សាមូរ៉ៃ និងកំពូលអ្នកកម្ចាត់បិសាច

សាមូរ៉ៃ និងកំពូលអ្នកកម្ចាត់បិសាច។

សាមូរ៉ៃ – គឺជាឈ្មោះដែលផ្សារភ្ជាប់នឹងវប្បធម៌នៃប្រទេសជប៉ុន។

មនុស្សជាច្រើនធ្លាប់បានលឺអំពីសាមូរ៉ៃ អ្នកខ្លះថែម​ទាំង​ស្ងើច​សរសើរ​ចំពោះ​ភាព​អង់​អាចក្លាហាន​របស់​សាមូរ៉ៃ។ ប៉ុន្តែផ្ទុយទៅវិញ ប្រវត្តិនៃការបង្កើតសាមូរ៉ៃ​បែរ​ជា​មិន​ត្រូវ​បាន​ផ្សព្វ​ផ្សាយទូលំ​ទូលាយ។

តាមពិតទៅ ដើមឡើយពួកគេជាអ្នកប្រយុទ្ធនឹង​បិសាច សដៀងនឹងអ្វីដែលអ្នកទាំងអស់គ្នាបាន​មើល​ក្នុង​រឿង “ក្រុម​អ្នក​កម្ចាត់​បិសាច” (Kimetsu no Yaiba) ។

ចំណុចនេះត្រូវឬខុសនៅតែជាអាថ៌កំបាំង ប៉ុន្តែក្នុងខ្លឹមសារអត្តបទថ្ងៃនេះ យើងខ្ញុំនឹងណែនាំដល់ប្រិយមិត្តអ្នកអានទាំងអស់គ្នា ដោយ​និយាយពីការងារដ៏ចម្លែករបស់សាមូរ៉ៃដែលត្រូវបានកត់ត្រាក្នុង​ប្រវត្តិ​សាស្ត្រ​ផ្លូវ​ការ​របស់​ជប៉ុន។ ចូរ​យើង​តាម​ដាន​ទាំង​អស់​គ្នា។

ផ្ទៃដីដែលពោរពេញ​ទៅ​ដោយ​ការចងកំហឹង

ប្រហែលជានៅឆ្នាំ ៧០០ ដល់ ៨០០ ឆ្នាំក្រោយគ.ស ជប៉ុនត្រូវបានគ្រប់គ្រងដោយវណ្ណៈអភិជន។

ដើមឡើយ រាជធានីស្ថិតនៅខេត្ត Nara សព្វថ្ងៃ ក្រោយមក បាន​ផ្លាស់​ទៅ​កាន់​ទីក្រុង​ក្យូតូ។ នៅទីនោះ វណ្ណៈ​​អភិជន​រស់​នៅ​តាម​អំពើ​ចិត្ត​របស់​ខ្លួន ហើយ​លិច​លង់​ក្នុង​ភាព​ហ៊ឺហា។

ជា​ការ​ពិត​ណាស់ ចំណុចនេះបានបណ្តាលឲ្យប្រជាជនមាន​ការ​អាក់​អន់​ចិត្ត​យ៉ាងខ្លាំង។ ម្យ៉ាងវិញទៀត ថែមទាំងមានការច្រណែនជាច្រើន និង​ការ​ប្រយុទ្ធ​ដណ្តើម​អំណោច​រវាង​ត្រកូលគ្រួសារ ស្រដៀង​នឹង​រឿង “ដណ្តើម​អំណោច​របស់​រាជវង្ស” ដែល​អ្នក​ទាំងអស់គ្នាតែងតែមើល។

ហើយនៅរាជធានីជាកន្លែងដែលពោរពេញទៅដោយការចងកំហឹង “មានអ្វីម្យ៉ាង” ចាប់ផ្តើមបង្ហាញ​ខ្លួន និង​កាន់​តែ​ច្រើន​ឡើងៗ។

តើនោះជាអ្វី…

រាជធានីពោរពេញទៅដោយបិសាចកំណាច

នៅប្រទេសជប៉ុនគេជឿថា ការចងកំហឹងប្រមូលផ្តុំកាន់តែច្រើននឹងបង្កើត​ឲ្យ​ទៅ​ជា​បិសាច កន្លែង​ដែល​មាន​ការ​ចង​កំហឹង និង​ការ​ច្រណែន​នឹង​មាន​បិសាច​កាន់​តែ​ច្រើន។

គេតំណាលថា នៅរាជធានីក្យូតូ នៅពេលយប់មានខ្មោចស្រេកឃ្លានជាច្រើនដើរតែលតោលតាម​ដង​ផ្លូវ។

បាតុភូតនេះក្នុងភាសាជប៉ុនគេហៅថា “Hyakki Yagyo” – ពោលគឺ “ក្បួនដង្ហែររបស់បិសាច” ។

ហើយក៏មិនច្បាស់ថា នោះជាបិសាច ខ្មោចព្រាយ ឬគ្រាន់តែ​ជា​ប្រជាជន​ដែល​ស្រេក​ឃ្លាន​ពេករហូត​ដល់​ថ្នាក់​មើល​ទៅ​ពួក​គេ​លែង​ដូច​មនុស្ស​នោះ​ទេ។

ទោះជាយ៉ាងណា នោះជាសម័យកាលដែលច្របូកច្របល់ខ្លាំងណាស់។

Onmyoji (គ្រូកម្ចាត់បិសាច) ចាប់ផ្តើមបង្ហាញខ្លួន

ក្នុងស្ថានភាពនោះ បុគ្គលដែលគេហៅថាគ្រូកម្ចាត់បិសាច ក្នុងភាសាជប៉ុនហៅថា Onmyoji – បាន​បង្ហាញ​ខ្លួន ដែល​មាន​តួនាទី​ការ​ពារ​វណ្ណៈ​អភិជន។

ពួកគេប្រើមន្តអាគមសម្រាប់ដាក់បណ្តាសាអ្នកដទៃរហូតដល់ស្លាប់ កោះហៅបិសាចកំណាច ឬបង្កើត​របាំង​សម្រាប់​លាក់​ខ្លួន​ពី​សត្រូវ។

តើអ្នកទាំងអស់គ្នាធ្លាប់មើល ឬ​បានដឹងអំពីរឿង anime “Jujutsu Kaisen” នេះដែរទេ? គ្រូកម្ចាត់​បិសាច​ក្នុង​រឿង​គំនូរ​ជីវចល​នេះ​ស្រដៀង​ទៅ​នឹង​គ្រូកម្ចាត់​បិសាច​កាល​ពី​បុរាណ ជា​អាជីពដែល​ធ្លាប់​មាន​ពិត។

បន្ទាប់មកគឺការបង្ហាញខ្លួនរបស់សាមូរ៉ៃ

មិនដូចជាគ្រូកម្ចាត់បិសាចនោះទេ សាមូរ៉ៃប្រើកម្លាំងដាវដែលនៅលើដៃសម្រាប់កម្ចាត់សត្រូវ។

ហើយបើតាមតំណាលនិយាយតៗមក សត្រូវដំបូងដែលពួកគេត្រូវប្រឈមមុខគឺ​បិសាច។ នៅ​ពេល​​នោះ​តួនាទី​របស់​សាមូរ៉ៃ​គឺ​ត្រូវ​កម្ចាត់​បិសាច​ដែល​បង្ហាញ​ខ្លួន​ក្នុង​រាជធានី។

នៅទីបំផុត សម័យកាលរបស់វណ្ណៈ​អភិជនបានបញ្ចប់ក្នុងដៃរបស់សាមូរ៉ៃ។

ចំនួន​សាមូរ៉ៃ​ ជាបុគ្គលដែលមានកាយសម្បទា​រឹងមាំ និងបច្ចេកទេសប្រើដាវយ៉ាងជំនាញកាន់តែច្រើនឡើង។ ពួកគេបានផ្តួលរំលំរបបអភិជនបន្តិចម្តងៗ ដោយឈានទៅដល់សម័យកាល​សាមូរ៉ៃ។

ខ្ញុំជឿថា រឿងដែលខ្ញុំបានចែករំលែកគឺជាឧទាហរណ៍មួយដែលនិយាយពី មូលហេតុដែលយើងមិនគួរធ្វើរឿងដែលធ្វើឲ្យអ្នកដទៃចងកំហឹងឡើយ។ ព្រោះ​បើ​ទោះបីជាការចងគំនុំមិនក្លាយទៅជាបិសាច​ក៏​ដោយ ខ្ញុំ​ជឿ​ថា គ្មាន​នរណា​អាច​រស់​នៅ​ប្រកប​ដោយ​ភាព​រីក​រាយ ឬ​ទទួល​បាន​លទ្ធផល​ល្អ​​ទាំង​​ដែល​ខ្លួនធ្វើរឿងអាក្រក់ជាច្រើននោះទេ។

រឿងស្រដៀងគ្នានេះក៏បង្ហាញឲ្យឃើញតាមរយៈរឿង anime ដ៏ល្បីរបស់ One Piece ផងដែរ។ ប្រសិន​បើអ្នកទាំងអស់គ្នាធ្លាប់មើលរឿងគំនូរជីវចលនេះ ខ្ញុំជឿថា អ្នកនឹងយល់ ហើយមានគំនិតដោយ​ឡែក​របស់​ខ្លួន។

ក្នុងជីវិតជាក់ស្តែង សាមូរ៉ៃបានដណ្តើមអំណោចក្នុងដៃរបស់វណ្ណៈអភិជន ចុះក្នុងរឿង One Piece វិញ តើ​ដំណើរ​រឿង​នឹង​ទៅ​ជា​យ៉ាង​ណា? តើកងទ័ពជើងទឹកអាចនឹងបះបោរដែរទេ?

ពិតជាគួរឲ្យទន្ទឹងរង់ចាំណាស់!

Abe Kengo