“គ្មាន​សុភមង្គល​បើ​សិន​ជា​មិនមាន​ក្តីស្រមៃ” សម្រង់​ពាក្យ​សម្តី​របស់​លោក Shibusawa Eiichi ជា​បុគ្គល​ដ៏​អស្ចារ្យ​នៅ​លើ​ក្រដាស​ប្រាក់ ១ ម៉ឺន​យ៉េន

“គ្មានសុភមង្គលបើសិនជាមិនមានក្តីស្រមៃ”

សម្រង់ពាក្យសម្តី​របស់​លោក Shibusawa Eiichi ជា​បុគ្គល​ដ៏​អស្ចារ្យ​នៅ​លើ​ក្រដាស​ប្រាក់ ១ ម៉ឺន​យ៉េន។

អំឡុងពេលមួយឆ្នាំមកហើយចាប់តាំងពីពេលដែលក្រដាសប្រាក់ជប៉ុនថ្មីត្រូវបានដាក់ឲ្យប្រើប្រាស់ ហើយ​បច្ចុប្បន្ន​ឃើញ​ថា ក្រដាសប្រាក់នេះចរាចរណ៍គ្រប់ទីកន្លែងនៅទូទាំងប្រទេស។

ក្រដាសប្រាក់ទាំងបីប្រភេទខុសគ្នាសុទ្ធតែត្រូវបានផ្លាស់ប្តូរថ្មី ហើយក្រដាសប្រាក់នីមួយៗសុទ្ធតែមានរូបថតរបស់បុគ្គលដ៏ល្បី​ឈ្មោះ​នៅ​ជប៉ុន ប៉ុន្តែក្នុងអត្តបទថ្ងៃនេះខ្ញុំនឹងនិយាយអំពីលោក Shibusawa Eiichi ជារូបថតបុគ្គល​ដែល​ត្រូវ​បាន​បោះ​ពុម្ព​លើ​ក្រដាស​ប្រាក់​ធំ​បំផុត​គឺ ១ ម៉ឺនយ៉េន។

លោក Shibusawa និងសម្រង់ពាក្យសម្តីរបស់លោក

ក្នុងមួយជីវិតរបស់ខ្លួន លោក Shibusawa បានបន្សល់ទុកនូវសម្រង់ពាក្យសម្តីដ៏ល្បីជាច្រើន ខ្ញុំសូម​ដក​ស្រង់​សម្រង់​ពាក្យ​សម្តី​មួយ​ចំនួន​ក្នុង​ចំណោម​នោះ​ខាង​ក្រោម។

“ខណៈពេលដែលអ្នកគិតថាខ្លួនពេញចិត្តគឺជាពេលដែលអ្នកចាប់ផ្តើមចុះខ្សោយ។”

“គ្មានមហិច្ឆតាគឺជាឫសគល់នៃភាពខ្ជិលច្រអូស។”

“គ្មានក្តីស្រមៃគឺមិនមានឧត្តមគតិ។ គ្មានឧត្តមគតិគឺមិនមានជំនឿ។ គ្មាន​ជំនឿ​គឺ​មិន​មានផែនការ។ គ្មានផែនការគឺមិនមានសកម្មភាព។ គ្មានសកម្មភាពគឺមិនមានសមិទ្ធផល។ គ្មានសមិទ្ធផល​គឺ​មិន​មាន​សុភមង្គល។

អាចនិយាយបានថា ប្រសិនបើអ្នកចង់បានសុភមង្គល អ្នកត្រូវមានក្តីស្រមៃ” ។

សមិទ្ធិផលរបស់លោក Shibusawa

លោក Shibusawa កើតនៅឆ្នាំ ១៨៤០ ជាសម័យកាលដែលជប៉ុនកំពុងស្ថិតក្រោមការគ្រប់គ្រងរបស់​វណ្ណៈ​សាមូរ៉ៃ ហើយ​បានទទួលមរណភាពនៅអាយុ ៩១ ឆ្នាំ។

លោកត្រូវបានគេចាត់ទុកដូចជាបិតានៃវិស័យសេដ្ឋកិច្ចជប៉ុននាសម័យទំនើប លោកបានធ្វើឲ្យអាជីវកម្ម​ជា​ច្រើន​ក្លាយ​ទៅ​ជា​ការ​ពិត។

・បង្កើតរចនាសម្ព័ន្ធប្រព័ន្ធក្រុមហ៊ុនភាគហ៊ុន

បានបង្កើតក្រុមហ៊ុនចំនួន ៤៨០ ក្រុមហ៊ុន និងចូលរួមគ្រប់គ្រងជាង ៦០០ ក្រុមហ៊ុន។

លោកបានចូលរួមបង្កើត និងគ្រប់គ្រងក្រុមហ៊ុនធំៗដែលនៅតែដំណើរការរហូតមកដល់សព្វថ្ងៃ រួម​មាន​ក្រុម​ហ៊ុន​ធានា​រ៉ាប់​រង ក្រុម​ហ៊ុន​អគ្គិសនី ក្រុម​ហ៊ុន​ឧស្ម័ន និង​សារព័ត៌មាន។

・បង្កើតធនាគារដំបូងរបស់ជប៉ុន

លោកជាបុគ្គលដែលបានចាក់គ្រឹះសម្រាប់ធនាគារ Mizuho ដែលបច្ចុប្បន្នជាធនាគារមួយក្នុងចំណោមធនាគារធំរបស់ជប៉ុន។ ហើយ​នេះក៏​ជាធនាគារតែមួយគត់ដែលមាន​ការ​អនុញ្ញាត​លក់សន្លឹក​ឆ្នោត​ផង​ដែរ។

សមិទ្ធិផលដ៏អស្ចារ្យជាច្រើនរបស់លោក ពិបាកនឹងរាប់អស់ខ្លាំងណាស់ ដូច្នេះខ្ញុំសូមលើកឡើងពីចំណុច​មួយ​ចំនួន​ប៉ុណ្ណោះ។

ទស្សនៈអាជីវកម្មរបស់លោក Shibusawa

មិនត្រឹមតែផ្តោតលើហិរញ្ញវត្ថុប៉ុណ្ណោះទេ ទស្សនអាជីវកម្មរបស់លោកគឺរក្សាតុល្យភាពរវាងសីលធម៌ គោល​ការណ៍​ជា​មួយ​នឹង​តួលេខ។

បទដ្ឋានរបស់លោក Shibusawa គឺបន្តទស្សនៈដែលថា ប្រាក់ចំណេញត្រូវបានបង្កើតឡើងតាម​រយៈ​អាជីវកម្ម ដើម្បី​ក្រម​សីលធម៌ និង​ការ​រួម​ចំណែក​ដល់​សង្គម។

ប្រសិនបើមិនខ្វល់ពីក្រមសីលធម៌ និងការរួមចំណែកដល់សង្គម ទោះបីជារកបានប្រាក់ចំណេញខ្ពស់​នា​ពេល​នោះ​ក៏​ដោយ ក៏មិនបានយូរអង្វែងនោះដែរ។

លោកធ្លាប់និយាយថា បណ្តាអាជីវកម្ម​ជប៉ុន​សព្វ​ថ្ងៃ​នឹងធ្លាក់ក្នុងស្ថានភាពខាត​បង់។ តើអាជីវកម្ម​ទាំង​នេះ​នឹង​ទៅ​ជា​យ៉ាង​ណា?

តើមូលហេតុដែលបណ្តាលឲ្យកើតមានវិបត្តិសេដ្ឋកិច្ចអូសបន្លាយរយៈពេល ៣០ ឆ្នាំកន្លងមកនេះសុទ្ធ​តែ​ជាប់​ពាក់​ព័ន្ធ​ទៅ​នឹង​ទស្សនៈ​​សេដ្ឋកិច្ច​នេះ​មែន​ទេ?

បុគ្គលដ៏អស្ចារ្យដែលមនុស្សគ្រប់គ្នាគោរពស្រលាញ់

នៅថ្ងៃទី ១១ ខែវិច្ឆិកា ឆ្នាំ ១៩៣១ លោក Shibusawa Eiichi បានទទួលមរណភាពនៅអាយុ ៩១ ឆ្នាំ។

មនុស្ស​ជាង ៣ ម៉ឺននាក់​បាន​ទៅកាន់កន្លែងធ្វើពិធីបុណ្យសពរបស់លោក ដើម្បីបង្ហាញពីទឹកចិត្តសោកស្តាយរបស់ខ្លួន។

ដោយមិនត្រឹមតែរួមចំណែកយ៉ាងធំធេងក្នុងការធ្វើទំនើបកម្មជប៉ុនប៉ុណ្ណោះទេ លោកទទួលបាន​ការ​គោរព​ស្រលាញ់​ពី​មនុស្ស​ជា​ច្រើន​ព្រោះ​តែការប្រកាន់ភ្ជាប់ទស្សនៈ ដោយមិនបោះបង់ទស្សនៈ​សីលធម៌ និង​ការ​រួម​ចំណែក​ក្នុង​សង្គម។

សព្វថ្ងៃនេះ ក្នុងជីវិតប្រចាំថ្ងៃ និងជាពិសេសក្នុង​អាជីវកម្ម ទស្សនៈដែលថា “ប្រាក់​ចំណេញ​គឺសំខាន់​បំផុត” មិនត្រឹមតែរីកផ្សព្វផ្សាយនៅជប៉ុនប៉ុណ្ណោះទេ ថែម​ទាំង​ពេញ​និយមនៅបណ្តាប្រទេស​ជា​ច្រើន​ជុំវិញ​ពិភព​លោក។

ខ្ញុំដឹងថា ប្រាក់ចំណេញពិតជាសំខាន់ខ្លាំងណាស់។ ទោះ​ជា​យ៉ាង​ណា យើង​ក៏​មិន​អាច​រំលង​កត្តាដែល​នៅ​សល់​នោះ​ដែរ។

អ្នកទាំងអស់គ្នាធ្លាប់គិតទេថា ប្រសិនបើយើងរស់នៅក្នុងពិភពលោកដែលមនុស្ស​គ្រប់​គ្នា​ផ្តោតសំខាន់តែប្រាក់ កេរ្តិ៍ឈ្មោះ គ្មានសីលធម៌ គ្មាន​មនុស្ស​ធម៌ តើ​អាច​នឹង​មាន​សុភមង្គល​ដែរ​ទេ? ហើយ​ពិភព​លោក​បែប​នេះ​ស្ថិត​ស្ថេរ​បាន​យូរ​អង្វែង​ដែរ​ទេ?

មនុស្សដែលព្រោះតែប្រាក់រកសុីគ្មាន​សីលធម៌ តើលទ្ធផល​នឹងទៅជាយ៉ាងណា?

ឥឡូវនេះ រូបថតរបស់លោក Shibusawa ត្រូវបានបោះពុម្ពនៅលើក្រដាសប្រាក់ជប៉ុន ខ្ញុំគិតថា ដល់​ពេល​ដែល​យើង​គួរ​ពិចារណា​ទស្សនៈ​របស់​លោក​ឡើង​វិញ​ហើយ។

ពិតជាល្អខ្លាំងណាស់ ប្រសិន​បើ​យើង​ទាំង​អស់​គ្នា​គ្រប់​គ្រង​អាជីវកម្មរបស់​ខ្លួន​ដោយ​មិន​មើលរំលង​បញ្ហា​សីលធម៌ និង​ការ​រួម​ចំណែក​ដល់​សង្គម។

Abe Kengo