HONDA និងគោលដៅឆ្ពោះទៅរកលំហអវកាស

HONDA និងគោលដៅឆ្ពោះទៅរកលំហអវកាស។

HONDA ត្រូវបានគេស្គាល់ថាជាសាជីវកម្មចម្រុះជាតិសាសន៍របស់ជប៉ុន ដែលល្បីល្បាញទូទាំងពិភព​លោក​ខាង​វិស័យ​ផលិត​ម៉ូតូ យានយន្ត ម៉ាស៊ីន និង​ឧបករណ៍​អគ្គិសនី។

HONDA បានបង្ហាញពីកម្លាំងយ៉ាងខ្លាំងតាមរយៈការប្រកួតដូចជា F1 ហើយបង្កើតបានជាប្រវត្តិសាស្រ្ត​តាម​រយៈ​ការ​អនុវត្ត​បទ​ប្បញ្ញត្តិ​ថ្មី។

ប្រហែលជាភាគច្រើនប្រិយមិត្តបានដឹងហើយថា HONDA បានបង្កើតយន្តហោះខ្នាតតូចមួយ ហើយ​រឿង​នេះ​បាន​ក្លាយ​ជា​ប្រធាន​បទ​ដ៏​ក្តៅ​គគុក​នៅ​ទូទាំង​ពិភព​លោក។

ក្នុងអំឡុងពេល ៥ ឆ្នាំជាប់ៗគ្នា HONDA បានកត់សម្គាល់ចំនួនយន្តហោះពាណិជ្ជកម្មខ្នាត​តូចផលិត​ចេញ​ពី​រោង​ចក្រ​ច្រើន​ជាង​គេ​លើពិភពលោក ហើយបច្ចុប្បន្នកំពុងអភិវឌ្ឍយន្តហោះខ្នាតធំ ដែលអាចហោះបានឆ្ងាយជាងមុន។

ការពង្រីកខ្លួនរបស់ HONDA ត្រូវបានគេចាត់ទុកថាមិនធ្លាប់មានពីមុនមកខាងវិស័យឧស្សាហកម្ម​រថយន្ត។ យ៉ាងណាមិញ យើងអាចមើលឃើញយ៉ាងច្បាស់ពីគោលដៅបន្ទាប់ដែលសាជីវកម្ម​នេះ​កំពុង​ឆ្ពោះ​ទៅ​រក នោះ​គឺ​រ៉ុក្កែត។

ដូច្នេះអាចនិយាយបានថា HONDA បានចាប់ផ្តើមឆ្ពោះទៅរកលំហអវកាស។

កាលពីថ្ងៃទី ១៧ ខែមិថុនា ឆ្នាំ ២០២៥ ។

គ្រាប់រ៉ុក្កែតត្រូវបានបាញ់បង្ហោះចេញពី Hokkaido ប្រទេសជប៉ុន ហោះឡើងដល់កម្ពស់ ៣០០ ម៉ែត្រ​ដូច​ដែល​បាន​គ្រោង​ទុក ហើយ​បាន​ចុះ​ចត​នៅ​ទីតាំង​ដើម​វិញ។

ប្រហែល​ជាអ្នកទាំងអស់គ្នាគិតថា ៣០០ ម៉ែត្រ​គ្រាន់តែជាចម្ងាយដែលខ្លីប៉ុណ្ណោះ។ យ៉ាងណាមិញ ជាក់ស្តែងគ្រាប់រ៉ុក្កែតដែលត្រូវបានសាកល្បងបង្ហោះនេះមានទំហំតូច ជាមួយនឹងប្រវែង ៦,៣ ម៉ែត្រ និង​អង្កត់​ផ្ចិត ៨៥ សង់ទីម៉ែត្រ។ ហើយជាការពិតដែលថា រ៉ុក្កែត​ដែល​ប្រើ​ឡើង​វិញ​បាន​ចុះ​ចត​ដោយ​សុវត្ថិភាព គឺ​ជា​ព័ត៌មាន​ដ៏​ធំ​មួយ។

សាជីវកម្ម SpaceX នៃសហរដ្ឋអាមេរិកកំពុងនាំមុខ ហើយប្រាកដជាដើរតួនាទីយ៉ាងសំខាន់ក្នុងការអភិវឌ្ឍ​បច្ចេកវិទ្យា​រុក​រក​អវកាសនា​ពេល​អនាគត។

រ៉ុក្កែតធម្មតាគ្រាន់តែប្រើម្តងប៉ុណ្ណោះ។

Booster – ឬអាចហៅថារ៉ុក្កែតហោះទៅលើ អាចនឹងត្រូវបានបោះចោលមួយផ្នែក ឬទាំងស្រុងបន្ទាប់​​ពី​​បង្ហោះ។ ក្នុងរ៉ុក្កែតមានច្រើនស្រទាប់ booster ច្រើនតែជាស្រទាប់ដំបូងរុញបង្ហោះរ៉ុក្កែត ហើយ​ត្រូវបានបំបែកចេញពីរ៉ុក្កែត បន្ទាប់ពីបំពេញមុខងារ។ ការបំបែកស្រទាប់រ៉ុក្កែតអាចប្រព្រឹត្ត​ទៅ​នៅ​លើ​អាកាស ឬ​​នៅ​លើ​ផ្ទៃ​ដី អាស្រ័យ​​លើ​​ការ​​រចនា​​របស់​​​រ៉ុក្កែត។

បន្ទាប់មក ក្នុងអំឡុងពេលបាញ់បង្ហោះរ៉ុក្កែតទៅលើអវកាស បញ្ហាចាត់ចែងម៉ាស៊ីនរ៉ុក្កែតដែល​បានប្រើរួចគឺជាផ្នែកមួយដ៏សំខាន់សម្រាប់បង្កើនប្រសិទ្ធភាពប្រតិបត្តិការ និងសន្សំសំចៃឥន្ធនៈ។ ជាទូទៅម៉ាស៊ីនទាំងនេះត្រូវបានបំបែកជាដំណាក់កាល ហើយធ្លាក់មកលើផែនដីវិញ ឬធ្លាក់​ចុះតំបន់ដែលត្រូវបានកំណត់លើសមុទ្រ ជួយកាត់បន្ថយទម្ងន់របស់រ៉ុក្កែត និងបង្កើន​ឳកាស​ឡើង​ទៅ​​ដល់​​គន្លង។

ឧទាហរណ៍ដូចជានៅឆ្នាំ ២០២៤ រ៉ុក្កែត H3 ដែលជាប្រព័ន្ធបាញ់បង្ហោះអវកាសជំនាន់ថ្មីរបស់ជប៉ុន ត្រូវ​បាន​បាញ់​បង្ហោះ​ដោយ​ជោគជ័យ ជាមួយនឹងគោលបំណងប្រកួតប្រជែងខាងវិស័យបាញ់​បង្ហោះ​ផ្កាយ​រណប និង​​ជម្រុញ​​មហិច្ឆតា​​អវកាស​​របស់​​ជប៉ុន។

ទោះជាយ៉ាងណា ដើម្បីសម្រេចបានមហិច្ឆតានេះ ជប៉ុនបានចំណាយប្រាក់មិនតិចនោះទេ។

បញ្ហាការចំណាយខ្ពស់នឹងក្លាយជាឧបសគ្គយ៉ាងធំសម្រាប់ការអភិវឌ្ឍ​លំហ។

SpaceX កំពុងតែខិតខំប្រឹងប្រែងកាត់បន្ថយការចំណាយទៅលើការបាញ់បង្ហោះរ៉ុក្កែត តាមរយៈការប្រើឡើងវិញ​រ៉ុក្កែត។ ដើម្បី​សម្រេច​បាន​​គោល​​ដៅ​​នេះ SpaceX កំពុងតែផ្តោតលើការកែ​លម្អ​បច្ចេក​វិទ្យា​ដែល​អាច​ប្រើ​ឡើង​វិញ រួម​ទាំង​ការ​ប្រមូល និង​ការ​ប្រើ​ប្រាស់​ឡើង​វិញ​នូវ​ស្រទាប់ខាង​ក្រៅ​​របស់​​​រ៉ុក្កែត។

ទន្ទឹមនឹងនោះ បច្ចុប្បន្ន Honda ក៏​កំពុង​ផ្តោត​លើ​ការ​ស្រាវជ្រាវ​ និងអភិវឌ្ឍបច្ចេកវិទ្យារ៉ុក្កែតដែល​អាច​ប្រើ​ឡើង​វិញ ជាផ្នែកមួយដែល SpaceX បានផ្តួចផ្តើមដំបូង។

ទោះបីជាមិនទាន់មានលទ្ធភាពអនុវត្តជាក់ស្តែង ប៉ុន្តែគោលដៅដែលដាក់ចេញគឺឆ្ពោះ​ទៅរកទីតាំង​ដែល​មាន​ចម្ងាយ​ពី​ផ្ទៃ​ដី ៣២,០០០ គីឡូម៉ែត្រ ដែល​ហៅ​ថា​ការបាញ់បង្ហោះ​ពាក់​កណ្តាលស្វ័យ​ប្រវត្តិ​នៅ​ឆ្នាំ ២០២៩ ។

ប្រសិនបើសម្រេចបានជំហាននេះ បន្ទាប់មកអាចបាញ់បង្ហោះផ្កាយរណបសិប្បនិម្មិតមួយចំនួនបាន។

ទាក់ទងនឹងបញ្ហានេះ ASIMO (អក្សរកាត់នៃពាក្យ Advanced Step in Innovative Mobility) ជា​មនុស្សយន្តដែលល្បីឈ្មោះមាន​សមត្ថភាព​ដើរ​ជើង​ពីរ​ដូច​មនុស្ស និងសមត្ថភាពអនុវត្តចលនា​ដែល​ស្មុគ​ស្មាញ ដែល​ធ្លាប់​ត្រូវ​បាន HONDA អភិវឌ្ឍ។

បន្ទាប់ពីត្រូវបានណែនាំលើក​ដំបូង​ក្នុង​ឆ្នាំ ២០០០ ASIMO បានក្លាយជានិមិត្តសញ្ញានៃបច្ចេក​វិទ្យា​មនុស្ស​យន្ត​ទំនើប និងធ្លាប់ត្រូវបានរំពឹង​ទុក​ថា​អាច​ជួយ​ដល់​មនុស្ស​ក្នុង​វិស័យ​ជា​ច្រើន ជាពិសេស​គឺ​ជួយ​ដល់មនុស្ស​ចាស់ និង​ជន​ពិការ។

ថ្វីត្បិតតែ ទទួលបានការរំពឹងទុកយ៉ាងខ្លាំង ប៉ុន្តែ HONDA បានសម្រេចចិត្តបញ្ឈប់ការអភិវឌ្ឍ ASIMO នៅឆ្នាំ ២០១៨ ហើយងាកទៅផ្តោតលើបច្ចេកវិទ្យាផ្សេងទៀត។

ខណៈពេលដែល HONDA បានកត់សម្គាល់យ៉ាងខ្លាំងខាងផ្នែកបច្ចេកវិទ្យាយន្តហោះ និងរ៉ុក្កែត ផ្ទុយទៅវិញ TOYOTA នៅតែផ្តោតសំខាន់ខាងវិស័យបច្ចេកវិទ្យារថយន្ត ហើយមានការរីក​ចម្រើន​មិន​តិច​នោះ​ទេ។ ក្នុងនោះត្រូវ​និយាយ​ពី​បច្ចេក​វិទ្យា hybrid និង​យាន​រុករក​ព្រះ​ច័ន្ទនាពេល​អនាគត។

យើងអាចមើលឃើញថា ទោះបីជា​សាជីវកម្ម​ទាំង​ពីរ​ចាប់ផ្តើមដំបូងជាក្រុមហ៊ុនផលិតរថយន្តក៏​ដោយ ប៉ុន្តែសាជីវកម្មទាំងពីរនេះបែរជាមានមហិច្ឆតា​ដោយ​ឡែក ហើយ​​គោល​​ដៅ​ធំ​ដែល​​មិន​នឹកស្មាន​ដល់។

ទាំងដែល NISSAN កំពុងតែបាត់បង់ទស្សនៈវិស័យនាពេលអនាគត សាជីវកម្ម HONDA និង TOYOTA តែងតែសាកល្បងខ្លួនឯងក្នុងវិស័យជាច្រើន និងសម្រេចបានសមិទ្ធផលដែលគួរឲ្យរំពឹង​ទុក។

ប្រហែលជានៅពេលដែលមើលឃើញពីចំណុចនេះ យើងនឹងទទួលបានប្រភពថាមពលលើកទឹកចិត្ត ដើម្បី​ទទួលយកបញ្ហាប្រឈម និងអភិវឌ្ឍអាជីពរបស់ខ្លួន ដោយ​មិន​ភ័យ​ខ្លាច ហើយ​នៅមួយ​កន្លែង​ទៀត​ឡើយ។

Abe Kengo