ប៉ូ​លីស​ចិន​ឃាត់​ខ្លួន​ Youtuber ជនជាតិ​ជប៉ុន​ព្រោះ​រៀបចំ “free hug” នៅកន្លែងសាធារណៈ

Koichi Kuwabara គឺជា Youtuber ជនជាតិ​ជប៉ុន​ម្នាក់ល្បី​ឈ្មោះ​ជាមួយនឹង​វីដេអូ “free hug” នៅបណ្តាប្រទេសអាស៊ីដើម្បី​ផ្សព្វ​ផ្សាយ​អំពី​សន្តិភាពអស់​រយៈពេល ៧​ ឆ្នាំ។

េនះ​ជា​វីដេអូ​សកម្មភាព​របស់​គាត់នៅ​ប្រទេសកូ​រ៉េ។

មូលហេតុពីក្រោយសកម្មភាពនេះព្រោះ​ពេល Koichi Kuwabara ទំនាក់​ទំនង​ជាមួយនឹងជនជាតិកូ​រ៉េ និងជនជាតិ​ចិនកំ​ឡុង​ពេល​ធ្វើ​ដំ​ណើរទេសចរណ៍ គាត់​យល់​ឃើញ​ថាពួកគេខុសទាំងស្រុងអ្វីដែលប្រព័ន្ធ​ផ្សព្វផ្សាយ​របស់ជប៉ុន​បាន​ពិពណ៌នា។ ដោយ​សារ​ភាព​តាន​តឹង​ផ្នែក​នយោ​បាយ​ និង​ជម្លោះ​ក្នុង​ប្រវត្តិ​សាស្រ្តនាំ​អោយជនជាតិ​ជប៉ុន​មួយ​ចំនួនគ្មាន​អារម្មណ៍​ល្អចំពោះ​ប្រជាជនទាំង​ ២ ប្រទេសនេះ។ Kuwabara ព្យាយាមបន្ថយការ​យល់​ច្រឡំដោយ​រៀប​ចំ “free hug” ក្នុង​គោល​បំ​ណង​ល្អ។ ក្នុងពេលជាមួយគ្នានេះដែរគាត់ក៏កំពុងផុសសកម្មភាព​របស់​ខ្លួនលើ Youtube ដើម្បី​ផ្សព្វ​ផ្សាយ​គោល​បំ​ណង។

ទោះបី​ពេល​ខ្លះ​គាត់​ជួប​មនុស្ស​មួយ​ចំនួន​មាន​គំនិត​អវិជ្ជមាន ប៉ុន្តែ​ភាគ​ច្រើន​សុទ្ធតែ​ទទួល​យកទឹក​ចិត្ត​របស់​គាត់។ ទោះបីជាគំនិតនយោបាយខុសគ្នាប៉ុន្តែភាគច្រើនមិនស្អប់ចំពោះបុគ្គលជប៉ុនណាមួយ​ឡើយ។

ប៉ុន្តែ​នៅ​ក្នុង​វីដេអូ​ថ្មីៗ​នេះ​របស់​គាត់ Youtuber ត្រូវ​ប៉ូលីស ៣ នាក់​មកសាក​សួរ។

លើក​នេះ Kuwabara ប្រារព្ធធ្វើព្រឹត្តិការណ៍នៅណានជីងប្រទេសចិន។ នេះក៏ជាកន្លែងដែលការសម្លាប់រង្គាលក្នុង​ប្រវត្តិសាស្ត្របានកើតឡើងកំឡុងពេលសង្គ្រាមចិន និង​ជប៉ុនដែរ។

ក្នុង​វីដេអូ​មាន​ Clip បាតុ​កម្ម​ប្រឆាំង​នឹង​ជប៉ុនពី​ប៉ុន្មាន​ឆ្នាំ​មុននៅណានជីង។

Kuwabara កាន់​ផ្លាកមួយ​ខាង​លើ​មាន​ទង់ជាតិ​ប្រទេសចិន និង​ទង់ជាតិ​ប្រទេសជប៉ុនជាមួយនឹង​អក្សរ​ “មិត្ត​ភាពចិន និង​ជប៉ុន សូម​ឳប​គ្នា​!” ប្រជាជន​មួយ​ចំនួន​គឺគាំទ្រ​។

ប៉ុន្តែ​បរិយាកាស​ស្រាប់តែ​តាន​តឹង​ភ្លាមៗពេលមាន​ប៉ូលីស ៣ នាក់​មក​ជិត​គាត់។ ពួកគេសាក​សួរទាំង​​មិត្ត​ជនជាតិ​ចិន​របស់ Kuwabara ហើយ​សម្រេច​ចិត្ត​យក​គាត់​ទៅ​ស្ថានីយ៍​ប៉ូលីស។

សំ​ណាង​នៅ​ស្ថានីយ៍​ប៉ូលីសក្រុម Youtuber មានឱកាសដើម្បីពន្យល់លម្អិត​ជូន​ប៉ូលីស ហើយ​ធ្វើអោយប៉ូលីសផ្លាស់ប្តូរអាកប្បកិរិយារបស់ពួកគេ។

ប៉ូលីសចាប់ផ្តើមលេងសើចជាមួយ​ Kuwabara និង​ក្រុម​មិត្ត​ភក្តិ​របស់គាត់ដោយនិយាយថាប្រសិនបើអ្នកចង់ផ្សព្វផ្សាយពី​សន្តិភាពអ្នកគួរតែដាក់និមិត្តសញ្ញាសត្វព្រាប។ ប៉ូលី​សមួយ​ចំនួនថែម​ទាំង​កោត​សរសើរ Kuwabara ដោយសារតែគាត់អាចធ្វើដំណើរតែម្នាក់ឯងទៅកាន់ប្រទេសជាច្រើន។

ទោះបី​ទៅស្ថានីយ៍​ប៉ូលីស​នៅលើ​ទឹក​ដី​ប្រទេសផ្សេង បុរស Youtuber នៅ​តែ​ក្លាហានបន្តបេសកកម្មសន្តិភាពរបស់ខ្លួនជាមួយគំនិត​វិជ្ជមាន។

អតីតកាល​បាន​កន្លង​ផុត​ទៅ ភាព​យល់​ច្រឡំ​នៅ​តែ​បន្តរហូត​មក​ដល់​បច្ចុប្បន្ន​។ សម្រាប់​មនុស្ស​ម្នាក់ៗគួរតែ​​ស្រលាញ់​មិន​រើស​អើម​ជនជាតិ​​។ គួរតែ​លើក​ទឹក​ចិត្ត​ការ​ផ្សព្វ​ផ្សាយ​ពី​សន្តិភាពសម្រាប់​ពិភពលោក។

ប្រភព Grapee

Sacchan