ប្រវត្តិ​រឿងនិយាយ​ពី​បុគ្គល​ដ៏​អស្ចារ្យ​បំផុត​របស់​ជប៉ុន

ប្រវត្តិរឿង​និយាយពីបុគ្គលដ៏អស្ចារ្យបំផុតរបស់ជប៉ុន។

មនុស្សដ៏អស្ចារ្យបង្កើតបានជាកំពូលស្នាដៃនៅទូទាំងពិភពលោក។

“អ្វីដែលកំពូលវីរបុរសអាចធ្វើបាន ជាអ្វីដែលយើងទាំងអស់គ្នាមិនអាចធ្វើបាន” តើនេះជាគំនិតទូទៅរបស់យើងទាំង​​អស់​​គ្នា​មែន​ទេ?

ប៉ុន្តែសម្រាប់ខ្ញុំ មិនថាបុគ្គលអស្ចារ្យ ឬមនុស្សធម្មតានោះទេ សុទ្ធតែជាមនុស្សនៅក្នុងពិភពលោក មិន​មាន​​​ភាព​​ខុស​​​គ្នា​​​ឡើយ។ ពួកគេប្រហែលជាពូកែជាងយើងត្រង់ចំណុចណាមួយ ប៉ុន្តែពួកយើងក៏អាចពូកែជាងពួក​គេ​​ត្រង់​​ចំណុច​​ណា​​មួយ​​ផង​​ដែរ។

ក្នុង​អត្ថបទ​នេះ យើងនឹងណែនាំដល់អ្នកទាំងអស់គ្នាតួអង្គម្នាក់គឺលោក Itou Hirobumi ជាបុគ្គលដែលធ្លាប់ធ្វើជា​​នាយករដ្ឋ​​មន្ត្រី​​​ដំបូង​​របស់​​ជប៉ុន។

ប្រសិនបើលោកអាចធ្វើដូចនេះបាន ប្រហែលជាយើងទាំងអស់គ្នាក៏អាចធ្វើបានដែរ។

សង្ឃឹមថា តាមរយៈអត្ថបទនេះអាចជួយឲ្យយើងទាំងអស់គ្នាមានភាពជឿទុកចិត្តចំពោះសមត្ថភាពរបស់ខ្លួនក្នុងជីវិត។

នៅពេលដែលសម័យកាលសាមូរ៉ៃបានបញ្ចប់ ហើយចាប់ផ្តើមយុគសម័យថ្មី ជប៉ុនបានធ្វើទំនើបកម្មយ៉ាងឆាប់រហ័ស។

នាយករដ្ឋមន្ត្រីដំបូងរបស់ជប៉ុននាពេលនោះគឺលោក Itou Hirobumi ។

ជាមួយនឹងសមិទ្ធិផលដ៏អស្ចារ្យរបស់ខ្លួន រូបភាពរបស់លោកធ្លាប់ត្រូវបានប្រើសម្រាប់បោះពុម្ពនៅលើក្រដាសប្រាក់ជប៉ុន​​កាល​​ពី​​មុន។

ទោះជាយ៉ាងណា លោកជាមនុស្សដែលមានទេព​កោសល្យ ហើយក៏មានគុណវិបត្តិដែរ ដោយ​សារ​លង់នឹងសម្រស់។ 

ទៅសិក្សានៅប្រទេសអង់គ្លេសតាមបញ្ជារបស់រដ្ឋាភិបាល ប៉ុន្តែហាក់បីដូចជាបុរសម្នាក់នេះបានចំណាយប្រាក់ឧបត្ថម្ភ​​របស់​ខ្លួន​ស្ទើរ​តែ​ទាំង​អស់​ទៅ​លើ​ហាង​បម្រើ​សេវាកម្ម​ផ្លូវ​ភេទ ហើយ​ត្រូវ​បង្ខំ​ឲ្យ​ត្រឡប់​ទៅ​ប្រទេស​វិញ។

ពិតជាអាម៉ាស់ណាស់ក្នុងនាមជាអ្នកតំណាងឲ្យប្រទេសមួយ។

ក្រោយមក លោក​បាន​ត្រឡប់​ទៅ​ប្រទេស​ជប៉ុន​វិញ ហើយកាន់តំណែងដែលសំខាន់ក្នុង​ប្រព័ន្ធ​រដ្ឋាភិបាល។

លោកបានទៅដល់ Hiroshima ដើម្បីត្រៀមប្រយុទ្ធជាមួយរាជវង្សឈីង (ប្រទេសចិនសព្វថ្ងៃ) ។

បន្ទាប់មក លោកបានទៅធ្វើសង្គ្រាម ប៉ុន្តែទោះបីជាកំពុងស្ថិតក្នុងសមរភូមិ​ក៏លោកមិនអាចបញ្ឈប់សកម្មភាព​ចែ​ចង់​ស្រ្តី​បាន​ដែរ។

បុរសម្នាក់នេះហាក់បីដូចជាឆាប់មានអារម្មណ៍ចំពោះអ្នកដទៃណាស់ ទោះបីជាខ្លួនបានរៀបការហើយ ឬភាគីជាមនុស្ស​ដែលមានគ្រួសារក៏មិនសំខាន់ដែរ ពួកគេនៅតែអាចបង្កើតទំនាក់ទំនងលួចលាក់ គេង​ជា​មួយ​គ្នា​ជា​ច្រើន​យប់។

ទោះបីជាយ៉ាងនេះក្តី លោក​នៅ​តែ​ជា​មនុស្ស​ដែល​ទទួល​បានការជឿទុកចិត្តពីរដ្ឋាភិបាល។

ខ្ញុំគិតថា ជាមួយនឹងមុខតំណែងដូចនេះ លោកទទួលបានប្រាក់ចំណូលច្រើនគួរសម ប៉ុន្តែនៅទីបំផុតគាត់បានក្ស័យ​ធន​ព្រោះ​តែ​ចំណាយ​ប្រាក់​យ៉ាង​ច្រើន​សម្រាប់ស្រ្តី ហើយក្លាយជាមនុស្សគ្មានផ្ទះសម្បែង។

នៅពេលនោះ តំណែងរបស់លោកគឺជានាយករដ្ឋមន្ត្រី។

ត្រូវហើយ នាយករដ្ឋមន្ត្រីដំបូងរបស់ជប៉ុនជាមនុស្សដែលគ្មានផ្ទះសម្បែងខណៈពេលដែលកំពុងធ្វើការឲ្យរដ្ឋាភិបាល។

ដូចដែលបានរំពឹងទុក នាយករដ្ឋមន្ត្រីនៃប្រទេសមួយមិនអាចជាមនុស្សដែលគ្មានផ្ទះសម្បែងនោះទេ ដូច្នេះនៅ​ពេល​នោះ​អធិរាជ​បាន​សាង​សង់​ផ្ទះ​ដ៏​ល្អ​ឥត​ខ្ចោះ​មួយ​សម្រាប់​លោក។

សព្វ​ថ្ងៃ​នេះ ទីនោះបានក្លាយជាកន្លែងរស់នៅរបស់នាយក​រដ្ឋមន្ត្រី​បច្ចុប្បន្ន វិមាន​របស់​នាយក​រដ្ឋមន្ត្រី។

ក្រៅពីសាងសង់កន្លែងស្នាក់នៅជូនលោក ព្រះ​ចៅ​អធិរាជក៏ខឹងយ៉ាងខ្លាំងហើយរំលឹកលោកថា “ធ្វើអ្វីក៏ដោយត្រូវ​តែ​មាន​ដែន​កំណត់” ។

លោក Itou Hirobumi ត្រូវបានគេចាត់ទុកថាជាមិត្តភក្តិជិតស្និទ្ធ​នឹង​អ្នក​តាក់តែង​រដ្ឋធម្មនុញ្ញ​សម្រាប់​រដ្ឋាភិបាល​ជប៉ុន​​នៅ​​ពេល​​នោះ។

ទោះជាយ៉ាងណា ធ្លាប់មានការកត់ត្រានិយាយថា លោកបានធ្វើរឿងជាច្រើនជាមួយស្ត្រីលើរទេះសេះពេលដែលកំពុងចេញ​ទៅ​ក្រៅ ហើយលោកក៏ត្រូវបានគេចាត់ទុកថា ជា​អ្នក​ចាប់​ផ្តើម​ទំនោរ​​ផ្លូវ​ភេទនៅលើរថយន្តផងដែរ។

លោក Itou Hirobumi ប្រៀបដូចជាមនុស្សដែលល្មោភស្រីម្នាក់។ យ៉ាងណាមិញ ចំពោះការងារលោកហាក់បីដូចជាបាន​រួមចំណែក​យ៉ាង​ធំ​ធេង ហើយ​​ក៏​​ជា​​បុគ្គល​​ដែល​​បាន​​កសាង​​មូល​​ដ្ឋាន​​គ្រឹះ​នៃ​ប្រទេស​ជប៉ុន​នា​ពេល​សព្វថ្ងៃនេះដែរ។

ទាំងនេះជាឧទាហរណ៍បង្ហាញឲ្យយើងទាំងអស់គ្នាឃើញថា មិនមែនបុគ្គលដ៏អស្ចារ្យ​គ្រប់​រូប​សុទ្ធ​តែ​ពិសេស និងល្អឥតខ្ចោះ​​នោះ​​ទេ។

ទោះបីជាបុគ្គលនោះមានបុគ្គលិកលក្ខណៈខុសគេ និស្ស័យមិនល្អ ឬមានចំណុចខ្វះខាតណាមួយ ប្រហែលជាថ្ងៃណា​មួយ​យើង​អាច​ក្លាយ​ជា​បុគ្គល​ដែល​អស្ចារ្យ​មួយ​រូប បង្កើត​អព្ភូត​ហេតុ​សម្រាប់​មនុស្ស​ជាតិ​មែន​ទេ?

Abe Kengo