ទំព័រដើម
Japo- ថ្ងៃនេះ
វគ្គបណ្ដុះបណ្ដាលជំនាញផាត់មុខសម្រាប់ប៉ូលីសប្រុសរបស់ជប៉ុន តើគោលបំណងដើម្បីអ្វី?

វគ្គបណ្ដុះបណ្ដាលជំនាញផាត់មុខសម្រាប់ប៉ូលីសប្រុសរបស់ជប៉ុន តើគោលបំណងដើម្បីអ្វី?

ថ្ងៃព្រហស្បតិ៍ 27/03/2025 | 17:24 ល្ងាច

នៅលើពិភពលោក “ប៉ូលីស” គឺជាពាក្យដែលយើងគ្រប់គ្នាសុទ្ធតែស្គាល់ ហើយមាននៅគ្រប់ប្រទេសទាំងអស់ ប៉ុន្តែប្រហែលជាបើប្រៀបធៀបទៅនឹងប្រទេសដទៃទៀត ប៉ូលីសជប៉ុនមានចំណុចមិនធម្មតាបន្តិចបន្តួច។

ចំណុចមិនធម្មតាដែលខ្ញុំបាននិយាយគឺថា ពួកគេត្រូវបានបង្រៀនឲ្យផាត់មុខ និងធ្វើសក់។

ដូច្នេះតើសកម្មភាពនេះដើម្បីអ្វី? យើងទាំងអស់គ្នានឹងស្វែងយល់ខ្លឹមសារតាមរយៈអត្តបទខាងក្រោម។

តើវគ្គបណ្តុះបណ្តាលជំនាញផាត់មុខចាំបាច់សម្រាប់មន្ត្រីប៉ូលីសដែរទេ?

នៅវិទ្យាស្ថានប៉ូលីសខេត្ត Fukushima និស្សិតដែលត្រៀមបញ្ចប់ការសិក្សាកំពុងចូលរួមវគ្គបណ្តុះបណ្តាលផាត់មុខ និងធ្វើសក់។

មិនយូរប៉ុន្មាន យុវជនដ៏ពូកែទាំងនេះនឹងឈានជើងចូលសង្គមក្នុងនាមជាប៉ូលីស ជាឋានៈដ៏មានមោទនភាព។

ភាគច្រើនសុទ្ធតែជាប៉ូលីសប្រុស ប៉ុន្តែក៏មានការចូលរួមពីនិស្សិតប្រុសផងដែរ ដោយចំនួនសរុបគឺ ៦០ នាក់។

ប្រហែលជាអ្នកទាំងអស់គ្នាកំពុងគិតថា មូលហេតុដែលប៉ូលីសរៀនផាត់មុខគឺដើម្បីបន្លំខ្លួននៅពេលចូលរួមដំណើរការស៊ើបអង្កេត ចាប់ខ្លួនឧក្រិដ្ឋជន សរុបទៅគឺដើម្បីបម្រើដល់ការងារ។ យ៉ាងណាមិញ តាមពិតទៅមិនមែននោះទេ។

វគ្គបណ្តុះបណ្តាលនេះហាក់បីដូចជាជួយឲ្យអ្នករៀនអាចត្រៀមលក្ខណៈ និងរូបរាងខាងក្រៅ។

តើអ្នកទាំងអស់គ្នាយល់ថាចំណុចនេះចាំបាច់សម្រាប់មន្ត្រីប៉ូលីសដែរទេ?

ទិដ្ឋភាពអ្នកដែលចូលរួមវគ្គបណ្តុះបណ្តាលដូចជាស្រឡាំកាំងចំពោះការផាត់មុខដោយខ្លួនឯង។

គ្រូបង្រៀនរបស់ពួកគេមកពីម៉ាកផលិតផលថែសម្ផស្ស Shiseido ។

ក្នុងអំឡុងពេលបណ្តុះបណ្តាល អ្នកចូលរួមនឹងឆ្លុះកញ្ចក់ ហើយចាប់ផ្តើមដំណើរការផាត់មុខដូចជាលាបម្សៅទ្រនាប់ ម្សៅហុយ គូចិញ្ចើម និងសូម្បីតែធ្វើម៉ូដសក់ផងដែរ។

ជាការពិតណាស់ វិទ្យាស្ថាននេះដំណើរការដោយផ្អែកលើប្រាក់ពន្ធ ដូច្នេះហើយ មិនអាចប្រើប្រាស់ប្រាក់សម្រាប់សកម្មភាពគ្មានប្រយោជន៍នោះទេ។

ត្រឹមចំណុចនេះ តើអ្នកទាំងអស់គ្នាយល់ពីគោលបំណងរបស់វគ្គបណ្តុះបណ្តាលនេះដែរទេ?

ដើម្បីផ្លាស់ប្តូររូបភាពរបស់មន្ត្រីប៉ូលីស

នេះគឺជាគោលដៅរបស់វគ្គបណ្តុះបណ្តាល។

ប្រសិនបើមិនធ្វើរឿងអាក្រក់ ប្រាកដជាមិនរអៀសខ្លួននោះទេ ប៉ុន្តែបើស្រាប់តែត្រូវប៉ូលីសហៅឈ្មោះ នោះយើងនឹងភ្ញាក់ខ្លួន ដែលប្រៀបដូចជាប្រតិកម្មធម្មតាមែនទេអ្នកទាំងអស់គ្នា?

ដូច្នេះហើយ មូលហេតុដែលតម្រូវឲ្យប៉ូលីសផាត់មុខគឺដើម្បីលុបបំបាត់រូបភាពសោះកក្រោះ និងគួរឲ្យខ្លាចក្នុងក្រសែភ្នែកប្រជាពលរដ្ឋ ផ្ទុយទៅវិញ បំពាក់ដោយរូបរាងស្រស់ស្អាត ងាយនឹងចូលទៅជិតប្រជាពលរដ្ឋ។

ប្រសិនបើមន្ត្រីប៉ូលីសដែលនិយាយនោះជាមនុស្សម្នាក់ដែលមានមុខមាត់គួរឲ្យខ្លាច និងមនុស្សម្នាក់ដែលមានមុខមាត់សង្ហា តើប្រិយមិត្តគិតថានរណាងាយនឹងទទួលបានការសហការជាង? ពួកគេចាប់ផ្តើមវគ្គបណ្តុះបណ្តាលបន្ទាប់ពីបានពិចារណាយ៉ាងម៉ឺងម៉ាត់ចំពោះបញ្ហានេះ។

ខ្ញុំនៅតែឆ្ងល់ថា តើរូបរាងខាងក្រៅពិតជាសំខាន់ដល់ថ្នាក់នឹងដែរទេ តើអ្នកទាំងអស់គ្នាគិតយ៉ាងណាចំពោះបញ្ហានេះ?

តើវគ្គបណ្តុះបណ្តាលនេះនឹងត្រូវបានដាក់ពង្រាយនៅទូទាំងប្រទេសជប៉ុនមែនទេ?

គេនិយាយថា មិនត្រឹមតែនៅ Fukushima ប៉ុណ្ណោះទេ វគ្គបណ្តុះបណ្តាលនេះថែមទាំងត្រូវបានអនុវត្តនៅវិទ្យាស្ថានប៉ូលីសខេត្ត Yamaguchi ផងដែរ។

ប្រសិនបើចំណុចនេះត្រូវបានផ្សព្វផ្សាយនៅទូទាំងប្រទេសជប៉ុន ប៉ូលីសជប៉ុននឹងក្លាយជាប្រុសសង្ហា ហើយស្អាតជាមិនខាន។

ខ្ញុំបារម្ភថា អាចនឹងមានមនុស្សស្រីមួយចំនួនគិតក្នុងចិត្ត “ខ្ញុំចង់ឲ្យបងប៉ូលីសសង្ហាចាប់ខ្លួន” ពិតជាគ្រោះថ្នាក់ណាស់ ប្រសិនបើពួកគេប្រព្រឹត្តដោយសារគំនិតនេះ តើប្រិយមិត្តអ្នកអានដែលជាសុភាពនារីគិតយ៉ាងណាចំពោះចំណុចនេះ?

ប្រហែលជាពេលខ្លះអាចនឹងមានអាល់ប៊ុមរូបដែលសុទ្ធតែជារូបថតរបស់ប៉ូលីស។

ប្រសិនបើចំនួនប៉ូលីសសង្ហាកាន់តែច្រើនឡើង ប៉ូលីសនឹងទទួលបានចំណាត់ថ្នាក់ខ្ពស់ក្នុងចំណោមវិជ្ជាជីវៈដែលស្រ្តីចូលចិត្ត។

ប្រសិនបើរឿងនោះកើតឡើង បុរសដែលចង់ទាក់ទាញមនុស្សស្រី និងស្ត្រីដែលចង់ហ៊ុំព័ទ្ធទៅដោយប្រុសសង្ហា ប្រហែលជាកំពុងប្រញាប់ប្រញាល់ដាក់ពាក្យសុំចូលធ្វើជាប៉ូលីស។

មន្ត្រីប៉ូលីសតែងតែទទួលការប្រមាថដោយសារតែការងាររបស់ពួកគេ។

ប្រសិនបើប៉ូលីសជាមនុស្សដែលមើលទៅស្អាតសង្ហា ប្រហែលជាមានភាពងាយស្រួលជាងក៏ថាបាន។

Abe Kengo