ប្រភេទ​អាហារ​ក្លែង​បន្លំ​ពិត​មួយ​ចំនួន​នៅ​ប្រទេស​ជប៉ុន

ប្រភេទអាហារក្លែងបន្លំពិតមួយចំនួននៅប្រទេសជប៉ុន។

សូមជម្រាបសួរអ្នកទាំងអស់គ្នា បច្ចុប្បន្ននៅលើទីផ្សារជប៉ុនមានអាហារក្លែងបន្លំពិតច្រើនប្រភេទ។ ហើយប្រហែលជា​ក្នុង​ចំណោម​យើង​ទាំង​អស់​គ្នា​ធ្លាប់​បរិភោគ ប៉ុន្តែ​បែរ​ជា​មិន​ដឹង​រឿង​នេះ

ចូរយើងស្វែងយល់ប្រភេទអាហារទាំងនេះក្នុងអត្តបទខាងក្រោមជាមួយនឹង JAPO ទាំងអស់គ្នា។

Kanikama – ប្រហិតសាច់ក្តាម

ប្រហែលជាយើងទាំងអស់គ្នានៅតែរើសយកប្រហិតសាច់ក្តាមទាំងដែលដឹងថានោះជាផលិតផលក្លែងបន្លំក៏ដោយ។

ថ្វីត្បិតតែ ត្រូវបានផលិតឡើងស្រដៀងនឹងសាច់ក្តាម ប៉ុន្តែគ្រឿងផ្សំដែលយកមកផលិតប្រហិតសាច់​ក្តាម​គឺ​ជា​ត្រីទៅ​​វិញ។

ប្រហិតសាច់ក្តាមពេញនិយមតាមបណ្តាប្រទេសផ្សេងទៀតជាងនៅប្រទេសជប៉ុនទៅទៀត។

ហើយប្រហិតសាច់ក្តាមនៅមានអាថ៌កំបាំងមួយ ប្រហិតសាច់ក្តាមគឺជាលទ្ធផលដែលអ្នកផលិតទទួលបាននៅពេលដែល​ព្យាយាមផលិតអាហារដែលមានរសជាតិដូចជាខ្ញែសមុទ្រ ទាំងនេះជាប្រភពដើមរបស់ប្រហិតសាច់ក្តាម។

អាច​និយាយ​បាន​ថា​ ចំណុចនេះជាភាព​បរាជ័យរបស់ផលិត ព្រោះថាអ្នកបរិភោគគ្រាន់តែមានអារម្មណ៍ដូចរស​ជាតិ​ប្រហិតសាច់ក្តាមជាជាងខ្ញែសមុទ្រ។ ដោយសារមូលហេតុនេះហើយ ទើបគេសម្រេចចិត្តកែលម្អ ដូច្នេះលទ្ធផលដែល​ទទួល​បានគឺប្រហិតសាច់ក្តាម ដែលមើលទៅដូចជាសាច់ក្តាមពិតនៅលើទីផ្សារសព្វថ្ងៃនេះ។

ចំពោះគំនិតផ្ទាល់របស់ខ្ញុំទាក់ទងនឹងចំណុចដែលប្រជាជនជប៉ុនខំប្រឹងធ្វើគ្រប់យ៉ាងឲ្យមើលទៅដូចផលិតផលពិត​អាច​ចាត់​ទុក​ដូច​ជា “របៀបរស់នៅដែលខុសឆ្គង” ។

ដោយសារបរិមាណក្តាមដែលចាប់បាននៅលើពិភពលោកកំពុងថយចុះ ដូច្នេះខ្ញុំយល់ថា តម្រូវការប្រើប្រាស់នឹង​កើន​ឡើង​នា​ពេល​អនាគត។

ម្យ៉ាងវិញទៀត ខ្ញុំក៏ចង់ចែករំលែកនិយាយពីស៊ូស៊ីប្រហិតសាច់ក្តាមដែលមើលទៅដូចជាពេញនិយមនៅបណ្តាប្រទេស​ផ្សេង​ទៀត ប៉ុន្តែ​នៅជប៉ុនយើងស្ទើរតែមិនដែលឃើញអ្នកហូបមុខម្ហូបនេះនោះទេ។ ផ្ទុយទៅវិញ យើងអាចមើលឃើញថា ប្រហិត​សាច់​ក្តាមត្រូវបានប្រើជាគ្រឿងផ្សំហូបជាមួយនឹងសាឡាត់។

ថ្វីត្បិតតែ បានខិតខំប្រឹងប្រែងយ៉ាងខ្លាំងក្នុងការផលិត ប៉ុន្តែគួរឲ្យសោកស្ដាយ ប្រហិតសាច់ក្តាមបែរជាត្រូវបានគេ​ហៅ​ថា “របស់ក្លែងក្លាយ” និងត្រូវចំអកនៅក្នុងប្រទេសជប៉ុន។

ខ្ញុំសង្ឃឹមថា គុណភាពផលិតផលមួយមុខនេះអាចកែលម្អបន្ថែម ហើយឈានដល់កម្រិតដែលអាចបោកបញ្ឆោតអ្នក​បរិភោគ​នៅ​ជប៉ុន។

Negitoro – ត្រីធូណាចិញ្ច្រាំ

មុខម្ហូប Negitoro នេះគេប្រើចំណែកសាច់ដែលនៅជិតឆ្អឹងខ្នងនៃប្រភេទត្រីធូណាលំដាប់ខ្ពស់ហៅថាត្រីធូណាព្រុយ​ខៀវ។

វិធីសាស្រ្តកោសយកសាច់កណ្តាលឆ្អឹងគេហៅថា “negiru” ។ សាច់ត្រង់ផ្នែកនេះមានគុណភាពល្អ និងត្រូវបានគេ​ហៅ​​ថា negitoro ។ ឈ្មោះ​មុខ​ម្ហូប​មិន​មែន​មក​ពី​មាន​ស្លឹក​ខ្ទឹម (negi – ពាក្យមានសំឡេងដូចគ្នាក្នុងភា​សាជប៉ុន) ក្នុង​ម្ហូប​នោះ​ទេ។

ដើមឡើយ នេះជាផលិតផលលំដាប់ខ្ពស់ ប៉ុន្តែឥឡូវនេះតម្លៃថោកជាងមុនហើយ។ យ៉ាងណាមិញ ប្រភេទនេះត្រូវបាន​ផលិតដោយប្រើត្រីធូណាដែលមិនមានពណ៌ដិត លាយជាមួយប្រេងបន្លែ និងសារធាតុបន្ថែមពណ៌។ ប្រភេទមួយ​ចំនួន​ដែល​ថោក​ជាង​នេះ​ត្រូវបានផលិតពីសាច់ត្រី Lampris guttatus ជំនួសឲ្យត្រីធូណា។

Negitoro មួយចំនួនអាចនឹងមានផ្ទុកសារធាតុរក្សាទុក ដូច្នេះប្រសិនបើអ្នកចង់បរិភោគមុខម្ហូបនេះ ចូរ​យើង​ទាំង​​អស់​​គ្នា​ប្រុង​ប្រយ័ត្នក្នុង​ការ​ជ្រើស​រើស​ដើម្បីជៀសវាងផលិតផលក្លែងបន្លំ។

ស៊ុត

ក្នុងប្រអប់បាយដែលលក់នៅម៉ាតតែងតែមានស៊ុតនៅពីលើ ស៊ុត​មួយគ្រាប់នេះមើលទៅដូចជាមិនឆ្អិន​ប៉ុន្មាន​ទេ ហើយ​មើលទៅដូចជានៅទន់ខ្លាំង។ យ៉ាង​ណា​មិញ នៅ​ពេល​ដែល​ខ្ញុំ​ប្រើ​មីក្រូវ៉េវ​សម្រាប់​កម្តៅ​ប្រអប់​បាយ​ក៏​ស៊ុតមិន​រឹង​នោះដែរ។ ចំពោះករណីនេះ ប្រសិនបើនោះជាស៊ុតធម្មតាប្រាកដ​ជា​រឹង ដូច្នេះអាចនិយាយបានថា នោះ​គឺ​ជា​ស៊ុត​ក្លែង​ក្លាយ។

ស៊ុតក្លែងក្លាយត្រូវបានផលិតឡើងដោយការលាយស៊ុតជាមួយប្រេង និង gelatin… ដូច្នេះហើយ ស៊ុតនឹងមិនរឹង​ពេល​កម្តៅ​នោះ​ទេ។

ម្យ៉ាងវិញទៀត ប្រសិនបើចង់សាកល្បងចៀនក្នុងខ្ទះ ស៊ុតនេះនឹងរលាយ។

ដោយផ្អែកលើការផលិតស៊ុតក្លែងក្លាយទាំងនេះ ការប្រើស៊ុតស្ងោរទន់ដែលដាក់បន្ថែមក្នុងប្រអប់បាយកាន់​តែ​មាន​ភាព​ងាយ​ស្រួល។

តើអ្នកទាំងអស់គ្នាយល់យ៉ាងណាដែរ? ទាក់ទងនឹងចំណុចដែលថា ប្រជាជនជប៉ុនប្រើប្រាស់បច្ចេកទេសពិសេសបង្កើត​ផលិត​ផល​ក្លែង​បន្លំ​ដើម្បីធ្វើជាគ្រឿងផ្សំសម្រាប់មុខម្ហូបលំដាប់ខ្ពស់ ឬពិបាកចម្អិន។

ប្រហែលជានៅពេលអនាគត បច្ចេកទេសផលិតអាហារក្លែងក្លាយអាចនឹងក្លាយជាដំណោះស្រាយចំពោះវិបត្តិសេដ្ឋកិច្ច​​ដែល​​អាច​​កើត​​មាន។

Abe Kengo