តើខ្មោចមានអាយុកាលដែរទេ? ប្រសិន​បើ​មាន​​អាយុកាល ៤០០ ឆ្នាំទើប​​រលាយ​បាត់ តើ​​ព្រលឹង​​ខ្មោច​​ទាំង​​នោះ​​នឹង​​ទៅ​​ណា?

តើខ្មោចបិសាចមានអាយុកាលដែរទេ?

ប្រសិនបើខ្មោចបិសាចមានអាយុកាល ៤០០ ឆ្នាំទើបរលាយបាត់ តើព្រលឹងខ្មោចទាំងនោះនឹងទៅណា?

តើអ្នកទាំងអស់គ្នាធ្លាប់មើលឃើញខ្មោចដែរទេ?

មនុស្សមួយចំនួនជឿថាមានខ្មោចបិសាច អ្នកខ្លះថែមទាំងធ្លាប់មើលឃើញខ្មោចផ្ទាល់ភ្នែកទៀតផង ក្នុងនោះបុគ្គល​​មួយ​ចំនួន​ជឿ​ថា​មាន គ្រប់​គ្នាសុទ្ធតែមានទស្សនៈដោយឡែក យ៉ាងណាមិញ នៅមានអាថ៌កំបាំង​ជា​ច្រើនដែល​​បង្កប់​​ពី​ក្រោយ​បញ្ហា​ខាង​ព្រលឹង​វិញ្ញាណ​នេះ។

យ៉ាងណាមិញ មានមតិសង្ស័យមួយចំនួននិយាយថា៖

“មិនធ្លាប់មានអ្នកមើលឃើញព្រលឹងខ្មោចកាលពីសម័យបុរាណនោះទេ” ។

នៅជប៉ុនមានតែអ្នកក្នុងសម័យកាលសាមូរ៉ៃប៉ុណ្ណោះទើបឃើញខ្មោច ក្នុងរឿងភាពយន្ត និងប្រលោមលោកក៏ដូចគ្នា​ដែរ។

តាំងពីបុរាណកាល ប្រជាជនដែលរស់នៅជប៉ុនចាប់ផ្តើមបរបាញ់សត្វដោយប្រើពូថៅថ្ម និងលំពែង ប៉ុន្តែមិនមានរឿង​រ៉ាវ​និយាយ​ពី​វត្តមាន​មនុស្ស​មើល​ទៅ​ដូចខ្មោចឡើយ។

តើនៅប្រទេសរបស់អ្នកទាំងអស់គ្នាដូចគ្នាដែរទេ?

មនុស្សជាច្រើនជឿថា ខ្មោចបិសាចកើតចេញការចងកំហឹងរបស់អ្នកដែលបានស្លាប់តែនៅមានភាពសោកស្តាយជា​ច្រើន។ ប្រសិន​បើ​ដូច្នេះ​មែន​មាន​ន័យ​ថា អ្នកដែលស្លាប់នៅសម័យបុរាណសុទ្ធតែស្លាប់ដោយស្ម័គ្រចិត្ត។

សម្មតិកម្មមួយនេះហាក់បីដូចជាពិបាកទទួលយកមែនទេ?

នៅសម័យនោះ ប្រហែលជាមានមូលហេតុជាច្រើនដែលបណ្តាលឲ្យមនុស្សស្លាប់ ដូចជាចាញ់បោកគេ ឬគ្រោះថ្នាក់ដែល​មិន​អាច​ទទួល​យក​បាន។ ដូច្នេះ​ហេតុ​អ្វី​បាន​ជា​មិន​មាន​ខ្មោច?

អ្នកប្រាជ្ញជប៉ុនម្នាក់បាននិយាយថា ជាទូទៅខ្មោចមានអាយុកាលប្រហែល ៤០០ ឆ្នាំ។

ជាការពិតណាស់ យើងមិនបានធ្វើការស្ទង់មតិដោយប្រើសំណួរទាក់ទងនឹងខ្មោចនោះទេ ហើយក៏មិនអាចបញ្ជាក់​ពី​ភាព​ជាក់​ស្តែង​របស់ខ្មោច​បិសាច​បាន​ដែរ។

មូលហេតុដែលកំណត់យកចំនួន ៤០០ ឆ្នាំដោយសារដានមកពីសមរភូមិប្រយុទ្ធដ៏ធំមួយ។

នៅឆ្នាំ ១៦០០ ខ្មាន់កាំភ្លើងសាមូរ៉ៃជប៉ុនបែងចែកជាពីរក្រុម ហើយបានប្រយុទ្ធគ្នាយ៉ាងខ្លាំងនៅកន្លែងមួយហៅ​ថា Sekigahara ស្ថិត​នៅ​ខេត្ត Gifu សព្វថ្ងៃ។

ការប្រយុទ្ធគ្នារវាងមនុស្ស ៨ ម៉ឺននាក់ និងម្ខាងទៀតមានចំនួន ១០ ម៉ឺននាក់កើតឡើងយ៉ាងសាហាវបំផុត ចំនួនអ្នក​​ស្លាប់ និង​​របួស​ត្រូវ​បាន​គេ​ជឿ​ថា មានចំនួនរាប់ម៉ឺននាក់។

ចាប់តាំង​ពី​ពេល​នោះ​មក Sekigahara បានក្លាយជាកន្លែងដែលល្បីទាក់ទងនឹងរឿងរ៉ាងខាងព្រលឹងវិញ្ញាណ ដែលនិយាយ​​ពី​វត្តមាន​របស់​ខ្មោច។

រឿងនេះហាក់បីដូចជាពិត។

ព្រោះ​ក្នុង​សមរភូមិ​នេះ​មាន​ការ​ក្បត់ ហើយក៏មានអ្នកស្លាប់យ៉ាងឈឺចាប់បន្ទាប់​ពី​ត្រូវ​​កាប់ អ្នកខ្លះស្លាប់ដោយ​មិន​ដឹង​ថាខ្លួនបានស្លាប់។

នេះជាតំបន់មួយដែលមាន​សាក្សី​ជាច្រើន​បាននិយាយពីករណីមើលឃើញខ្មោច។

យ៉ាងណាមិញ ប្រហែលជាចាប់ពីឆ្នាំ ២០០០ ទៅ របាយការណ៍និយាយពីករណីមើលឃើញខ្មោចបានថយចុះគួរឲ្យ​កត់​សម្គាល់។

ផ្អែកលើចំណុចនេះគេសន្និដ្ឋានបានថា ប្រហែលជាអាយុកាលរបស់ព្រលឹងខ្មោចមានរយៈពេល ៤០០ ឆ្នាំ។

ប្រសិនបើផ្អែកលើការសន្និដ្ឋាននេះ យើងអាចពន្យល់ពីករណីមិនមើលឃើញខ្មោចនៅសម័យបុរាណ ជាសម័យកាល​ដែល​​មនុស្ស​រើស​ផ្លែ​ឈើ និង​បរបាញ់​សត្វ​ដោយ​ពូថៅ​ថ្ម​តាំង​ពី​រាប់​ពាន់​ឆ្នាំ​មុន។

ប្រហែលជានឿយហត់ណាស់ហើយនៅពេលដែលចងកំហឹងអស់រយៈពេល ៤០០ ឆ្នាំមែនទេ?

ទោះជាយ៉ាងណា នៅតែមានករណីលើកលែងមួយចំនួនដែរ។

បុគ្គលម្នាក់ត្រូវគេសម្លាប់ក្នុងឆ្នាំ ៩៤០ មានឈ្មោះថា Tairano Masakado ដែលបានស្លាប់បន្ទាប់ពីត្រូវកាត់ក្បាល។ គេនិយាយថា កំហឹងបានធ្វើឲ្យក្បាលរបស់ម្នាក់នោះហោះយ៉ាងឆ្ងាយ ដោយបង្កឲ្យមានគ្រោះមហន្តរាយទូទាំងប្រទេស​​ជប៉ុន។

ក្បាលរបស់ Masakado បានហោះទៅដល់ Otemachi ទីប្រជុំជនតូក្យូ។

នៅទីនេះមានផ្នូរមួយហៅថា Kubitsuka ជាកន្លែងដែលកប់ក្បាលនោះ។ ប្រសិនបើប៉ុនប៉ងបំផ្លាញផ្នូរនឹងបង្កឲ្យមាន​​គ្រោះ​​មហន្តរាយ​ធ្ងន់​ធ្ងរ។

ក្រោយ​សង្គ្រាម អាមេរិក​បាន​បញ្ជូន​កងទ័ពចូលជប៉ុន ហើយបំផ្លាញរបស់ជាច្រើន​ក្នុង​នាម​កែ​តម្រូវ។

ពួកគេបានព្យាយាមបំផ្លាញវប្បធម៌ជប៉ុន ជាពិសេសអ្វីដែលទាក់ទងនឹងជំនឿ ប៉ុន្តែរាល់ពេលដែលពួកគេព្យាយាមបំផ្លាញ Kubitsuka តែង​តែ​កើត​មាន​គ្រោះ​ថ្នាក់ និង​ការ​ស្លាប់។ រថយន្ត​ឈូស​ឆាយក្រឡាប់​អំឡុង​ពេល​កំពុង​ដំណើរការ អ្នក​បើក​ស្លាប់។

អ្នកទាំងអស់គ្នាសាកស្រមៃគិតមើល រថយន្ត​ឈូស​ឆាយកំពុងដំណើរការធម្មតាស្រាប់តែក្រឡាប់ដោយសារកំហឹង។

តាមមើលទៅ ព្រលឹងចងកំហឹងរបស់ម្នាក់នោះនៅតែបន្តលើលោកទោះបីជាកន្លងផុតរយៈពេល ១០០០ ឆ្នាំក៏​ដោយ។

ដូចដែលបានរៀបរាប់ខាងលើ ទីតាំងផ្នូរ Kubitsuka ស្ថិតនៅទីប្រជុំជនតូក្យូ ជាកន្លែងដែលតម្លៃដីឡើងដល់ ៤.០០០.០០០.០០០ យ៉េន។ មនុស្សគ្រប់គ្នាចង់មកទីនេះសាងសង់ផ្ទះ និងប្រើប្រាស់តម្លៃដីនៅទីនេះ យ៉ាងណាមិញ ក្រោយ​ពេលជាច្រើនឆ្នាំរហូតមកទល់ពេលនេះ Kubitsuka នៅ​ដដែល ហើយបានក្លាយជាកន្លែងគោរពបូជារបស់​ប្រជាជន​ក្នុង​តំបន់។

សម្រាប់មនុស្សមួយចំនួនការចងកំហឹងរយៈពេល ៤០០ ឆ្នាំពិបាកណាស់ទៅហើយ ដូច្នេះហើយ រយៈពេល ១០០០ ឆ្នាំកាន់​តែ​លំបាក​ទៅ​ទៀត។

ដូច្នេះខ្ញុំសង្ឃឹមថា យើងទាំងអស់គ្នានឹងមិនចងកំហឹងនរណាម្នាក់ខ្លាំងពេកឡើយ ហើយក៏មិនត្រូវបង្កកំហឹងធ្វើឲ្យនរណា​ម្នាក់​ស្អប់​យើង​នោះ​ដែរ។

ខ្ញុំមិនដឹងថា តើទ្រឹស្ដីដែលថាខ្មោចមានអាយុកាល ៤០០ ឆ្នាំស្របនឹងជំនឿខាងព្រលឹងវិញ្ញាណនៅក្នុងប្រទេសរបស់​អ្នក​​ទាំង​អស់​គ្នា​ដែរ​​ទេ?

Abe Kengo