សកម្មភាព​ចម្លែក​ខុស​គេ​របស់​សាមូរ៉ៃ​ជប៉ុន​​មួយចំនួនបាន​បង្ក​ឲ្យ​មាន​ភាពអាម៉ាស់​

សកម្មភាព​ចម្លែក​ខុស​គេ​របស់​សាមូរ៉ៃ​ជប៉ុន​​​មួយ​ចំនួន​បាន​​បង្ក​​ឲ្យ​​មាន​​ភាព​​អាម៉ាស់។

សាមូរ៉ៃគឺជាក្រុមមនុស្សដែលធ្លាប់គ្រប់គ្រងប្រទេសជប៉ុន។

នៅតំបន់នីមួយៗមានស្តេចក្រាញ់ម្នាក់ដែលជាកំពូលសាមូរ៉ៃ ពួកគេប្រយុទ្ធ ឬ​បង្កើត​សម្ព័ន្ធ​ភាព​ជា​មួយ​នឹង​តំបន់ជិត​​ខាង។

ថ្វីត្បិតតែ ពួកគេជាអ្នកតំណាងដ៏អស្ចារ្យរបស់ជប៉ុន ប៉ុន្តែពួកគេក៏ជាមនុស្សធម្មតាម្នាក់ដែរ ដូច្នេះអាចបង្កឲ្យមាន​រឿង​ជា​ច្រើន។

ចូរយើងក្រឡេកមកមើលសកម្មភាពដែលអាម៉ាស់មួយចំនួនរបស់ពួកគេតាមរយៈអត្តបទខាងក្រោម។

Tokugawa Ieyasu

បុរសម្នាក់ដែលទទួលបានជោគជ័យយ៉ាងខ្លាំង ជាបុគ្គលដែលគ្រប់គ្រងប្រទេសជប៉ុនទាំងមូល និងបានបង្កើត​យុគសម័យ​សន្តិភាព​អស់​រយៈ​ពេល ២៦០ ឆ្នាំ។

ទោះជាយ៉ាងណា លោកធ្លាប់ហូបរបស់គេដោយមិនបាន​សង​ប្រាក់ ហើយត្រូវចាប់ខ្លួន។

រឿងនេះកើតឡើងកាលពីគាត់នៅក្មេង

មានម្តងពេលប្រយុទ្ធជាមួយនឹង Takeda Shingen ដែលជាគូប្រកួតដ៏ខ្លាំងម្នាក់ លោកបានបរាជ័យ។ បន្ទាប់​ពីចាញ់​​ការ​ប្រកួត និង​កំពុង​រត់​គេច​ខ្លួន​តាម​ផ្លូវ​ទៅ​ផ្ទះ ព្រោះ​តែ​ឃ្លាន​ពេក គាត់​ក៏​បាន​ឈប់​នៅ​ហាង​តែ​មួយ ហើយ​ហូប mochi បន្តិច​បន្តួច។

ប៉ុន្តែដោយសារកំពុងប្រញាប់​រត់​គេច​ខ្លួន លោកបានភ្លេចសងប្រាក់ ហើយត្រូវស្រ្តីចំណាស់ដែលជាម្ចាស់ហាងចាប់ខ្លួន។

សព្វថ្ងៃកន្លែងនេះត្រូវបានគេហៅថា Zenitori នៅខេត្ត Shizuoka ។

Zenitori មានន័យថាយកប្រាក់។

ហេតុការណ៍ដ៏គួរឲ្យសង្ស័យនេះបាន​ក្លាយទៅ​ជា​ឈ្មោះរបស់តំបន់ និងត្រូវបានគេហៅដូច្នេះ​រហូត​មក​ដល់​សព្វ​ថ្ងៃ។

Takeda Shingen

ដូចដែលបាន​រៀប​រាប់​ខាង​លើ Takeda Shingen ត្រូវ​​បាន​​គេ​​ចាត់​​ទុក​​ជា​​បុគ្គល​​ដែល​​ខ្លាំង​បំផុត​​ក្នុង​​ប្រទេស​​ជប៉ុន​នា​​ពេល​​នោះ។

រឿងហេតុដែលលោកបង្កឡើងបានធ្វើឲ្យមន្ត្រីគ្រប់គ្រងនៅជប៉ុនបារម្ភព្រោះថា សំបុត្រដែលលោកនិយាយការពាររឿងផិតក្បត់របស់ខ្លួនត្រូវ​បាន​ផ្សព្វផ្សាយ​ជា​សាធារណៈ។

ប្រហែលជាលោកស្រលាញ់ទាំងបុរស និងស្រ្តី ហើយហាក់បីដូចជាលោកបានផ្ញើសំបុត្រទៅបុរសម្នាក់ដើម្បីបកស្រាយ នៅ​ពេល​ដែល​បុគ្គល​ម្នាក់​នោះ​សង្ស័យ​ថា គាត់​កំពុង​មាន​ទំនាក់​ទំនង​ស្នេហា​ជា​មួយ​នឹង​បុរស​ម្នាក់​ទៀត។

ប្រហែលនេះជារឿងដ៏អាម៉ាស់​បំផុតនៅប្រទេសជប៉ុន។

Hosokawa Masamoto

លោកត្រូវបានគេចាត់ទុកជាបុគ្គលដែលបានបញ្ចប់សម័យកាលរដ្ឋសង្រ្គាម នៅ​ពេល​ដែល​សាមូរ៉ៃ​កំពុង​វាយ​លុក។

ថ្វីត្បិតតែ លោកជាសាមូរ៉ៃ ប៉ុន្តែលោកធ្លាប់ចង់យកតម្រាប់តាមរូបរាងរបស់ Tengu ។

Tengu ឬ​អាច​ហៅថាបិសាចច្រមុះវែង ជា​ប្រភេទ​សត្វ​ក្នុង​រឿង​ព្រេង​និទាន​រស់​នៅ​លើ​ភ្នំ ហើយ​វា​មាន​ស្លាប​សម្រាប់​ហោះ​​ហើរ។

ស្តាប់ទៅរឿងនេះក៏ទាក់ទាញណាស់ដែរ មែនទេអ្នកទាំងអស់គ្នា?

Date Masamune

នេះជាតួអង្គដែលធ្លាប់គ្រប់គ្រងកន្លែងដ៏ធំមួយនៅតំបន់ Tohoku និងធ្វើឲ្យតំបន់ផ្សេងទៀតភ័យខ្លាច។

ទោះបីជាលោកបាត់បង់ភ្នែកម្ខាងដោយសារតែជំងឺធ្ងន់ ប៉ុន្តែចំណុចនេះមិនប៉ះពាល់ច្រើនដល់កម្លាំងរបស់លោកនោះ​ទេ។ 

មន្ត្រីជាច្រើននៅសម័យនោះបានអនុវត្តពិធីតែ ហើយមនុស្សម្នាក់​ក្នុង​ចំណោមពួកគេបានប្រើចានតែដ៏មានតម្លៃបំផុត។

មានម្តង Date Masamune បានធ្វើឲ្យធ្លាក់ចានដ៏មានតម្លៃដូចនោះ។

ក្នុងជីវិតប្រចាំថ្ងៃ លោកព្យាយាមមិនធ្វើឲ្យធ្លាក់ចានតែ ប៉ុន្តែស្រាប់តែមានថ្ងៃមួយ គាត់​ខឹង​នឹង​ខ្លួន​ឯង ហើយធ្វើ​ឲ្យ​ធ្លាក់​ចាន​តែ​ដោយ​មិន​ដឹង​ខ្លួន។

គ្រប់គ្នាអស់សំណើចហើយយល់ថា មិនដឹងថាលោកកំពុងធ្វើអ្វីនោះទេ។

Maeda Toshiie

លោកបានកសាងអាណាចក្រដ៏មានអំណាចមួយដែលមានមូលដ្ឋាននៅ Kanazawa ។

ថ្វីត្បិតតែ លោកជាអ្នកមានម្នាក់ ប៉ុន្តែគាត់បែរជាល្បីថាជាមនុស្សដែលត្បិតត្បៀត ដែលសូម្បីតែប្រពន្ធរបស់លោកក៏​ពិបាក​ទទួល​យក​ដែរ។

ជាទូទៅអ្នកដែលចែកអាំងប៉ាវជាបុគ្គលដែលមានឋានៈខ្ពស់ជាង ប៉ុន្តែហាក់បីដូចជាលោកបានសុំឲ្យអ្នកក្រោមឱវាទ​របស់​ខ្លួន​ជូន​អាំង​ប៉ាវ​ឲ្យ​លោក​ទៅ​វិញ។

ក្រៅ​ពី​ឈ្មោះ​ដែល​ខ្ញុំ​បានលើកឡើងខាងលើ នៅមានតួអង្គ និងរឿងរ៉ាវដ៏គួរឲ្យចាប់អារម្មណ៍ជាច្រើនផ្សេងទៀត។

ឧទាហរណ៍ដូចជាស្តេចក្រាញ់ម្នាក់ទុកឲ្យរោមច្រមុះដុះវែង ក្នុងគោលបំណងចង់ឲ្យសត្រូវគិតថា លោកជាមនុស្សល្ងង់ម្នាក់។ ចំណែក​ឯ​ករណី​ផ្សេង​ទៀត​គឺ​ថា បុរស​ម្នាក់​ត្រូវ​ប្រពន្ធ​កាប់​បន្ទាប់​ពី​ត្រូវ​បាន​ប្រទះ​ឃើញ​ថា​ផិត​ក្បត់។

អាចនិយាយបានថា មិនថាសាមូរ៉ៃ ឬស្តេចក្រាញ់ល្បីឈ្មោះក្នុងតំបន់នោះទេ សរុបទៅពួកគេគ្រាន់តែជាមនុស្សធម្មតា​ប៉ុណ្ណោះ។ សុទ្ធ​តែ​មាន​រឿង​រ៉ាវ​ដោយ​ឡែក​របស់​ខ្លួន។

នៅពេលដែលបានអានរឿងស្រដៀងគ្នានេះ តើប្រិយមិត្តធ្លាប់អាន ឬដឹងរឿងទាំងនេះដែរទេ?

Abe Kengo