ជនជាតិជប៉ុនប្រើមនុស្សយន្តនិយាយជំនួសក្នុងថ្ងៃណាត់ជួបរកគូរស្នេហ៍

ថ្ងៃសុក្រ 22/02/2019 | 18:32 ល្ងាច

នៅប្រទេសជប៉ុនស្ថានភាពមិនចង់ណាត់ជួបរកគូរស្នេហ៍ រៀបអាពាហ៍ពិពាហ៍ និងកើតកូនមានកម្រិតខ្ពស់។ ក្នុងពេលថ្មីៗនេះ មនុស្សមិនទាន់មានគូរនៅប្រទេសជប៉ុនជាច្រើនកំពុងមានចំណាប់អារម្មណ៍ចូលរួមពិធីណាត់ជួបស្វែងរកគូរ ហើយបន្តស្គាល់គ្នាដោយពឹងលើជំនួយការមនុស្សយន្ត។

ប្រភេទនៃការណាត់ជួបខាងលើត្រូវបានរៀបចំដោយក្រុមហ៊ុនបច្ចេកវិទ្យា Sharp និងក្រុមហ៊ុនផ្សព្វផ្សាយ Cyber Agent ផ្តល់ដំណោះស្រាយនៃការណាត់ជួបសម្រាប់មនុស្សដែលគ្មានបទពិសោធ ឬខ្មាសអៀនពេលនិយាយជាមួយមនុស្សមិនធ្លាប់ស្គាល់។

ជំនួយការមនុស្សយន្តជួយអោយដៃគូរណាត់ជួបអាចទទួលបានការសន្ទនាគួរអោយចាប់អារម្មណ៍ និងបន្តការណាត់ជួបគ្នាលើកក្រោយ។ តុនីមួយៗមានមនុស្សយន្តពីរដែលត្រូវបានបញ្ចូលព័ត៌មានរបស់អ្នកចូលរួម។

តាម Soranews បានអោយដឹងព័ត៌មានដែលបញ្ចូលក្នុងមនុស្សយន្តត្រូវបានសំយោគតាមរយៈការស្ទង់មតិមានចំនួន ៤៥ សំណួរ ដែលបានបំពេញដោយអ្នកមិនទាន់មានគូរមុននោះ។ ជាមួយទិន្នន័យទាំងនេះមនុស្សយន្តនឹងសួរហើយឆ្លើយគ្នាទៅវិញទៅមកចំណែកមនុស្សទាំងពីរនាក់គ្រាន់តែអង្គុយស្ងៀមហើយស្តាប់។

វីដេអូបានបង្ហាញថាវិធីដែលមនុស្សយន្ត “នាំពាក្យ” សម្រាប់ដៃគូរចូលរួម។ ពេលដែលមនុស្សយន្តប្រុសសួរ “តើពេលថ្មីៗនេះចំណង់ចំណូលចិត្តរបស់អូនជាអ្វី?” មនុស្សយន្តស្រីឆ្លើយ “ថ្មីៗនេះខ្ញុំចាប់ផ្តើមរៀន piano”។

បន្ទាប់ពីរយៈពេល ៣នាទីស្តាប់មនុស្សយន្តសន្ទនា មនុស្សទាំងពីរដែលបានចូលរួមនឹងគិតថាពួកគេចង់និយាយគ្នាដោយផ្ទាល់ឬទេ?

ក្នុងចំណោមមនុស្ស ២៨ នាក់ចូលរួមមាន ៤ គូរយល់ព្រមណាត់ជួបបន្ត។ អ្នកចូលរួមបង្ហាញអំពីអារម្មណ៍ពេញចិត្តជាមួយនឹងអត្ថប្រយោជន៍របស់មនុស្សយន្ត។

មានមតិមួយបាននិយាយថា៖ “ដំបូងខ្ញុំគិតថាភាគីម្ខាងទៀតមិនមែនជាមនុស្សដែលខ្ញុំនឹងចូលចិត្តទេ ប៉ុន្តែបន្ទាប់ពីស្តាប់មនុស្សយន្តសន្ទនា ខ្ញុំយល់ថាភាគីមានចំនុចដូចនឹងខ្ញុំច្រើន ហេតុនេះខ្ញុំសម្រេចចិត្តនឹងណាត់ជួបបន្តលើកក្រោយ”។

មនុស្សជាច្រើនយល់ថាដោយសារតែមនុស្សយន្តពួកគេអាចផ្តោតអារម្មណ៍ទៅលើការស្តាប់ ហើយស្វែងយល់ដៃគូរនៅទល់មុខ។ ពួកគេមិនចាំបាច់ភ័យខ្លាច និងបារម្ភអំពីចម្លើយដែលត្រូវឆ្លើយដោយចៃដន្យយ៉ាងណាទេ។

តាមរយៈប្រព័ន្ធសំណួរចម្លើយដោយស្វ័យប្រវត្តិមានទិន្នន័យស្រាប់បែបនេះ ការសន្ទនាដោយមនុស្សយន្តអាចជួយកាត់បន្ថយភាពខ្មាសអៀន ឬមិនដឹងថាត្រូវនិយាយអ្វីក្នុងពេលណាត់ជួប។

ដោយសារតែភាពភ័យខ្លាច នេះប្រហែលជាវិធីសាស្រ្តដ៏មានប្រសិទ្ធភាពសម្រាប់អ្នកដែលមិនទាន់មានគូរ។

ប៉ុន្តែតើវិធីនេះអាចនឹងបន្ថយភាពរ៉ូមែនទិចរបស់អ្នកណាត់ជួបទេ?

ប្រភពបន្ថែម៖ Nextshark

អត្ថបទ៖ Sacchan