Mizuhiki – វប្បធម៌នៃការជូនអំណោយរបស់ជប៉ុនផ្តើមចេញពីការយល់ច្រឡំ

ថ្ងៃសៅរ៍ 22/03/2025 | 11:47 ព្រឹក

Mizuhiki – វប្បធម៌នៃការជូនអំណោយរបស់ជប៉ុនផ្តើមចេញពីការយល់ច្រឡំ។

នៅប្រទេសជប៉ុន ពេលដែលជូនប្រាក់ឲ្យនរណាម្នាក់ ការដាក់ប្រាក់ក្នុងស្រោមសំបុត្រគឺជាចំណុចមូលដ្ឋាន។

ផ្នែកខាងក្រៅស្រោមសំបុត្រមានខ្សែចម្រុះពណ៌ចងភ្ជាប់គ្នា តើអ្នកទាំងអស់គ្នាធ្លាប់មើលឃើញ ឬដឹងពីចំណុចនេះដែរទេ?

វត្ថុនេះត្រូវបានគេហៅថា Mizuhiki មិនត្រឹមតែនៅក្នុងប្រទេសជប៉ុនប៉ុណ្ណោះទេ ជនបរទេសជាច្រើនក៏ចូលចិត្តវត្ថុទាំងនេះដែរ។

យ៉ាងណាមិញ ចំណុចនេះប្រៀបដូចជាវប្បធម៌ដែលផ្តើមចេញពីការយល់ច្រឡំ ហើយបានវិវត្តន៍បន្តិចម្តងៗរហូតមកដល់សព្វថ្ងៃនេះ។

ត្រូវយល់ច្រឡំថាគឺជាវប្បធម៌ជូនអំណោយនៃប្រទេសចិន

ប្រហែលជានៅសតវត្សទី ១៤ សម័យកាល Muromachi ជប៉ុនបានធ្វើពាណិជ្ជកម្មជាមួយប្រទេសចិន (នៅពេលនោះគឺរាជវង្សមិង) ។

ការជួញដូរត្រូវបានពង្រីក ហើយពាណិជ្ជកម្មជាមួយ Hoi An នៅប្រទេសវៀតណាមក៏ចាប់ផ្តើមផងដែរ ប៉ុន្តែរឿងនេះបានកើតឡើងមុននោះមិនយូរប៉ុន្មានឡើយ។

នៅពេលនោះ ហាក់បីដូចជាខ្សែពណ៌ក្រហម និងសដែលចងភ្ជាប់នឹងប្រអប់ដាក់របស់របរនាំចូលពីរាជវង្សមិង។

ជាមួយនឹងគំនិតយល់ថា៖

“នៅរាជវង្សមិង ខ្សែពណ៌ក្រហម និងសត្រូវបានចងភ្ជាប់គ្នាសម្រាប់សម្គាល់អំណោយ” ។

ដូច្នេះដំបូងឡើយ ការចម្លងតាមគំនិតនេះគ្រាន់តែដើម្បីដើរតាមម៉ូដដែលថ្មីបំផុតនៃរាជវង្សមិញនៅសម័យនោះប៉ុណ្ណោះ។

ទោះជាយ៉ាងណា នៅក្នុងរាជវង្សមិង នេះជាវិធីសាស្រ្តដែលប្រើសម្រាប់បែងចែក “ផលិតផលនាំចេញ” ។

ដូច្នេះហើយ ទើបនិយាយថា Mizuhiki របស់ជប៉ុនផ្តើមចេញពីការយល់ច្រឡំ ហើយបានអភិវឌ្ឍរហូតមកដល់សព្វថ្ងៃនេះ។

របៀបជ្រើសរើស Mizuhiki

គេនិយាយថា នៅពេលដែលជ្រើសរើស Mizuhiki មិនអាចរើសយកពណ៌ រូបរាង និងចំនួនខ្សែខុសនោះទេ។

ដឹងពីចំណុចនេះអាចជួយឲ្យអ្នកទាំងអស់គ្នាមានភាពងាយស្រួលក្នុងការជ្រើសរើសកាដូអនុស្សាវរីយ៍។

ដោយសារតែមានភាពខុសគ្នាទៅតាមតំបន់ ដូច្នេះខ្ញុំនឹងនិយាយពីចំណេះដឹងទូទៅដែលពេញនិយមនៅប្រទេសជប៉ុន។

ជាដំបូងគឺនិយាយពីពណ៌របស់ខ្សែ។

ពណ៌ក្រហមជាមួយនឹងស ពណ៌លឿងជាមួយនឹងពណ៌ប្រាក់ ត្រូវបានគេប្រើក្នុងឳកាសអបអរសាទរ។ សូមកុំប្រើពណ៌ទាំងនេះនៅពេលដែលចូលរួមពិធីបុណ្យសព ប៉ុន្តែត្រូវប្រើពណ៌ខ្មៅ និងស។

បន្ទាប់គឺចំនួនខ្សែ។

ជាមូលដ្ឋានខ្សែត្រូវតែជាលេខសេស ជាទូទៅគឺ ០៥ ខ្សែ។

ចំពោះករណីប្រើក្នុងពិធីមង្គលការគឺ ១០ ខ្សែ។

របៀបចងខ្សែមានច្រើន ខ្ញុំមិនអាចពន្យល់បានទាំងអស់នោះទេ ប៉ុន្តែអ្វីដែលសាមញ្ញបំផុតនោះត្រង់ថា អត្ថន័យផ្លាស់ប្តូរអាស្រ័យលើចុងខ្សែបែរមុខឡើងលើ ឬចុះក្រោម។

ប្រសិនបើចងដូចជាចងខ្សែស្បែកជើងប៉ាតា នោះចុងខ្សែនឹងនៅខាងក្រោម។

របៀបចងបែបនេះត្រូវបានប្រើក្នុងអត្តន័យ “អ្វីដែលអ្នកចង់ជូនពរមានច្រើននៅពេលអនាគត” ។

ឧទាហរណ៍ដូចជាពិធីបុណ្យទទួលសមាជិកថ្មី ជូនពរថ្ងៃចូលរៀន និងពិធីជូនពរឲ្យអាយុវែង។

ផ្ទុយទៅវិញ ប្រសិនបើចុងខ្សែឆ្ពោះឡើងលើមានន័យថា “រឿងដែលមិនគួរធ្វើឡើងវិញនៅពេលអនាគត” ។

ដូចជាពិធីបុណ្យសព ប៉ុន្តែក៏អាចប្រើសម្រាប់ជូនពរនៅពេលដែលចេញពីមន្ទីរពេទ្យផងដែរ។

ក្រៅពីនេះ រៀបការគឺជារឿងដែលគួរធ្វើតែម្តងគត់ក្នុងមួយជីវិត ដូច្នេះគួរតែជ្រើសរើសរបៀបចងខ្សែដែលបែរមុខឡើងលើ។ ទន្ទឹមនឹងនេះ ដូចដែលខ្ញុំបាននិយាយមុននោះ ចំពោះពិធីមង្គលការ Mizuhiki ត្រូវចងចំនួន ១០ ខ្សែ។

របៀបចងខ្សែខុសៗគ្នា

មានរបៀបចងខ្សែខុសៗគ្នាជាច្រើន។

ក្នុងចំណោមនោះមានរបៀបចងក្បាច់ក្បូរដូចជាអណ្តើក ឬសត្វក្រៀល។ ដោយសារតែរបៀបចងមានភាពទាក់ទាញ អ្នកអាចនឹងជ្រើសយកដោយមិនចាំបាច់គិត ប៉ុន្តែត្រូវប្រុងប្រយ័ត្នបន្តិច។ ជាទូទៅគេតែងតែគិតថា ស្រោមសំបុត្រដែលមានក្បូរក្បាច់ច្រើនតែមានប្រាក់ច្រើន។ ប្រសិនបើស្រោមសំបុត្រមើលទៅឆើតឆាយ ប៉ុន្តែនៅខាងក្នុងបែរជាមានប្រាក់មិនច្រើន អ្នកទទួលនឹងខកចិត្តបន្តិច ហើយនិយាយថា “ហ៎?”

ដូច្នេះប្រសិនបើអ្នកជ្រើសរើសស្រោមសំបុត្រ Mizuhiki ដែលមានក្បូរក្បាច់ច្រើន សូមដាក់ប្រាក់ឲ្យសមនឹងរូបរាងខាងក្រៅរបស់ស្រោមសំបុត្រ។

គ្រឿងតុបតែងខ្លួនដូចជាកន្លាស់អាវដែលធ្វើពី Mizuhiki ក៏ពេញនិយមណាស់ដែរ ដូច្នេះផលិតផលទាំងនេះអាចជាវត្ថុអនុស្សាវរីយ៍ដ៏ល្អផងដែរ។

Mizuhiki គឺជាវប្បធម៌ដែលផ្តើមចេញពីការយល់ច្រឡំ ហើយបានអភិវឌ្ឍរហូតមកដល់សព្វថ្ងៃនេះ។

ប៉ុន្តែតាមរយៈការប្រើ Mizuhiki ដើម្បីបង្ហាញពីទឹកចិត្តរបស់ខ្លួនទៅកាន់អ្នកទទួល ខ្ញុំគិតថា Mizuhiki លែងជាការយល់ច្រឡំទៀតហើយ ប៉ុន្តែបានក្លាយជាលក្ខណៈវប្បធម៌ពិតប្រាកដ។

Abe Kengo