លោកតាកសិករជនជាតិជប៉ុនអាយុ ៩០ ឆ្នាំប្រឡងជាប់វគ្គបញ្ជាយន្ត​ហោះ​គ្មាន​មនុស្សបើកឆ្ពោះទៅរកគោលបំណង “កសិកម្មឆ្លាតវៃ”

នៅទីក្រុងក្យូតូលោកតាអាយុ ៩០ ឆ្នាំ​ម្នាក់ បានធ្វើអោយមនុស្សជាច្រើនកោតសរសើរតាមរយៈការប្រឡង ដោយទទួលបានវិញ្ញាបនបត្របញ្ជាយន្តហោះគ្មានមនុស្សបើកសម្រាប់កសិកម្មខ្នាតធំនៅថ្ងៃទី ១០ ធ្នូ ឆ្នាំ ២០២២ ។

លោកតា Mamoru Tanaka កំពុងដំណើរការអាជីវកម្មដែលមានឯកទេសផ្គត់ផ្គង់អង្ករក្នុងស្រុក Fukuchiyama ទី​ក្រុង Kyoto ភាគខាងលិចប្រទេសជប៉ុន។ គាត់ឆ្ពោះទៅរក “កសិកម្មឆ្លាតវៃ” ក្នុងអាជីវកម្មរបស់ខ្លួន។

លោតាធ្លាប់ធ្វើការនៅសាជីវកម្មទូរគមនាគមន៍ បន្ទាប់ពីលាឈប់ការងារនៅ NTT (Nippon Telegraph and Telephone) សព្វថ្ងៃលោកតាកំពុងដាំស្រូវលើផ្ទៃដីប្រហែល ៨០០០ ម៉ែត្រការ៉េ។

ជាមួយនឹង​ផ្ទៃ​ដី​ធំ​បែប​នេះ គាត់ចាប់ផ្តើមយល់ថាពិបាកក្នុងការលើកម៉ាសុីនបាចស្រូវ និងជីដែល​មាន​ទម្ងន់​សរុប​រហូត​ដល់ ៣០ គីឡូក្រាម។ ដូច្នេះ​គាត់​ចាប់​អារម្មណ៍​នឹង​យន្តហោះគ្មានមនុស្សបើក ដែល​ត្រូវ​បាន​គេ​ប្រើ​ក្នុង​វិស័យ​កសិកម្ម​​នៅ​​ប្រទេស​​ជប៉ុន។

នៅទីបំផុតលោកតា Mamoru Tanaka បានចុះឈ្មោះចូលរៀនបញ្ជាយន្តហោះគ្មានមនុស្សបើក នៅមជ្ឈមណ្ឌលបណ្តុះ​បណ្តាល​នៃសមាគមបណ្តុះបណ្តាលអ្នកបើកយន្តហោះនៅ Fukuchiyama ទីក្រុងក្យូតូ។ លោកតាចូលរួមវគ្គ​បណ្តុះ​បណ្តាល​ដែលមានរយៈពេល ៥ ម៉ោង ស្តីពីច្បាប់អាកាស​ចរណ៍ និងអាកាសធាតុ តាមការណែនាំដោយរដ្ឋបាលអាកាស​ចរណ៍ស៊ីវិលនៃក្រសួងដឹកជញ្ជូន និងវគ្គបណ្តុះបណ្តាលបញ្ជាយន្តហោះគ្មានមនុស្ស​បើក​រយៈ​ពេល ១០​ ម៉ោង មុន​នឹងឆ្លងកាត់ការប្រឡងទ្រឹស្តី និងការអនុវត្តជាក់ស្តែង។

លោកតា Mamoru Tanaka រំលឹកដល់ការប្រឡងអនុវត្ត ហើយនិយាយថា “ពិបាកក្នុងការចាប់យកចម្ងាយដោយភ្នែកទទេណាស់” ។ ទោះជាយ៉ាង​ណា​លោក​តាមិនជួបបញ្ហាអ្វីទាំងអស់ពេលបញ្ជាយន្តហោះ ហើយធ្វើអោយអ្នកណែនាំចាប់អារម្មណ៍ជាមួយនឹងស្ថេរភាពរបស់ខ្លួន។

មុននោះនៅខែធ្នូ លោកតា Mamoru Tanaka អាយុ ៩០ ឆ្នាំក៏ទទួលបានប័ណ្ណបើកបរម៉ូតូធំ ជាពិសេសដើម្បីបញ្ជាត្រាក់ទ័រប្រើសម្រាប់កសិកម្មដែលមានទទឹងជាង ១,៧ ម៉ែត្រ។

លោកតាអាយុ ៩០ ឆ្នាំរូបនេះមានបំណងចង់បញ្ចូលដំណោះស្រាយកសិកម្មឆ្លាតវៃ ​ដូចជាការប្រើយន្តហោះគ្មានមនុស្ស​បើក​សម្រាប់បាចជី ទៅក្នុងអាជីវកម្មបច្ចុប្បន្ន​របស់​គាត់។

Japo Cambodia