លេងកម្សាន្តយ៉ាងសប្បាយមិនថាអាកាសធាតុនៅទីក្រុងតូក្យូយ៉ាងណាក៏ដោយ

លេងកម្សាន្តយ៉ាងសប្បាយមិនថាអាកាសធាតុនៅទីក្រុងតូក្យូយ៉ាងណាក៏ដោយ។

ជូនចំពោះប្រិយមិត្តអ្នកអានដែលកំពុងមានគម្រោងទៅលេងជប៉ុននាប៉ុន្មានថ្ងៃខាងមុខនេះ។

សួស្តីអ្នកទាំងអស់គ្នា នៅប្រទេសជប៉ុន​រដូវវស្សា​ប្រចាំ​ឆ្នាំ​ចាប់​ផ្តើម​ពី​ខែ​មិថុនារហូត​ដល់​ពាក់កណ្តាលខែកក្កដា ហើយប៉ុន្មានថ្ងៃនេះនឹងមានភ្លៀងធ្លាក់គ្រប់ពេល។ នៅ​ពេល​ដែល​រដូវវស្សាកន្លង​ផុត​ទៅ​នឹងចូលដល់រដូវក្តៅ អារម្មណ៍ក្តៅស្អុះស្អាប់ខ្លាំង​ជាងអាកាសធាតុរដូវក្តៅនៅទីក្រុងភ្នំ​ពេញ​ទៅ​ទៀត។ 

ទោះបីជាយ៉ាងនេះក្តី យើងមិនចាំបាច់ព្រួយបារម្ភអំពីដំណើរកម្សាន្តនោះទេ។ ព្រោះនៅពេលដែលអ្នកទៅដល់ទីក្រុង Tokyo អ្នក​ទាំង​អស់​គ្នា​អាច​លេង​កម្សាន្ត​នៅ​កន្លែង​ជា​ច្រើន ដោយ​មិន​ចាំ​បាច់​បារម្ភ​អំពី​អាកាស​ធាតុ​ឡើយ។

TeamLab Planets Toky

គ្រាន់តែចំណាយពេលដើរមួយនាទីពីស្ថានីយ៍ Shin Toyosu យើងអាចរកឃើញសារមន្ទីរមួយ ជាកន្លែង​ដែល​យើង​អាច​គយ​គន់​ស្នាដៃ​សិល្បៈ។

មិនត្រឹមតែអាចសម្លឹងមើលស្នាដៃសិល្បៈប៉ុណ្ណោះទេ នៅទីនេះជាកន្លែងដែលយើងអាចបន្ធូរ​អារម្មណ៍​​ជា​​មួយ​​នឹង​​សិល្បៈ។

អាស្រ័យលើចលនា ផ្ទៃខាងក្រោយនឹងផ្លាស់ប្តូរ ដែលធ្វើឲ្យអ្នកទស្សនាមានអារម្មណ៍ដូចជាពួកគេកំពុងដើរចូលលំហមួយផ្សេង។

ប្រសិនបើអ្នកជាមនុស្សដែលចូលចិត្តថតរូបនៅកន្លែងពិសេស ខ្ញុំជឿថា ទីនេះនឹងក្លាយជាកន្លែង​ទេស​ចរណ៍​ដែល​សាក​សម​សម្រាប់​អ្នក។

Konica Minolta Planetarium Manten in Sunshine City 

Sunshine City គឺជាតំបន់ចម្រុះដ៏ធំមួយស្ថិតនៅភាគខាងកើត Ikebukuro, Toshima, Tokyo ។

នៅ​​កន្លែង​​សង្កេត​មើល​មេឃ​​​លើ​​ដំបូល អ្នក​ទាំង​អស់​គ្នា​​អាច​​មើល​​មេឃ​ទាំង​ដែលមានភ្លៀងក៏​ដោយ។ នេះជាតារាសាស្រ្តដែលរ៉ូមែនទិក អ្នកទាំងអស់គ្នាអាចមើលមេឃដែលពោរពេញទៅដោយផ្កាយ​នៅ​ពេល​យប់ ស្វែងយល់ពីតារាសាស្ត្រតាមរយៈបច្ចេកវិទ្យាអេក្រង់ដំបូលមូលដ៏ទំនើប អមដោយ​ការ​​ប្រគំ​​សំឡេង និង​​ពន្លឺ​​យ៉ាង​​ស្រស់​ស្អាត។

ស្តាប់តន្ត្រីពេលសម្លឹងមើលផ្កាយ និងរីករាយជាមួយក្លិនក្រអូបនៃប្រភេទឱសថក្រអូប។ សម្រាកបន្ធូរអារម្មណ៍លើកៅអីដែលទន់ ឬ​កៅ​អីរាប​ស្មើ ចំណុចទាំងអស់នេះនាំមកនូវអារម្មណ៍ល្អធ្វើឲ្យអ្នកលង់​លក់​ដោយ​មិន​ដឹង​ខ្លួន។

Sanrio Puroland

ខ្ញុំគិតថាមានប្រិយមិត្តជាច្រើនៅទីនេះ ជាពិសេសមនុស្សស្រីប្រាកដជាចូលចិត្តរូបតំណាងតុក្កតាដ៏​គួរ​ឲ្យ​ស្រលាញ់​ដូច​ជា Hello Kitty ។

ដើរប្រាំនាទីពីស្ថានីយ៍ Odakyu Tama Center មានសួនកម្សាន្តក្នុងផ្ទះមួយដែលមានឈ្មោះថា Sanrio Puroland ។ បរិយាកាស​គួរ​ឲ្យ​​ស្រលាញ់​​ក្នុង​​សួន​​កម្សាន្ត​​នេះ​​នឹង​​ធ្វើ​ឲ្យ​មនុស្ស​ស្រី​ទាំងអស់ពេញចិត្ត។

មានហាងលក់វត្ថុអនុស្សាវរីយមួយនៅច្រកចេញចូល ប៉ុន្តែដល់ពេលដែលមនុស្សគ្រប់គ្នាចេញទៅផ្ទះ តំបន់នេះមានមនុស្សច្រើនខ្លាំងណាស់ ពេលខ្លះអាចបណ្តាលឲ្យកកស្ទះ ដូច្នេះប្រសិនបើចូលចិត្ត​វត្ថុ​អ្វី​ម្យ៉ាង អ្នក​គួរ​តែ​ទិញ​ភ្លាម​នៅ​ពេល​ដែល​ដើរ​ចូល។

សារមន្ទីរធម្មជាតិ និងវិទ្យាសាស្ត្រជាតិ

សារមន្ទីរធម្មជាតិ និងវិទ្យាសាស្ត្រជាតិស្ថិតនៅឧទ្យាន Ueno បើកទ្វារនៅឆ្នាំ ១៨៧៧ ហើយជាសារ​មន្ទីរ​មួយ​ក្នុង​ចំណោម​សារមន្ទីរ​ដែល​ចំណាស់​បំផុត​នៅ​ជប៉ុន។ សារមន្ទីរនេះដាក់​តាំង​វត្ថុបុរាណដែល​ទាក់​ទង​នឹង​ប្រវត្តិសាស្ត្រ​ និង​​វិទ្យា​សាស្ត្រ​​របស់​​ជប៉ុន រួម​ទាំង​ការ​តាំង​បង្ហាញ​អំពី​​ប្រវត្តិ​​សាស្ត្រ ធម្មជាតិ ជីវវិទ្យា និង​អរិយធម៌​របស់​ជប៉ុន។

ក្រៅពីនេះ នៅឧទ្យាន Ueno មានសារមន្ទីរសិល្បៈ និង​កន្លែង​ដ៏​គួរ​ឲ្យ​ទាក់ទាញ​ជា​ច្រើន​ផ្សេងទៀត។

Tokyo Joypolis

Joypolis គឺជាខ្សែសង្វាក់នៃសួនកម្សាន្តក្នុងផ្ទះដែលបង្កើតឡើងដោយ Sega និង​គ្រប់​គ្រងដោយ CA Sega Joypolis ។ ចាប់​ផ្តើម​នៅ​ថ្ងៃ​ទី ២០ ខែកក្កដា ឆ្នាំ ១៩៩៤ ជាមួយនឹងទីតាំងដំបូងនៅ Yokohama ប្រទេសជប៉ុន មជ្ឈមណ្ឌល Joypolis ផ្សេង​ទៀត​ត្រូវ​បាន​បើក​នៅ​ទីក្រុង​មួយចំនួន​ក្នុង​ប្រទេស​ជប៉ុន។

នៅ​ទីនេះជាកន្លែងដែលល្បីមានល្បែងកម្សាន្តប្រើបច្ចេកវិទ្យាខ្ពស់ រួមមានល្បែងកម្សាន្តដែលលស់​ព្រលឹង និង​បទ​ពិសោធន៍​ជាក់​ស្តែង។

ជាកន្លែងលេងកម្សាន្តដែលសាកសមបំផុតសម្រាប់វិស្សមកាលរដូវក្តៅ ដែលអ្នកទាំងអស់គ្នាអាចពិចារណា​នាំ​កូនៗ​របស់​ខ្លួន​ទៅ​លេង​ក្នុង​រដូវ​ក្តៅ​នេះ។

ប្រសិនបើអ្នកកំពុងតែមានអារម្មណ៍ធុញថប់នឹងភ្លៀង គ្មានកន្លែងល្អសម្រាប់ដើរលេង និងថត​រូប សូម​អញ្ជើញ​មក​កាន់​ទីក្រុង​តូក្យូ​ដើម្បី​លេង​កម្សាន្ត ដោយ​មិន​ចាំ​បាច់​បារម្ភ​អំពី​អាកាសធាតុឡើយ​។

Abe Kengo