វត្តប្រាសាទដែលចម្លែកអនុញ្ញាតឲ្យភ្ញៀវយកប្រាក់ក្នុងប្រអប់បច្ច័យ

ថ្ងៃចន្ទ 19/05/2025 | 17:24 ល្ងាច

វត្តប្រាសាទដែលចម្លែកអនុញ្ញាតឲ្យភ្ញៀវយកប្រាក់ក្នុងប្រអប់បច្ច័យ។

នៅពេលដែលទៅដល់ប្រាសាទ និងទីសក្ការបូជានៅជប៉ុន យើងតែងតែមើលឃើញប្រអប់ដាក់ប្រាក់បរិច្ចាគ ឬហៅថាប្រអប់បច្ច័យ។

ភ្ញៀវដែលមកនឹងដាក់ប្រាក់ក្នុងប្រអប់នោះ រួមជាមួយនឹងបំណងប្រាថ្នា និងការបួងសួងរបស់ខ្លួន។

យើងតែងតែត្រូវបានបង្រៀនថា មិនត្រូវយកប្រាក់ក្នុងប្រអប់បច្ច័យដាច់ខាត ប្រសិនបើធ្វើដូច្នេះនឹងត្រូវទេវតាដាក់ទោស។

ប្រហែលមិនត្រឹមតែនៅប្រទេសជប៉ុនប៉ុណ្ណោះទេ សូម្បីតែប្រទេសផ្សេងទៀតនៅលើពិភពលោកក៏មានវប្បធម៌បែបនេះដែរ។

ទោះជាយ៉ាងណា នៅពេលដែលប្រាក់នៅចំពោះមុខ ហើយសន្តិសុខមានភាពធូររលុង ករណីលួចប្រាក់បរិច្ចាគកាន់តែច្រើនឡើង។

ប្រាសាទ និងទីសក្ការៈបូជាច្រើនតែស្ងាត់ណាស់នៅពេលយប់ ដែលធ្វើឲ្យករណីលួចកើតឡើងកាន់តែច្រើន។ យ៉ាងណាមិញ មិនអាចមានអ្នកនៅយាមជាប្រចាំនោះទេ។

ដូច្នេះហើយ មានប្រាសាទមួយបានគិតឃើញគំនិតដ៏គួរឲ្យចាប់អារម្មណ៍មួយដើម្បីដោះស្រាយបញ្ហានេះ។

ប្រាសាទអនុញ្ញាតឲ្យយកប្រាក់បច្ច័យទៅផ្ទះ

ប្រាសាទនេះមានទីតាំងស្ថិតនៅទីក្រុង Takarazuka ខេត្ត Hyogo ដែលប្រាសាទមានឈ្មោះថា Kiyokojin Seichoji (清荒神清澄寺) ។

ឈ្មោះប្រាសាទពិតជាពិបាកចាំណាស់មែនទេអ្នកទាំងអស់គ្នា?

នៅប្រាសាទនេះ ប្រាក់បច្ច័យត្រូវបានដាក់ក្នុងទ្រុងដែកមួយ យើងអាចប្រើឈើសម្រាប់ទាញប្រាក់មកជិត ហើយយកចេញ។

មានអារម្មណ៍ដូចជាល្បែងកម្សាន្ត ពិតជាគួរឲ្យចាប់អារម្មណ៍ណាស់មែនទេ?

ហើយប្រាក់ដែលយកបាន ពួកគេអាចយកទៅផ្ទះ។

ប៉ុន្តែកុំយកច្រើនពេក យកបានតែមួយកាក់ប៉ុណ្ណោះ។

ដូច្នេះហើយ គ្រប់គ្នាប្រាកដជាចង់យកប្រាក់ដែលមានតម្លៃខ្ពស់បំផុត។

យ៉ាងណាមិញ បើតាមបទប្បញ្ញត្តិផ្លូវការ ចំនួនទឹកប្រាក់នោះមិនមែនជាការ “ប្រទាន” ឡើយ ប៉ុន្តែត្រូវ “រក្សាទុក និងសងវិញ” ។

យើងមានសិទ្ធិរក្សាទុកប៉ុណ្ណោះ ប៉ុន្តែមិនអាចប្រើបាននោះទេ។

គេនិយាយថា ប្រសិនបើដាក់ប្រាក់កាក់នោះក្នុងកាបូប នោះលាភសំណាងទ្រព្យសម្បត្តិនឹងច្រើនឡើង។

ទោះជាយ៉ាងណា មានបទប្បញ្ញត្តិសំខាន់មួយទៀតនោះគឺ៖

“លើកក្រោយពេលត្រលប់មកវិញ ត្រូវសងប្រាក់ទ្វេជាពីរ” ។

ក្នុងអំឡុងពេលរក្សាទុកប្រាក់ ប្រាក់កាក់ដែលយកពីវត្តត្រូវដាក់ក្នុងកាបូប ដែលធ្វើឲ្យលាភសំណាងរបស់អ្នករក្សាទុកកាន់តែច្រើនឡើង។ ជាការអរគុណ យើងនឹងសងវត្តទ្វេជាពីរ។

ដូច្នេះហើយ អ្នកបន្ទាប់នឹងបន្តយកប្រាក់នោះទៅវិញ ហើយសងវិញទ្វេជាពីរ។

នេះជាប្រព័ន្ធមួយដែលអស្ចារ្យណាស់ ផ្សារភ្ជាប់សំណាងរវាងមនុស្សគ្រប់គ្នា។

“ដូច្នេះប្រសិនបើមិនត្រឡប់មកវិញទៀត តើអាចយកប្រាក់នោះបានទេ?”

ខ្ញុំគិតថា ប្រាកដជាមានអ្នកគិតដូច្នេះ។

ប៉ុន្តែគំនិតនោះរបស់អ្នក ទេវតាប្រាកដជាយល់យ៉ាងច្បាស់។

កុំសប្បាយចិត្តព្រោះតែទទួលបានប្រាក់បន្តិចបន្តួចបែបនេះ ការដែលទទួលបានលាភសំណាងមានប្រយោជន៍ជាងមែនទេ?

សូមបញ្ជាក់ផងដែរថា វត្ត ឬទីសក្ការបូជាផ្សេងទៀតមិនអនុវត្តប្រព័ន្ធនេះទេ ដូច្នេះប្រសិនបើអ្នកយកប្រាក់បច្ច័យដោយគ្មានការអនុញ្ញាត នឹងត្រូវចាត់ទុកជាការលួច។

ករណីលួចអាចនឹងមានទោសជាប់ពន្ធនាគាររហូតដល់ ១០ ឆ្នាំ ឬពិន័យជាប្រាក់រហូតដល់ ៥០០.០០០ យ៉េន។

ការដាក់ទណ្ឌកម្មធ្ងន់ធ្ងរកំពុងតែរង់ចាំយើងទាំងអស់គ្នា ដូច្នេះសូមកុំព្រោះតែភាពលោភលន់ ហើយលួចប្រាក់បច្ច័យឲ្យសោះ មិនថានៅទីណាក៏ដោយ។

Abe Kengo