និទាឃ​រដូវ​ជា​រដូវ​កាល​ឃ្លាត​ឆ្ងាយ ផ្កា​សាគូរ៉ា​តំណាង​ឲ្យ​ភាព​ព្រាត់​ប្រាស

និទាឃ​រដូវ​ជា​រដូវ​កាលឃ្លាត​ឆ្ងាយ ផ្កា​សាគូរ៉ា​តំណាង​ឲ្យ​ភាព​ព្រាត់​ប្រាស។

ចុងខែមីនា និងខែមេសាជារៀងរាល់ឆ្នាំ គឺជារដូវផ្កាសាគូរ៉ារីកស្គុះស្គាយយ៉ាងស្អាត។ ផ្ការីកមុនពេលចេញស្លឹក ចំណុច​​​នេះ​​​ធ្វើ​​ឲ្យ​សម្រស់​របស់​ផ្កា​កាន់​តែ​​លេច​​ធ្លោ ដូច្នេះ​ទើប​ទាក់​ទាញ​ការស្រលាញ់ចូលចិត្តនៅទូទាំងពិភពលោក។

យ៉ាងណាមិញ តើអ្នកទាំងអស់គ្នាដឹងទេថាផ្កាសាគូរ៉ាតំណាងឲ្យភាពព្រាត់ប្រាសដែរទេ?

តាមពិតទៅ ផ្កាប្រភេទនេះបង្កប់អត្តន័យក្រៀមក្រំ។ ដូច្នេះក្នុងអត្តបទថ្ងៃនេះ ខ្ញុំនឹងបកស្រាយពីចំណុចនេះ យើងនឹង​តាម​ដាន​ទាំង​អស់​គ្នា។

ខែមីនាគឺជារដូវកាលលាគ្នា

នៅប្រទេសជប៉ុន សាលារៀន ក្រុមហ៊ុន និងរដ្ឋាភិបាលតែងផ្លាស់ប្តូរឆ្នាំសិក្សា ឬឆ្នាំសារពើពន្ធនៅថ្ងៃទី ១ ខែមេសា។ ហើយ​​ចាប់​​ផ្តើម​​ឆ្នាំ​​សារ​ពើ​​ពន្ធ​​ថ្មី។

ចំណុចនេះមានន័យថា នៅចុងខែមីនាសិស្សានុសិស្សត្រូវលាមិត្តរួមថ្នាក់របស់ខ្លួន ហើយចាប់ផ្តើមឆ្នាំសិក្សាថ្មី ឬឡើង​ថ្នាក់។

តាមបណ្តាក្រុមហ៊ុន អំឡុងពេលនេះក៏ជាពេលវេលាដែលមនុស្សជាច្រើននឹងផ្លាស់ប្តូរកន្លែងធ្វើការ ដូច្នេះសម្រាប់មនុស្ស​ពេញ​វ័យ គឺ​ជា​ពេល​ដែល​ត្រូវ​និយាយ​លា​មិត្ត​រួម​ការ​ងារ​ដែល​បាន​រួម​ដំណើរ និង​ធ្វើ​ការ​ជា​មួយ​គ្នា។

ដូច្នេះហើយ ខែមីនាជារដូវកាលលាគ្នា ហើយផ្កាសាគូរ៉ាប្រភេទនេះចេញផ្កាអំឡុងខែមីនាក៏តំណាងឲ្យភាពព្រាត់ប្រាស​ផង​ដែរ។

ត្របកផ្កាស្រពោន ជាតំណាងដ៏ល្អឥតខ្ចោះរបស់សាមូរ៉ៃមួយរូប

វិធីសាស្រ្តមួយក្នុងចំណោមវិធីសាស្រ្តស្លាប់របស់សាមូរ៉ៃគឺ “Seppuku” ដែលខ្ញុំបានលើកឡើងក្នុងអត្តបទមុន។

តាមពិតទៅ Seppuku មិន​មែន​ជា​ការ​ដាក់​ទោស​នោះ​ទេ ប៉ុន្តែជា​ទម្រង់​នៃ​ការ​ស្លាប់ដ៏មានមោទនភាពសម្រាប់​សាមូរ៉ៃ។

នៅប្រទេសជប៉ុន គេនិយាយថា ភាពស្មោះត្រង់របស់មនុស្សម្នាក់ត្រូវបានរកឃើញនៅក្នុងពោះ ដូច្នេះសកម្មភាព​វះ​ពោះ​ខ្លួន​ឯង គឺ​ជា​ពិធី​មួយ​សម្រាប់​បញ្ជាក់​ថា មនុស្សម្នាក់នោះមិននិយាយកុហក។

ដូច្នេះហើយ ក្នុងករណីប្រសិនបើម្នាក់នោះជាជនល្មើស ពួកគេមិនត្រូវបានអនុញ្ញាតឲ្យធ្វើពិធីវះពោះនោះទេ ប៉ុន្តែត្រូវ​កាត់​ក្បាល។

នៅពេលដែលឈុតឆាក Seppuku ត្រូវបានចាក់ផ្សាយក្នុងខ្សែភាពយន្ត ទិដ្ឋភាពត្របកផ្កាសាគូរ៉ាជ្រុះធ្លាក់តែងតែកើតឡើងនៅពីក្រោយ។

ផ្កាសាគូរ៉ាដែលរីកក្នុងពេលជាមួយគ្នានោះ ក៏ត្រូវខ្យល់បក់ធ្លាក់ព្រមគ្នាផងដែរ។

ឧទាហរណ៍ប្រភេទផ្កាផ្សេងទៀតដូចជាផ្កាកុលាប ត្របកផ្កាមិនធ្លាក់ទាំងដែលផ្កាប្រែទៅជាពណ៌ត្នោត ហើយរលួយក៏​ដោយ ប៉ុន្តែ​ផ្កា​សាគូរ៉ា​បែរ​ជា​បញ្ចប់​វដ្ត​ជីវិត​យ៉ាង​ឆាប់​នៅ​ពេល​ដែល​មាន​ខ្យល់​បក់​​ឆ្លង​កាត់។

សាមូរ៉ៃនឹងស្លៀកឈុត Kimono ពណ៌សនៅពេលដែលអនុវត្តពិធី Seppuku ក្នុងភាសាជប៉ុនហៅថា Shini Shozoku ជាប្រភេទសម្លៀកបំពាក់ដែលត្រៀមសម្រាប់សេចក្តីស្លាប់។

នៅខាងក្នុងសម្លៀកបំពាក់នោះ ឈាមស្រក់ដោយស្ងៀមស្ងាត់។

ចំណែកឯផ្កាសាគូរ៉ាក៏មានពណ៌សលាយជាមួយនឹងពណ៌ផ្កាឈូកបន្តិចដែរ។

ត្រង់កន្លែងដែលមានពណ៌ផ្កាឈូកទាំងនោះធ្វើឲ្យយើងនឹកស្រមៃដល់តំណក់ឈាមស្រស់ហូរជ្រាបក្នុងក្រណាត់ស។

ចំណុចនេះបង្កើតបានជាទំនាក់ទំនង ផ្សារភ្ជាប់រវាងទិដ្ឋភាពផ្កា​ធ្លាក់ និងសេចក្តីស្លាប់ដ៏ថ្លៃថ្នូរបស់សាមូរ៉ៃបើតាម​ទស្សនៈ​របស់​ប្រជាជន​ជប៉ុន។

សេចក្តីស្លាប់ប្រៀបដូចជាការឃ្លាតឆ្ងាយ។

ហើយវាបានធ្វើឲ្យខ្ញុំគិតដល់ការកើតជាថ្មី។

ផ្កាសាគូរ៉ាស្អាតនៅកន្លែងដែលមានវិញ្ញាណប្រមូលផ្តុំច្រើន ដូចជាទីបញ្ចុះសពជាដើម

តើអ្នកទាំងអស់គ្នាស្គាល់ទីសក្ការបូជា Yasukuni នៅ Tokyo ដែរទេ?

នេះជាទីសក្ការបូជាសម្រាប់អ្នកដែលបានលះបង់ជីវិតការពារប្រទេសជប៉ុន។

ក្នុងអំឡុងសង្គ្រាមលោកលើកទី ២ ពាក្យស្លោករបស់ទាហាននិយាយថា “ជួបគ្នានៅក្រោមម្លប់ផ្កាសាគូរ៉ានៅ Yasukuni” ។

ព្រលឹងរបស់អ្នកដែលបានប្រយុទ្ធដើម្បីប្រទេសជាតិនឹងវិលត្រឡប់ទៅកាន់ទីសក្ការៈបូជា Yasukuni ដូច្នេះនេះគឺជាពាក្យ​ស្លោករបស់អ្នក​ចម្បាំង​ដែល​បាន​លះ​បង់​ដើម្បី​ប្រទេស ដោយ​សង្ឃឹម​ថា​អាច​ជួយជុំគ្នាទោះ​ក្នុង​ពិភព​មួយ​ផ្សេងក៏​ដោយ។

ក្រៅពីនេះ ឧទ្យាន Ueno ក៏ជាកន្លែងសម្រាប់គយគន់ផ្កាសាគូរ៉ាដ៏ល្បីផងដែរ។

ហើយទីនេះក៏ធ្លាប់ជាកន្លែងប្រយុទ្ធ​គ្នា​យ៉ាង​សាហាវដើម្បី​ការពារ​ប្រទេស​នាចុងសម័យសាមូរ៉ៃ។

ពិតជាចៃដន្យណាស់ ផ្កាសាគូរ៉ារីកយ៉ាងស្រស់ស្អាតនៅកន្លែងដែលប្រមូលផ្តុំទៅដោយមនុស្សដែលមានទឹកចិត្តខ្ពង់​ខ្ពស់ និង​សុចរិត តែង​​តែ​ព្យាយាម​ការ​​ពារ​​ប្រទេស​​ជាតិ។

គេនិយាយថា ក្នុងដូវផ្ការីក​ ខណៈពេលដែលមនុស្សជាច្រើនប្រមូលផ្តុំគ្នានៅក្រោមម្លប់ផ្កាសាគូរ៉ាដ៏ស្រស់ស្អាតទាំងនោះ ហើយផឹកស្រា អ្នកដែលបានស្លាប់ទៅក៏កំពុងមើលឃើញនៅលើមេឃដែរ។

មនុស្សជាច្រើននៅតែស្រលាញ់ចូលចិត្តផ្កាសាគូរ៉ាជប៉ុន ទាំងដែលអត្តន័យរបស់ផ្កាសាគូរ៉ាមួយផ្នែកទាក់ទងនឹងសេចក្តី​ស្លាប់​ក៏​ដោយ។

ប្រសិនបើអ្នកទាំងអស់គ្នាសាកល្បងដាក់ខ្លួនក្នុងស្ថានភាពរបស់ប្រជាជនជប៉ុន ហើយគិតដល់រឿងដែលខ្ញុំបានរៀបរាប់អំឡុងពេលគយគន់ផ្កាសាគូរ៉ា ប្រហែល​ជា​អារម្មណ៍​ដែល​មាន​ចំពោះ​ភាព​ស្រស់​ស្អាត​របស់​ផ្កាសាគូរ៉ា​នឹង​កាន់​តែ​​ច្រើន​​ឡើង។

Abe Kengo