តើ​នេះ​ជា​ជំងឺ​ដែល​កើត​នៅ​ជប៉ុន​ប៉ុណ្ណោះ​មែន​ទេ? និ​យាយ​ពី “ជំងឺ​ខែ​ឧសភា”

តើនេះ​ជា​ជំងឺ​ដែល​កើត​​នៅ​ជប៉ុន​​ប៉ុណ្ណោះ​មែន​ទេ? និយាយ​ពី “ជំងឺ​ខែ​ឧសភា” ។

តើអ្នកទាំងអស់គ្នាដឹងទេថា នៅប្រទេសជប៉ុនមានជំងឺមួយហៅថា “5 tsuki – byo” ពោលគឺ “ជំងឺខែឧសភា” ដែរទេ?

រោគ​សញ្ញារបស់ជំងឺកើតឡើងអំឡុងខែ​ឧសភា ឬ​មិថុនា នេះជាជំងឺដែលធ្វើឲ្យអ្នកកើតមានអារម្មណ៍មិនស្រួលខ្លួន និង​បាត់បង់​ស្មារតី។ អ្នកជំងឺ​នឹង​មិន​ចង់​ធ្វើ​អ្វី​ទាំងអស់ មិនថារៀនសូត្រ ឬក្នុង​ជីវិត​ប្រចាំ​ថ្ងៃ​នោះ​ទេ ខួរ​ក្បាលស្រពេច​ស្រពិល ភ្លេច​ភ្លាំង និង​មិន​ស្ងប់​អារម្មណ៍។ ជាង​នេះ​ទៅ​ទៀត រោគសញ្ញា​ដូច​ជា​ព្រួយ​បារម្ភ ពិបាកទ្រាំ គេងមិនលក់ បាត់បង់ចំណង់អាហារ ឈឺក្រពះ ចង្អោរ ឈឺក្បាល និងរឹងស្មាអាចនឹងកើតឡើង។ ដំបូងរោគ​សញ្ញា​មានលក្ខណៈ​​ស្រាល ប៉ុន្តែ​យូរៗ​ក្លាយ​ទៅ​ជា​ជំងឺ​ដ៏គួរឲ្យខ្លាចបំផ្លាញទាំងផ្លូវកាយ និងស្មារតីរបស់អ្នកជំងឺ។

ប្រហែលជាការរៀបរាប់របស់ខ្ញុំស្តាប់ទៅដូច​ជា​ភាពយន្ត​ភ័យ​រន្ធត់។ យ៉ាងណាមិញ អ្នកទាំងអស់គ្នាមិនចាំបាច់បារម្ភពេកទេ យើងនឹងមិនជួបប្រទះអំឡុងពេលធ្វើដំណើរកម្សាន្តឡើយ។ ទោះជាយ៉ាងណា ប្រសិនបើរស់នៅជប៉ុនយូរឆ្នាំ អ្នកអាចនឹងកើតជំងឺខែឧសភានេះ។

“ជំងឺខែឧសភា” ជារបៀបហៅដែលពេញនិយមនៅជប៉ុន អាចនិយាយបានថា នេះជារបៀបហៅរបស់ប្រជាជន ហើយមិនមែនជាឈ្មោះជំងឺផ្លូវការនោះទេ។

ធាតុពិតទៅបញ្ហានេះត្រូវបានគេហៅថាភាពមិនប្រក្រតី។

នៅប្រទេសជប៉ុន ឆ្នាំសារពើពន្ធថ្មីចាប់ផ្តើមនៅខែមេសា ប៉ុន្តែមនុស្សមួយចំនួនមិនអាចសម្របខ្លួនទៅនឹងបរិយាកាសថ្មីបាន ហើយហត់នឿយក្រោយរយៈពេលខំប្រឹងពីរទៅបីខែ។

ប្រហែលជាបញ្ហាមកពីការខិតខំប្រឹងប្រែងហួសកម្លាំង។

ខ្ញុំបានព្យាយាមស្វែងយល់ថា តើជំងឺខែឧសភានេះមាននៅប្រទេសដទៃទៀតដែរទេ?

ថ្វីត្បិតតែ របៀបហៅមានភាពខុសគ្នា ប៉ុន្តែប្រហែលជាជំងឺនេះក៏មាននៅប្រទេសផ្សេងទៀតផងដែរ។

ជាទូទៅ នៅប្រទេសកូរ៉េកើតឡើងក្នុងខែមីនា។

នៅប្រទេសកូរ៉េ ឆ្នាំសារពើពន្ធថ្មីចាប់ផ្តើមនៅខែមីនា ហើយល្បឿនរីលរាលរបស់ជំងឺហាក់បីដូចជាលឿនណាស់។

នៅសហរដ្ឋអាមេរិក អាឡឺម៉ង់ និងប្រេស៊ីលគឺស្ថិតក្នុងខែមករា។

ក្នុងប្រទេសទាំងនេះ ឆ្នាំសារពើពន្ធចាប់ផ្តើមនៅខែមករា ដូច្នេះរយៈពេលផ្ទុះជំងឺក៏លឿនជាងបើប្រៀបទៅនឹងជប៉ុនដែរ។

ប្រហែលជាប្រជាជនជប៉ុននឹងមានរោគសញ្ញាធ្ងន់ជាង ព្រោះតែពួកគេទ្រាំរយៈពេលយូរ។

ចុះនៅប្រទេសកម្ពុជាយ៉ាងម៉េចវិញ?

ប្រសិនបើ​មិន​ព្យាបាល ជំងឺខែឧសភាអាចបណ្តាលឲ្យកើតមានជំងឺ​ធ្លាក់​ទឹកចិត្ត ដូច្នេះសូមកុំមើលស្រាល និងលេង​សើច​ឲ្យ​សោះ។

ប្រសិនបើយើងជួបប្រទះរោគសញ្ញាស្រដៀងគ្នានេះរយៈពេលពីរបីខែ អ្នកទាំងអស់គ្នាអាចសាកល្បងវិធីសាស្រ្តខាងក្រោមនេះបាន។

យើងក៏ត្រូវការជំនួយពីមនុស្សនៅជុំវិញផងដែរ។

១. ជាដំបូង រៀបចំវិស្សមកាលសម្រាប់ខ្លួន និងធ្វើឲ្យរាងកាយមានសុខភាពឡើងវិញ។

ដោយសារតែយើងមិនទាន់អាចសម្របខ្លួនទៅនឹងបរិយាកាសថ្មី ដូច្នេះយល់ល្អយើងគួរតែសម្រាក ហើយព្យាយាមត្រលប់ទៅរកបរិយាកាសចាស់ឡើងវិញ។

ទៅ​លេង​ និងជួបជុំមិត្តភក្តិ ​មិត្ត​រួម​ការងារចាស់ក៏ល្អណាស់ដែរ។

២. បង្កើនឱកាសទំនាក់ទំនងជាមួយនឹងមនុស្សនៅជុំវិញ

តាមរយៈការបង្កើតឱកាសជជែកគ្នាជាមួយមិត្តរួមការងារ ឬមិត្តភ័ក្តិ យើងអាចសម្របខ្លួននឹងបរិយាកាសថ្មី។

ប្រសិនបើគិតឲ្យសាមញ្ញទៅ ជំងឺខែឧសភានេះ គឺជាពេលដែលយើងបន្តធ្វើការដោយមិនសម្របខ្លួនទៅនឹងបរិយាកាសថ្មី ធ្វើឲ្យស្មារតីកាន់តែនឿយហត់។

អាទិភាពចម្បងគឺស្គាល់មនុស្សនៅជុំវិញ ដូច្នេះអ្វីដែលសំខាន់គឺជជែកគ្នាជាមួយអ្នកទាំងអស់គ្នា ទោះ​បី​ជា​ឃើញ​ថាខ្លួន​កំពុង​តែ​មាន​ភាព​ឯកោ​ក៏​ដោយ ត្រូវមានភាពជឿទុកចិត្តដើម្បីចាប់ផ្តើមការសន្ទនា។

ចូរយើងធ្វើការ និងរៀនសូត្រដោយភាពរីករាយទាំងអស់គ្នា សូមកុំចុះចាញ់ជំងឺដ៏អាថ៌កំបាំងនេះ។

Abe Kengo