ប្រសិនបើចង់ហ្វឹកហាត់សាច់ដុំ ហេតុអ្វីមិនសាកល្បងការងារខាងផ្នែកគិលានុបដ្ឋាយិកា?

ថ្ងៃអង្គារ 01/07/2025 | 17:30 ល្ងាច

ប្រទេសជប៉ុនកំពុងឆ្លងកាត់ដំណាក់កាលចំនួនប្រជាជនវ័យចំណាស់កើនឡើង។ ក្រោមស្ថានភាពបែបនេះពិតជាត្រូវការអ្នកដែលធ្វើការខាងផ្នែកថែទាំមនុស្សចាស់ណាស់ ប៉ុន្តែសព្វថ្ងៃនេះប្រភពធនធានមនុស្សដែលធ្វើការខាងផ្នែកនេះកំពុងខ្វះខាត។

នេះជាការងារដែលទាមទារកម្លាំងរាងកាយ ដូច្នេះហេតុអ្វីបានជាយើងមិនប្រមូលផ្តុំអ្នកដែលជឿជាក់លើកម្លាំងរាងកាយរបស់ពួកគេ?

ហេតុនេះហើយ នៅជប៉ុនក្រុមហ៊ុនសម្រាប់អ្នកដែលចូលចិត្តការហ្វឹកហាត់សាច់ដុំត្រូវបានបង្កើតឡើង។ ជាក្រុមហ៊ុនមួយដែលមានឈ្មោះថា Visionary ស្ថិតនៅខេត្ត Aichi ។

ខ្ញុំជឿជាក់ថា នៅប្រទេសកម្ពុជាក៏ដូចជាប្រិយមិត្តជាច្រើនផ្សេងទៀតដែលចង់ឲ្យខ្លួនមានរាងកាយរឹងមាំ ហើយចូលចិត្តហាត់ប្រាណ។ ប្រសិនបើដូច្នេះ ប្រហែលជាខ្លឹមសារអត្តបទនេះអាចនឹងក្លាយជាឯកសារដែលមានប្រយោជន៍សម្រាប់ការងារនាពេលអនាគតរបស់អ្នកទាំងអស់គ្នា។

មិនថាក្នុងការងារ ឬការហ្វឹកហាត់ សូមកុំបោះបង់ដោយងាយ

សម្រាប់អ្នកដែលចូលចិត្តហាត់ប្រាណបង្កើនសាច់ដុំ ការហ្វឹកហាត់ជាប្រចាំពិតជាសំខាន់ខ្លាំងណាស់។

យ៉ាងណាមិញ នៅជប៉ុនបញ្ហាធ្វើការថែមម៉ោងប្រៀបដូចជារឿងធម្មតាទៅហើយ ដូច្នេះអាចនិយាយបានថា គ្រប់គ្នាពិបាកនឹងរៀបចំពេលវេលាសម្រាប់ហាត់ប្រាណ។

ថ្វីត្បិតតែ ពួកគេចូលចិត្តហាត់ប្រាណបង្កើនសាច់ដុំ ប៉ុន្តែប្រឈមមុខនឹងបញ្ហាជីវភាពប្រចាំថ្ងៃ មនុស្សជាច្រើនត្រូវលះបង់ក្តីស្រមៃចូលរួមការប្រកួតកីឡាកាយវប្បកម្ម ព្រោះត្រូវចំណាយពេលធ្វើការ និងរកប្រាក់ចំណូល។

ដោយយល់ឃើញថា ជាទូទៅការងារខាងផ្នែកថែទាំតម្រូវឲ្យអ្នកធ្វើការត្រូវប្រើកម្លាំងសាច់ដុំ។ ក្រុមហ៊ុនផ្គត់ផ្គង់សេវាកម្មគិលានុបដ្ឋាយិកាបានកាត់បន្ថយម៉ោងធ្វើការរបស់បុគ្គលិកពីប្រាំបីម៉ោងចុះសល់ប្រាំមួយម៉ោង ហើយធ្វើបន្ទប់ហាត់ប្រាណសម្រាប់បុគ្គលិករបស់ខ្លួន ដើម្បីឲ្យបុគ្គលិកអាចហាត់ប្រាណ បន្តការងាររបស់ពួកគេដោយមិនចាំបាច់បោះបង់ក្តីស្រមៃកាយវប្បកម្ម។

មានបុគ្គលិកស្រីជាច្រើនដែលធ្វើការខាងផ្នែកគិលានុបដ្ឋាយិកា យ៉ាងណាមិញ ការមើលថែទាំមនុស្សចាស់គឺជាការងារដែលពិបាកបំផុត។ មិនដូចជាកូនក្មេងនោះទេ រាងកាយរបស់មនុស្សពេញវ័យធ្ងន់ជាងនេះច្រើនដងណាស់ មិនត្រឹមតែប៉ុណ្ណឹង មានមនុស្សជាច្រើនបាត់បង់សមត្ថភាពធ្វើចលនា គ្រប់សកម្មភាពទាំងអស់ត្រូវពឹងលើគិលានុបដ្ឋាយិកា។

ចំពោះស្ថានភាពចាំបាច់ត្រូវបី លើកមនុស្សចាស់ទៅងូតទឹក អនាម័យខ្លួនប្រាណមិនមែនជាការងារដែលងាយស្រួលនោះទេ ប៉ុន្តែសម្រាប់អ្នកដែលចូលចិត្តហាត់សាច់ដុំ ការងារទាំងនេះអាចចាត់ទុកដូចជាការហាត់ប្រាណ។ ដូច្នេះអាចនិយាយបានថា នេះជាការងារដែលស័ក្តិសមសម្រាប់ពួកគេ។

របបសុខុមាលភាពពិសេស

នៅទីនេះ របបសុខុមាលភាពរបស់បុគ្គលិកពិតជាល្អខ្លាំងណាស់ ជាពិសេសសម្រាប់អ្នកដែលចូលចិត្តហាត់សាច់ដុំ។

ដូចដែលខ្ញុំបានលើកឡើងខាងលើ បុគ្គលិកមានសិទ្ធហ្វឹកហាត់សាច់ដុំរយៈពេលពីរម៉ោងក្នុងម៉ោងធ្វើការ។ ក្រៅពីនេះ ពួកគេថែមទាំងទទួលបានប្រាក់ចំនួន ២ ម៉ឺនយ៉េនក្នុងមួយខែ ដែលចាត់ទុកដូចជាប្រាក់ផ្គត់ផ្គង់បន្ថែមប្រូតេអុីន និងសារធាតុចិញ្ចឹមដែលចាំបាច់សម្រាប់រាងកាយ។

ទោះបីជាពេលខ្លះត្រូវផ្អាកពីការងារបណ្តោះអាសន្នដើម្បីចូលរួមក្នុងការប្រកួតកីឡាកាយវប្បកម្ម ប៉ុន្តែបុគ្គលិកនៅតែទទួលបានប្រាក់ខែ។

តាមរយៈការផ្តល់នូវអត្ថប្រយោជន៍ល្អ និងទាក់ទាញ ក្រុមហ៊ុននេះបានប្រមូលផ្តុំអ្នកដែលចូលចិត្តហ្វឹកហាត់សាច់ដុំនៅទូទាំងប្រទេសជប៉ុន ហើយសូម្បីតែមនុស្សស្រីដែលចូលចិត្តធ្វើការងារក្នុងបរិយាកាសដែលជុំវិញសុទ្ធតែបុរសៗសាច់ដុំក៏បានដាក់ពាក្យសុំចូលធ្វើការផងដែរ។

ការងារខាងផ្នែកគិលានុបដ្ឋាយិកាតែងតែមានភាពអាប់អួរណាស់ ព្រោះការងារពិបាក និងទាមទារខ្ពស់ ប៉ុន្តែនៅពេលនេះបរិយាកាសបានផ្លាស់ប្តូរទាំងស្រុងដោយនឹកស្មានមិនដល់។

ការផ្លាស់ប្តូរនេះក៏ទទួលបានមតិយោបល់វិជ្ជមានជាច្រើនពីអ្នកដែលទទួលបានការថែទាំផងដែរ។ ពួកគេមានអារម្មណ៍ថាទុកចិត្តនៅពេលដែលទទួលបានការថែទាំពីគិលានុបដ្ឋាយិកាដែលមានសុខភាពល្អ។ ចំណែកឯអ្នកដែលធ្វើការខាងផ្នែកគិលានុបដ្ឋាយិកាក៏មានអារម្មណ៍សប្បាយចិត្ត ព្រោះអាចរកប្រាក់ចំណូល ហើយមានពេលវេលាបំពេញក្តីស្រមៃ។ អាចនិយាយបានថា មានប្រយោជន៍សម្រាប់ភាគីទាំងពីរ។

តើអ្នកទាំងអស់គ្នាយល់យ៉ាងណាចំពោះក្រុមហ៊ុននេះ និងគំនិតរបស់ពួកគេ?

មិនត្រឹមតែអាចបង្កើតប្រាក់ចំណូល ថែមទាំងអាចធ្វើឲ្យការងារខាងផ្នែកនេះកាន់តែមានភាពទាក់ទាញជាងមុន។

ប្រហែលជាចំណុចទាំងនេះអាចនឹងក្លាយជាឯកសារដ៏មានប្រយោជន៍នៅពេលណាមួយ នៅពេលដែលអ្នកទាំងអស់គ្នាបង្កើតអាជីវកម្មផ្ទាល់ខ្លួននាពេលអនាគ។

Abe Kengo