក Shimizu បានសាកសួរទៅកាន់អ្នកនេសាទដែលរស់នៅតំបន់នោះ បានឲ្យដឹងថា គេមិនអាចមើលឃើញកោះនេះពីដីគោក ឬពីលើទូកដែលធ្វើដំណើរនៅជិតទីនោះទៀតឡើយ។

មួយវិញទៀតដោយសារតែកោះនេះ ជាសញ្ញាសម្គាល់ដែនទឹករបស់ជប៉ុននៅភាគខាងជើង អាជ្ញាធរជប៉ុន មានការព្រួយបារម្ភជាខ្លាំង ចំពោះការលិចបាត់កោះនេះ ខណៈដែលប្រទេសរុស្ស៊ីបានអះអាងថា តំបន់នេះ គឺជារបស់ខ្លួន។ ប្រទេសរុស្ស៊ី បានហៅតំបន់នេះថា Kurils ដែលធ្លាប់គ្រប់គ្រងដោយអតីតទ័ពសហភាពសូវៀត រយៈពេលខ្លីក្រោយសង្គ្រាមលោកលើកទី២បានបញ្ចប់។

ក្នុង ឆ្នាំ២០១៤ រដ្ឋាភិបាលជប៉ុន បានប្រកាសជាផ្លូវការថា មានចំនួនសរុប ១៥៨កោះ ដែលស្ថិតនៅក្រោមការគ្រប់គ្រងរបស់ជប៉ុន ហើយជាកោះគ្មានមនុស្សរស់នៅ ដូចជាកោះ Esanbehanakitakojima ផងដែរ។

តាមការវាស់ស្ទង់មួយកាលពីឆ្នាំ១៩៨៧ កោះ Esanbehanakitakojima មានកម្ពស់ ១,៤ម៉ែត្រពីនីវ៉ូទឹកសមុទ្រ៕ យោងទៅតាមច្បាប់អន្តរជាតិ ប្រទេសមួយអាចទាមទារថា ដែនទឹកជុំវិញកោះមួយ ថាជារបស់ខ្លួនបាន លុះត្រាតែគេអាចមើលឃើញកោះទាំងនោះនៅលើនីវ៉ូទឹកសមុទ្រ ពេលដែលមានជំនោរខ្ពស់បំផុត។

ប្រែសម្រួល៖ Naing Seiha

ប្រភព៖ JapanTimes