សមាជិក​ម្នាក់​នៃ​កង​កម្លាំង​ការ​ពារ​ជប៉ុន​យក​កាំបិត​លួច​ចូល​ស្ថាន​ទូត​ចិន

សមាជិកម្នាក់នៃកងកម្លាំងការពារជប៉ុនយកកាំបិតលួចចូលស្ថានទូតចិន។

កាលពីថ្ងៃទី ២៤ ខែមីនា ឆ្នាំ ២០២៦ នៅសង្កាត់ Minato ទីក្រុងតូក្យូ បុរសម្នាក់យកតាមកាំបិតដែល​​មាន​​ប្រវែង១៨ សង់ទីម៉ែត្រ​បាន​សម្រុក​ចូល​ទៅ​ក្នុង​ស្ថានទូតចិន និងត្រូវបានចាប់ខ្លួន។

បុរសដែលត្រូវចាប់ខ្លួនមានឈ្មោះថា Murata អាយុ ២៣ ឆ្នាំ ជាសមាជិកនៃកងកម្លាំងការ​ពារ​ដែន​គោក​​ជប៉ុន។

ហេតុការណ៍នេះបានបញ្ចប់ដោយគ្មាននរណាម្នាក់រងរបួសនោះទេ ប៉ុន្តែសំណួរសួរថា៖ តើគោល​បំណង​​របស់​​គាត់​​ជា​​អ្វី?

តើហេតុការណ៍នេះអាច​បណ្តាល​ឲ្យ​មាន​ការ​ផ្លាស់​ប្តូរ​ទំនាក់​ទំនង​រវាង​ជប៉ុន និង​ចិន​នា​ពេលអនាគត​​​ដែរ​​ទេ?

បុគ្គលិកស្ថានទូត និងបុគ្គលិកការទូតដែលធ្វើការនៅក្នុងស្ថានទូតត្រូវបានការពារដោយសន្ធិសញ្ញាអន្តរជាតិមួយហៅថា អនុសញ្ញាទីក្រុងវីយែន។ យោងតាមសន្ធិសញ្ញានេះ មិនថានៅប្រទេស​ណា​នោះ​ទេ ពួក​គេ​សុទ្ធ​តែ​ទទួល​បានការកំណត់ពិសេស។

មិនថាក្នុងកាលៈទេសៈណាក៏ដោយ ប៉ូលីសមូលដ្ឋានមិនអាចចាប់ខ្លួនពួកគេបានឡើយ ហើយក៏មិនមានសិទ្ធិសម្រុកចូលបរិវេណស្ថានទូតនោះដែរ។

ការដែលសម្រុកចូលស្ថានទូតគឺជាបញ្ហាដ៏ធំមួយ ប៉ុន្តែអ្វីដែលធ្វើឲ្យរឿងហេតុកាន់តែធ្ងន់ធ្ងរជាងនេះ​ត្រង់​ថា បុគ្គលដែលធ្វើសកម្មភាពគឺជាសមាជិកម្នាក់នៃកងកម្លាំង​ការពារ។

តើបុរសម្នាក់នោះមានបំណងអ្វី?

មុនពេលហេតុការណ៍កើតឡើង សេចក្តីថ្លែងការណ៍​របស់​អ្នកការទូត​ចិន​បាន​បង្ក​ឲ្យ​មាន​ភាពចម្រូង​ចម្រាស​​យ៉ាង​​ខ្លាំង​​នៅ​​ក្នុង​​ប្រទេស​​ជប៉ុន។

គ្រប់យ៉ាងផ្តើមចេញពីសេចក្តីថ្លែងការណ៍របស់នាយករដ្ឋមន្ត្រី Takaichi នៅក្នុងសភាជប៉ុនថា៖

• “ប្រសិនបើសង្គ្រាមផ្ទុះឡើងនៅតៃវ៉ាន់ អាចនឹងត្រូវបានចាត់ទុកថាជាស្ថានភាពគំរាមកំហែង​ដល់​វត្ត​មាន​របស់​ជប៉ុន។”

តៃវ៉ាន់មិនមែនជាទឹកដីរបស់ជប៉ុននោះទេ ហើយកងកម្លាំងការពាររបស់ជប៉ុនសម្រាប់តែការ​ពារ​ប្រទេស​របស់​ខ្លួន​ប៉ុណ្ណោះ។

ទោះជាយ៉ាងណា តៃវ៉ាន់មានទីតាំងស្ថិតនៅជិតទឹកដីជប៉ុនខ្លាំងណាស់។ ប្រសិនបើច្រកសមុទ្រ​តៃវ៉ាន់​ត្រូវ​បាន​បិទ ដំណើរការ​ដឹកជញ្ជូន​របស់ជប៉ុនអាចនឹងជាប់គាំង ហើយក្នុងករណីមួយចំនួន ចំណុច​នោះ​អាច​នឹង​ក្លាយ​ជា​ការ​គំរាម​កំហែង​ដល់ការរស់រានមានជីវិតរបស់ប្រទេស។

ចំណុចនេះគ្រាន់តែជាការឧបមាថានឹងកើតឡើងប៉ុណ្ណោះ។

ទោះជាយ៉ាងណា ភាគីប្រទេសចិនបានជំទាស់យ៉ាងខ្លាំងចំពោះសេចក្តីថ្លែងការណ៍នេះ។

អគ្គកុងស៊ុលចិនប្រចាំទីក្រុង Osaka បានបង្ហោះសេចក្តីថ្លែងការណ៍នៅលើអុីនធឺណេតដូចខាងក្រោម៖

• “ក​កខ្វក់​សម្រុកចូលដោយខ្លួនឯង មានតែកាត់ចោលប៉ុណ្ណោះ មិនគួរស្ទាក់ស្ទើរនោះទេ។

តើពួកគេត្រៀមហើយឬនៅ?”

ច្បាស់ណាស់នេះជាសេចក្តីថ្លែងការណ៍ដែលសំដៅលើនាយករដ្ឋមន្ត្រី Takaichi ហើយមិនមែនជាពាក្យ​ពេចន៍​សមរម្យ​ដែលអ្នកការទូតតំណាងឲ្យប្រទេសជាតិគួរប្រើនោះទេ។

យ៉ាងណាមិញ នាយករដ្ឋមន្ត្រី Takaichi មិនបានធ្វើអត្ថាធិប្បាយអ្វីចំពោះសេចក្តីថ្លែងការណ៍នេះនោះ​ទេ ហើយ​ក៏មិនបានចាត់វិធានការណាមួយ ឬស្នើសុំឲ្យដកចេញនោះដែរ។

លទ្ធផលសេចក្តីថ្លែងការណ៍ពីភាគីចិនកាន់តែច្រើនឡើង។

ក្រៅពីនេះ ប្រទេសចិនថែមទាំងផ្អាកដំណើរទស្សនកិច្ចទៅកាន់ប្រទេសជប៉ុន និងហាមឃាត់ការនាំចេញទំនិញសំខាន់ៗទៅកាន់ប្រទេសជប៉ុន ដែលបណ្តាលឲ្យកើតមានស្ថានភាពបច្ចុប្បន្ន។

Murata មិនអាចទទួលយកសេចក្តីថ្លែងការណ៍ និងការវិវត្តទាំងនេះបាន ដូច្នេះបានប្តេជ្ញាចិត្ត​ជួប​ជា​មួយ​ឯកអគ្គរដ្ឋ​ទូតដើម្បីស្នើសុំឲ្យបញ្ចប់សេចក្តីថ្លែងការណ៍លក្ខណៈគំរាមកំហែងនោះ។

កាំបិតដែលគាត់យកតាមត្រូវបានចាត់ទុកថាប្រើសម្រាប់ធ្វើអត្តឃាត។

ប្រហែលជាដោយសារតែស្មារតីស្នេហាជាតិ និងអារម្មណ៍មួយពេលរបស់ Murata បានជម្រុញឲ្យគាត់​ធ្វើ​សកម្មភាព​ដែល​កែ​ប្រែ​​មិន​បាន។

ទោះជាយ៉ាងណា ប្រសិនបើអ្វីដែលគាត់និយាយជាការពិត ប្រហែលជាប្រជាជនជប៉ុនជាច្រើននឹងចងចាំបុគ្គលប្រវត្តិសាស្ត្រម្នាក់ដែលមានឈ្មោះថា Yukio Mishima ។

Mishima បានកាន់ដាវជប៉ុនសម្រុកចូលទៅក្នុងជំរំកងកម្លាំងការពារ ហើយបានថ្លែងសុន្ទរកថានៅចំពោះមុខទាហាន។

លោក​បានអំពាវនាវឲ្យ​ពួកគេ​ក្រោក​ឡើង​ដើម្បី​ស្តារ​ប្រទេស​ជប៉ុន​ដ៏ខ្លាំងក្លាឡើងវិញ ប៉ុន្តែ​មិនទទួលបានការឆ្លើយតប។ ហើយនៅ​ទី​បំផុត លោក​បាន​វះពោះធ្វើអត្តឃាតតាមពិធី seppuku ដោយ​ប្រើ​ដាវ​នោះ។

រឿងរ៉ាវនិយាយពី Mishima ធ្លាប់ត្រូវបានចុះផ្សាយនៅលើគេហទំព័រផ្លូវការរបស់ JAPO ។ ប្រសិន​បើ​អ្នក​ចាប់​អារម្មណ៍ អ្នក​អាច​ចូល​មើល​អត្ថបទ​​តាម​​រយៈ​​តំណ​ភ្ជាប់​ខាង​ក្រោម៖

https://kh.japo.news/contents/japo-today/97469.html

Murata បានធ្វើសកម្មភាពខុសឆ្គងមួយ ប្រសិនបើមានប្រជាជនជប៉ុនកាន់តែច្រើនឡើងៗចាប់​​ផ្តើម​​យល់​​ស្រប​​តាម​​គំនិត​​របស់​​គាត់ តើ​នឹង​មាន​អ្វី​កើត​ឡើង?

ហើយតើ​អ្នកការទូតចិន – ជាអ្នកដែលធ្លាប់បង្ហាញសេចក្តីថ្លែងការណ៍ដែលហួសហេតុ មើលងាយប្រទេស​ជប៉ុន – នឹង​​បន្ត​​ធ្វើ​​ដូច្នេះ​​នៅ​ពេល​អនាគត​​ដែរ​ឬ​ទេ?

នេះ​ជា​ព្រឹត្តិការណ៍​មួយ​ដែល​អាច​ក្លាយ​ជា​បញ្ហា​ការទូត​ដ៏​ធំ។

វិធីសាស្រ្តដែលអ្នកនយោបាយជប៉ុន និង​ចិន​ដោះ​ស្រាយ​ស្ថាន​ភាព​នេះ​នឹង​បង្ហាញ​ពី​សមត្ថភាពរបស់​​ពួក​គេ។

Abe Kengo