តើសេរីភាព​សារព័ត៌មានជាអ្វី? នៅ​ថ្ងៃ​ដែល​ស្ថានីយ៍​ទូរ​ទស្សន៍​ជប៉ុន​ដួល​រលំ

តើសេរីភាព​សារព័ត៌មានជាអ្វី? នៅថ្ងៃដែលស្ថានីយ៍ទូរទស្សន៍ជប៉ុនដួលរលំ

នៅប្រទេសជប៉ុនមានចំនួន ១២៩ ស្ថានីយ៍ទូរទស្សន៍។

ក្នុងចំណោមនោះ ស្ថានីយ៍ទូរទស្សន៍ចំនួន ៥ មានមូលដ្ឋាននៅទីក្រុង Tokyo ដែលគេហៅថាស្ថានីយ៍សំខាន់ ហើយក្នុង​ចំណោម​បណ្តាញ​ស្ថានីយ​សំខាន់​ទាំង​នោះ​នៅ​មាន​ស្ថានីយ៍​ទូរទស្សន៍​ជា​ច្រើន​ផ្សេងទៀត ដែលបង្កើតបានជាបណ្តាញ​ស្ថានីយ៍​ទូរទស្សន៍​ជប៉ុន។

អាចនិយាយបានថា ស្ថានីយ៍សំខាន់គឺជាចំណុចកណ្តាលនៃ​វិស័យស្ថានីយ៍ទូរទស្សន៍ជប៉ុន ប៉ុន្តែស្ថានីយ៍មួយក្នុងចំណោម​នោះ​គឺស្ថានីយ៍ទូរទស្សន៍ Fuji ប្រហែលជាអាចនឹងរលាយបាត់។

ពួកគេបានធ្វើរឿងមួយដែលប្រព័ន្ធផ្សព្វផ្សាយមិនគួរធ្វើ។

ដូច្នេះហើយ តើពួកគេបានធ្វើអ្វីខ្លះទើបធ្លាប់ក្នុងស្ថានភាពបែបនេះ?

១. ជម្លោះជាមួយនឹងអុីនធឺណេត

ពួកគេបានធ្វើសកម្មភាពដែលមិនគួរមួយចំនួននៅពេលដែលបច្ចេកវិទ្យាអុីនធឺណេត​ទើប​តែ​ចាប់​ផ្តើម​អភិវឌ្ឍ​នៅ​​ដើម​​ឆ្នាំ ២០០០ ជាមួយនឹងសកម្មភាពប្រឆាំង។

នៅពេលនោះ ខ្ញុំកំពុងគ្រប់គ្រងគេហទំព័រធំមួយរបស់ជប៉ុន ហើយមានម្តងខ្ញុំធ្លាប់រកមធ្យោបាយសហការជាមួយស្ថានីយ៍​ទូរទស្សន៍​ធំ​របស់​ជប៉ុន។ យ៉ាង​ណា​មិញ លទ្ធផល​ចុង​ក្រោយ ភាគីទាំងពីរមិនបានចុះកិច្ច​សន្យា​ជាមួយ​គ្នា​នោះទេ។

គ្រប់គ្នាយល់ថា “អុីនធឺណេតកំពុងធ្វើឲ្យស្ថានីយ៍ទូរទស្សន៍ធ្លាក់ក្នុងស្ថានភាពត្រូវរំសាយ” ប៉ុន្តែនោះជាមូលហេតុដែល​យើងទាំងអស់គ្នាគួររួមកម្លាំងមែនទេ? ទោះបីជាខ្ញុំនិយាយបែបនេះ ការចរចាបានបញ្ចប់ដោយអារម្មណ៍មិនពេញ​ចិត្ត​ពី​ភាគី​ម្ខាង​ទៀត។

លទ្ធផលគឺពួកគេមិនអាចប្រឈមនឹងក្រុមហ៊ុនដូចជា Netflix បានទេ។

ប្រសិនបើធ្វើសកម្មភាពនៅពេលនោះ ពួកគេអាចបង្កើតអ្វីម្យ៉ាងដែលស្រដៀងនឹង Netflix ។

២. ប្រាក់ចំណូលធ្លាក់ចុះ និងផ្តាច់មុខប្រាក់ចំណេញ

អត្រាអ្នកមើលទូរទស្សន៍កាន់តែធ្លាក់ចុះ ប្រាក់ចំណូលក៏ធ្លាក់ចុះផងដែរ។

យ៉ាងណាមិញ ពួកគេនៅតែរក្សាកម្រិតប្រាក់បៀវត្សរ៍ខ្ពស់ ហើយចាប់ផ្តើមកាត់បន្ថយថវិកាសម្រាប់ក្រុមហ៊ុនដែលផលិតកម្មវិធីតាមកិច្ចសន្យា។

ទូរទស្សន៍ធ្លាប់មានអត្ថន័យយ៉ាងខ្លាំង ព្រោះទូរទស្សន៍ផលិតកម្មវិធីក្នុងទ្រង់ទ្រាយដែលមនុស្សធម្មតា និងអ្នក​ផ្សព្វ​ផ្សាយ​​តាម​​អុីនធឺណេត​​ខ្នាត​​តូច​​មិន​​អាច​​ធ្វើ​​បាន ប៉ុន្តែ​ចំណុចនេះបានបាត់ទៅហើយ។

៣. កំហុសធ្ងន់ធ្ងរ

ដោយសារតែគំនិតគិតថា ស្ថានីយ៍ទូរទស្សន៍ចង់ធ្វើអ្វីក៏បាន ពួកគេបានធ្វើហួសហេតុជាច្រើនដង។

ជប៉ុនជាប្រទេសដែលតែងតែជួបប្រទះស្ថានភាពរញ្ជួយដី និងគ្រោះមហន្តរាយធម្មជាតិផ្សេងទៀត ប៉ុន្តែក្នុងអំឡុងពេល​​​ខំ​ប្រឹង​​ប្រែង​​ជួយ​សង្រ្គោះ ឧទ្ធម្ភាគ​ចក្រ​របស់​ស្ថានីយ៍​ទូរទស្សន៍​ហោះ​នៅ​លើ​មេឃ ដោយធ្វើឲ្យគេមិនអាចស្តាប់​ឮ​សំឡេង​របស់​ជន​រង​គ្រោះ។

នៅពេលដែលមានការ​រិះគន់ទាក់​ទង​នឹង​បញ្ហា​ទាំងនេះ ពួក​គេ​បានប្រកាសថា៖ “ការ​រាយការណ៍​ព័ត៌មានគឺជាការ​ងារ​របស់​ពួក​យើង” ។

ការមើលងាយអាយុជីវិតមនុស្សបែបនេះពិតជាអាក្រក់ណាស់។

៤. មើលស្រាលស្ត្រីគឺជាបញ្ហាធ្ងន់ធ្ងរ

នៅ​ស្ថានីយ​ទូរទស្សន៍ មានអ្នកផ្សាយព័ត៌មានស្រីមួយចំនួន។ លក្ខខណ្ឌជ្រើសរើសផ្តោតលើរូបរាងខាងក្រៅ ដូច្នេះ​ភាគ​ច្រើន​សុទ្ធ​តែ​ជា​ស្រី​ស្អាត។

បញ្ហាមនុស្សស្រីត្រូវបង្ខំឲ្យបម្រើផ្លូវភេទតារា​ទូរទស្សន៍​ដែលល្បីបានក្លាយជាប្រធានដែលទទួលការចាប់​អារម្មណ៍​យ៉ាង​ខ្លាំង។

មនុស្សស្រីដែលទទួលការធ្វើបាបស្ទើរតែបាត់បង់ស្មារតី ប៉ុន្តែភាគីស្ថានីយ​ទូរទស្សន៍បែរជាបដិសេធមិន​ជាប់​ពាក់ព័ន្ធ​​អ្វី​​ឡើយ។

មានការរិះគន់ជាច្រើននិយាយថា ការបដិសេធនេះគឺមិនត្រឹមត្រូវនោះទេ។

៥. រហូតដល់ថ្នាក់មិនអាចសុំទោស

សន្និសីទសារព័ត៌មានមួយត្រូវបានធ្វើឡើងដើម្បីសុំទោសចំពោះបញ្ហាខាងលើ ប៉ុន្តែបែរជាហាមឃាត់អ្នកថតព័ត៌មាន​ចូល​រួម​សន្និសីទ។

ជា​ថ្មី​ម្តង​ទៀត ទង្វើនេះបានធ្វើឲ្យសាធារណៈជនមាន​ការ​ខឹង​សម្បារ​យ៉ាងខ្លាំង។

ព្រោះថានៅពេលដែលមានរឿងអាស្រូវ ឬបញ្ហាដែលបង្កឡើងដោយក្រុមហ៊ុនផ្សេង ពួកគេនឹង​បង្ហាញ​​នៅ​លើ​កញ្ចក់​​ទូរ​ទស្សន៍ ហើយ​​វាយ​ប្រហារ​លើស​ពី​ការ​ចាំ​បាច់ ប៉ុន្តែនៅ​ពេលដែលទាក់ទងនឹងរឿងរបស់ខ្លួន ពួកគេបែរជាគេចវេះ មិន​ប្រឈម​មុខ​ដោយ​ផ្ទាល់​ឡើយ។

៦. បិទបាំងរឿងអាក្រក់

ផលប្រយោជន៍ត្រង់ថា មានទំនាក់ទំនងជិតស្និទ្ធជាមួយរដ្ឋាភិបាលជប៉ុន និងសាជីវកម្មដែលធំ មិនចេញផ្សាយព័ត៌មាន​ដែល​មិន​អំណោយ​ផល​ដល់​ខ្លួន ជា​អ្វី​ដែល​ក្រុម​ហ៊ុន​នេះ​ត្រូវ​រិះ​គន់​នៅ​លើ​អុីនធឺណេត។

ហើយហាក់បីដូចជាក្រោមការអភិវឌ្ឍរបស់អុីនធឺណេត រឿងទាំងនេះមិនអាចបិទបាំងបន្ត​ទៀត។

ប្រហែលជាពួកគេគិតថា បើទោះបីជាពួកគេធ្វើរឿងដែលមិននឹកស្មានដល់ទាំងនេះក៏ស្ថានីយទូរទស្សន៍មិនក្ស័យ​ធន​នោះ​ដែរ។ ប៉ុន្តែ​មើល​ទៅ​ពេល​នេះ​ស្ថានភាព​មិន​ដូច​មុនឡើយ។

ក្នុងប្រព័ន្ធផ្សព្វផ្សាយមានចំណុចសំខាន់មួយត្រង់ថា ត្រូវចេញផ្សាយដោយយុត្តិធម៌។ ម្យ៉ាងវិញទៀត ដំណើរការត្រូវ​ពឹងលើទស្សនិក​ជន និង​ក្រុម​ហ៊ុន​ឧបត្ថម្ភ។ ប្រសិនបើបំភ្លេចចំណុចសំខាន់នេះ ហើយធ្វើអ្វីដែលខ្លួនចង់​នឹង​បាត់​បង់​​គ្រប់​​យ៉ាង។

នេះ​មិន​ត្រឹម​តែ​ត្រូវសម្រាប់ស្ថានីយ​ទូរទស្សន៍​ប៉ុណ្ណោះ​ទេ ថែមទាំងត្រូវចំពោះការងារទាំងអស់ផងដែរ។

ខ្ញុំគិតថា រឿងនេះជាមេរៀនល្អនិយាយពីសារៈសំខាន់នៃការគិតឲ្យបានហ្មត់ចត់ចំពោះមូលហេតុដែលយើងធ្វើអ្វី​មួយ ហើយ​ចំណុច​អ្វី​នឹង​ធ្វើ​ឲ្យ​អាជីវកម្ម​នោះ​កាន់​តែ​មាន​ភាព​រីក​ចម្រើន។ តើ​ត្រូវ​ទេ​អ្នក​ទាំង​អស់​គ្នា?

Abe Kengo