ការដាក់ទារុណកម្មនៅជប៉ុនកាលពីសម័យបុរាណ

ការដាក់ទារុណកម្មនៅជប៉ុនកាលពីសម័យបុរាណ។

សព្វថ្ងៃនេះ ប្រសិនបើប្រព្រឹត្តបទល្មើសនឹងត្រូវប៉ូលីសចាប់ខ្លួន កាលពីសម័យបុរាណ គេប្រើការដាក់ទារុណ​កម្មដើម្បី​ផ្តន្ទា​ទោស​អ្នក​​​ប្រព្រឹត្ត​​កំហុសដែលមិនមាន​កម្រិត​ធ្ងន់​ធ្ងរ​ពេក។ ហើយ​ប្រហែល​ជា​ការ​អនុវត្ត​ទារុណកម្ម​ក៏​ឃើញ​​ច្រើន​នៅ​តាម​បណ្តា​ប្រទេស​ជុំវិញ​ពិភព​លោក​ផង​ដែរ។

ក្នុងអត្តបទនេះ ខ្ញុំនឹងណែនាំដល់អ្នកទាំងអស់គ្នាអំពីការរដាក់ទណ្ឌកម្មមួយចំនួននៅជប៉ុនកាលពីសម័យបុរាណ ដែល​​ស្តាប់​​ទៅ​គួរ​ឲ្យ​អស់​សំណើច ប៉ុន្តែក៏ឈឺចាប់ណាស់ដែរ។

នៅសម័យ Edo ដោយស្ថិតក្រោមការគ្រប់គ្រងរបស់វណ្ណៈសាមូរ៉ៃ។

នៅទីក្រុង Edo នាសម័យនោះ (សព្វថ្ងៃគឺទីក្រុងតូក្យូ) មានតំបន់កម្សាន្តនាពេលរាត្រីមួយកន្លែងដែលមានឈ្មោះ​ថា Yoshikawa ។ បើ​តាម​ឈ្មោះ​តំបន់​សព្វ​ថ្ងៃ នេះ​ជា​កន្លែង​តូច​មួយ​​ដែល​​ស្ថិត​​នៅ​​ចន្លោះ Ueno និង Asakusa ។

មានមនុស្សស្រីជាច្រើនធ្វើការនៅទីនេះ ហើយកន្លែងនេះក៏ជាទីក្រុងដែលមានបុរសជាច្រើនមកដើម្បីជួបមនុស្សស្រីទាំងនោះផងដែរ។ ហើយនេះក៏ជាទីក្រុងដែលមានស្រ្តីពេស្យា (បើតាមរបៀបហៅរបស់ជប៉ុនគឺ Oiran) ធ្លាប់​​រស់​នៅ។ 

ទីក្រុង​នេះ​មាន​ច្បាប់ដោយឡែក ហើយអ្នកដែលបំពាននឹងត្រូវទទួលទណ្ឌកម្ម។ ក្នុងនោះទណ្ឌកម្មមួយចំនួនមានដូច​ខាង​ក្រោម៖

ទណ្ឌកម្ម “Okefuse”

ចំពោះករណីដែលបុរសៗបន្ទាប់ពីសប្បាយជាមួយនឹងស្រ្តីនៅទីនោះហើយបែរជាមិនព្រមបង់ប្រាក់។ ជាការពិតណាស់ គ្រប់​គ្នា​នឹង​ដេញ​តាម​បុរស​រូប​នោះ បើ​ទោះបីជាត្រូវឆែកឆេរទីក្រុងទាំងមូលដើម្បីចាប់ជនដែលមិនព្រម​បង់​ប្រាក់​ក៏​ដោយ។ នៅពេលដែលចាប់បានជនដែល​មិន​ព្រម​បង់​ប្រាក់ គេ​នឹង​ដាក់ទារុណ​កម្ម​​ដែល​​ហៅ​​ថា Okefuse ។

Okefuse គឺជាការដាក់​ទណ្ឌកម្ម ដែលបុគ្គលទទួលទារុណកម្មត្រូវឃុំពីក្បាលដល់ចុងជើងក្នុងធុងមួយ គ្មានកន្លែងដែលអាចចេញបាន​នោះ​ទេ ហើយត្រូវបោះចេញនៅតាមផ្លូវ។ ធុងនេះមានរន្ធតែមួយប៉ុណ្ណោះ ដើម្បីឲ្យអ្នកនៅខាងក្នុង​អាច​លេច​មុខ​ចេញ​ដក​ដង្ហើម ហើយ​នៅ​ពេល​នោះ​អ្នក​ដំណើរ​ដើរ​ទៅ​មក​នឹង​សើច​ចំអក​និយាយ​ថា៖

“ត្រូវហើយ នៅខាងក្នុងគឺជាជនដែលមិនព្រមសងប្រាក់” ។

នេះ​ជា​ការដាក់ទណ្ឌកម្ម​ដ៏​គួរ​ឲ្យ​អាម៉ាស់។

ទោះបីជាមិនទុកឲ្យអត់ឃ្លាន ប៉ុន្តែបញ្ហាបត់ជើងតូច និងការបន្ទោរបង់ត្រូវធ្វើឡើងនៅក្នុងធុង។

ពិតជាគួរឲ្យអាម៉ាស់ខ្លាំងណាស់។

ជនដែលមិនព្រមសងប្រាក់ទាំងនេះត្រូវទ្រាំនៅក្នុងធុងដែលមានក្លិនស្អុយនោះ​រហូត​ដល់​មាន​នរណា​ម្នាក់​ដែល​ពួក​គេ​​ស្គាល់​យក​ប្រាក់​មក​លោះ​ពួក​គេ​ទើប​ត្រូវ​បាន​ដោះ​លែង។

ម៉្យាងវិញទៀត ការដាក់ទណ្ឌកម្មចំពោះស្ត្រីពេស្យាដែលព្យាយាមរត់គេចខ្លួនក៏មានលក្ខណៈពិសេសផងដែរ។

សម្រាប់តៀមស្រាទាំងនេះ មនុស្សស្រីគឺជាវត្ថុដែលមានតម្លៃ ដូច្នេះមិនអាចមានបញ្ហាអ្វីឡើយ។

ការធ្វើទារុណកម្មដោយផ្សែង “Ibushi Seme”

អ្នកដែលទទួលទណ្ឌកម្មនេះត្រូវចងដៃ និងជើងរបស់ពួកគេ ដើម្បីកុំឲ្យពួកគេអាចធ្វើចលនាបាន បន្ទាប់មកធ្វើទារុណកម្មតាមរយៈការដុតផ្សែង។

ផ្សែងមិនត្រឹមតែបានមកពីការដុតអុសប៉ុណ្ណោះទេ គេថែមទាំងដុតម្ទេសដើម្បីបង្កើនកម្រិតហឹរផងដែរ។

ដូច្នេះហើយ ភ្នែក និងច្រមុះនឹងឆួលយ៉ាងខ្លាំង។ ដែលត្រូវបានចាត់ទុកជាទារុណកម្មដែលពិបាកទ្រាំបំផុត។

ការដាក់ទណ្ឌកម្ម “Kusuguri Seme”

“Kusuguri” មាន​ន័យ​ថា “ចាក់ក្រឡេក” ដូចទៅនឹងឈ្មោះរបស់វា នេះជាការដាក់ទារុណកម្មដែល​អ្នក​ទទួល​ទណ្ឌកម្ម​ត្រូវទ្រាំ​នឹង​ការ​ចាក់​ក្រឡេក។

ស្ត្រី​ដែល​បំពាន​ច្បាប់ត្រូវចាប់ចងក្រោមស្ថានភាពអាក្រាត​កាយ និងត្រូវចាក់ក្រឡេកដោយ​របស់​​​​ដូច​ជាជក់ ឬ​រោមសត្វ​​ជា​ដើម។

ស្តាប់ទៅដូចជាស្រាលណាស់ ប៉ុន្តែអារម្មណ៍ត្រូវចាក់ក្រឡេកទាំងនេះមិនស្រួលនោះទេ ពី​ព្រោះ​ការអស់សំណើចដែលមិន​អាច​គ្រប់​គ្រង​បាន​គឺ​មិន​ស្រួល​ឡើយ ហើយ​ថែម​ទាំង​អាច​បណ្តាល​ឲ្យ​ពិបាកដកដង្ហើម​ទៀត​ផង។ សើច​រហូតដល់​បាត់​បង់​ស្មារតី ពួក​គេ​នឹង​ត្រូវ​ជះ​ទឹក​ឲ្យ​ស្វាង​ឡើង​វិញ និង​បន្ត​ទទួល​ទារុណកម្ម។ ទណ្ឌកម្ម​បែប​នេះ​ត្រូវ​បាន​ធ្វើឡើង​​វិញ​ម្តង​ហើយ​ម្តង​ទៀត។

អ្នកទាំងអស់គ្នាសាក​ស្រមៃ​មើលទិដ្ឋភាពរបស់ពួកគេមើលទៅ។ ខ្ញុំយល់ថា នេះ​ជា​ទារុណកម្ម​ដែល​ពិបាក​ទ្រាំ​យ៉ាងខ្លាំង។

ហើយសំឡេងសើចដូចជាឆ្កួត និងទឹកភ្នែកហូរប្រៀបដូចជាក្នុងខ្សែភាពយន្តភ័យរន្ធត់។

ការដាក់ទារុណកម្មនេះហាក់បីដូចជាល្ងីល្ងើ ប៉ុន្តែបែរជាបង្កការឈឺចាប់ដល់អ្នកទទួលទារុណកម្ម ដូច្នេះសូមកុំធ្វើតាម​ឲ្យ​សោះ​មិន​ថា​ក្រោម​ទម្រង់​អ្វី​ក៏​ដោយ។

Abe Kengo