ស្វែង​រក​កំពូល Pokémon ? ឆ្មា​សម្បរ​បី​ដ៏​កម្រ​នៅ​ប្រទេស​​ជប៉ុន

ស្វែងរកកំពូល Pokémon ? ឆ្មាសម្បរបីដ៏កម្រនៅប្រទេស​ជប៉ុន។

ពិភពសត្វចិញ្ចឹមមានសត្វជាច្រើនប្រភេទខុសគ្នា និងត្រូវបានយកទៅចិញ្ចឹមអាស្រ័យលើលក្ខខណ្ឌ របៀបរស់នៅរបស់​​គ្រួសារ​នីមួយៗ។ ក្នុងនោះមានសត្វចិញ្ចឹមចំនួនពីរប្រភេទដែល​ទទួលបានការស្រលាញ់ចូលចិត្តយ៉ាងខ្លាំង ហើយ​ត្រូវ​បាន​ជ្រើស​រើស​យក​ទៅ​ចិញ្ចឹម​ច្រើន​បំផុត​គឺ​ឆ្កែ និង​​ឆ្មា។

ក្នុងអត្ថបទថ្ងៃនេះ JAPO សូមណែនាំអំពីសត្វឆ្មាដ៏កម្របំផុតនៅប្រទេសជប៉ុន។ ចូរយើងក្រឡេកមើលទាំងអស់គ្នា។

នេះជាប្រភេទឆ្មាដែលមានតម្លៃជាង ២០ លានយ៉េន ដែល​ស្មើ​នឹង​កំពូល Pokémon ។

ចូរយើងក្រឡេកមកមើលប្រភេទឆ្មាដែលមានតម្លៃថ្លៃកំពុងលាក់ខ្លួនក្នុងចំណោមសត្វឆ្មាធម្មតានៅប្រទេសជប៉ុនទាំង​អស់​​គ្នា។

សត្វឆ្មាក្នុងរូបភាពនេះត្រូវបានគេហៅថា Mike Neko (ឆ្មាសម្បុរបី) ដែលឈ្មោះជាភាសាអង់គ្លេស​គឺ Calico គឺ​ជា​ពូជឆ្មា​ដែល​តែង​​តែ​ឃើញ​​នៅ​​ប្រទេស​​ជប៉ុន។

ឆ្មាទាំងនេះមិនមែនជាជាពូជដាច់ដោយឡែកនោះទេ ប៉ុន្តែកើតចេញពីការរួមបញ្ចូលដោយឆ្មាញីឈ្មោលដែលមាន​ពណ៌​ខុសៗ​គ្នា។

នៅប្រទេសជប៉ុន យើងអាចនឹងមើលឃើញសត្វឆ្មាសម្បុរបីដ៏ស្លូតកំពុងដេកនៅ​តាម​ដង​ផ្លូវ។ ភាគច្រើនសត្វឆ្មាទាំងនេះគ្មានម្ចាស់នោះទេ ហើយត្រូវបានគេហៅថា Nora Neko (ឆ្មាអនាថា) ។

គេនិយាយថា ក្រៅពីប្រទេសជប៉ុនឆ្មាសម្បុរបីកម្រនឹងមើលឃើញនៅកន្លែងផ្សេងណាស់។ ដូច្នេះប្រសិនបើសួរថា តើសត្វ​ឆ្មា​សម្បុរ​​បី​​មាន​​តម្លៃ​​ថ្លៃ​​ដែរ​​អត់? ដើម្បី​ឆ្លើយ​តប​សំណួរ​នេះ ចូរ​យើង​ស្វែង​យល់​អំ​ពី​លក្ខណៈ​ពិសេស​របស់​ឆ្មា​ប្រភេទ​​​នេះ។

គេនិយាយថា សត្វឆ្មាសម្បុរបីមានតែឆ្មាញីប៉ុណ្ណោះ ចំណុចនេះទាក់ទងនឹងបញ្ហាក្រូម៉ូសូម។

ចំណុចនេះស្ថិតក្នុងដែនកំណត់ជីវវិទ្យា ដូច្នេះប្រសិនបើគិតថាពិបាកយល់ អ្នកទាំងអស់គ្នាគ្រាន់តែយល់យ៉ាង​សាមញ្ញ​​ថា “មានតែឆ្មាសម្បុរបីញី” ប៉ុណ្ណោះ ចាំតែប៉ុណ្ណឹងបានហើយ។ 

ឆ្មាកើតមកមានការរួមបញ្ចូលគ្នារវាងហ្សែន O ដែលកំណត់រោមពណ៌ត្នោត ជាមួយនឹងហ្សែន O ដែលកំណត់​រោម​ពណ៌​ខ្មៅ។ ហើយ​ការ​រួម​បញ្ចូល​គ្នា​រវាង​ហ្សែន O ទាំង​ពីរ​នេះ​គឺ​ជា​លក្ខខណ្ឌ​សម្រាប់​បង្កើត​បាន​ឆ្មា​សម្បុរបី។

ហ្សែន O ទាំងពីរនេះសុទ្ធតែមានក្រូម៉ូសូម X ។ 

សរុបទៅ ប្រសិនបើការរួមបញ្ចូលគ្នារបស់ក្រូម៉ូសូមគឺ XX នោះប្រូបាប៊ីលីតេបង្កើតបានឆ្មាសម្បុរបីមានកម្រិតខ្ពស់ណាស់ ទន្ទឹមនឹងនោះ XX ក៏ជាក្រូម៉ូសូមដែលកំណត់ភេទ​ញី​ផង​ដែរ ដូច្នេះលទ្ធផលចុងក្រោយគឺថា ឆ្មាសម្បុរបីដែលកើត​មក​គឺ​ញី។

XY ដែលជាក្រូម៉ូសូមដែលកំណត់ភេទឈ្មោលមិនត្រូវបានបង្កើតឡើងឡើយ ដែលមានន័យថាមិនមានឆ្មាសម្បុរបីឈ្មោលនោះទេ។

ទោះជាយ៉ាងណា ក្នុងនោះមានករណីដ៏កម្រមួយចំនួន ឆ្មាអាចនឹងកើតមកជាមួយនឹងក្រូម៉ូសូម XXY ។

អាចនិយាយបានថា នេះជាករណីក្រូម៉ូសូមមិនប្រក្រតី ក្នុងនោះ Y គឺជាក្រូម៉ូសូមដែលពាក់ព័ន្ធនឹងការបង្កើតភេទឈ្មោល។

ដូច្នេះការរួមបញ្ចូលគ្នានេះបង្កើតបានជាឆ្មាសម្បុរបីឈ្មោល។

ជាមួយនឹងប្រូបាប៊ីលីតេឆ្មាឈ្មោល ១ លើ ៣០០០ ទៅ ៣ ម៉ឺនក្បាល ដែលមានន័យថា ក្នុងចំណោមឆ្មាសម្បុរបីជាង ៣០០០ ក្បាល ទើប​មាន​ឆ្មា​សម្បុរ​បី​ឈ្មោល​មួយ​ក្បាល។

កាលពីមុនធ្លាប់មានករណីឆ្មាសម្បុរបីឈ្មោលមួយក្បាលត្រូវបានគេលក់ក្នុងតម្លៃជាង ២០ លានយ៉េន។

នៅជប៉ុនបានកំណត់យកឆ្មាប្រភេទនេះជាពូជដ៏កម្រតាំងពីយូរយារណាស់មកហើយ។ គេជឿថា ហាងដែលចិញ្ចឹមឆ្មា​សម្បុរ​បី​ឈ្មោល​នឹង​ទទួល​បាន​ភាព​រីក​ចម្រើន និង​ជោគ​ជ័យ។ ហើយតម្លៃរបស់វាក៏ខ្ពស់ចាប់តាំងពីពេលនោះ​ដែរ។

នៅ​ឆ្នាំ ១៩៥៦ ក្នុងបេសកកម្មទៅកាន់អង់តាក់ទិកដំបូងរបស់ជប៉ុន គឺមានការរួមដំណើររបស់ឆ្មាសម្បុរបីឈ្មោល​មួយ​ក្បាល ដោយ​បានចុះចតនៅលើទ្វីបអង់តាក់ទិក ហើយឆ្លងកាត់រដូវរងានៅទីនោះ។

ឆ្មាសម្បុរបីមាននៅគ្រប់ទីកន្លែងតាមដងផ្លូវនៅក្នុងប្រទេសជប៉ុន។ ក្នុងចំណោមនោះ ប្រហែលជាមានឆ្មាសម្បុរបីឈ្មោល​មួយ​ក្បាល​​ដែល​​មាន​​តម្លៃ​​ជាង ២០ លាន​​យ៉េន។

តើ Pokémon ឆ្មាសម្បុរបីអាចនឹងត្រូវបានរកឃើញដែរទេ? ប្រសិនបើយើងមានឳកាសទៅលេងប្រទេសជប៉ុន។ នោះ​ប្រាកដ​ជា​ដំណើរ​កម្សាន្ត​ដ៏​គួរ​ឲ្យ​ចាប់​អារម្មណ៍​បំផុត​ហើយ ស្រដៀងនឹងដំណើរផ្សងព្រេងទៅរកកំណប់ដែលអ្នកទាំង​អស់​គ្នា​តែង​តែ​ឃើញ​ក្នុង​ល្បែង​កម្សាន្ត​មួយ​ចំនួន​ដូច​ជា Mario ឬ Treasure Hunter ជា​ដើម។

Abe Kengo