តើអនាគតរបស់ Nissan នឹង​​ទៅ​​ជា​​យ៉ាង​​ណា​​នៅ​​ពេល​​ដែល​​កាត់​​បន្ថយ​​សកម្មភាព​​អាជីវកម្ម?

តើអនាគតរបស់ Nissan នឹង​ទៅ​ជា​យ៉ាង​ណា​នៅ​ពេល​ដែល​កាត់​បន្ថយ​សកម្មភាព​អាជីវកម្ម?

Nissan ធ្លាប់ត្រូវបានចាត់ទុកជាសហគ្រាសមួយក្នុងចំណោមសហគ្រាស​ធំ​ទាំង​បី ដែល​រួម​ចំណែកយ៉ាង​ធំធេង​ខាង​វិស័យឧស្សាហកម្មរថយន្តជប៉ុន។ ទោះ​ជា​យ៉ាង​ណា បច្ចុប្បន្ននេះសហគ្រាសកំពុងស្ថិត​ក្នុង​ស្ថាន​ភាព​​លំបាក​​យ៉ាង​ខ្លាំង។

សហគ្រាសនេះធ្លាប់ផលិតម៉ូដែលរថយន្តស្ពរដែលមានកម្លាំងខ្លាំងហៅថា Nissan GT-R ឬគេហៅកាត់​ថា GT-R ហើយ​គេ​ថែម​ទាំង​​បាន​​ដាក់រហស្ស​នាម​ថា “Godzilla” មិន​ត្រឹម​តែ​ប៉ុណ្ណឹង​ល្បី​ថា ម៉ាសុីនដំណើរ​ការ​ខ្លាំង ការរចនាបែបស្ព័រ និងបច្ចេកវិទ្យាទំនើប ដូច្នេះ​ហេតុ​អ្វី​បាន​ជា Nissan បែរ​ជាធ្លាក់​ចុះ​យ៉ាង​លឿន​បែប​នេះ?

ការរៀបចំរចនាសម្ព័ន្ធឡើងវិញ ពន្យាពេលទូទាត់

មិនត្រឹមតែនៅប្រទេសជប៉ុនប៉ុណ្ណោះទេ Nissan ថែមទាំងមានមូលដ្ឋាននៅតាមបណ្តាប្រទេសជុំវិញ​ពិភព​លោក​ផង​ដែរ។ ក្នុងចំណោមនោះ មានមូលដ្ឋានចំនួន ១០ ត្រូវបានដាក់ក្នុងគម្រោង​រៀប​​ចំ​រចនា​សម្ព័ន្ធ​​ឡើង​វិញ ហើយ​ចំនួន​កម្មករ​ដែលត្រូវបញ្ឈប់ពីការងាររហូតដល់ទៅ ២ ម៉ឺន​នាក់។ ទន្ទឹមនឹងនេះ Nissan ក៏​កំពុង​ពិចារណា​បិទ​កន្លែង​ផលិត​ចំនួន​ពីរ​នៅ​ក្នុង​ប្រទេស​ជប៉ុនផងដែរ។

ដោយបានដឹងថា Nissan មានចំនួនបុគ្គលិកសរុបប្រមាណ ១៣ ម៉ឺននាក់ ដូច្នេះ​ចំនួន ២ ម៉ឺននាក់​ស្មើ​នឹង ១៥% ក្នុង​ចំណោម​នោះ។

នៅពេលដែលទម្រង់អាជីវកម្មរបស់សហគ្រាសមួយផ្លាស់ប្តូរ ការរៀបចំរចនា​សម្ព័ន្ធ​ឡើងវិញអាចនឹង​កើត​ឡើង។

ឧទាហរណ៍ដូចជាខាងវិស័យព័ត៌មានវិទ្យា ដំណាក់កាលដំបូងត្រូវការប្រភពធនធានមនុស្សច្រើន ហើយនៅពេលដែលចាប់ផ្តើមដំណាក់កាលប្រតិបត្តិការ នោះធនធានមនុស្សត្រូវកាត់បន្ថយ។ ប៉ុន្តែ​ខាងវិស័យឧស្សាហកម្មផលិតកម្ម គេតែងតែយល់ថា ការកាត់បន្ថយបុគ្គលិកស្មើនឹងការកាត់​បន្ថយ​ទ្រង់​ទ្រាយ។

ក្រៅពីនេះ មានព័ត៌មានបានឲ្យដឹងថា Nissan បានស្នើសុំក្រុមហ៊ុនផ្គត់ផ្គង់គ្រឿងបន្លាស់ជាច្រើន​ពន្យា​ពេល​ទូទាត់​សម្រាប់​ខ្លួន។

ប្រហែលជាក្រុមហ៊ុនផ្គត់ផ្គង់ជាច្រើនសុខចិត្តទទួលយកការពន្យារពេល ប្រសិនបើ Nissan ដាក់ភ្នាល់ធំចំពោះកំណើននាពេលអនាគត ប៉ុន្តែក្នុងស្ថានភាពបច្ចុប្បន្ន បញ្ហាផ្នែកហិរញ្ញវត្ថុរបស់ Nissan អាចមើលឃើញយ៉ាងច្បាស់ ក្រុមហ៊ុនផ្គត់ផ្គង់បារម្ភថា ប្រសិនបើពួកគេយល់ព្រមពន្យារពេល​សម្រាប់ Nissan ពួក​គេ​នឹងប្រឈមមុខនឹងហានិភ័យនៃការទូទាត់ទាំងនេះនៅពេលក្រោយ។

ប្រសិនបើមើលតាមទិសដៅនេះ ក្រុមហ៊ុនផ្គត់ផ្គង់នឹងមិនបន្តសហការជាមួយ Nissan នាពេលអនាគត​ឡើយ។

ភាគីដៃគូប្រកួតប្រជែង

មិនដូចជា Nissan​ នោះទេ Honda មានហិរញ្ញវត្ថុគ្រប់គ្រាន់សម្រាប់ធ្វើការស្រាវជ្រាវទាក់ទងនឹងការ​បាញ់​បង្ហោះ​រ៉ុក្កែត ចំណែក​ឯ Toyota ក៏​កំពុង​ឆ្ពោះ​ទៅ​មុខ​ផង​ដែរ។

ដើម្បីឆ្លើយតបទៅនឹងបញ្ហាពន្ធគយរបស់សហរដ្ឋអាមេរិក Toyota កំពុងប្រកាន់ភ្ជាប់គោលជំហរតាមរយៈការដកខ្លួនចេញពីសហរដ្ឋអាមេរិក ហើយសហការជាមួយនឹងកាណាដា។ ព័ត៌មានទាក់​ទង​នឹង​រឿង Toyota មានសមត្ថភាពគ្រប់គ្រាន់អាចអង្រួនពិភពលោក ហើយការបន្តរីក​ចម្រើន​របស់ Toyota ពិត​ជា​គួរ​ឲ្យ​ភ្ញាក់​ផ្អើល​ណាស់។

ដោយធ្លាប់ជាក្រុមហ៊ុនលក់រថយន្តស្រដៀងគ្នា ប៉ុន្តែឥឡូវនេះមានតែ Nissan ប៉ុណ្ណោះដែលស្ថិតក្នុង​ស្ថាន​ភាព​លំបាក ដូច្នេះ​មិន​អាច​បន្ទោស​ឧស្សាហកម្ម​នេះ​បាន​ទេ។

មូលហេតុដែលបណ្តាលឲ្យធ្លាក់ក្នុងស្ថានភាពពិបាក

មូលដ្ឋានផលិតលើសពីតម្រូវការ ជាការពិតណាស់ ចំណុចនេះនឹងធ្វើឲ្យការចំណាយកាន់តែច្រើនឡើង ហើយ​​ការ​​បញ្ចុះ​​តម្លៃ​លក់​ក៏មិន​អាច​ធ្វើ​បាន​ដែរ។

ចំពោះបញ្ហានេះ Toyota ពិតជាពូកែគ្រប់គ្រង និងមានលទ្ធភាពដាក់ចេញផលិតផលដែលមានគុណ​ភាព​ខ្ពស់ ជា​មួយ​នឹង​តម្លៃ​ទាប ដូច​ជា​ប្រភេទ​រថយន្ត​ទូទៅ និងរថយន្តប្រណីត​ផង​ដែរ។

ដំបូងឡើយ ប្រព័ន្ធផលិតកម្មរបស់ Toyota ត្រូវបានបង្កើតឡើងក្នុងគោលបំណងកាត់បន្ថយការចំណាយ ដូច្នេះ​ខ្ញុំ​គិត​ថា នេះ​ជា​ចំណុច​ដែល​ខុសគ្នា។

អ្នកដែលកាន់តំណែងជាន់ខ្ពស់នៅ Nissan ទទួលបានប្រាក់ខែខ្ពស់ ទោះបីជាត្រូវបានកាត់បន្ថយ​ប្រាក់​ខែ​ហើយ​ក៏​ដោយ ក៏នៅតែទទួលបានប្រាក់ខែខ្ពស់ជាង បើប្រៀបនឹងសមាជិកថ្នាក់ដឹកនាំដែលមានមុខ​តំណែង​ដូច​គ្នា​នៅ Toyota ។

ប្រសិនបើដឹងរឿងនេះ តើបុគ្គលិកដែលកំពុងស្ថិតក្នុងស្ថានភាពមិនដឹងថាពេលណាពួកគេនឹងត្រូវ​បណ្តេញ​ចេញ​នោះ​អាច​ទទួល​យក​បាន​ទេ? 

ហើយក៏មានអ្នកខ្លះយល់ថា គំនិតរបស់ថ្នាក់ដឹកនាំរបស់ Nissan ហួសសម័យទៅហើយ ហើយមិនអាចតាមទាន់សម័យកាល។ ប្រហែលជាដោយសារមូលហេតុនេះ ទើបពួកគេមិនអាចសម្រេចបាន​​លទ្ធផល​ថ្មី​ដូច​ជា Honda ។

ឥឡូវនេះ នៅពេលដែលស្ថានភាពកាន់តែពិបាកទៅ ការដាក់ចេញសេចក្តីសម្រេចចិត្តណា​មួយ​គឺ​យឺត​ពេល​ហើយ។

ការអភិវឌ្ឍរថយន្តចំណាយច្រើនណាស់ ដូច្នេះក្នុងស្ថានភាពបច្ចុប្បន្ន ការដាក់ចេញម៉ូដែលរថយន្តថ្មី​ដែល​មានភាពទាក់ទាញគឺជាបញ្ហាដ៏ពិបាកសម្រាប់ Nissan ។

ទោះជាយ៉ាងណា ដោយធ្លាប់ជាក្រុមហ៊ុនមួយក្នុងចំណោមក្រុមហ៊ុនដែលបានជួយដល់សេដ្ឋកិច្ចជប៉ុន ដូច្នេះ Nissan អាចនឹងទទួលបាន​ប្រភព​ប្រាក់​ជំនួយ រួម​ទាំង​រដ្ឋាភិបាល ឬ​ធនាគារ​ផង​ដែរ។

ប៉ុន្តែមានរឿងមួយដែលប្រាកដថា ប្រសិនបើ Nissan មិនធ្វើកំណែទម្រង់ធំដើម្បីស្តារឡើងវិញនោះទេ ដូច្នេះ​មិន​ថា​ទទួល​បាន​ការ​គាំទ្រ ឬ​ជំនួយ​ច្រើន​ប៉ុណ្ណា អតីត​កាល​អាច​នឹង​កើត​ឡើង​ម្តងទៀត។

ដោយដឹងថា រដ្ឋាភិបាលជប៉ុនក៏បានផ្តួចផ្តើមការពិភាក្សាដែលទាក់ទងនឹងការដាក់បញ្ចូលនឹង Honda ប៉ុន្តែ Honda បានបដិសេធការដាក់បញ្ចូលនេះ។

គ្រប់អាជីវកម្មទាំងអស់ ប្រសិនបើយើងបន្តរក្សាគំនិតចាស់ ដោយមិនមានការច្នៃប្រឌិត ដើម្បីតាមឲ្យទាន់សម័យកាល នោះរឿងស្រដៀងគ្នានេះអាចនឹងកើតឡើងចំពោះអាជីវកម្មរបស់យើងក្នុងពេលណាមួយ។

អាជីវកម្មមួយប្រៀបដូចជាសារពាង្គកាយមានជីវិត ប្រសិនបើមិនមានលទ្ធភាពសម្របខ្លួនតាមស្ថានការណ៍ទេនោះ ពិបាកនឹងរស់រានមានជីវិតនាពេលអនាគតណាស់។

Abe Kengo