ការធ្វើដំណើរដោយ Gran Class – កាប៊ីនដ៏ប្រណិតបំផុតនៃរថភ្លើងល្បឿនលឿន

ការធ្វើដំណើរដោយ Gran Class – កាប៊ីនដ៏ប្រណិតបំផុតនៃរថភ្លើងល្បឿនលឿន។

ជាទូទៅមិនដឹងថា នៅពេលដែលធ្វើដំណើរកម្សាន្តទៅលេងជប៉ុន តើអ្នកទាំងអស់គ្នាប្រើមធ្យោបាយ​ធ្វើ​ដំណើរ​ប្រភេទ​ណា?

ក្នុង​ចំណោម​មធ្យោបាយ​ធ្វើ​ដំណើរទាំងអស់ ការប្រើប្រាស់យន្តហោះគឺ​មាន​ភាព​ងាយ​ស្រួល​ណាស់ ព្រោះ​ថាចំណេញពេលវេលាបើសិនជាចង់ទៅកាន់តំបន់ដែលឆ្ងាយ។ យ៉ាង​ណា​មិញ ប្រសិនបើយើងបាន​ទៅ​ដល់​ប្រទេស​ជប៉ុន ហេតុអ្វី​បាន​ជា​យើង​មិន​សាក​ល្បង​ជិះ​រថភ្លើង​ល្បឿន​លឿន?

ក្នុងខ្លឹមសារអត្តបទថ្ងៃនេះ យើងនឹងណែនាំអំពីភាពងាយស្រួល និងផាសុកភាពនៃរថភ្លើងល្បឿន​លឿន (Shinkansen) ក៏​ដូច​ជា​កាប៊ីន​រថភ្លើង​លំដាប់​ខ្ពស់​បំផុតគឺ Gran Class ផងដែរ។

ផាសុកភាពនៅលើរថភ្លើង Shinkansen

បើ​និយាយ​ពី​ពេលវេលា​ធ្វើ​ដំណើរ​ជាក់​ស្តែង យន្តហោះប្រាកដជាលឿនជាង ប៉ុន្តែអ្នកដំណើរចាំ​បាច់​ត្រូវទៅកាន់អាកាសយានដ្ឋាន​យ៉ាង​ហោច​ណាស់​មួយ​ម៉ោង​មុន​ពេល​ហោះហើរ ខណៈពេលដែលព្រលាន​យន្តហោះនៅឆ្ងាយពីទីក្រុង។ ម្យ៉ាងវិញទៀត បន្ទាប់ពីយន្តហោះចុះចត អ្នកដំណើរត្រូវចំណាយពេលចាំយកអីវ៉ាន់ និងចាកចេញពីព្រលានយន្តហោះ ប្រសិន​បើ​ពិចារណា​លើ​ចំណុចទាំងអស់នេះ យន្តហោះមិនប្រាកដថាអាចធ្វើឲ្យយើងពេញចិត្តទាំងស្រុងនោះទេ។

ចំណែកឯរថភ្លើង Shinkansen យើងអាចឡើងរថភ្លើងទាន់ពេលវេលា សូម្បីតែនៅនាទីចុងក្រោយ​មុន​ពេលចេញដំណើរក៏ដោយ។

គុណសម្បត្តិមួយផ្សេងទៀតត្រង់ថាចំនួនរថភ្លើងធ្វើដំណើរ

ខ្សែរថភ្លើងល្បឿនលឿនដែលមានឈ្មោះថា Tokaido នៅកណ្តាល Tokyo និង Osaka ចេញដំណើរចន្លោះគ្នាត្រឹមប៉ុន្មាននាទីប៉ុណ្ណោះ។ ហើយរថភ្លើងស្ទើរតែមិនដែលយឺតយ៉ាវ ឬ​ពន្យារ​ពេល​ចេញដំណើរ​នោះទេ។ បើ​ប្រៀប​ទៅ​នឹង​យន្ត​ហោះ ចំណុចនេះជាគុណសម្បត្តិ​ដែល​យើង​អាច​មើល​ឃើញយ៉ាង​ច្បាស់។

កាប៊ីនរថភ្លើងលំដាប់ខ្ពស់នៃខ្សែរថភ្លើង Shinkansen Tokaido

បច្ចុប្បន្ននេះ នៅលើរថភ្លើងមានកៅអីចំនួន ៣ ប្រភេទ៖ កៅអីដែលមិនបាន​កក់​ទុក​មុន កៅអី​កក់​ទុក​មុន និង​កាប៊ីន​ពណ៌​បៃ​តង​ដែល​មានកៅអីធំទូលាយជាងបន្តិច។

បើសិនជាគ្រាន់តែប៉ុណ្ណឺង ខ្ញុំផ្ទាល់​មាន​អារម្មណ៍​ថា​មិនទាន់ពេញចិត្តប៉ុន្មានឡើយ។

ទោះជាយ៉ាងណា បើតាមព័ត៌មានដែលបានដឹង នៅឆ្នាំ ២០២៦ បន្ទប់ឯកជនសម្រាប់មនុស្សម្នាក់​ទៅ​ពីរនាក់ក៏នឹងដាក់ឲ្យដំណើរការផងដែរ សម្រាប់​បម្រើ​ដល់​អ្នក​ដំណើរ​ដែល​ចូលចិត្តភាព​ឯក​ជន។

មិនយូរប៉ុន្មាន កៅអី Premier (កៅអីថ្នាក់ដំបូង) នៃរថភ្លើងនេះត្រូវបានគេរំពឹងថា នឹងដាក់ឲ្យប្រើប្រាស់នៅឆ្នាំ ២០២៧ ។ ដោយត្រូវបានគេរំពឹងថានឹងផ្តល់ជូនមុខងារពិសេសប្រៀបដូចជាបន្ទប់​ឯកជន កៅអី​អង្គុយ​មាន​កន្លែង​ដាក់​ជើង និង​អាច​ប្រើ WiFi បាន។

ស្វែងយល់អំពីកាប៊ីនលំដាប់ខ្ពស់នៅលើរថភ្លើងល្បឿនលឿន – Gran Class

បច្ចុប្បន្ននេះ កាប៊ីនរថភ្លើងលំដាប់ខ្ពស់ត្រូវបានដាក់ឲ្យប្រើប្រាស់នៅលើខ្សែរថភ្លើង Shinkansen Tohoku និង Hokkaido ក៏ដូចជាខ្សែរថភ្លើង Shinkansen Joetsu និង Hokuriku ផងដែរ។

ថ្វីត្បិតតែ មិនទាន់មានបន្ទប់ឯកជន ប៉ុន្តែឥឡូវនេះត្រូវបានបំពាក់ដោយកៅអីដ៏ប្រណិតស្រដៀង​នឹង​កាប៊ីន​យន្ត​ហោះ​លំដាប់​ខ្ពស់។

សូមក្រឡេកមើលរូបភាពតំណាង យើងអាចមើលឃើញថា ក្នុងមួយជួរមានកៅអីចំនួន ៣ គឺមិន​មែន​មាន​កៅ​អី​ចំនួន ៥ ដូចកាប៊ីនធម្មតានោះទេ។ ដូច្នេះហើយ ជាការពិតណាស់ កន្លែងអង្គុយធំទូលាយ និង​មាន​ផាសុកភាព​ជាង​មុន។

ស្រដៀងគ្នាទៅនឹងថ្នាក់ធុរកិច្ចនៅលើយន្តហោះដែរ ថែមទាំងមានសេវាកម្មជាច្រើនផងដែរ។

ជាដំបូងអ្នកដំណើរនឹងមានកន្លែងសម្រាកបន្ធូរអារម្មណ៍មុនពេលចេញដំណើរ។

ប្រសិនបើអ្នកកក់យកកញ្ចប់ដែលរួមបញ្ចូលអាហារសម្រន់ អ្នកដំណើរអាចចំណាយពេលទទួល​ទាន​អាហារ ខណៈ​ពេល​ដែល​រថភ្លើង​ធ្វើ​ដំណើរ​ទៅ​កាន់​គោល​ដៅ។

ផ្លូវដែលឆ្ងាយ​បំផុត​អាច​នឹង​ចេញ​ដំណើរ​ពី​ស្ថានីយ៍ Tokyo ទៅ​កាន់​ស្ថានីយ៍ Sapporo នៅ Hokkaido ។ លឿន​បំផុត​ត្រូវ​ចំណាយ​ពេល​ប្រហែល ៤,៥ ម៉ោងទើប​ទៅ​ដល់​កន្លែង។

បើនិយាយពីតម្លៃ Gran Class នេះថ្លៃជាងកៅអីកក់ទុកមុនដល់ទៅ ២ ដង និងថ្លៃជាងដល់ទៅ ១,៥ ដងបើប្រៀបនឹងកាប៊ីនពណ៌បៃតង។ ទោះជាយ៉ាងណា ប្រសិនបើអាចសម្រាកបន្ធូរអារម្មណ៍នៅលើកៅអីធំទូលាយ អ្នកដំណើរនឹងមិនមានអារម្មណ៍នឿយហត់ពេលធ្វើដំណើរផ្លូវឆ្ងាយឡើយ ហើយមានថាមពលគ្រប់គ្រាន់ពេលទៅដល់កន្លែង ខ្ញុំយល់ថា ប្រាក់ដែលចំណាយសម្រាប់ប្រើប្រាស់សេវាកម្មនេះពិតជាសមណាស់។

ប្រសិនបើជិះយន្តហោះ អ្នកដំណើរនឹងចុះចតនៅ Sapporo ទីប្រជុំជន Hokkaido ។ ត្រង់ចំណុចនេះត្រូវចំណាយពេលចេញពីព្រលានយន្តហោះ ហើយធ្វើដំណើរទៅកាន់គោលដៅ។ ផ្ទុយទៅវិញ ប្រហែល​ជា​ការ​ធ្វើ​ដំណើរ​ដោយ​រថភ្លើងល្បឿន​លឿន​ជាមធ្យោបាយដែលល្អបំផុត ហើយផ្តល់ភាពងាយ​ស្រួល​សម្រាប់​ការ​ធ្វើ​ដំណើរ​ជុំវិញ​ប្រទេស​ជប៉ុន។

ប្រសិនបើអ្នកកំពុងតែមានគម្រោងទៅលេងជប៉ុន សូមសាកល្បងជិះរថភ្លើងល្បឿនលឿន និងទទួល​យក​សេវាកម្ម​ដ៏ទំនើប​នៅ​លើ​រថភ្លើង ដើម្បី​បន្ថែម​បទ​ពិសោធន៍​ដ៏អស្ចារ្យ​សម្រាប់​ខ្លួន។

Abe Kengo