តើនៅខាងក្នុងផ្ទះព្រិល kamakura ពិតជាកក់ក្តៅដែរទេ?

តើនៅខាងក្នុងផ្ទះព្រិល kamakura ពិតជាកក់ក្តៅដែរទេ?

បើប្រៀបធៀបនឹងប្រទេសផ្សេងទៀត ជប៉ុនជាកន្លែងដែលមានបរិមាណព្រិលធ្លាក់ប្រចាំឆ្នាំច្រើនបំផុតនៅលើពិភព​លោក។

អ្នកដែលមិនធ្លាប់មើលឃើញព្រិលប្រាកដជាមានអារម្មណ៍ច្រណែន ប៉ុន្តែសម្រាប់អ្នកដែលរស់នៅតំបន់មានព្រិលធ្លាក់​​ខ្លាំង ប្រាកដ​ជា​ចាត់​ទុក​ដូច​ជា​ការ​រំខាន​ជា​រៀង​រាល់​ឆ្នាំ។

ការបោសសម្អាតព្រិលនៅតាមផ្លូវគឺជាការងារដែលសំខាន់ ដើម្បីកុំឲ្យស្ទះចរាចរណ៍ ប្រជាជនអាចធ្វើដំណើរទៅ​មក​។ មិនត្រឹមតែប៉ុណ្ណឹង បរិមាណព្រិលធ្លាក់គរលើដំបូលផ្ទះ ប្រសិនបើមិនសម្អាត បរិមាណព្រិលអាចនឹងធ្វើឲ្យផ្ទះ​រលំ​នៅ​​រដូវ​​រងា។ ដូច្នេះ​ហើយ​ទើប​គេ​និយាយ​ថា ព្រិលធ្លាក់ប្រៀបដូចជាការរំខាន។

ក្រោមអាកាសធាតុត្រជាក់ខ្លាំង ប្រជាជនដែលរស់នៅតំបន់ព្រិលធ្លាក់បានរកឃើញគំនិតមួយ ដោយប្រើបរិមាណព្រិលធ្លាក់ដើម្បីសាងសង់ផ្ទះព្រិល ចំណុចនេះមិនត្រឹមតែអាចលេងកម្សាន្ត ថែមទាំងនៅជិតធម្មជាតិផងដែរ។ ទាំង​​នេះ​​ជា​គំនិត​ដ៏​ពិសេស ពួក​គេ​ហៅ​ផ្ទះ​ព្រិល​ទាំង​នេះ​ថា “kamakura” ។

ស្រុកកំណើតរបស់ខ្ញុំនៅទីក្រុងតូក្យូ និងតំបន់ Osaka ប្រទេសជប៉ុនក៏មានព្រិលធ្លាក់នៅរដូវរងាដែរ ប៉ុន្តែ​បរិមាណព្រិល​ធ្លាក់​នៅ​ទីនេះ​មិន​គ្រប់​សម្រាប់​សាង​សង់​ផ្ទះ​ព្រិល​នោះ​ទេ។ ដូច្នេះហើយ ទើប​បំណង​ប្រាថ្នា​សាង​សង់ kamakura ដោយ​​​ផ្ទាល់​​​ដៃ​​​ជា​​​អ្វី​​​ដែល​​​ខ្ញុំ​​​តែង​​​​តែ​​​​ចង់​​​​សម្រេច។

តើនៅខាងក្នុងផ្ទះព្រិលត្រជាក់ដែរទេ?

ជាការពិតណាស់ តើនេះជាសំណួរដែលអ្នកទាំងអស់គ្នាកំពុងគិតក្នុងចិត្តមែនទេ?

ប្រហែលជាចម្លែកបន្តិច យ៉ាងណាមិញ បរិយាកាសនៅខាងក្នុង kamakura បែរជាមានភាពកក់ក្តៅដែលមិនគួរឲ្យ​ជឿ។

ដើម្បី​ពន្យល់​ពី​ចំណុច​នេះ ចូរយើងក្រឡេកមើលពីដំណើរការធ្វើ kamakura ខាងក្រោមទាំងអស់គ្នា។

អង្កត់ផ្ចិតផ្ទះព្រិលសម្រាប់មនុស្សម្នាក់ប្រហែល ២ ម៉ែត្រការ៉េ ចំណែកឯក្រុមមនុស្សចាប់ពី ៤ ទៅ ៥ នាក់មានទំហំប្រហែល ៣,៥ ម៉ែត្រការ៉េ។ ម្យ៉ាងវិញទៀត ព្រិលត្រូវប្រើដៃទះឲ្យណែនខ្ពស់ជាលំដាប់ ជំហាន​ចុង​ក្រោយ​គឺជីក​ផ្លូវ​រូង​ក្រោម​​ដី​​ដើម្បីបង្កើតបរិយាកាសខាងក្នុង ដូច្នេះហើយ យើងអាចធ្វើ kamakura បាន។

ប្រសិនបើជញ្ជាំងព្រិលត្រូវបានសាងសង់ឡើងដោយកម្រាស់ដែលសមស្រប យើងនឹងមិនចាំបាច់ព្រួយបារម្ភជញ្ជាំង​រលំ​នោះ​ទេ។

នៅខាងក្នុងអ្នកទាំងអស់គ្នាអាច​ដុត​ភ្លើង ហើយជួបជុំគ្នាបរិភោគស៊ុបឆ្នាំងភ្លើងក្តៅ។

តើផ្ទះព្រិលទាំងនេះអាចនឹងរលាយដែរទេ?

យើង​គិត​ថា ​ព្រិល​នឹង​រលាយ​ដោយ​សារ​កម្តៅភ្លើង ប៉ុន្តែទោះបីជាយ៉ាងនេះក្តី ផ្ទះព្រិលនឹងមិនមានបញ្ហាអ្វីឡើយ។ ទោះបីជាព្រិលផ្នែកខាងក្នុងរលាយបន្តិចក៏ដោយ នៅពេលនោះស្រទាប់ព្រិលខាងក្រៅនឹង​ធ្វើ​ឲ្យ​ទឹក​ដែល​រលាយនោះ​ប្រមូល​ផ្តុំក្លាយជាផ្ទាំងទឹកកក ផ្ទាំងទឹកកកនឹងធ្វើឲ្យជញ្ជាំងទាំងនេះកាន់តែរឹងមាំ។

ចំពោះករណីដែលត្រជាក់បំផុតគឺនៅពេលដែលប៉ះនឹងខ្យល់ ប៉ុន្តែផ្នែកខាងក្នុង kamakura ត្រូវបានគ្របដណ្តប់ដោយ​ស្រទាប់ជញ្ជាំងព្រិល ដូច្នេះខ្យល់មិនអាចបក់ចូលបានទេ។ ចំណែកឯភ្លើងដែលឆេះនៅខាងក្នុងនឹងធ្វើឲ្យបរិយាកាស​កាន់​តែ​កក់​ក្តៅ។

ជាការពិតណាស់ ភាពកក់ក្តៅដែលខ្ញុំនិយាយមិនមែនចង់មានន័យថា អ្នកដែលអង្គុយខាងក្នុងផ្ទះព្រិលអាចស្លៀក​ពាក់​ស្តើង​នោះ​ទេ ប៉ុន្តែ​អាច​និយាយ​បាន​ថា នោះ​ជា​សីតុណ្ហភាព​ដែល​អាច​ទ្រាំ​បាន​ក្រោម​បរិយាកាស​ត្រជាក់ខ្លាំង។

អង្គុយនៅខាងក្នុងផ្ទះព្រិលហូបឆ្នាំងភ្លើងផង មើលព្រិលធ្លាក់ខាងក្រៅផង។ អ្នកទាំងអស់គ្នាធ្លាប់គិតទេថា បើមាន​ឳកាស​ទទួលយកបទពិសោធន៍​ទាំង​នេះ​ដោយផ្ទាល់ប្រាកដជាពិសេសណាស់។

និយាយអញ្ជឹង មានទ្រឹស្តីខុសៗគ្នាជាច្រើននិយាយពីប្រភពដើមនៃពាក្យ “kamakura” ប៉ុន្តែគេនិយាយថា ពាក្យនេះ​មក​ពី​ពាក្យ 神座 (អានថា kamakura) ដែល​គេចាត់ទុកជាកន្លែងសម្រាប់អាទិទេពអង្គុយ។

ដំបូងឡើយ នេះគ្រាន់តែជាល្បែងសម្រាប់ក្មេងៗប៉ុណ្ណោះ ប៉ុន្តែនៅឆ្នាំ ១៩៣៦ ស្ថាបត្យករជនជាតិអាឡឺម៉ង់ម្នាក់ដែល​ទៅ​លេង​ជប៉ុន​ក្នុង​រដូវ​រងា​បានរំភើបចិត្តយ៉ាងខ្លាំង លោកបានចែករំលែករឿងនេះទៅកាន់ពិភពលោក។ មិន​​យូរ​​ប៉ុន្មាន តំបន់​​នេះ​​បាន​​ក្លាយ​ជា​តំបន់​ទេសចរណ៍​ទាក់ទាញ​ភ្ញៀវ​ទេសចរ​ណ៍បរទេស។

ប្រសិនបើអ្នកទាំងអស់គ្នាចង់ចូលរួមពិធីបុណ្យ kamakura អាចរកមើលកាលបរិច្ឆេទព្រឹត្តិការណ៍ដែលធ្វើឡើងរៀងរាល់​ខែ​កុម្ភៈ​នៅ​ខេត្ត Akita ប្រទេស​ជប៉ុន។

ពិធីបុណ្យព្រិលត្រូវបានប្រារព្ធឡើងនៅទីក្រុង Yokote ខេត្ត Akita នៅថ្ងៃទី ១៥ និង ១៦ ខែកុម្ភៈជារៀងរាល់ឆ្នាំ ដោយ​មាន​ផ្ទះ​ព្រិល​យ៉ាង​ស្អាត​ជា​ប្រធាន​បទ។

នេះ​ជា​ឱកាស​មួយ​សម្រាប់​ភ្ញៀវទេសចរ​ណ៍អាចរីករាយ​នឹង​សម្រស់ក្នុងរដូវរងានៅជប៉ុន។

ទោះជាយ៉ាងណា ការធ្វើដំណើរតែម្នាក់ឯងមានគ្រោះថ្នាក់ខ្លាំងណាស់ ព្រោះនេះជាតំបន់ដែលមានព្រិលធ្លាក់ខ្លាំង។ ដូច្នេះ​សូមស្វែងរកក្រុម​ហ៊ុន​ទេស​ចរណ៍ និងអ្នកបើកបរដែលមានជំនាញសម្រាប់ការណែនាំ និងសុវត្ថិភាព។

***

ពិភពលោក និងទេសភាពជុំវិញខ្លួនយើងនឹងកាន់តែស្រស់ស្អាតប្រសិនបើយើងគិតគំនិតវិជ្ជមាន។ ផ្តល់មធ្យោបាយ​កែ​ប្រែ​ចំណុច​អវិជ្ជមាន​ទៅ​ជា​រឿង​វិជ្ជមាន។

ឥឡូវនេះ ព្រិលលែងជាការរំខានទៀតហើយ ដូច្នេះរដូវរងាក៏កាន់តែស្រស់ស្អាតជាងមុនដែរ។

Abe Kengo