ហេតុការណ៍ដ៏កម្រមួយចំនួនដែលមិនអាចពន្យល់បាននៅជប៉ុន

ថ្ងៃពុធ 12/03/2025 | 17:30 ល្ងាច

ហេតុការណ៍ដ៏កម្រមួយចំនួនដែលមិនអាចពន្យល់បាននៅជប៉ុន។

សូម្បីតែប្រទេសដែលត្រូវបានគេចាត់ទុកថាមានសុវត្ថិភាពដូចជាជប៉ុនក៏មានហេតុការណ៍កើតឡើងនោះដែរ។

ក្នុងអត្ថបទថ្ងៃនេះ JAPO សូមចែករំលែកស្ថានភាពដ៏កម្រមួយចំនួនដែលបានកើតឡើង ដែលអាចនឹងធ្វើឲ្យអ្នកទាំងអស់គ្នាអស់សំណើច។

ករណីប្លន់នៅហាងផ្ទាល់របស់ខ្លួន

យុវជនអាយុ ២២ ឆ្នាំម្នាក់ត្រូវបានជ្រើសរើសធ្វើជាអ្នកគ្រប់គ្រងភោជនីយដ្ឋាន Yakitori មួយកន្លែង (ហាងសាច់មាន់អាំងបែបជប៉ុន) ។

នៅថ្ងៃឈប់សម្រាករបស់ខ្លួន យុវជនរូបនេះបានក្លែងខ្លួនធ្វើជាចោរម្នាក់ ហើយកាន់កាំបិតទៅប្លន់នៅហាងដែលខ្លួនធ្វើការ។

ថ្វីត្បិតតែ បានបិទបាំងមុខដោយប្រើម៉ាស និងវ៉ែនតាក៏ដោយ ប៉ុន្តែបុរសម្នាក់នេះត្រូវបុគ្គលិកធ្វើការថែមម៉ោងស្គាល់មុខនិយាយថា៖

“តើបងជាអ្នកគ្រប់គ្រងមែនទេ?”

បន្ទាប់ពីត្រូវបុគ្គលិកស្គាល់មុខ ហើយសួរសំណួរដូចនេះ បុរសម្នាក់នេះបាននិយាយប្រាប់បុគ្គលិកថា៖

“កុំធ្វេសប្រហែស ប៉ុន្តែត្រូវប្រុងប្រយ័ត្នចំពោះចោរ” ។

ដោយធ្វើពុតដូចជាកំពុងហាត់សមនៅពេលដែលមានករណីប្លន់កើតឡើង ហើយចាកចេញពីកន្លែងកើតហេតុ។

គ្រប់យ៉ាងនឹងល្អប្រសើរប្រសិនបើមានរឿងតែប៉ុណ្ណឹង ប៉ុន្តែពីរថ្ងៃក្រោយមក យុវជនម្នាក់នេះបានទាក់ទងទៅប៉ូលីសដោយផ្ទាល់ ហើយរាយការណ៍ថា ហាងមានចោរម្នាក់ចូលប្លន់។

ជាការពិតណាស់ ប៉ូលីសចាប់ផ្តើមការស៊ើបអង្កេតយ៉ាងលម្អិត និងបានសាកសួរបុគ្គលិកក្រៅម៉ោង។ ទន្ទឹមនឹងនោះ ក៏សាកសួរអ្នកគ្រប់គ្រងដែលបានរាយការណ៍ពីហេតុការណ៍ផងដែរ ហើយស្នើឲ្យអ្នកគ្រប់គ្រងនិយាយពីករណីចោរចូលប្លន់ឡើងវិញ។

ក្រោយពេលសាកសួរ អ្នកគ្រប់គ្រងបានសារភាពថា ខ្លួនពិតជាបានរាយការណ៍ខុស ហើយត្រូវបានចាប់ខ្លួនពីបទក្លែងបន្លំ និងរាយការណ៍ព័ត៌មានមិនពិត។

ប្រហែលជាបុរសម្នាក់នេះបានយកប្រាក់ចំនួន ៦ ម៉ឺនយ៉េនរបស់ហាងទៅប្រើសម្រាប់គោលបំណងផ្ទាល់ខ្លួន ហើយរៀបចំករណីប្លន់ដើម្បីគេចវេះពីទំនួលខុសត្រូវ។

នៅពេលដែលបុរសរូបនេះគិតឃើញគំនិតចង់ទម្លាក់កំហុសលើករណីប្លន់ យុវជនម្នាក់នេះប្រហែលជាគិតថា ខ្លួនជាមនុស្សពូកែម្នាក់ ប៉ុន្តែរឿងនេះពិតជាល្ងង់ពេកហើយ។

ប្រសិនបើជ្រុលធ្វើរឿងទាំងនេះ គ្រាន់តែចាកចេញពីហាងគឺបានហើយ។

នៅម៉ាតលក់ទំនិញ

មនុស្សម្នាក់ដើរចូលម៉ាតលក់ទំនិញ កាន់យកកាំបិតកាត់ក្រដាសមួយក្នុងចំណោមផលិតផលរបស់ហាង ហើយឆ្ពោះទៅកាន់កន្លែងគិតប្រាក់ ដាក់កាំបិតនៅកន្លែងបញ្ជរ ហើយនិយាយថា៖

“ប្រគល់ប្រាក់មក”

ក្រោយពីបានឮដូច្នេះ បុគ្គលិករូបនេះបានពិនិត្យមើលកូដផលិតផល ហើយប្រុងនឹងប្រាប់ពីតម្លៃរបស់ផលិតផល។

ក្នុងពេលនោះបុគ្គលម្នាក់នោះបាននិយាយថា៖

“ខ្ញុំនឹងយកប្រាក់មក”

នៅពេលដែលនិយាយចប់ បុគ្គលម្នាក់នោះបានរត់ចេញពីហាង ដោយមិនបានយកកាំបិត ឬប្លន់ប្រាក់នោះទេ។

តើបុគ្គលរូបនោះចង់បានអ្វី? ទាំងនេះនៅតែជាសំណួរដែលមិនទាន់មានចម្លើយ ព្រោះជននោះមិនត្រូវចាប់ខ្លួននោះទេ។

ប៉ុន្តែប្រហែលជាបុគ្គលម្នាក់នោះជាមនុស្សកំសាក។

គ្រាន់តែចង់យកទំពាំង

រោងចក្រថាមពលនុយក្លេអ៊ែរអាចនឹងត្រូវវាយប្រហារដោយភេរវកម្ម ដូច្នេះហាមមិនឲ្យសាធារណៈជនចូលនោះទេ។ តំបន់នេះហ៊ុមព័ទ្ធដោយរបង និងលួសបន្លាសម្រាប់ហាមឃាត់។

ជាការពិតណាស់ កាមេរ៉ាក៏ត្រូវបានដំឡើង និងត្រួតពិនិត្យ ២៤/២៤ ផងដែរ។

ក្នុងស្ថានភាពនោះ មានមនុស្សប្រុសស្រីចំនួន ២៤ នាក់បានលួចចូល ហើយត្រូវចាប់ខ្លួន។

នៅពេលដែលបុគ្គលពិនិត្យមើលបានឃើញមនុស្សចំនួន ២៤ នាក់ឡើងរបងដែលមានកម្ពស់ ២,៥ ម៉ែត្រដើម្បីចូលទៅខាងក្នុង ហើយជាការពិតណាស់ គឺបានចាត់ទុកថាជនទាំងនេះជាភេរវករ។

ប៉ុន្តែតាមពិតទៅ មិនមែននោះទេ។

ក្នុងចំណោមពួកគេមានពាណិជ្ជករចំនួន ៣ នាក់ និងបុគ្គលិកក្រៅម៉ោង ២១ នាក់ ហើយពួកគេមកគ្រាន់តែដើម្បីយកទំពាំងប៉ុណ្ណោះ។

នៅខាងក្រៅរបងជាតំបន់សេរី ដូច្នេះទំពាំងនៅទីនោះត្រូវគេយកអស់ហើយ។ ហើយហាក់បីដូចជាពួកគេយល់ថា នៅខាងក្នុងរបងមានទំពាំងច្រើន ដូច្នេះហើយ ទើបពួកឡើងរបងប្រថុយចូលយកទំពាំង។

ករណីបំពានខុសច្បាប់បែបនេះគឺមិនត្រឹមត្រូវនោះទេ ប៉ុន្តែពួកគេយល់ថា ប្រហែលជាមិនអី ព្រោះគោលបំណងរបស់ពួកគេគ្រាន់តែដើម្បីយកទំពាំងប៉ុណ្ណោះ។

តើប្រិយមិត្តយល់យ៉ាងណាចំពោះរឿងដ៏កម្រខាងលើនេះ?

ជាការពិតណាស់ ទាំងនេះជាករណីដែលកើតឡើងដោយចៃដន្យ មិនមែនជាគម្រោង ឬទម្លាប់នោះទេ ប៉ុន្តែខ្ញុំមិនមែនជាមនុស្សតែម្នាក់គត់ដែលមានអារម្មណ៍ថា ទាំងនេះជារឿងធម្មតាដែលបានកើតឡើងចំពោះប្រជាជនជប៉ុនប៉ុណ្ណោះទេ មែនទេ?

Abe Kengo