ការប្រកួតប្រជែងគ្នាដោយសម្ងាត់នៅខាងក្នុងកីឡដ្ឋានបេស្បល

ថ្ងៃសុក្រ 11/07/2025 | 17:32 ល្ងាច

ការប្រកួតប្រជែងគ្នាដោយសម្ងាត់នៅខាងក្នុងកីឡដ្ឋានបេស្បល។

នៅប្រទេសជប៉ុនបេស្បលត្រូវបានគេចាត់ទុកជាកីឡាដែលពេញនិយម។ ទោះបីជាការប្រកួតកីឡាបេស្បលភាគច្រើនសុទ្ធតែអាចមើលតាមកញ្ចក់ទូរទស្សន៍ ប៉ុន្តែប្រសិនបើទៅមើលផ្ទាល់នៅកីឡដ្ឋានបេស្បលច្បាស់ជានាំមកនូវអារម្មណ៍ជាក់ស្តែង និងកាន់តែពិសេសផងដែរ។

មិនត្រឹមតែទទួលបានអារម្មណ៍ជាក់ស្តែងប៉ុណ្ណោះទេ ថែមទាំងអាចផឹកស្រាបៀរស្រស់ត្រជាក់ក្នុងអំឡុងពេលទស្សនាការប្រកួត ជាពិសេសនៅពេលដែលក្រុមដែលអ្នកគាំទ្រយកឈ្នះ។

ទោះជាយ៉ាងណា ក្រៅពីការប្រកួតរបស់កីឡាករបេស្បល នៅក្នុងកីឡដ្ឋាននៅមានការប្រកួតប្រជែងយ៉ាងសាហាវមួយផ្សេងទៀត។ ដោយសំដៅលើការប្រកួតប្រជែងរបស់នារីដែលធ្វើការខាងផ្នែកលក់ស្រាបៀរ។

ថ្វីត្បិតតែ ពួកគេតែងតែបង្ហាញពីស្នាមញញឹម ប៉ុន្តែតាមពិតទៅពួកគេកំពុងប្រកួតប្រជែងគ្នាដោយសម្ងាត់។ យើងនឹងស្វែងយល់ពីនារីទាំងនោះ និងការងាររបស់ពួកគេក្នុងខ្លឹមសារអត្តបទថ្ងៃនេះ។

រូបភាពខិតខំប្រឹងប្រែងធ្វើការងារ

នារីទាំងអស់ដែលធ្វើការងារខាងផ្នែកលក់ស្រាបៀរនឹងស្ពាយធុងស្រាបៀរធំលើខ្នងដើរជុំវិញកីឡដ្ឋាន ហើយទឹកមុខតែងតែញញឹមជានិច្ច។ ធុងស្រាបៀរដែលពួកគេស្ពាយលើខ្នងមានទម្ងន់ជាមធ្យមពី ១៥ ទៅ ២០ គីឡូក្រាម។

សម្រាប់មនុស្សស្រីដែលមានរាងតូចស្ពាយធុងធំក្រោយខ្នងមិនមែនជារឿងងាយនោះទេ។ មិនត្រឹមតែប៉ុណ្ណឹង កីឡដ្ឋានត្រូវបានសាងសង់ឡើងប្រៀបដូចជាជណ្ដើរ ដើម្បីឲ្យអ្នកទស្សនាទាំងអស់អាចមើលការប្រកួត។ ការធ្វើដំណើរឡើងចុះជណ្តើរក៏ពិបាកណាស់ដែរ ទោះបីជាមើលទៅពិបាក ប៉ុន្តែពួកគេនៅតែសម្រេចចិត្តធ្វើការនៅទីនេះ ដោយសារតែប្រាក់ចំណូលខ្ពស់។ អាចនិយាយបានថា ប្រសិនបើខិតខំប្រឹងប្រែងធ្វើការ ប្រាក់រង្វាន់មិនតិចនោះទេ។

ប្រព័ន្ធប្រាក់ខែ

ប្រាក់ឈ្នួលតាមម៉ោងគឺ ១.២០០ យ៉េន។ នៅប្រទេសជប៉ុនប្រាក់ឈ្នួលនេះមិនខ្ពស់ប៉ុន្មានទេ ប៉ុន្តែមានប្រព័ន្ធប្រាក់លើកទឹកចិត្ត។

ម៉ោងធ្វើការប្រហែល ៤ ម៉ោងក្នុងមួយថ្ងៃ ចំណែកឯប្រាក់លើកទឹកចិត្តដែលនារីទាំងនោះទទួលបានប្រហែល ៣៥ ទៅ ៥០ យ៉េន សម្រាប់ស្រាបៀរមួយកែវដែលលក់បាន។

ដូច្នេះហើយ សំខាន់រឿងឈ្នះចាញ់ស្ថិតលើ តើអាចលក់ស្រាបៀរបានប៉ុន្មានកែវក្នុងអំឡុងពេលនោះ។

តម្លៃស្រាបៀរក្នុងមួយកែវរាងទាប អ្នកដែលពូកែលក់អាចលក់បានជាង ៤០០ កែវក្នុងមួយថ្ងៃ។ ហើយបើតាមការកត់សម្គាល់ មានអ្នកខ្លះលក់ស្រាបៀរបានជាង ៤ ពាន់កែវក្នុងអំឡុងពេល ២ ឆ្នាំ។

នេះជាកម្រិតប្រាក់ចំណូលដែលច្រើនគួរសម។

អ្នកទិញភាគច្រើនជាបុរសវ័យកណ្តាល

សម្រាប់អ្នកតាមដានអត្តបទដែលមានវ័យកណ្តាល ប្រសិនបើឃើញនារីដ៏គួរឲ្យស្រលាញ់ម្នាក់ ស្ពាយធុងស្រាបៀរធ្ងន់ក្រោយខ្នង បក់ដៃហៅអ្នកជាមួយនឹងស្នាមញញឹម តើអ្នកនឹងធ្វើយ៉ាងណា? អ្វីដែលខ្ញុំកំពុងគិតគឺ ផឹកស្រាបៀរបន្តិចដើម្បីជួយដល់នាង។

ចុះប្រសិនបើមាននារីពីរនាក់បង្ហាញខ្លួនក្នុងពេលតែមួយ តើអ្នកនឹងទិញរបស់នរណា?

ច្បាស់ជារើសយកនារីដែលមើលទៅគួរឲ្យស្រលាញ់ជាង។

ដូច្នេះទើបខ្ញុំនិយាយថា នេះជាការប្រកួតប្រជែងគ្នាដោយសម្ងាត់ ដែលប្រព្រឹត្តទៅដោយសម្ងាត់រវាងអ្នកលក់ស្រាបៀរនៅក្នុងកីឡដ្ឋានបេស្បល។

ភាគច្រើននារីដែលធ្វើការងារខាងផ្នែកលក់ដូចនេះសុទ្ធតែមានមុខមាត់ស្អាត ហើយអ្នកខ្លះក្នុងចំណោមពួកគេធ្លាប់ត្រូវបានជ្រើសរើស និងបង្ហាញខ្លួនខាងវិស័យឧស្សាហកម្មកម្សាន្ត។

អ្នកដែលមិនអាចលក់ស្រាបៀរបាន នៅទីបំផុតនឹងទទួលខុសត្រូវលក់ភេសជ្ជៈ ចំណុចនេះមានន័យថា ប្រាក់លើកទឹកចិត្តដែលពួកគេទទួលបានតិចជាង។

សូមក្រឡេកមកមើលរូបភាពរបស់អ្នកលក់ស្រាបៀរដ៏គួរឲ្យស្រលាញ់នៅប្រទេសជប៉ុនខាងក្រោមនេះ។