Bushido មិន​​មែន​​ជា​​មូល​​ដ្ឋាន​អប់រំ​ក្នុង​គោលបំណងប្រយុទ្ធ​​នោះ​​ទេ តើ​កម្លាំង​ពិត​របស់​អ្នក​ប្រយុទ្ធ​ជា​អ្វី?

Bushido មិនមែនជាមូលដ្ឋានអប់រំក្នុងគោលបំណងប្រយុទ្ធនោះទេ តើកម្លាំងពិតរបស់អ្នកប្រយុទ្ធជាអ្វី?

ប្រហែលជាអ្នកទាំងអស់គ្នាធ្លាប់លឺពាក្យ “Bushido” ហើយមែនទេ? ក្នុងអត្តបទថ្ងៃនេះ ខ្ញុំសូមអនុញ្ញាតពន្យល់អំពីពាក្យនេះ។

“Bushido” – ប្រែថា៖ ក្បួនច្បាប់របស់អ្នកចម្បាំងជប៉ុន។

ទោះបីជាត្រូវបានចាត់ទុកដូចជាមេរៀនសម្រាប់សាមូរ៉ៃ ប៉ុន្តែតាមពិតទៅ Bushido មិនទាមទារ ឬត្រូវតែមានកម្លាំង​បាយ​នោះ​ទេ។

ថ្វីត្បិតតែ ពួកគេជាវណ្ណៈគ្រប់គ្រង ប៉ុន្តែសាមូរ៉ៃត្រូវហាមឃាត់មិនឲ្យជាប់ពាក់ព័ន្ធនឹងបញ្ហាដែលបង្កឡើងដោយប្រជាជន ហើយ​ដក​ដាវក្នុងគោលបំណងផ្សេងក្រៅពីតួនាទីនោះឡើយ។

ដូច្នេះតើពួកគេត្រូវមានកម្លាំងបែបណា?

យើងនឹងនិយាយពីកម្លាំងពិតប្រាកដរបស់សាមូរ៉ៃ បើប្រៀបទៅនឹងទាហាន និង​មេទ័ព​នៅបណ្តាប្រទេសផ្សេងទៀត ចំណុច​ពិសេសដែលពួកគេត្រូវតែមានគឺអ្វី។

ការអប់រំគឺជាកត្តាដែលសំខាន់ដើម្បីដឹងអំពីកម្លាំងពិតប្រាកដ

កម្លាំងពិតដែលសាមូរ៉ៃត្រូវតែមាន និយយឲ្យចំទៅសំដៅលើការបញ្ចេញមតិ និងសកម្មភាពទាំងអស់​ដែល​ត្រូវតែត្រឹមត្រូវ។

ដើម្បីដឹងថាអ្វីទៅទើបត្រឹមត្រូវ សាមូរ៉ៃត្រូវបង្ខំឲ្យឆ្លងកាត់ការរៀនសូត្រ។

មុខវិជ្ជាប្រវត្តិសាស្ត្រ និងគណិតវិទ្យាគឺជាមុខវិជ្ជាទូទៅ យ៉ាងណាមិញ ការអប់រំសាមូរ៉ៃថែមទាំងរួមបញ្ចូលការរៀនសូត្រ ហើយយល់ច្បាស់អ្វីដែលស្របនឹងទង្វើរបស់មនុស្ស ជាមួយនឹងការបណ្តុះបណ្តាលរាងកាយ។

គោលការណ៍ទាំង ៥ ក្នុង Bushido 

មាន ៥ ចំណុចដែលបង្ហាញអំពីភាពត្រឹមត្រូវ និងកម្លាំង៖

。 ជាដំបូងគឺពាក្យ 義 (ぎ) – អត្ថន័យ

នេះជាចំណុចដែលត្រូវបានបង្រៀនយ៉ាងតឹងរឹង។

នៅពេលដែលប្រយុទ្ធជាមួយនឹងសត្រូវ មិនត្រូវប្រើល្បិចអាក្រក់នោះទេ ប៉ុន្តែត្រូវប្រយុទ្ធដោយយុត្តិធម៌។

。បន្ទាប់គឺជាពាក្យ 勇 (ゆう) – ក្លាហាន

មិនថាសត្រូវខ្លាំងយ៉ាងណានោះទេ ត្រូវក្លាហានប្រឈមមុខ តស៊ូអស់ពីកម្លាំងដើម្បីយុត្តិធម៌។

ឈ្នះ ឬចាញ់មិនសំខាន់នោះទេ ទោះបីជាត្រូវលះបង់ជីវិត នៅតែប្រយុទ្ធឲ្យអស់ពីកម្លាំងដើម្បីយុត្តិធម៌ នោះហើយទើប​ជា​រូបរាងដ៏គួរឲ្យសរសើរបំផុតរបស់អ្នកចម្បាំង។

。ពាក្យ 仁 (じん) – មនុស្ស

ចេះអត់ឱនចំពោះអ្នកដទៃ។

ទឹកចិត្តកក់ក្តៅហ៊ានការពារបុគ្គលដែលទន់ខ្សោយ។ ប្រសិនបើពាក្យ 義 និងពាក្យ 勇 តំណាងឲ្យកម្លាំងរឹងមាំរបស់បុរស រីឯពាក្យ 仁 បង្កប់អត្ថន័យទន់ភ្លន់នៃទឹកចិត្តរបស់ស្រ្តី។

。ពាក្យ 礼 (れい) – ច្បាប់ទម្លាប់

គឺជាពាក្យដែលបង្ហាញពីអត្តន័យគួរសម។

រួមទាំងច្បាប់ទាក់ទងនឹងការប្រព្រឹត្តគួរសមចំពោះអ្នកមើលថែទាំយើង ការ​ហូប​ចុក ការធ្វើដំណើរ និង​ការ​ប្រា​ស្រ័យ​​ទាក់​ទង​​គ្នា…

。誠 (まこと) – ស្មោះត្រង់

ការកុហក និងបោកប្រាស់ត្រូវបានចាត់ទុកដូចជាទង្វើដ៏អាម៉ាស់បំផុតរបស់សាមូរ៉ៃមួយរូប។

ដោយសារមូលហេតុនេះហើយ នៅពេលដែលសាមូរ៉ៃឲ្យខ្ចី ឬជំពាក់ប្រាក់គ្នាទៅវិញទៅមក ពួកគេតែងតែមិនធ្វើកិច្ចសន្យាខ្ចីប្រាក់នោះទេ។

តាមពិតទៅ ក៏មានករណីជាច្រើនមិនស្មោះត្រង់ដែរ ហើយអ្នកដែលធ្វើរឿងទាំងនោះគ្រាន់តែទទួលការរិះគន់ និងត្រូវគេចាត់ទុកថាគ្មានភាពថ្លៃថ្នូរក្នុងវណ្ណៈសាមូរ៉ៃប៉ុណ្ណោះ។

តើកិត្តិយសរបស់សាមូរ៉ៃជាអ្វី?

ស្វែងរកប្រាក់ជាអ្វីដែលឈ្មួញម្នាក់ត្រូវធ្វើ ក៏ដូចជាគោលការណ៍​ទាំង ៥ ខាង​លើដែរ​ ជាអ្វីដែលសាមូរ៉ៃត្រូវគោរពអនុវត្ត​​យ៉ាង​​តឹងរឹងដើម្បី​ការពារ​កិត្តិយស​។

ការអនុវត្តចំណុចទាំងនេះមិនត្រឹមតែជាស្មារតីរបស់សាមូរ៉ៃប៉ុណ្ណោះទេ ថែមទាំងជាសំណើ​ពីប្រពន្ធកូនរបស់ពួក​គេ​ផង​ដែរ។

ទោះបីជាមិននៅសល់ប្រាក់ក៏ដោយ ការជួយអ្នក​ដទៃ​នៅ​តែ​ជា​អាទិភាព​ចម្បង។

សាមូរ៉ៃជាវណ្ណៈ​គ្រប់គ្រងនាសម័យនោះ ហើយខ្ញុំយល់ថា ប្រហែល​ជា​មិន​មាន​វណ្ណៈ​គ្រប់​គ្រងផ្សេងនៅលើពិភពលោកមានគំនិតបែបនេះនោះទេ។

ក្រៅពីនេះ ភាពស្មោះត្រង់ក៏ជាកិត្តិយសរបស់សាមូរ៉ៃផងដែរ។

ថ្វីត្បិតតែ ពួកគេជាវណ្ណៈគ្រប់គ្រង ប៉ុន្តែក្នុងចំណោមសាមូរ៉ៃនៅតែមានការបែងចែកវណ្ណៈ។

ភាពស្មោះត្រង់សំដៅលើការខិតខំប្រឹងប្រែងអស់ពីសមត្ថភាពចំពោះថ្នាក់លើរបស់ខ្លួន។ ដូច្នេះក្នុង​ករណី​ដែល​ថ្នាក់​លើ​​​ធ្វើ​អ្វី​មួយ​ខុសឆ្គង សាមូរ៉ៃមួយរូបហ៊ានលះបង់ជីវិតជួយម្ចាស់របស់ខ្លួនកែប្រែកំហុស។ ពួកគេអាចរក្សាភាពស្ងៀម​​ស្ងាត់​ដើម្បីជៀសវាងការបាត់បង់ប្រយោជន៍ផ្ទាល់ខ្លួន ប៉ុន្តែពួកគេបែរជានិយាយតាមត្រង់ បើទោះបីជាពួក​គេ​ត្រូវ​​បញ្ជា​ឲ្យ​វះ​ពោះ​ខ្លួន​ឯង​ព្រោះ​ហ៊ាន​រិះគន់ថ្នាក់លើ ក៏ពួកគេសុខចិត្តដែរ ទាំងនេះជាភាពស្មោះត្រង់ដែលសំខាន់ចំពោះ​​សាមូរ៉ៃ​​មួយ​​រូប។

ស្មារតីសាមូរ៉ៃដែលមនុស្សធម្មតាមិនអាចយកតម្រាប់តាមបាន។ នោះហើយជាមូលហេតុដែលសាមូរ៉ៃពិតប្រាកដមួយ​រូប​ទទួលបានការស្រលាញ់ពីប្រជាជន។

ជាការពិតណាស់ មិនមែនសាមូរ៉ៃគ្រប់រូបសុទ្ធតែគោរពតាមការបង្រៀនទាំងនេះនោះទេ ហើយក៏មានករណីលើកលែង​មួយ​ចំនួន​ដែរ។

ក្នុងសម័យសព្វថ្ងៃខ្ញុំគិតថា យើងគួរយកតម្រាប់តាមទស្សនៈរបស់សាមូរ៉ៃមួយផ្នែក។ ទាំងនិយោជិត និងនិយោជក មិនថាអ្នកជាថ្នាក់លើ ឬចៅហ្វាយ កុំធ្វើខ្លួនជាមនុស្សអស្ចារ្យ។ ក្នុងនាមជាថ្នាក់លើត្រូវត្រួតពិនិត្យឲ្យបានច្បាស់​លាស់ និងការពារបុគ្គលិករបស់ខ្លួន។

ខ្ញុំជឿថា ដើម្បីឲ្យក្រុមហ៊ុនរបស់ខ្លួនរីកចម្រើនជាងមុន អ្នកទាំងអស់គ្នានឹងត្រូវការបុគ្គលិកឆ្នើម។

តើអ្នកទាំងអស់គ្នាចង់ក្លាយទៅជាសាមូរ៉ៃទាន់សម័យមួយរូបចាប់ពីពេលនេះដែរទេ?

Abe Kengo