មុខម្ហូបជប៉ុនមានលក្ខណៈ​សម្បូរ​​បែប​ណាស់ ប៉ុន្តែ​ហេតុ​អ្វី​បាន​ជា​មុខ​ម្ហូប​ឆ្នាំ​ថ្មី​បែរ​ជា​មិន​សូវ​ទាក់​ទាញ​ដូច្នេះ?

មុខម្ហូបជប៉ុនមានលក្ខណៈ​សម្បូរ​បែបណាស់ ប៉ុន្តែហេតុអ្វីបានជាមុខម្ហូបឆ្នាំថ្មីបែរជាមិនសូវទាក់ទាញដូច្នេះ?

យើងខ្ញុំទទួលបានសំណួរដ៏គួរឲ្យចាប់អារម្មណ៍មួយ​ពី​ជន​ជាតិ​បារាំង​ម្នាក់​ដែល​ទើប​តែ​ចាប់​ផ្តើម​រស់​នៅ​ប្រទេស​ជប៉ុន។

“ដោយធ្លាប់មានបទពិសោធន៍ភ្លក់មុខម្ហូបជប៉ុននៅកន្លែងជាច្រើនខុសៗគ្នា ខ្ញុំទទួលទានអាហារដែលមានរស​ជាតិ​​ឆ្ងាញ់​​ពិសេស ប៉ុន្តែ​ហេតុអ្វី​បានមុខម្ហូបឆ្នាំថ្មីបែរជាមានរស់ជាតិមិនឆ្ងាញ់បែបនេះ?

ប្រៀបដូចជាល្បែងដាក់​ទណ្ឌកម្ម​មែនទេ?”

បន្ទាប់ពីបានឮសំណួរនេះ ខ្ញុំមិនដឹងថា គួរសប្បាយចិត្ត ឬអត់នោះទេ ព្រោះសំណួរមានពីរកត្តា គឺសរសើរផង រិះ​គន់​ផង។ ប្រហែល​ជា​មុខ​ម្ហូប​ឆ្នាំ​ថ្មី​ដែល​បាន​និយាយ​នេះ​គឺ “osechi ryori’’ សម្រាប់​បរិភោគ​នៅ​ថ្ងៃ​ចូល​ឆ្នាំ​ថ្មី។

និយាយឲ្យត្រង់ទៅ កាលពីក្មេងខ្ញុំផ្ទាល់ក៏ស្អប់មុខម្ហូប osechi នេះដែរ ដូច្នេះខ្ញុំយល់ពីអារម្មណ៍របស់អ្នកដែលសួរសំណួរ​នេះ។

ក្នុងអត្តបទថ្ងៃនេះ ខ្ញុំសូមចែករំលែកនិយាយពីមុខម្ហូប osechi ចូរយើងស្វែងយល់ទាំងអស់គ្នា។

ជាទូទៅនេះជាមុខម្ហូបសម្រាប់បម្រុងទុក

Osechi មើលទៅស្អាតទាក់ទាញណាស់ ប៉ុន្តែជាទូទៅនេះជាអាហារបម្រុង​ទុក ដូច្នេះហើយ មិនមានអាហារស្រស់ៗដែលស្រដៀង​​នឹង sashimi នោះ​ទេ។

សព្វថ្ងៃនេះ នៅជប៉ុនគ្រប់គ្នាធ្វើការរហូតដល់ថ្ងៃទី ២៨ ខែធ្នូ បន្ទាប់មកចាប់ផ្តើមសម្អាតផ្ទះ និងរៀបចំម្ហូបអាហារសម្រាប់​​ត្រៀម​ទទួល​ឆ្នាំ​ថ្មី។

ទន្ទឹមនឹងនោះ នៅទីនេះមានទំនៀមទម្លាប់មួយគឺ គ្រួសារទាំងអស់នឹងមិនសម្អាត ឬធ្វើការងារផ្ទះបាយរយៈពេល ៣ ថ្ងៃ​ចូល​ឆ្នាំ​ថ្មី​ដំបូង​ឡើយ ពោលគឺចាប់ពីថ្ងៃទី ១ ដល់ថ្ងៃទី ៣ ខែមករា។ 

ដោយសារមូលហេតុនេះហើយ ទើបមុខម្ហូប osechi ត្រូវបានរៀបចំត្រៀមសម្រាប់បរិភោគក្នុង​ឳកាសនេះ។ 

ចូលឆ្នាំថ្មីទាំង ៣ ថ្ងៃ បរិភោគមុខម្ហូបដដែលៗ ដូច្នេះហើយ ទើបកុមារភាគច្រើនទ្រលាន់ និងមិនសូវចាប់អារម្មណ៍នឹង​រឿង​នេះ​ឡើយ។

ប្រផ្នូលល្អសំខាន់ជាងរសជាតិ

ជាមូលដ្ឋានមុខម្ហូប​ជប៉ុន​ផ្តោត​សំខាន់​លើ​រស​ជាតិ និង​ការ​រៀប​ចំតុប​តែង​លម្អ ប៉ុន្តែ​ដោយ​ឡែក osechi ផ្តោតសំខាន់​​លើ​​ប្រផ្នូល​​ល្អ។

មុខម្ហូបនីមួយៗសុទ្ធតែបង្កប់អត្តន័យដូចខាងក្រោម៖

សណ្តែកខ្មៅ

ក្នុងភាសាជប៉ុនពាក្យសណ្តែកគេបញ្ចេញសំឡេងថា “mame” ។

អ្នកដែលតែងតែធ្វើចលនា និងសកម្មភាពឥត​ឈប់​ឈរក៏គេហៅថា mame ដែរ។

ដូច្នេះហើយ ទើបការបរិភោគសណ្តែកនៅថ្ងៃដើមឆ្នាំថ្មីបង្កប់អត្តន័យសង្ឃឹមថាការងាររលូនល្អ។

Greater burdock (ដើមបន្លាស្អិត)

Greater burdock ជាប្រភេទបន្លែដែលប្រមូលផលមើម មើលទៅដូចជាឫសរុក្ខជាតិ។

ចំណុចនេះមានន័យថា ចាក់ឫសយ៉ាងរឹងមាំក្នុងដី ហើយការពារគ្រួសាររបស់ខ្លួន។

Kamaboko – ប្រែថា៖ ប្រហិតត្រីជប៉ុន

Kamaboko មានពីរពណ៌គឺ ពណ៌ក្រហម និងស។

ពណ៌ក្រហមមានន័យថា យ័ន្តការពារ និងភាពរីករាយ ចំណែកឯពណ៌សមានន័យថា ពិសិដ្ឋ និងភាពបរិសុទ្ធ។

ហេតុតែចូលចិត្តហូបត្រី ប៉ុន្តែមិនអាចបរិភោគ sashimi ក្លាសេបាន ប្រហែលនេះជាមូលហេតុដែលប្រជាជនជប៉ុនបន្ថែម​មុខ​ម្ហូប kamaboko ដែល​ធ្វើ​ពី​ត្រី​ក្នុង​ម៉ឺនុយ​អាហារ។

Datemaki – ប្រែថា៖ ស៊ុតក្រឡុកមូល

ស៊ុតអាំងទន់ដែលយើងមើលឃើញនៅពេលដែលបរិភោគ osechi ។

ស៊ុតក្រឡុកមូលស្រដៀងនឹងរូបរាងសៀវភៅសិក្សា (សៀវភៅកាលពីសម័យបុរាណ) ដោយនាំមកនូវក្តីសង្ឃឹមចំពោះចំណេះ​ដឹង គោល​បំណង​ចង់​បង្កើន​សមត្ថភាព​រៀន​សូត្រ​នៅ​ឆ្នាំ​ថ្មី។

ត្រី Pagrus major ក្រហមអាំង

ក្នុងមុខម្ហូប osechi ក៏មានប្រភេទត្រី Pagrus major សមុទ្រអាំងផងដែរ។

អត្តន័យនៃមុខម្ហូបនេះគឺ “ពាក្យជូនពរឆ្នាំថ្មី” ។

បង្គាអាចយកទៅស្ងោរ ឬអាំងអាស្រ័យការបរិភោគ។

នៅពេលដែលបង្គាឆ្អិនវានឹងកោងដោយខ្លួនឯង កម្រិតកោងរបស់បង្គាត្រូវបានគេជឿថា ស្របនឹងអាយុវែងរបស់​ម្ចាស់​ផ្ទះ។ ដូច្នេះ​ហើយ ប្រសិន​បើ​អាំង​បង្គា​ដោត​ចង្កាក់​ឲ្រ​ត្រង់​ជា​រឿង​ដែល​ត្រូវ​ជៀស​វាង​ដាច់​ខាត។

ក្រៅពីវត្ថុធាតុដើមដែលបានរៀបរាប់ខាងលើ នៅមានមុខម្ហូបជាច្រើនផ្សេងទៀត ប៉ុន្តែភាគច្រើនជាមុខម្ហូបដែល​ច្រើន​តែ​ឃើញ​នៅ​ថ្ងៃ​ចូល​ឆ្នាំ​ថ្មី​ប៉ុណ្ណោះ។

ប្រសិនបើជាមុខម្ហូបឆ្ងាញ់ ប្រាកដជាត្រូវបានគេប្រើសម្រាប់មុខម្ហូបប្រចាំថ្ងៃ។

ថ្វីត្បិតតែ តែងតែត្រូវរិះគន់ថាមិនឆ្ងាញ់ ប៉ុន្តែជាក់ស្តែងមុខម្ហូបបុរាណទាំងនេះពិតជាពិបាកធ្វើណាស់ ព្រោះមានរបស់​ច្រើន​ណាស់​ដែល​ត្រូវ​រៀប​ចំ។ ប្រសិនបើធ្វើនៅ​ផ្ទះ​ត្រូវ​ចំណាយ​ពេល​ប្រហែល​ពីរ​ថ្ងៃ ដូច្នេះ​ហើយ គេតែងតែកុម្ម៉ង់នៅ​ហាង។

ដើម្បីធ្វើមុខម្ហូបទាំងនេះ ភាគីហាងក៏​ចំណាយ​ពេល​វេលា កម្លាំង និង​ថវិកាច្រើនដែរ។ 

ប្រសិនបើមានមតិយោបល់និយាយថា គួរតែបរិភោគមី និងការីសម្រាប់ថ្ងៃឆ្នាំថ្មី ដោយជំនួសឲ្យមុខម្ហូប osechi ព្រោះ​មី និង​ការី​ជា​មុខ​ម្ហូប​ដែល​អាច​ទុក​បាន។ ខ្ញុំយល់ពីចំណុចនេះ យ៉ាងណាមិញ ខ្ញុំក៏យល់ពីបំណងចង់បានលាភសំណាង​ពេល​បរិភោគ​អាហារ​ដែល​នាំ​មក​នូវ​សំណាង​នៅ​ថ្ងៃ​ឆ្នាំ​ថ្មី​ផង​ដែរ។

មុខម្ហូប osechi មិនមែនជាល្បែងដាក់ទណ្ឌកម្មនោះទេ។

សង្ឃឹម​ថាអ្នកទាំងអស់គ្នានឹងភ្លក់មុខម្ហូបទាំងនេះ​ក្នុង​ពេល​ឆាប់ៗ ហើយ​ទទួល​បាន​លាភ​សំណាង​ក្នុង​ឆ្នាំ​ថ្មី។

Abe Kengo