កន្លងផុតរយៈពេលមួយរយឆ្នាំនៅតែចងចាំគុណស្រយ មូល​ហេតុ​ដែល​តួ​ក​គី​ជា​ប្រទេសស្និទ្ធស្នាលនឹងជប៉ុន

កន្លងផុតរយៈពេលមួយរយឆ្នាំនៅតែចងចាំគុណស្រយ មូលហេតុដែលតួ​ក​គីជាប្រទេសស្និទ្ធស្នាលនឹងជប៉ុន

សម្រាប់ពួកយើងជាជនជាតិជប៉ុន យើងដឹងគុណយ៉ាងជ្រាលជ្រៅចំពោះអ្នកដែលស្និទ្ធស្នាលនឹងជប៉ុននៅជុំវិញពិភព​លោក។ ចំណុច​ទាំង​នេះ​បាន​មក​ពី​ការ​ខិត​ខំប្រឹង​ប្រែង​របស់​ប្រជាជន​ជប៉ុន​ក្នុង​ប្រវត្តិ​សាស្ត្រ។ 

គេ​និយាយ​ថា មូលហេតុ​ដែលតួកគីស្និទ្ធស្នាលនឹងជប៉ុនយ៉ាងនេះក៏ព្រោះតែទង្វើរបស់ប្រជាជនជប៉ុនដែល​មិន​ស្គាល់​ឈ្មោះ។

អំឡុងពេល ១០០ ឆ្នាំក្រោយនៅតែធ្វើឲ្យមនុស្សចងចាំ ដូច្នេះតើមូលហេតុជាក់ស្តែងមកពីអ្វី? ចូរយើងស្វែងយល់បន្ថែមក្នុងអត្តបទ​នេះ។

រដ្ឋាភិបាលប្រទេសតួកគីផ្តល់អាទិភាពចំពោះប្រជាជនជប៉ុនជាងពលរដ្ឋរបស់ខ្លួន

ខណៈពេលដែលបណ្តាប្រទេសនៅមជ្ឈិមបូព៌ា អុីរ៉ង់ និងអុីរ៉ាក់កើតមានសង្គ្រាម ប្រទេសជាច្រើនបានបញ្ជូនក្រុមជំនួយ​ទៅជួយសង្គ្រោះពលរដ្ឋរបស់ខ្លួន។ យ៉ាងណាមិញ រដ្ឋាភិបាលជប៉ុនបានធ្វើសកម្មភាព​យឺត​យ៉៉ាវ ដោយទុកឲ្យប្រជាជន​ជប៉ុន​ជា​ច្រើន​ជាប់​គាំង​ក្នុង​ប្រទេស​នោះ ហើយស្ថិតក្រោមស្ថានភាពគ្រោះ​ថ្នាក់​ដល់​អាយុជីវិត។ ក្នុងគ្រាអាសន្ន​នោះ ប្រជាជន​ជប៉ុន​ដែល​បាន​រៀបរាប់​ខាងលើទទួលបានការជួយសង្គ្រោះពី​រដ្ឋាភិបាលប្រទេសតួកគី។

រដ្ឋាភិបាលប្រទេសតួកគីបានបញ្ជូនយន្តហោះទៅកាន់ទីតាំងនោះមុនជប៉ុន ហើយអ្វីដែលគួរឲ្យភ្ញាក់ផ្អើលត្រង់ថា ពួក​គេ​បានផ្តល់អាទិភាពជម្លៀសពលរដ្ឋជប៉ុនមុនពលរដ្ឋរបស់ខ្លួន។

នៅពេលនោះ ប្រជាជនតួកគីចំនួន ៥០០ នាក់ជាប់គាំងក្នុងតំបន់នោះ ប៉ុន្តែពួកគេត្រូវបានបង្គាប់ឲ្យធ្វើដំណើរតាម​ផ្លូវ​គោក ចំណែកឯប្រជាជនជប៉ុនត្រូវបានបញ្ជូនឡើងយន្តហោះ។

ខណៈពេលនោះ ឯកអគ្គរដ្ឋទូតប្រទេសតួកគីប្រចាំនៅជប៉ុនបានធ្វើសេចក្តីថ្លែងការណ៍ដូចខាងក្រោម៖

“សូមចាត់ទុករឿងនេះប្រៀបដូចជាការអរគុណដែលយើងមានចំពោះប្រទេសរបស់អ្នកព្រោះរឿងដែលកន្លងផុតទៅ​កាល​ពី​អតីតកាល” ។

ទន្ទឹមនឹងនេះ ដូចដែលយើងដឹងហើយថា ប្រជាជនតួកគីក៏យល់ស្របទាំងស្រុងនឹងការណែនាំរបស់រដ្ឋាភិបាលផង​ដែរ។

ដូច្នេះហើយ តើ​មាន​រឿងអ្វីកើត​ឡើង​កាល​ពី​អតីតកាល​ដែល​ធ្វើ​ឲ្យ​ពួក​គេ​សម្រេច​ចិត្ត​បែប​នេះ?

ប្រជាជនជប៉ុនដែលមិនស្គាល់អត្តសញ្ញាណបានខំប្រឹងអស់ពីសមត្ថភាពដើម្បីជួយសង្គ្រោះកប៉ាល់របស់តួកគីដែលហាក់​ដូច​ជា​គ្មាន​សង្ឃឹម

នៅឆ្នាំ ១៨៩០ នាវាចម្បាំងដែលដឹកបេសកជនរបស់តួកគី (នាពេលនោះជាចក្រភព Osman) បានលិចដោយសារព្យុះ​ដែល​នៅ​ជិត​ជប៉ុន។ ឧបទ្ទវហេតុ​នេះបានធ្វើឲ្យមនុស្សជាង ៥០០ នាក់ស្លាប់ និងបាត់ខ្លួន។

ដោយពឹងលើការខិតខំប្រឹងប្រែងរបស់ប្រជាជននៅភូមិនេសាទក្នុងខេត្ត Wakayama ដែលនៅជិតកន្លែងគ្រោះថ្នាក់​បំផុត មនុស្ស​ចំនួន ៦៩ នាក់ត្រូវបានជួយសង្គ្រោះ។ មិនត្រឹមតែលិចនាវាចម្បាំងប៉ុណ្ណោះទេ សមុទ្របោកបក់យ៉ាង​ខ្លាំងដោយ​សារ​ខ្យល់​ព្យុះ រហូតដល់ថ្នាក់អ្នកដែលទៅជួយសង្គ្រោះត្រូវត្រៀមចិត្តលះបង់ជីវិតផងដែរ។

ក្នុងស្ថានភាពនោះ ទូកនេសាទតូចមួយបានធ្វើដំណើរឆ្ពោះទៅកាន់សមុទ្រដែលកំពុងបោកបក់ អ្នកដែលមិនខ្លាច​ស្លាប់​បានលោតចូលសមុទ្រដោយសង្ឃឹមថាអាចជួយសង្គ្រោះអ្នកនៅរស់។ ក្រោយពេលរកឃើញ ពួកគេបានប្រើ​កំដៅ​រាង​កាយ​របស់​ខ្លួន​ដើម្បី​ជួយ​ប្រជាជន​តួកគី​ដែល​កំពុង​ត្រជាក់​ឲ្យ​កក់​ក្តៅ ហើយប្រញាប់នាំពួកគេត្រឡប់ទៅ​វិញ។

ស្ត្រី និងកុមារជាច្រើននាក់ក៏បានចូលរួមការជួយសង្គ្រោះផងដែរ ពួកគេជួយសង្គ្រោះតាមរយៈការសង្គ្រោះបឋម និង​រៀប​ចំ​អាហារ​សម្រាប់អ្នកដែលជួបគ្រោះថ្នាក់។ នៅ​ពេល​នោះ​ស្ថានភាព​ភូមិ​នេសាទមាន​ការ​លំបាកយ៉ាងខ្លាំង ខណៈ​ពេល​ដែល​អាហារ​សម្រាប់​ខ្លួន​ក៏​មិន​មាន ពួកគេ​នៅ​តែ​ផ្តល់​អាទិភាពជូនអាហារដល់ជនរងគ្រោះ។

សាកសពមួយចំនួនដែលបោកបក់ចូលឆ្នេរសមុទ្រក៏ត្រូវបានអ្នកភូមិនេសាទកប់យ៉ាងត្រឹមត្រូវ។ ឧប្បត្តិហេតុនេះត្រូវបានផលិតជាខ្សែភាពយន្តក្នុងឆ្នាំ ២០១៥ ប្រសិនបើអ្នកទាំងអស់គ្នាចង់ស្វែងយល់បន្ថែមអាចរកមើលខ្សែភាព​យន្ត​នេះ​បាន។

នៅជប៉ុនព្រឹត្តិការណ៍នេះមិនត្រូវបានកត់ត្រាក្នុងប្រវត្តិសាស្ត្រនោះទេ ដើម្បីចៀសវាងការរំលឹកពីឧប្បត្តិហេតុដ៏​សោក​សៅ​នេះ ប៉ុន្តែប្រជាជនតួកគីហាក់បីដូចជាដឹងពីរឿងនេះតាមរយៈប្រវត្តិសាស្ត្ររបស់ពួកគេ ហើយទោះបីជា ១០០ ឆ្នាំ​ក្រោយ​មក​ពួក​គេ​នៅ​តែ​មិន​ភ្លេច។

ដូច្នេះនៅពេលដែលព្រឹត្តិការណ៍នៅមជ្ឈិមបូព៌ាបានកើតឡើង សម្រាប់ប្រជាជនប្រទេសតួកគី នេះជាពេលវេលាដែល​ត្រូវ​សង​គុណ ដូច្នេះ​ទើប​ពួក​គេ​ផ្តល់​អាទិភាព​ជួយ​សង្រោះ​ប្រជាជន​ជប៉ុន​ពី​ស្ថានភាព​បន្ទាន់។

ប្រជាជនតួកគីមិនដែលភ្លេចទឹកចិត្តដ៏ល្អដែលពួកគេបានទទួលនោះទេ ហើយបានផ្តល់អាទិភាពចំពោះការតបស្នង​គុណ។ ដោយ​សារ​​ប្រជាជន​ជប៉ុន​ដែល​មិន​ស្គាល់អត្តសញ្ញាណបានលះបង់ខ្លួន​ដើម្បី​សង្គ្រោះ​ជីវិត​ជនបរទេស​ដែល​មិន​​ស្គាល់​មុខ។

ខ្ញុំជឿថា ចំណងមិត្តភាពដ៏កក់ក្តៅនេះនឹងរួមចំណែកដល់ការផ្សព្វផ្សាយសន្តិភាពសម្រាប់ពិភពលោក។

ទន្ទឹមនឹងនោះ រវាង​ជប៉ុន និង​កម្ពុជាក៏មានរឿងរ៉ាវជាច្រើនផងដែរ។ ទោះបីជាគេនិយាយថា ជប៉ុន ឬប្រទេសណាក៏​ដោយសុទ្ធតែលាយឡំរវាងមនុស្សល្អ និងអាក្រក់ យ៉ាងណាមិញ ខ្ញុំពិតជាដឹងគុណចំពោះបុព្វបុរសរបស់ខ្លួនដែលបាន​លះ​បង់​យ៉ាង​ធំ​ធេង ដោយ​បន្ត​រឿងល្អសម្រាប់​មនុស្ស​ជំនាន់​ក្រោយ។

គោលបំណងសំខាន់នៃទស្សនាវដ្ដី JAPO របស់យើងខ្ញុំគឺ​ចង់​រួម​ចំណែក​នាំ​មក​នូវ​សន្តិភាព​ដល់​ពិភព​លោក​តាម​រយៈ​​រឿង​​​វិជ្ជមាន និង​​មនុស្ស​ធម៌។

ជាថ្មីម្តងទៀត សូមអរគុណចំពោះការគាំទ្ររបស់អ្នកទាំងអស់គ្នាក្នុងអំឡុងពេលកន្លងមក។ សង្ឃឹមថាអ្នកទាំងអស់​គ្នា​នឹង​បន្ត​គាំទ្រ​តាម​ដាន JAPO ។ 

Abe Kengo