នៅជប៉ុនតើការប្រជ្រៀតជួរអាចចាត់ទុកជាសកម្មភាពល្មើសច្បាប់ដែរទេ?

ថ្ងៃពុធ 23/04/2025 | 17:32 ល្ងាច

នៅប្រទេសជប៉ុន ការតម្រង់ជួរ និងរង់ចាំដល់វេនរបស់ខ្លួនប្រៀបដូចជារឿងធម្មតានៅគ្រប់ទីកន្លែង។

យ៉ាងណាមិញ សព្វថ្ងៃនេះ បើទោះបីជាគេនិយាយថា ការប្រជ្រៀតជួរជាទម្លាប់របស់មនុស្សមួយចំនួន ប៉ុន្តែអ្នកទាំងអស់គ្នាដឹងទេថា ជាក់ស្តែងមនុស្សជាច្រើន រួមទាំងប្រជាជនជប៉ុនមិនដឹងថា ការប្រជ្រៀតជួរបែបនេះត្រូវបានចាត់ទុកជាទង្វើខុសឆ្គងនៅជប៉ុន។

ប្រសិនបើអ្នកទាំងអស់គ្នាទៅលេងជប៉ុន សូមប្រយ័ត្នប្រយែងចំពោះចំណុចនេះ ព្រោះពេលខ្លះចំណុចនេះមិនត្រឹមតែជាសុជីវធម៌នៅទីសាធារណៈប៉ុណ្ណោះទេ ថែមទាំងលើសពីនឹងទៅទៀត។

នៅប្រទេសជប៉ុន ការប្រជ្រៀតជួរគឺជាសកម្មភាពខុសឆ្គងកម្រិតស្រាល។

មាត្រា ០១ កថាខ័ណ្ឌ ១៣ ច្បាប់និយាយពីទោសកម្រិតស្រាលមានខ្លឹមសារដូចខាងក្រោម៖

បុគ្គលដែលបង្កបញ្ហាដល់មនុស្សជាច្រើននៅទីសាធារណៈក្រោមទម្រង់សកម្មភាពគំរោះគំរើយខ្លាំង ឬរំខានដល់សណ្តាប់ធ្នាប់សាធារណៈដោយពាក្យសម្តី និងសកម្មភាពហឹង្សា; ប្រជ្រៀតជួរ ឬធ្វើឲ្យបាត់បង់សណ្តាប់ធ្នាប់ក្រុមមនុស្សកំពុងរង់ចាំរថភ្លើង ឡានក្រុង នាវា ឬមធ្យោបាយដឹកជញ្ជូនសាធារណៈផ្សេងទៀត; ជួរមនុស្សរង់ចាំមើលល្ខោន ឬព្រឹត្តិការណ៍ផ្សេងៗ; ជួរមនុស្សឈររង់ចាំទទួលរបស់របរ មនុស្សម្នាឈរតម្រង់ជួរទិញសំបុត្រ; ជួរមនុស្សរង់ចាំទទួលប្រភេទសំបុត្រផ្សេងៗ។

ដើម្បីឲ្យកាន់តែយល់ច្បាស់ ខ្ញុំសូមសង្ខេបខ្លឹមសារដូចខាងក្រោម៖

អ្នកដែលប្រជ្រៀតជួរក្នុងពេលឡើងជិះមធ្យោបាយដឹកជញ្ជូនដូចជា រថភ្លើង ឡានក្រុង នាវា; នៅពេលដែលទៅមើលល្ខោន ឬព្រឹត្តិការណ៍ស្រដៀងគ្នា; នៅពេលទិញ ឬទទួលទំនិញសុទ្ធតែកំពុងប្រព្រឹត្តបទល្មើសកម្រិតស្រាល។

ប្រសិនបើត្រូវប៉ូលីសប្រទះឃើញសកម្មភាពនេះ ជនល្មើសនឹងត្រូវឃុំខ្លួនពី ០១ ដល់ ៣០ ថ្ងៃ ឬពិន័យជាប្រាក់ពី ១.០០០ ទៅ ១០.០០០ យ៉េន។

ថ្វីត្បិតតែ ការផាកពិន័យនេះមានកម្រិតស្រាល ប៉ុន្តែប្រសិនបើមិនបំពាន ដើម្បីកុំឲ្យត្រូវផាកពិន័យល្អជាងមែនទេ?

ទោះជាយ៉ាងណា នៅតែមានចំណុចចម្លែកក្នុងមាត្រនេះ។

ច្បាប់នេះកំណត់យ៉ាងច្បាស់ចំពោះមធ្យោបាយដឹកជញ្ជូនសាធារណៈ ព្រឹត្តិការណ៍ដូចជាមើលល្ខោន ការចែកចាយទំនិញ ដូច្នេះចំពោះករណីដែលមិនស្ថិតក្នុងច្បាប់នេះសុទ្ធតែមិនអាចចាត់ទុកជាបទល្មើសឡើយ។

ឧទាហរណ៍សកម្មភាពប្រជ្រៀតជួរពេលឈរតម្រង់ជួរនៅភោជនីយដ្ឋាន អាហារដ្ឋានមិនមែនជាសកម្មភាពខុសច្បាប់នោះទេ។

យ៉ាងណាមិញ ប្រសិនបើប្រព្រឹត្តសកម្មភាពខ្វះការគួរសមបែបនេះ ប្រាកដជាទទួលកំហឹងពីមនុស្សនៅជុំវិញជាមិនខាន ក្នុងពេលឈ្លោះប្រកែកគ្នា គេតែងតែជេរប្រមាថគ្នាទៅវិញទៅមក ហើយនៅពេលនោះ ពួកគេអាចនឹងប្រព្រឹត្តិបទល្មើសផ្សេងទៀត និងបង្កឲ្យមានផលវិបាកដែលមិនអាចដឹងមុន។ ដូច្នេះហើយ សរុបសេចក្តីទៅការប្រជ្រៀតជួរគឺជាសកម្មភាពដែលមិនគួរនោះទេ។

ប្រសិនបើអ្នកទាំងអស់គ្នាកំពុងគិតថា ការប្រជ្រៀតជួរជាសកម្មភាពមិនគួរសម ហើយមិនស្របនឹងក្រមសីលធម៌នៅជប៉ុន មិនពាក់ព័ន្ធនឹងជនបរទេស ដូច្នេះនេះជាចំណុចសំខាន់គួរកត់សម្គាល់។

នៅពេលដែលនិយយាថា មិនគួរធ្វើរឿងអ្វីមួយ មូលហេតុមិនមែនដោយសារតែត្រូវចាប់ខ្លួននោះទេ ប៉ុន្តែដោយសារតែយើងមិនធ្វើរឿងដែលធ្វើឲ្យអ្នកដទៃមានអារម្មណ៍មិនស្រួល នេះជាគោលការណ៍មូលដ្ឋាននៅជប៉ុន។

អត្តសញ្ញាណរបស់ប្រជាជនជប៉ុនត្រូវបានគេមើលឃើញតាមរយៈទង្វើដែលពួកគេប្រកាន់ខ្ជាប់ច្បាប់ និងក្រមសីលធម៌។

ខ្ញុំពិតជាមានអំណរណាស់ ប្រសិនបើអ្នកទាំងអស់គ្នាមានទស្សនៈវិជ្ជមាន ហើយយល់អំពីចំណុចនេះ។

Abe Kengo