“ការប្រឹក្សាដោយឯកឯង” វិធីសាស្រ្តបង្កើនសមត្ថភាពសម្រាប់មនុស្សពេញវ័យ។

“ការប្រឹក្សាដោយឯកឯង” វិធីសាស្រ្តបង្កើនសមត្ថភាពសម្រាប់មនុស្សពេញវ័យ។

សូមគោរពប្រិយមិត្តទាំងអស់គ្នា ប្រសិនបើនិយាយពីខ្ញុំ ខ្ញុំផ្ទាល់ក៏កំពុងធ្វើជាអ្នកប្រឹក្សាម្នាក់ផង​ដែរ។

រហូតមកដល់ពេលនេះ ខ្ញុំធ្លាប់ធ្វើជាប្រឹក្សាសម្រាប់ក្រុមហ៊ុនជាច្រើនដូចជា HONDA, NTT, Kirin Beer, KAGOME… 

បើសិនជាសំណួរសួរថា ហេតុអ្វីបានជាមានមនុស្សជាច្រើនស្គាល់ខ្ញុំ ហើយខ្ញុំ​ទទួលបានការជឿទុក​ចិត្ត​ពី​សាជីវកម្មធំៗដោយធ្វើជាអ្នក​​ប្រឹក្សា​បែប​នេះ? ចំណុចនេះដោយសារតែនៅពេលដែលពួក​គេ​លើក​ឡើង​​ពី​​បញ្ហា ខ្ញុំ​អាច​រៀប​ចំគម្រោង​បាន​ភ្លាមៗ។

ខ្ញុំមិនមែនកំពុងតែសប្បាយចិត្ត ឬមានចេតនាអួតអាងថាខ្លួនមានភាពឆ្លាតវៃនោះទេ។ តាមពិតទៅ ខ្ញុំគ្រាន់តែចង់ចែករំលែកប្រាប់ប្រិយមិត្តអ្នកគាំទ្រដែលកំពុងអានអត្តបទនេះ នូវបទពិសោធន៍​ដែលមានប្រយោជន៍បំផុតក្នុងការងារ ដែលខ្ញុំបានសង្ខេបនាពេលកន្លងមក។

ប្រសិនបើទទួលយកបាននូវចំណុចសំខាន់ៗ ហើយអនុវត្តជាប្រចាំ ខ្ញុំជឿជាក់ថា អ្នកទាំងអស់គ្នានឹង​​ទទួល​បាន​ជោគជ័យ​ជា​ច្រើន​មិន​ថាក្នុងការ​ងារ និង​ជីវិត​ផ្ទាល់​ខ្លួន​នោះ​ទេ។

សង្ឃឹមថាប្រិយមិត្តនឹងតាមដានទាំងអស់គ្នា!

គន្លឹះក្នុងការប្រឹក្សាគឺចំណេះដឹង និងបទពិសោធន៍

ក្នុងការប្រឹក្សា ប្រសិនបើយើងធ្លាប់ជួបប្រទះស្ថានភាពស្រដៀងគ្នានេះពីមុន ហើយដាក់ចេញដំណោះ​ស្រាយ​​​បាន​លឿន​ជាង​មុន​ក៏​ជា​រឿង​ធម្មតា​ដែរ។

ចំណុចនេះបង្ហាញថាចំណេះដឹង និងបទពិសោធន៍ពិតជាសំខាន់ខ្លាំងណាស់។

យ៉ាងណាមិញ នៅពេលដែលយើងមិនមានចំណេះដឹង និងបទពិសោធន៍គ្រប់គ្រាន់ គ្មាននរណា​ជឿ​​ជាក់ ហើយ​ប្រគល់​ការ​ងារ​ឲ្យយើងនោះទេ។ មិនមានឳកាសទទួលបាននូវបទពិសោធន៍ជាក់ស្តែង តើធ្វើយ៉ាងណាមានបទ​ពិសោធន៏​អាច​សន្និដ្ឋាន​បាន?

ដូច្នេះមានតែវិធីមួយគត់គឺបណ្តុះបណ្តាលខ្លួនឯងដោយប្រើវិធីសាស្រ្ត “ការប្រឹក្សាដោយឯកឯង” ប៉ុណ្ណោះ។

ចូរយើងស្វែងយល់លម្អិតពីមូលហេតុ ហេតុអ្វីបានជាយើងឃើញថារបស់នោះគួរឲ្យចាប់អារម្មណ៍ ស្រស់ស្អាត ឬឆ្ងាញ់

ឧទាហរណ៍ដូចជានៅពេលដែលយើងមើលរឿងដែលគួរឲ្យចាប់អារម្មណ៍ ប្រសិនបើគ្រាន់តែសន្និដ្ឋាន​​ថា “រឿងនេះល្អមើលណាស់” តែប៉ុណ្ណឹង នោះយើងប្រាកដជាមិនអាច​ដក​យក​នូវ​​មេរៀន​អ្វី​​ឡើយ។

ចូរយើងសាកល្បងស្វែងយល់ ហេតុអ្វីបានជាយើងយល់ថារឿងល្អមើល។

មិនចាំបាច់ផ្តោតសំខាន់ថា ការវិភាគរបស់យើងត្រូវ ឬខុសនោះទេ ព្រោះនេះគ្រាន់តែជាលំហាត់ក្នុងការគិតពិចារណាប៉ុណ្ណោះ

ស្រដៀងនឹងម្ហូបឆ្ងាញ់មួយមុខដែរ សាកល្បងគិតមើល តើអ្វីទៅធ្វើឲ្យមុខម្ហូបមានរសជាតិឆ្ងាញ់។

ឬនៅពេលដែលជួបនារីស្រស់ស្អាតម្នាក់ ចូរយើងសាកល្បងវិភាគមើលថា តើចំណុចអ្វីដែលអ្នកយល់​​ថា​​នាង​​ស្អាត?

សូមធ្វើការសន្និដ្ឋានតាមរបៀបគិតរបស់អ្នក។

ការប្រឹក្សាដោយឯកឯងនៅភោជនីយដ្ឋាន

នៅពេលខ្លះយើងចេញទៅក្រៅទទួលទានអាហារ ប្រាកដជាមានហាងមួយចំនួនធ្វើឲ្យយើងមានអារម្មណ៍ថាមិនពេញចិត្ត ខ្ញុំជឿថាអាចនឹងមានករណីនេះ។ បើដូច្នេះមែន ចូរយើងឆ្ពោះទៅមុខមួយ​​ជំហាន​ទៀតដោយពិចារណាថា ប្រសិនបើជាអ្នក តើអ្នកនឹងកែលម្អហាងនេះយ៉ាងណា?

សូមគិតពិចារណាគ្រប់យ៉ាងនៅក្នុងចិត្ត មិនចាំបាច់ចែករំលែកគំនិតរបស់អ្នកប្រាប់មនុស្សនៅទីនោះ​ឡើយ។ ព្រោះគោលដៅនៃរឿងនេះគឺ ដើម្បីឲ្យយើងមានឳកាសគិតពិចារណាដោយខ្លួនឯង ប្រមូល​​ផ្តុំ​ចំណេះ​ដឹង​បន្ថែម និង​បទពិសោធន៍​។

សូមកុំគិតដូចជា “ខ្ញុំគ្មានបំណងបើកភោជនីយដ្ឋាននោះទេ” ព្រោះប្រហែលជាបច្ចុប្បន្នដូច្នេះ​មែន ប៉ុន្តែ​ចំណេះ​ដឹង និង​បទពិសោធន៍​នោះ​ប្រាកដ​ជានឹងមានប្រយោជន៍នៅ​ពេល​ណា​មួយ។

ចូរយើងសាក​ល្បង​ការ​ប្រឹក្សា​ដោយ​ឯក​ឯង​សម្រាប់​រឿងគ្រប់យ៉ាងដែល​នៅ​ជុំវិញ​ខ្លួន យើងនឹងមិន​បាត់​​បង់​​អ្វី​​ទាំង​​អស់​​សម្រាប់​រឿង​នេះ។

ចំណុចនេះក៏សំខាន់ណាស់ដែរក្នុងជីវិតផ្ទាល់ខ្លួន

ចំពោះប្តីប្រពន្ធដែលរៀបការហើយ ឬក្នុងដំណាក់កាលស្រលាញ់គ្នាមុនពេលរៀបការ នៅពេលខ្លះមានការខ្វែងគំនិត​ឈ្លោះប្រកែក​គ្នាក៏ជារឿងធម្មតាដែរ។ រហូតដល់ថ្នាក់មិនដឹងថា ម្នាក់នោះកំពុង​គិត​អ្វី​នោះ​ទេ។ យ៉ាងណាមិញ នេះជាចំណុចដែលសំខាន់។

សូមកុំបារម្ភ វិភាគលម្អិតអ្វីដែលបុគ្គលម្នាក់ទៀតកំពុងគិត។

និយាយឲ្យកាន់តែសាមញ្ញទៅ ជាដំបូងយើងត្រូវដាក់ខ្លួនក្នុងស្ថានភាពរបស់បុគ្គលនោះ ហើយពិចារណា ដូច្នេះ​ទើប​អ្នក​យល់​បាន​ខ្លះ​ថា ពួកគេកំពុងគិតអ្វី មានអារម្មណ៍យ៉ាងណា។

បន្ទាប់មក បើនិយាយពីអាកប្បកិរិយា ចូរយើងសាកល្បងដើរតួមនុស្សពីរនាក់ យើងដើរតួខ្លួន​ឯង និងបុគ្គលម្នាក់ទៀត ហើយស្រមៃមើលពីទិដ្ឋភាព ប្រសិន​បើ​យើង​និយាយ​អ្វី​ម្យ៉ាង បុគ្គលម្នាក់​នោះនឹងធ្វើយ៉ាងណា ហើយ​បើ​សិន​ជា​យើង​និយាយ​តាម​បែប​ផ្សេង តើ​នឹង​មាន​អ្វី​ប្រែប្រួល…?

ដូច្នេះអាចដកស្រង់នូវអាកប្បកិរិយាដែលត្រឹមត្រូវ ដើម្បីបញ្ចប់ការឈ្លោះប្រកែក ជួយឲ្យទំនាក់ទំនង​​កាន់​តែ​ប្រសើរ​ឡើង។

“គ្មាននរណាកើតមកសុទ្ធតែត្រូវគ្នាទាំងអស់នោះទេ អ្វី​ដែល​សំខាន់ត្រូវយល់ពីភាគីបន្តិចម្តងៗ លុប​បំបាត់​គម្លាត និង​កាន់​តែ​ខិត​ជិត​គ្នា។

ការឈ្លោះប្រកែកគ្នាច្រើនតែកើតចេញពីអារម្មណ៍មិនចុះ​សម្រុង។ នៅពេលដែលស្ងប់ចិត្ត យើងអាចនឹងមានអារម្មណ៍ថា​សោក​ស្តាយ​ព្រោះ​តែ​ពាក្យសម្តីដែលបាននិយាយ និងទង្វើដែលយើងបាន​ធ្វើក្នុងអំឡុងពេលដែលខឹង។ ដូច្នេះ​ត្រូវ​ចងចាំ​រឿង​មួយគឺ កុំសម្រេចចិត្តរឿងដែលសំខាន់ក្នុង​ពេល​ដែល​កំពុង​ខឹង។ 

សូមទុកពេលឲ្យខ្លួនឯង និងភាគីមានពេលវេលាស្ងប់ស្ងាត់ ដោយចោទសួរខ្លួនឯង ស្វែងរកចម្លើយ និង​ធ្វើ​ការ​សម្រេច​ចិត្ត​ត្រឹម​ត្រូវ នៅពេលអ្នកទាំងពីរបានស្ងប់ចិត្ត។”

និយាយនរណាក៏អាចនិយាយបានដែរ ប៉ុន្តែធ្វើបានឬអត់គឺជារឿងមួយផ្សេង។ ខ្ញុំផ្ទាល់ក៏កំពុងខិតខំប្រឹងប្រែងមួយ​ជំហាន​ម្តងៗ ធ្វើជារៀងរាល់ថ្ងៃដើម្បី​កែ​លម្អ​ខ្លួន​ឯង។

សង្ឃឹមថា ចំណុចទាំងនេះជាការចែករំលែកវិជ្ជមានដែលអាចរួមចំណែកជួយដល់ប្រិយមិត្តអ្នក​អាន​ទាំង​ក្នុង​ការ​ងារ និង​ជីវិត​នា​ពេល​ខាង​មុខ។

Abe Kengo