តើត្រីធូណាបាន​សង្គ្រោះពិភព​លោក​ដោយ​របៀប​​ណា? រឿង​និយាយ​ពី​ភោជនីយដ្ឋាន​ស៊ូស៊ី​​ជួយ​កាត់​បន្ថយ​ចំនួន​ចោរ​សមុទ្រ

តើត្រីធូណាបានសង្គ្រោះពិភពលោកដោយរបៀបណា? រឿងនិយាយពីភោជនីយដ្ឋានស៊ូស៊ីជួយកាត់បន្ថយចំនួន​ចោរ​សមុទ្រ។

តើប្រិយមិត្តដឹងទេថាចោរសមុទ្រនៅតែមានរហូត​មក​ដល់សព្វថ្ងៃនេះដែរទេ?

ថ្វីត្បិតតែ ជាចោរសមុទ្រដូចគ្នា ប៉ុន្តែមិនដូចជា Luffy និងមិត្តភ័ក្តិរបស់គេក្នុងរឿង Anime One Piece ដ៏ល្បីនោះទេ។ ក្នុង​ជីវិត​ជាក់​ស្តែង ចោរ​សមុទ្រ​តែង​តែ​វាយ​ប្រហារ និង​ប្លន់​កប៉ាល់​ធម្មតា។

ចោរសមុទ្រវាយប្រហារនាវាដឹកប្រេងដែលផ្ទុកទំនិញបរិមាណច្រើន ប្លន់ទំនិញ និងចាប់ជំរិតសមាជិកនាវិកដើម្បី​ទារ​ប្រាក់​លោះ​ខ្លួន។ ទាំង​នេះ​​ជា​​សកម្មភាព​​របស់​ចោរ​សមុទ្រនៅ​សម័យ​សព្វ​ថ្ងៃ។

នាវាដឹកប្រេងឯកជនភ័យខ្លាចចំពោះរឿងនេះ ហើយត្រូវធ្វើដំណើរផ្លូវវាង ឬជួលអ្នកដែលមានអាវុធដើម្បីការពារខ្លួន។

ចំណុចនេះគឺជាបញ្ហាធំសម្រាប់សេដ្ឋកិច្ចពិភពលោក។

ចោរសមុទ្រ Somalia

មានប្រទេសមួយនៅទ្វីបអាហ្រ្វិកហៅថា Somalia ។

Somalia គឺជាតំបន់ដែលមានទីតាំងភូមិសាស្ត្រសំខាន់តាមបណ្តោយផ្លូវនាវាដឹកជញ្ជូនប្រេង ហើយជាតំបន់ដែលអាច​នេសាទ​បាន​ត្រី​ច្រើន។ 

ទោះជាយ៉ាងណា ដោយសារខ្វះកន្លែងកែច្នៃ ក៏ដូចជាបច្ចេកវិទ្យាកែច្នៃក្នុងស្រុក ពួកគេគ្រាន់តែអាចនេសាទបរិមាណ​ត្រី​ក្នុង​ស្រុក​ប៉ុណ្ណោះ។

ដូច្នេះហើយ ដោយសារតែមិនអាចរស់នៅដោយប្រកបរបរនេសាទ កន្លែងនេះបានក្លាយជាតំបន់ដែលមានមនុស្សជា​ច្រើន​ធ្វើ​ជា​ចោរ​សមុទ្រ។

មូលហេតុក៏ព្រោះតែភាពក្រីក្រ។

ហាងស៊ូស៊ីជប៉ុនបានខិតខំប្រឹងប្រែងលុបបំបាត់បញ្ហាចោរសមុទ្រ

នៅជាប់ Somalia មានប្រទេសមួយឈ្មោះថា Djibouti ។

មិនដូចជា Somalia នោះទេ ប្រទេសនេះអាចដឹកជញ្ជូនបរិមាណត្រីយ៉ាងច្រើនទៅកាន់ពិភពលោកដោយផ្អែកលើឧបករណ៍ និង​បច្ចេកវិទ្យាខ្ពស់​ដែល​នាំ​ចូល​ដោយ​ក្រុម​ហ៊ុន​បរទេស ជាពិសេស​គឺ​ត្រី​ធូណា។

ព្រោះតែអាចនេសាទប្រភេទត្រីធូណាដែលប្រជាជនជប៉ុនចូលចិត្ត ក្រុមហ៊ុនបរទេសជាច្រើនទៀតក៏បានជ្រៀតចូល និង​អភិវឌ្ឍ​ទីផ្សារ​មួយ​នេះ​ផង​ដែរ។

យ៉ាងណាមិញ នៅជាប់ប្រទេស Djibouti គឺ Somalia ហើយត្រីធូណាអាច​នឹង​ត្រូវ​បាន​នេសាទ​តាមរបៀបស្រដៀងគ្នា ប៉ុន្តែដោយសារស្ថានភាពបច្ចុប្បន្ននៅក្នុងប្រទេសនេះ ក្រុមហ៊ុនបរទេស​មិន​បាន​ផ្គត់​ផ្គង់​ដើម​ទុន ទើប​ធ្វើ​ឲ្យ​ស្ថាន​ភាព​ពិបាក។

ក្រោមស្ថានភាពបែបនេះ លោក Kimura ដែលជាអ្នកតំណាងនៃ Sushizanmai គឺជាភោជនីយដ្ឋានស៊ូស៊ីជប៉ុនដែលប្រើត្រីធូណាយ៉ាងច្រើននាំចូលពីប្រទេស Djibouti បានទៅកាន់ Somalia ហើយផ្គត់ផ្គង់បច្ចេកវិទ្យា ក៏ដូចជាកន្លែង ឧបករណ៍សម្រាប់នេសាទ និងកែច្នៃត្រីធូណា។

ដើម្បីកាត់បន្ថយភាពក្រីក្រនៅប្រទេស Somalia ពួកគេបានចាប់ផ្តើមសកម្មភាពមួយហៅថា “ចូរយើងគ្រប់គ្នានេសាទត្រីធូណា” ។

អំឡុងពេលនោះ នៅតំបន់សមុទ្រនេះចំនួនចោរសមុទ្រសាហាវកាន់តែច្រើនឡើង អាមេរិក បារាំង អាល្លឺម៉ង់ អេស្ប៉ាញ និង​ជប៉ុន​បាន​បញ្ជូន​នាវា​ចម្បាំង​ទៅ​ការពារ​តំបន់​នេះ។

លោក Kimura បាននិយាយ​ដូច​ត​ទៅ៖

“ការចាប់ផ្តើមប្រតិបត្តិការយោធាក៏ល្អដែរ ប៉ុន្តែមិនអាចលុបបំបាត់ចោរសមុទ្រទាំងអស់ដោយមីស៊ីលនោះទេ។

ក្រៅ​ពីនេះ ក្រុមចោរមានបំពាក់អាវុធ ភាគ​ច្រើន​ចោរ​សមុទ្រ​សុទ្ធ​តែ​ប្រើទូកតូច មិនមានអាវុធ និងមិនខ្វល់​ពី​ជីវិត។

ហើយបើទោះបីជាយកឈ្នះចោរសមុទ្រដោយអាវុធ ប៉ុន្តែ​ប្រជាជន​នៅ​ទី​នេះមិនមានមុខរបរចិញ្ចឹមជីវិតផ្សេងទៀតទេ ដូច្នេះ​បញ្ហា​ចោរ​​សមុទ្រ​​មិន​អាច​បញ្ចប់​បាន​ឡើយ” ។

បន្ទាប់មក លោក Kimura បានសម្រេចចិត្តនាំមនុស្សមួយចំនួនទៅកាន់ប្រទេសជប៉ុន ហើយនិយាយជាមួយពួក​គេ​​ដោយ​​ប្រុង​​ប្រយ័ត្ន។

ក្រុម​ចោរសមុទ្រទាំងនេះបាននិយាយថា ពួកគេ​មិន​ចង់​ត្រឡប់​ទៅ​ប្រទេស​របស់​ខ្លួន​វិញ​នោះទេ។

ប៉ុន្តែ​ដើម្បី​សង្គ្រោះ​ស្ថានការណ៍​ប្រទេស​នៅ​ពេល​នោះ​មាន​តែ​ពួក​គេ​ប៉ុណ្ណោះ ជាបុគ្គលដែលត្រូវបានបញ្ចូនទៅកាន់​ប្រទេស​​ជប៉ុន។

ដោយកំណត់គោលដៅផ្លាស់ប្តូរ Somalia លោក Kimura បានចាប់ផ្តើមធ្វើសកម្មភាព។

ធ្វើឲ្យ Somalia ក្លាយទៅជាតំបន់ផលិតត្រីធូណាដ៏ធំ

នឹងមិនអាចធ្វើអ្វីបាននោះទេ ប្រសិនបើមិនដឹងច្បាស់ពីស្ថានភាពក្នុងស្រុក លោក Kimura បានទៅកាន់ Somalia ។

នៅទីនោះជាតំបន់ក្រីក្រ ដូច្នេះ​សន្តិសុខមិនល្អនោះទេ ទោះបីជាដូច្នេះក្តី លោកនៅតែឡើងប៉ាល់ធ្វើដំណើរដោយផ្ទាល់។

នៅពេលដែលអនុវត្តវិធីសាស្រ្តនេសាទរបស់ប្រជាជនជប៉ុន លោកទទួលបានលទ្ធផលដ៏គួរឲ្យភ្ញាក់ផ្អើល។

ដោយដឹងថា ទីនេះជាកន្លែងដែលមានប្រភពធនធានច្រើន លោកគិតថា ប្រសិនបើយកប្រាក់ចំណេញធ្វើជាប្រាក់​ខែ ហើយ​បើក​ប្រាក់​ឲ្យ​អ្នក​នេសាទ​គ្រប់​គ្រាន់ នោះ​គ្មាន​នរណា​ចង់​​ធ្វើ​ជា​ចោរ​សមុទ្រទៀត​ឡើយ។

ដោយសហការជាមួយរដ្ឋាភិបាលរបស់ Somalia លោកបាននាំចូលទូកនេសាទដែលប្រើហើយនៅជប៉ុនបញ្ចូន​ទៅកន្លែង​នេះ ហើយចាប់ផ្តើមនេសាទ។

ទន្ទឹមនឹងនោះ ទំនាក់ទងសហប្រតិបត្តិការរវាងប្រទេសជិតខាងដូចជា Djibouti និង Sri Lanka ឧស្សាហកម្មត្រី​ធូណា​នៅតែរីកចម្រើន​រហូត​មក​ដល់​សព្វ​ថ្ងៃ​នេះ ហើយ​គេ​ចាត់​ទុក​ថា ដោយ​សារ​ចំណុច​នេះ​ចំនួន​អ្នក​ធ្វើចោរសមុទ្រ​បាន​កាត់​បន្ថយ។

ដើម្បីធ្វើឲ្យពិភពលោកកាន់តែស្រស់​ស្អាត ល្អ​ប្រសើរ​ឡើង និង​លុប​បំបាត់​អំពើ​អាក្រក់​ យើងអាចប្រើវិធីសាស្រ្តលុបបំបាត់​ប្រភព​នៃ​ភាព​ក្រីក្រ ដើម្បី​ជំនួស​ឲ្យ​ការ​ប្រើ​កម្លាំង​ហិង្សា។

ទោះបីជាដឹងថា នេះជាតំបន់ដែលមានគ្រោះថ្នាក់ លោក Kimura នៅតែមិនខ្លាចគ្រោះថ្នាក់ ហើយ​ឆ្ពោះ​ទៅ​មុខដើម្បី​​ផ្លាស់​​ប្តូរ​​ពិភព​​លោក។

ក្នុងភ្នែករបស់ខ្ញុំ លោក​ប្រៀប​ដូច​ជា​អ្នក​ប្រយុទ្ធ​សាមូរ៉ៃ​មួយ​រូប។ តើ​អ្នក​ទាំង​អស់​គ្នា​យល់យ៉ាង​ណា​ចំពោះ​តួអង្គ​ម្នាក់នេះ?

Abe Kengo