ការពិតដែល​និយាយ​អំពី​ពែងតែ​ធំ និង​​វាំង​នន​​ប្រឡាក់​នៅ​​ភោជនីយដ្ឋាន​​ស៊ូស៊ី​

ការពិតដែលនិយាយអំពីពែងតែធំ និង​វាំងនន​ប្រឡាក់នៅ​ភោជនីយដ្ឋាន​ស៊ូស៊ី​។

នៅពេលដែលទៅបរិភោគនៅភោជនីយដ្ឋានស៊ូស៊ីជប៉ុន តើប្រិយមិត្តធ្លាប់កត់សម្គាល់ ឬឆ្ងល់ទាក់ទងនឹងរបស់ប្រើប្រាស់នៅទីនោះដែរទេ?

ជាទូទៅយើងនឹងមើលឃើញពែងតែដែលមានទំហំធំជាងពែងធម្មតា ហើយនោះគឺជាពែងសម្រាប់ផឹកតែ។ ទោះជាយ៉ាងណា បច្ចុប្បន្នភោជនីយដ្ឋានស៊ូស៊ីកម្រនឹងប្រើប្រភេទពែងនេះណាស់ ប៉ុន្តែទន្ទឹមនឹងនោះ ភោជនីយដ្ឋានប្រពៃណីដែលមានអាយុកាលយូរឆ្នាំនៅតែពេញនិយមប្រភេទ​ពែង​នេះ​ខ្លាំង​ណាស់ ដែល​ជា​ផ្នែក​មួយ​សម្រាប់ថែរក្សាវប្បធម៌ម្ហូបអាហារជប៉ុន។

តែមួយពែងដ៏ស្រស់ស្រាយនារដូវក្តៅស្អុះស្អាប់ ឬតែក្តៅឧណ្ហៗមួយពែងនៅយប់នារដូវរងាដ៏ត្រជាក់ គឺជាការរួមបញ្ចូលគ្នាដ៏ល្អឥតខ្ចោះសម្រាប់ការ​ទទួល​ទាន​អាហារ។ មិនត្រឹមតែស៊ូស៊ីប៉ុណ្ណោះទេ សូម្បីតែមុខម្ហូបផ្សេងទៀតក៏ដោយ។ ដូច្នេះហេតុអ្វីបានជាពែងតែដែលមានទំហំធំៗបែរជាពេញនិយមនៅភោជនីយដ្ឋានស៊ូស៊ី ទាំងដែលកន្លែងផ្សេងមិននិយមប្រើទៅវិញ?

ដូច្នេះហើយ តើចម្លើយជាអ្វី?

ក្រៅពីនេះ ថែមទាំងមានរឿងរ៉ាវនិយាយអំពីវាំងននដែលព្យួរនៅតាមភោជនីយដ្ឋាននីមួយៗ (ដែលមានឈ្មោះហៅថា Noren) ។

គេតែងតែនិយាយថា ប្រសិនបើយើងមើលឃើញភោជនីយដ្ឋានដែលមានវាំងនន noren ប្រឡាក់ ស៊ូស៊ីនៅទីនោះប្រាកដជាឆ្ងាញ់ណាស់។

ស្តាប់ទៅដូចជាចម្លែកណាស់ ព្រោះថាប្រជាជនជប៉ុនមានរបៀបរស់នៅមានអនាម័យ និងសណ្តាប់ធ្នាប់ល្អ ប៉ុន្តែបែរជាចូលចិត្តហាងដែលមើលពីខាងក្រៅមិនសូវអនាម័យទៅវិញ។

នៅថ្ងៃនេះ JAPO នឹងស្រាយចម្ងល់សម្រាប់ប្រិយមិត្តទាំងអស់ទាក់ទងនឹងចំណុចនេះ រឿងរ៉ាវអាថ៌កំបាំង​និយាយ​ពី​ភោជនីយដ្ឋាន​ស៊ូស៊ី។

ពែងតែធំគឺប្រើសម្រាប់លាងម្រាមដៃ

ដើមឡើយ ស៊ូស៊ីមិនមែនជាម្ហូបដែលយើងទទួលទាននៅក្នុងភោជនីយដ្ឋានដូចសព្វថ្ងៃនេះទេ ប៉ុន្តែ​​តាម​​ពិត​ទៅត្រូវបានដាក់លក់នៅតាមតូបអាហាររហ័ស។

មិនមានបុគ្គលិកបម្រើការនោះទេ ម្ចាស់ហាងនឹងរៀបចំស៊ូស៊ីដោយខ្លួនឯង ឆុងតែសម្រាប់ភ្ញៀវ និង​​​ទទួល​​​ប្រាក់។

ដូច្នេះហើយ ម្ចាស់ហាងនឹងប្រើពែងធំៗដើម្បីធានាថាបរិមាណតែគ្រប់ល្មមសម្រាប់ភ្ញៀវផឹក ហើយម្ចាស់​ហាងក៏មិនចាំបាច់ឆុងតែ​ច្រើន​ដង​ពេក​ដែរ ទាំង​ដែល​កំពុងរវល់ធ្វើរឿងជាច្រើនក្នុងពេល​តែ​​មួយ។

ហើយបន្ទាប់ពីបរិភោគរួច ភ្ញៀវអាចប្រើពែងតែមួយនោះស​ម្រាប់លាងដៃមុនពេលចាកចេញ​ពី​ហាង។

សព្វថ្ងៃនេះ ភ្ញៀវអាចប្រើប្រាស់ “oshibori “ ជាប្រភេទកន្សែងសើមដែលប្រើនៅតាមភោជនីយដ្ឋាន។ យ៉ាងណាមិញ កាលពីមុន មុនពេលដែលកន្សែងដៃទាំងនេះមាន ស៊ូស៊ីគឺជាមុខម្ហូបដ៏ពេញនិយម ហើយមនុស្ស​គ្រប់គ្នាសុទ្ធតែប្រើដៃសម្រាប់បរិភោគ។ ដែលមានន័យថា ហាងត្រូវរៀបចំកន្លែង​​​សម្រាប់​ភ្ញៀវលាងដៃបន្ទាប់ពីបរិភោគរួច ប៉ុន្តែជាមួយនឹងទម្រង់អាជីវកម្មតូបលក់អាហារ​​នៅពេលនោះ ចំណុចនេះមិនអាចទៅរួចនោះទេ។ ផ្ទុយ​ទៅ​វិញ ភ្ញៀវ​អាច​លាង​ដៃ​របស់ខ្លួនដោយ​​ប្រើ​​ទឹក​តែ​ដែល​នៅ​សល់។

ក្នុងតែមានផ្ទុកសារធាតុមួយហៅថា catechin ដែលត្រូវបានគេចាត់ថាអាចប្រឆាំងនឹងបាក់តេរី និង​បំបាត់​ក្លិន​មិន​ល្អ។

នោះជារឿងរ៉ាវដែលនិយាយពីពែងតែធំកាលពីសម័យមុន។ សព្វថ្ងៃនេះ ភោជនីយដ្ឋានស៊ូស៊ីមួយចំនួន​នៅតែប្រើពែងប្រភេទនេះ ដែលប្រៀបបីដូចជាការថែរក្សាវប្បធម៌ម្ហូបអាហារជប៉ុន ប៉ុន្តែលែង​​ប្រើសម្រាប់លាងដៃទៀតហើយ។ ដូច្នេះប្រសិនបើយើងទៅបរិភោគមើលឃើញពែងតែនេះដោយ​​ចៃដន្យ ចូរប្រើសម្រាប់ផឹកតែ និងមើលប៉ុណ្ណោះ សូមកុំលាងដៃឲ្យសោះ។

ដូច្នេះតើការដែលទៅបរិភោគនៅហាងដែលមានវាំងនន noren ប្រឡាក់ល្អជាងពិតដែរទេ? តើចំណុច​នេះ​ពិត ឬយ៉ាងណា?

Noren គឺជាវាំងននក្រណាត់ខ្លី ដែលបិទបាំងផ្នែកខាងលើច្រកទ្វារចេញចូល។

សព្វថ្ងៃនេះ យើងនៅតែមើលឃើញវាំងននទាំងនេះព្យួរនៅតាមច្រកចូលភោជនីយដ្ឋានស៊ូស៊ីជាច្រើន ប៉ុន្តែកាលពីមុន វាថែមទាំងត្រូវបានប្រើសម្រាប់វាយតម្លៃមុខម្ហូបឆ្ងាញ់របស់ហាងផងដែរ វាំងនន​កាន់តែកខ្វក់ អាហារកាន់តែឆ្ងាញ់។

ជាការពិតណាស់ នេះជាចម្ងល់ដ៏ធំមួយទាំងដែលគំនិតនេះមានប្រភពមកពីជប៉ុន ជាប្រទេសមួយ​ដែល​ល្បី​ថា​ស្រលាញ់​ភាព​ស្រស់​ស្អាត។

តាមពិតទៅ វាំងនន noren នេះជារបស់ដែលភ្ញៀវប្រើសម្រាប់ជូតម្រាមដៃរបស់ខ្លួនបន្ទាប់ពីលាងដៃជាមួយតែ ជំនួសដោយការប្រើកន្សែង។ ដូច្នេះហើយ វាំងនន noren កាន់តែកខ្វក់មាន​ន័យ​ថា មានភ្ញៀវជាច្រើនបានមកបរិភោគនៅកន្លែងនេះ។

ជប៉ុនជាប្រទេសមួយដែលស្រលាញ់ភាពស្រស់ស្អាត និងឲ្យតម្លៃទៅលើអនាម័យ ប៉ុន្តែនៅតែមានរឿង​រ៉ាវ​មួយ​ចំនួន​ធ្វើឲ្យយើងមានការភ្ញាក់ផ្អើល។

ហើយជាការពិតណាស់ នេះជារឿងរ៉ាវដែលបានកើតឡើងយូរណាស់មកហើយ។

សព្វថ្ងៃនេះ ស៊ូស៊ីគឺជាមុខម្ហូបដ៏ពេញនិយមមួយនៅជុំវិញពិភពលោក រួមទាំងនៅប្រទេសកម្ពុជាផងដែរ។ សង្ឃឹមថា រឿងនេះនឹងនាំមកនូវបទពិសោធន៍ដ៏ពិសេសសម្រាប់​អ្នក​ដែល​ចូល​ចិត្ត​ស៊ូស៊ី មិន​​ថា​​នោះ​​គ្រាន់​​តែ​ជា​ចំណុច​​តូច​​តាច​បំផុត​​ក្នុង​វប្បធម៌​ម្ហូប​អាហារ​ជប៉ុន​ក៏ដោយ។

Abe Kengo