តើ​អ្វី​ទៅ​ទើប​ជា​រឿង​ដែល​សំខាន់​ក្នុង​ជីវិត? ជប៉ុន​កំពុង​តែ​ប្រឈម​នឹង​ភាព​អន់​ថយ​ពី​មួយ​ថ្ងៃ​ទៅ​មួយ​ថ្ងៃ

តើអ្វីទៅទើបជារឿងដែលសំខាន់ក្នុងជីវិត? ជប៉ុនកំពុងតែប្រឈមនឹងភាពអន់ថយពីមួយថ្ងៃទៅមួយថ្ងៃ។

ជប៉ុនផ្សារភ្ជាប់នឹងទិដ្ឋភាពនៃប្រទេសដែលមានមនុស្ស​ស្លូតបូត និង​ចិត្ត​ល្អ។ ប៉ុន្តែគួរឲ្យស្តាយ ចំណុចនេះគ្រាន់តែជា​រឿង​កាល​ពី​អតីតកាល​ប៉ុណ្ណោះ។

ប្រសិនបើមើលឃើញពីចំណុចមិនល្អទាំងនេះរបស់ជប៉ុននាពេលបច្ចុប្បន្ន ហើយដកយកមេរៀន ខ្ញុំជឿថា អ្នកនឹងធ្វើ​ឲ្យ​ប្រទេស​របស់​ខ្លួន​កាន់​តែ​ប្រសើរ​ឡើង។

ក្នុងអត្តបទនេះ ខ្ញុំនឹងរៀបរាប់ប្រាប់អ្នកទាំងអស់គ្នាទាក់ទងនឹងបញ្ហាគួរឲ្យអាម៉ាស់មួយចំនួននៅជប៉ុនសព្វថ្ងៃ។

មនុស្សដែលមិនអាចជួយគ្នាទៅវិញទៅមក

មានរឿងជាច្រើន ឧទាហរណ៍ដូចជាលើកនេះខ្ញុំនឹងចែករំលែកបទពិសោធផ្ទាល់របស់ខ្លួន។

មានម្តងពេលកំពុងធ្វើដំណើរអាជីវកម្ម ខ្ញុំបានទៅដល់ស្ថានីយ៍ Shibuya នៅ Tokyo ។

ដោយមើលឃើញស្រ្តីជាម្តាយម្នាក់កំពុងត្រៀមដើរចុះជណ្តើរ ដៃកំពុងរុញ​រទេះ​ក្មេង ដូច្នេះទើបខ្ញុំសួរថា តើខ្ញុំអាចជួយអ្វី​បាន​ទេ? 

• “ទេ… ខ្ញុំមិនអីទេ” ។

ខ្ញុំមិនត្រឹមតែភ្ញាក់ផ្អើល ថែមទាំងទទួលបានការបដិសេធ។

អ្នកដែលស្គាល់ខ្ញុំសុទ្ធតែដឹង ហើយខ្ញុំក៏យល់ថាមុខរបស់ខ្លួនមិន​ដូច​មនុស្ស​អាក្រក់​នោះទេ។ ដូច្នេះហេតុអ្វីបានជា​ស្រ្តី​ម្នាក់​នោះ​បែ​រជា​បដិសេធ​ជំនួយ​របស់​ខ្ញុំ តើ​ព្រោះ​តែ​ពួក​គេ​ខ្លាច​ខ្ញុំ​មែន​ទេ?

រឿងនេះធ្វើឲ្យខ្ញុំភ្ញាក់ផ្អើលយ៉ាងខ្លាំង ហើយបន្ទាប់ពីឆ្លងកាត់រឿងបែបនេះ ខ្ញុំមានអារម្មណ៍ថាពិបាកនឹងជួយអ្នកដទៃ។

អ្នកដែលមានអារម្មណ៍ដូចជាខ្ញុំកាន់តែច្រើនឡើង ទំនាក់ទំនងរវាងមនុស្ស និងមនុស្សកាន់តែឆ្ងាយទៅៗ ហើយយើងមិនអាចជួយគ្នាទៅវិញទៅមកបាន។

ត្រូវប្តឹងបន្ទាប់ពីជួយគេ

នៅប្រទេសជប៉ុន ឧបករណ៍ដែលហៅថា AED ត្រូវបានដំឡើងនៅគ្រប់ទីកន្លែង រួមទាំងនៅតាមដងផ្លូវ សាលារៀន និង​ការិយាល័យ។

ចរន្ត​អគ្គិសនី​ត្រូវ​បានបញ្ជូនចូលរាងកាយមនុស្សដែលមានបេះដូងឈប់លោត តាមរយៈការបិទនៅលើដើមទ្រូង ដោយ​​ជួយ​ឲ្យ​បេះ​ដូង​លោត​ឡើងវិញ។

ជីវិតមនុស្សជាច្រើនត្រូវបានជួយសង្គ្រោះតាមវិធីសាស្រ្តនេះ។

នារី​ម្នាក់​បាន​ដួល​សន្លប់​នៅ​តាម​ផ្លូវក្នុងស្ថានភាពបេះដូងឈប់លោត។ បុរសម្នាក់ប្រទះឃើញនាងក៏បានប្រើ AED ដើម្បីជួយសង្គ្រោះនារីម្នាក់នោះ។ ដោយសារតែឧបករណ៍ប្រភេទនេះត្រូវបិទនៅលើរាងកាយ នៅខាងក្នុងសម្លៀកបំពាក់ មនុស្ស​នៅ​ជុំវិញ​បាន​ប្រើ​សម្លៀក​បំពាក់​របស់​ពួក​គេ​ដើម្បី​បាំង​ឲ្យ​នាង ជៀស​វាង​កុំ​ឲ្យ​មនុស្ស​ជា​ច្រើន​មើលឃើញ។

អាយុជីវិតរបស់នារីម្នាក់នោះត្រូវបានជួយសង្គ្រោះ ប៉ុន្តែនៅថ្ងៃបន្ទាប់ ​ឪពុកម្តាយ​របស់ក្មេងស្រីបានប្តឹងបុរសរូបនោះ។

បុរសម្នាក់នោះបាននិយាយថា ការ​ដោះ​សម្លៀក​បំពាក់​របស់​ក្មេង​ស្រី​នៅ​ចំពោះ​មុខអ្នកទាំងអស់គ្នាដែលនៅទី​នោះគឺ​ជា​រឿង​ដែល​បង្ខំ​ចិត្ត។

ប្រសិនបើមិនធ្វើដូចនេះ ក្មេងស្រីម្នាក់នោះនឹងស្លាប់ ហើយពួកគេក៏បានព្យាយាមបាំងឲ្យនាងក្នុងចំណោមហ្វូងមនុស្ស​ផង​ដែរ ប៉ុន្តែ​លទ្ធផល​ចិត្ត​ល្អ​បែរ​ជា​ទទួល​បាន​ពាក្យ​បណ្តឹង​ទៅ​វិញ។

ប៉ូលីសដែលបានទទួលពាក្យបណ្ដឹងក៏មិនល្អប៉ុន្មានដែរ ប៉ុន្តែអ្វីដែលសំខាន់ជាងនេះគឺ ខ្ញុំមិនយល់ហេតុអ្វីបានជាមនុស្ស​ទាំង​នោះ​បែ​រជា​ប្តឹង​អ្នក​ដែល​មាន​គុណ​ជួយ​សង្គ្រោះ​ជីវិត​របស់​ខ្លួន​ឡើយ។

រឿងហេតុដែលបានកើតឡើងធ្វើឲ្យយើងទាំងអស់គ្នាមិនអាចជួយអ្នកដទៃ ឬអាចនិយាយបានថា លែង​ហ៊ាន​ជួយមនុស្ស​ស្រី ទោះ​បី​ជា​ពួក​គេ​កំពុង​ដួល​ក៏​ដោយ។

មិនអាចខឹងនឹងកុមារបានទេ

កាលពីនៅតូច ខ្ញុំធ្លាប់ត្រូវឪពុកម្តាយរបស់មិត្តភ័ក្តិ និងពូមីងអ្នកជិតខាងស្តីបន្ទោសជាច្រើនដង។

លោកគ្រូអ្នកគ្រួដាក់ពិន័យវាយដោយរំពាត់ជាច្រើនដង ហើយស្ទើរតែមិនដឹងថាប៉ុន្មានដងផង។

ប៉ុន្តែនៅសម័យសព្វថ្ងៃ ប្រសិនបើធ្វើរឿងស្រដៀងគ្នានេះ ប្រាកដជាត្រូវឪពុកម្តាយសិស្សប្តឹងភ្លាម។

ឪពុកម្តាយមិនអាចមើលកូនៗរបស់ខ្លួនគ្រប់ពេលនោះទេ ដូច្នេះខ្ញុំគិតថា សង្គមទាំងមូលមានតួនាទីបង្រៀនក្មេងៗ ប៉ុន្តែ​មនុស្ស​នៅ​សម័យ​សព្វ​ថ្ងៃ​មិន​យល់​ពី​ចំណុច​នេះ​ឡើយ។

គ្រូបង្រៀនចង់ខឹងក៏ពិបាកណាស់ដែរ រឿងសិស្សត្រូវគ្រូដាក់ពិន័យមិនមែនជារឿងធំអ្វីឡើយ ប៉ុន្តែឥឡូវនេះបានក្លាយ​ទៅ​ជា​បញ្ហា​ធំ។

គ្រូ​បង្រៀន​ជា​ច្រើននាក់បាត់​បង់​ការងារ​ដោយ​សារ​តែ​រឿង​នេះ។

ស្ថានភាពទាំងនេះច្រើនតែកើតឡើងនៅតំបន់ទីក្រុង ជាពិសេសគឺ Tokyo ។

នៅពេលដែលដំណាក់កាលនគរូបនីយកម្មកាន់តែរីកចម្រើន ចំនួនប្រជាជនកើនឡើង មនុស្សគ្រប់គ្នាចាប់ផ្តើមមាន​ភាព​តាន​តឹង ពួក​គេ​ប្រហែល​ជា​មិន​អាច​រស់​នៅ​ចុះ​សម្រុង​នឹង​មនុស្ស​នៅ​ជុំវិញ​ឡើយ។

ជាការពិតណាស់ មិនមែនគ្រប់គ្នាសុទ្ធតែបែបនេះនោះទេ ប៉ុន្តែស្ថានភាពហាក់បីដូចជាមិនល្អប៉ុន្មានទេ។

កម្ពុជាសព្វថ្ងៃនៅតែជាប្រទេសដ៏ស្រស់ស្អាត ជាកន្លែងដែលមានមនុស្សចិត្តល្អ ចេះជួយគ្នាទៅវិញទៅមក។

តាមរយៈអត្ថបទនេះ ខ្ញុំសង្ឃឹមថា យើងទាំងអស់គ្នានឹងដកយកមេរៀនដ៏មានតម្លៃ កុំបណ្តោយឲ្យរឿងដែលមិនល្អកើត​ឡើង​ដូច​ជា​ស្ថាន​ភាព​នៅ​ទីក្រុង Tokyo សព្វ​ថ្ងៃ ហើយរួមគ្នាជួយដល់ប្រទេសកម្ពុជាឲ្យកាន់​តែ​ល្អ​ប្រសើរ​ឡើង ពោរ​ពេញ​ទៅ​ដោយ​ក្តី​ស្រលាញ់។

Abe Kengo