មុខម្ហូបមួយចំនួនដែលប្រជាជនជប៉ុននិយមទទួលទានជាមួយនឹងបាយ

ថ្ងៃព្រហស្បតិ៍ 05/06/2025 | 17:32 ល្ងាច

មុខម្ហូបមួយចំនួនដែលប្រជាជនជប៉ុននិយមទទួលទានជាមួយនឹងបាយ។

ស្រដៀងនឹងប្រទេសកម្ពុជាដែរ អង្ករជាអាហារដែលសំខាន់នៅប្រទេសជប៉ុន។ សម្រាប់ប្រជាជនជប៉ុនភាគច្រើន បាយគឺជាមុខម្ហូបដែលមិនអាចខ្វះបានពេលបរិភោគអាហារប្រចាំថ្ងៃ។

អង្ករអាចយកទៅកែច្នៃធ្វើមុខម្ហូបជាច្រើន ប៉ុន្តែប្រជាជនជប៉ុនបែរជាចូលចិត្តបរិភោគបាយសជាង។ គេនិយាយថា ប្រជាជនជប៉ុនកាលពីបុរាណហូបបាយប្រហែល ១៤ ចានក្នុងមួយថ្ងៃ។

ហើយចាប់តាំងពីពេលនោះមក មុខម្ហូបសម្រាប់បរិភោគជាមួយនឹងបាយសចាប់ផ្តើមពេញនិយម។

មុខម្ហូបទាំងនេះមានលក្ខណៈសាមញ្ញណាស់ គ្រាន់តែដាក់ ឬរោយបន្តិចលើបាយក្តៅគឺអាចហូបបាយអស់ប៉ុន្មានចានយ៉ាងឆ្ងាញ់។ ហើយថែមទាំងអាចចាត់ទុកដូចជាអំណោយសម្រាប់ជូនសាច់ញាតិ មិត្តភ័ក្តិ បន្ទាប់ពីទៅដើរលេងនៅប្រទេសជប៉ុន។

Furikake – គ្រឿងផ្សំសម្រាប់រោយលើបាយ

Furikake ជាប្រភេទគ្រឿងផ្សំសម្រាប់រោយនៅលើបាយ។

ភាគច្រើនប្រភេទគ្រឿងផ្សំទាំងនេះសុទ្ធតែត្រូវបានសម្ងួត ដូច្នេះអាចរក្សាទុកនៅសីតុណ្ហភាពធម្មតា។ មិនត្រឹមតែប៉ុណ្ណឹង កញ្ចប់តូចល្មម ងាយស្រួលយកតាមពេលធ្វើដំណើរ ហើយអាចហូបបាននៅពេលដែលចាំបាច់។

ដំបូងឡើយ មានតែរសជាតិដើមដូចជាអំបិល ត្រី និងសារ៉ាយសមុទ្រប៉ុណ្ណោះ ប៉ុន្តែសព្វថ្ងៃនេះ គេផលិតរសជាតិថ្មីជាច្រើនដូចជា mentaiko ពងមាន់ សាច់អាំង។ល។

ដោយគ្រាន់តែរោយលើបាយ អ្នកអាចហូបបាយបានយ៉ាងឆ្ងាញ់។

Nori no tsukudani – សារ៉ាយសមុទ្រស្ងួត

សារ៉ាយសមុទ្រយកទៅប្រឡាក់ជាមួយទឹកស៊ីអុីវ ហើយដាំឲ្យពុះរហូតដល់ខាប់។

ប្រភេទអាហារនេះថែមទាំងអាចរក្សាទុកបានយូរផងដែរ។

ថ្វីត្បិតតែ មើលទៅពណ៌ខ្មៅគ្មានអ្វីទាក់ទាញទាល់តែសោះ ប៉ុន្តែនេះជាមុខម្ហូបមួយក្នុងចំណោមមុខម្ហូបដែលគេបរិភោគជាមួយបាយតាំងពីបុរាណកាលមក។ គុណវិបត្តិរបស់មុខម្ហូបនេះគឺថា ងាយនឹងជាប់ធ្មេញពេលបរិភោគ។

Taberu rayu – ប្រេងម្ទេសសម្រាប់បរិភោគ

ប្រេងម្ទេសជាប្រភេទប្រេងល្ង ដោយប្រើម្ទេស និងខ្ទឹមសសម្រាប់ធ្វើឲ្យមានក្លិនឈ្ងុយ។

ផលិតផលនេះត្រូវបានបង្កើតឡើងសម្រាប់បរិភោគជាមួយនឹងបាយ។

ខ្ទឹមស និងស្លឹកខ្ទឹមត្រូវបានលីងឲ្យមានក្លិនឈ្ងុយ ស្រួយក្នុងប្រេង រួមជាមួយនឹងរសជាតិហឹររបស់ម្ទេស ពិតជាស័ក្តិសមសម្រាប់បរិភោគជាមួយបាយខ្លាំងណាស់។

យ៉ាងណាមិញ ក្នុងមាត់អាចនឹងមានក្លិនខ្ទឹមស ដូច្នេះហើយ បន្ទាប់ពីបរិភោគសូមកុំភ្លេចដុសធ្មេញ ដើម្បីនាំមកនូវខ្សល់ដកដង្ហើមស្រស់ថ្លា។

Tamago kake gohan – បាយលាយស៊ុតឆៅ

មិត្តភ័ក្តិដែលមកពីបរទេសរបស់ខ្ញុំតែងតែបដិសេធមុខម្ហូបនេះ ព្រោះតែមិនធ្លាប់បរិភោគស៊ុតឆៅ។

គោះពងមាន់ឆៅមួយគ្រាប់ ហើយដាក់ក្នុងចានបាយ ឬយើងអាចហៅថា សាស៊ីមីស៊ុត។ ប្រជាជនជប៉ុនតែងតែដាក់ទឹកស៊ីអុីវបន្តិច និងបីចេងដើម្បីបង្កើតរសជាតិសម្រាប់មុខម្ហូប។

នៅប្រទេសជប៉ុនស៊ុតត្រូវបានត្រួតពិនិត្យអនាម័យយ៉ាងតឹងរ៉ឹង ដូច្នេះអាចបរិភោគស៊ុតឆៅបាន។ ប៉ុន្តែនៅប្រទេសមួយចំនួន ស៊ុតដែលដាក់លក់មិនទទួលបានការត្រួតពិនិត្យតឹងរ៉ឹងនោះទេ ដែលអាចបង្កគ្រោះថ្នាក់ដល់សុខភាព ដូច្នេះសូមប្រយ័ត្ននៅពេលដែលអ្នកទាំងអស់គ្នាបរិភោគស៊ុតឆៅ។

ក្រឡេកមកមើលមុខម្ហូបនេះ ភាគច្រើនគ្រប់គ្នាសុទ្ធតែមិនចង់ភ្លក់នោះទេ ប៉ុន្តែនៅពេលដែលបានភ្លក់ហើយ អ្នកអាចនឹងចូលចិត្តមុខម្ហូបនេះក៏ថាបាន។

Natto – សណ្តែកសៀងឡើងជូរ

ខ្ញុំជឿថា អ្នកទាំងអស់គ្នាប្រាកដជាធ្លាប់ឃើញមុខម្ហូបនេះ ប៉ុន្តែបែរជាមិនធ្លាប់ភ្លក់នោះទេ។

Natto គឺជាសណ្តែកសៀងដែលទុកឲ្យឡើងជូរ ងាយស្រួលរក្សាទុក និងបរិភោគ ថែមទាំងសម្បូរទៅដោយសារធាតុចិញ្ចឹម។

ដំបូងឡើយ មើលទៅមុខម្ហូបនេះប្លែកបន្តិច ប៉ុន្តែនៅពេលដែលធ្លាប់ហូបនឹងមានអារម្មណ៍ថាឆ្ងាញ់។ យ៉ាងណាមិញ natto មានក្លិនឆួលខ្លាំង និងស្អិត ដូច្នេះអ្នកដែលមិនធ្លាប់ហូបប្រាកដជាមានអារម្មណ៍ថាខ្ពើម។

Niku miso – សាច់គោឆាសៀង

យកសាច់គោទៅឆាជាមួយនឹងសៀងមីសូ អំបិល និងស្ករ។

ប្រសិនបើអ្នកទាំងអស់គ្នាបរិភោគអាហារមិនឆ្ងាញ់ ឬគ្មានសាច់ អ្នកទាំងអស់គ្នាអាចភ្លក់មុខម្ហូបនេះបាន។ នេះជាមុខម្ហូបដែលមានលក្ខណៈសាមញ្ញ ហើយថែមទាំងមានសាច់ផងដែរ។

ក្រៅពីអាចបរិភោគជាមួយបាយ សាច់នេះហូបជាមួយសាឡាត់ក៏ឆ្ងាញ់ណាស់ដែរ។

ក្នុងចំណោមមុខម្ហូបដែលខ្ញុំបានរៀបរាប់ខាងលើ តើមុខម្ហូបណាខ្លះដែលអ្នកទាំងអស់គ្នាធ្លាប់ហូប ឬចូលចិត្ត?

ទាំងនេះសុទ្ធតែជាមុខម្ហូបដែលអ្នកទាំងអស់គ្នាអាចរកបាននៅក្នុងផ្សារទំនើបជប៉ុន ថែមទាំងអាចទិញទុកធ្វើជាអំណោយសម្រាប់សាច់ញាតិ និងមិត្តភ័ក្តិផងដែរ។

ក្រៅពីនេះ មុខម្ហូបដូចជាសាច់គោឆាសៀង សារ៉ាយសមុទ្រស្ងួត ឬប្រេងម្ទេស អ្នកអាចធ្វើដោយខ្លួនឯងនៅប្រទេសកម្ពុជាបាន។

សព្វថ្ងៃនេះ ជីវិតកាន់តែមានភាពមមាញឹក ពេលខ្លះយើងគ្មានពេលសម្រាប់ធ្វើម្ហូប ឬមិនចង់ធ្វើម្ហូបដែលពិបាកៗ អ្នកទាំងអស់គ្នាអាចសាកល្បងធ្វើមុខម្ហូបទាំងនេះនៅថ្ងៃសម្រាក ឬចុងសប្តាហ៍។ ចម្អិនម្ហូបសាមញ្ញប៉ុន្មានមុខនេះទុកក្នុងទូទឹកកក ទុកសម្រាប់បរិភោគនៅពេលដែលមមាញឹក។

ប្រាកជាឆ្ងាញ់ និងមានភាពងាយស្រួលណាស់។

Abe Kengo