ជប៉ុន​ជា​ប្រទេស​ដែល​មាន​នាម​ត្រកូល​ច្រើន​ជាង​គេ​លើ​ពិភព​លោក តើ​យើង​អាច​នឹង​ស្គាល់​ពី​បុព្វបុរស​​របស់ខ្លួនតាមរយៈនាមត្រកូលដែរទេ?

ប្រជាជនជប៉ុនមាននាមត្រកូលច្រើន ហើយជាប្រទេសដែលមាននាមត្រកូលច្រើនជាងគេលើពិភពលោក។

តើយើងអាចនឹងស្គាល់ពីបុព្វបុរស​របស់ខ្លួនតាមរយៈនាមត្រកូលដែរទេ? 

ខ្ញុំមិនប្រាកដថា អ្នកទាំងអស់គ្នាធ្លាប់ប្រាស្រ័យទាក់ទងនឹងប្រជាជនជប៉ុននោះទេ យ៉ាងណាមិញ តាមរយៈរឿងគំនូរ​ជីវចល សៀវភៅរឿង ឬការផ្សាយព័ត៌មាន យ៉ាងហោចណាស់យើងប្រហែលជាស្គាល់ប្រជាជនជប៉ុន ហើយធ្លាប់បាន​ឮ​ឈ្មោះ​មួយ​ចំនួន។ ក្រៅ​ពី​នាម​ត្រកូល​ខុសៗ​គ្នា​ជា​ច្រើន​ដូច​ជា Suziki, Sato, Yamada, ឬ Sasaki ។ល។ ជា​នាម​​ត្រកូល​​ដែល​​យើង​​តែង​​តែ​​ឃើញ។

បើ​តាម​ស្ថិតិបច្ចុប្បន្នមានជាង ៣០ ម៉ឺននាមត្រកូលខុសគ្នាក្នុងប្រទេសជប៉ុន ហើយជាតួលេខដែលគេចាត់ទុកថាមិន​ធ្លាប់​មាន​​នៅ​​លើ​​ពិភព​លោក។

នៅជប៉ុនបន្ទាប់ពីរៀបការរួច ប្តីប្រព័ន្ធនឹងប្រើនាមត្រកូលដូចគ្នា (ករណីភាគច្រើនប្រពន្ធយក និងប្រើនាមត្រកូល​ប្តី​របស់​ខ្លួន) ។ សម្រាប់គ្រួសារដែលមានតែកូនស្រី បន្ទាប់ពីកូនស្រីពេញវ័យរៀបការ ហើយប្រើ​នាម​ត្រកូលរបស់​ប្តី នាម​ត្រកូល​របស់​គ្រួសារ​ទាំង​នោះ​នឹង​បាត់​បង់ ដោយបញ្ចប់ព្រោះតែគ្មានកូនប្រុសបន្តត្រកូល។ ចំណុចនេះមានន័យថា សព្វ​ថ្ងៃ​នេះ​ចំនួន​នាម​ត្រកូល​តិច​ទៅៗ​បើ​ប្រៀប​នឹង​កាល​ពី​មុន។ 

ចំណុចដែលគួរឲ្យចាប់អារម្មណ៍ត្រង់ថា ប្រជាជនជប៉ុនអាចដឹងអំពីឋានសង្គមរបស់បុព្វបុរសខ្លួនតាមរយៈនាមត្រកូល​របស់​ពួក​គេ។

តើអ្នកដែលយើងស្គាល់អាចនឹងមកពីនាមត្រកូលសាមូរ៉ៃដែរទេ? មិនចាំបាច់សួរនៅតែអាចស្មានដឹង ពិតជាគួរឲ្យចាប់​អារម្មណ៍​ណាស់​មែន​ទេ?

ក្នុងអត្តបទថ្ងៃនេះ ខ្ញុំនឹងរៀបរាប់នាមត្រកូលទូទៅមួយចំនួន ចូរយើងតាមដានទាំងអស់គ្នា។

佐藤さん　(អ្នកដែលមាននាមត្រកូល Sato)

នៅប្រទេសជប៉ុននាមត្រកូលនេះមានច្រើន ហើយអ្នកដែលមាននាមត្រកូលនេះត្រូវបានគេចាត់ទុកថា បុព្វបុរសរបស់​ពួក​គេ​ជា​សាមូរ៉ៃ។

គ្រួសារសាមូរ៉ៃ Fujiwara មានអំណោចខ្លាំងក្លានៅតំបន់ Kanto រួមទាំងទីក្រុង Tokyo និងតំបន់ខាងលើគឺ Tohoku ។

ដូច្នេះហើយ គេនិយាយថា មនុស្សជាច្រើនដែលមាននាមត្រកូល Sato មកពីតំបន់ Kanto និង Tohoku ។

ដូចជា Sato ដែរ អ្នកដែលមាននាមត្រកូល Fujiwara ឬ Kato ក៏ត្រូវបានគេស្មានតាមវិធីសាស្រ្តស្រដៀងគ្នាដែរ។

(របៀបសរសេរនាមត្រកូលទាំងនេះជាអក្សរ Han សុទ្ធតែមានតួអក្សរ 藤 ដូចគ្នា) ។

គេនិយាយថា មូលហេតុដែលមានអ្នកត្រកូល Sato ច្រើនព្រោះមិនទាន់មាននរណាល្បីឈ្មោះ។ នៅពេលដែលមានអ្នក​ល្បីឈ្មោះ ពួកគេព្រួយបារម្ភចំពោះការប្តូរឈ្មោះផ្សេងពីពង្សាវតារដើម (ឧទាហរណ៍ដូចជាគ្រួសារកូនប្រុសច្បង) ដូច្នេះ​ពួក​គេរើសយកឈ្មោះស្រដៀងគ្នាផ្សេងទៀត។

鈴木さん　(អ្នកដែលមាននាមត្រកូល Suzuki)

នាមត្រកូល Suzuki ត្រូវបានគេចាត់ទុកថាមានប្រភពមកពីតំបន់ Kumano នៃឧបទ្វីប Kii ។

នៅតំបន់ Kumano មានសាសនាមួយហៅថាជំនឿ Kumano ហើយគេតំណាលថា នៅទីនោះបុគ្គលដំបូងដែលចូលរួម​ផ្សព្វ​ផ្សាយ​សាសនា​ណែ​នាំ​ខ្លួន​មាន​ឈ្មោះ​ថា Suzuki ។

阿部さん  (អ្នកដែលមាននាមត្រកូល Abe)

បាទ មែនហើយ Abe ជានាមត្រកូលរបស់ខ្ញុំ។ 

នាមត្រកូល Abe មានតួអក្សរ​ខុស​គ្នា​ជា​ច្រើន សំឡេង​ដូច​គ្នា ប៉ុន្តែ​ទម្រង់អក្សរ Han ខុសគ្នាដូចជា 阿部、安倍、安部… ។

អ្នកដែលមាននាមត្រកូល Abe គឺជាកូនចៅនៃគ្រួសាររាជវង្ស ហើយជាគ្រួសារដែលធ្លាប់គ្រប់គ្រងទឹកដីដ៏ធំល្វឹង​ល្វើយ លាត​សន្ធឹង​ពី​ខេត្ត Iwate ដល់​ខេត្ត Aomori បច្ចុប្បន្ន។

ឪពុករបស់ខ្ញុំមកពីខេត្ត Iwate ដូច្នេះហើយ ចំណុច​ប្រវត្តិ​សាស្រ្តនេះស្របនឹងគាត់។ បន្ទាប់ពីស្រាវជ្រាវខ្ញុំពិតជាមានការភ្ញាក់ផ្អើល​ណាស់។

យ៉ាងណាមិញ…

មិនមែនគ្រប់គ្នាសុទ្ធតែយកចិត្តទុកដាក់ចំពោះរឿងប្រវត្តិសាស្ត្រទាំងនេះឡើយ។ 

នៅចុងសម័យកាលសាមូរ៉ៃ មនុស្សក្នុងត្រកូលគ្រួសារនេះជួបបញ្ហាផ្នែកហិរញ្ញវត្ថុ។ ដូច្នេះហើយ ករណីលក់់ត្រកូលរបស់​ខ្លួ​ន​បាន​កើត​ឡើង​ចំពោះ​សាមូរ៉ៃ​វណ្ណៈ​ទាប។

ខ្ញុំមិនដឹងច្បាស់ថា បុព្វបុរសរបស់ខ្លួនបែបណានោះទេ ប៉ុន្តែ​ខ្ញុំ​ជឿ​ថា ខ្លួនជាកូនចៅនៃគ្រួសារ​រាជវង្ស។

ដោយផ្អែកលើប្រវត្តិសាស្រ្ត តើអ្នកទាំងអស់គ្នាចាប់អារម្មណ៍ចំពោះនាមត្រកូលជាច្រើន​ក្នុង​ប្រទេសជប៉ុន និងរឿងរ៉ាវដែលពាក់​ព័ន្ធ​ដែរ​ទេ?

Abe Kengo