ការ​អភិវឌ្ឍន៍ និងកែ​លម្អ​គុណ​ភាព​ផ្លែ​ឈើ​នៅ​ប្រទេស​ជប៉ុន

ការកែលម្អគុណភាពផ្លែឈើនៅជប៉ុន

ជប៉ុនជាប្រទេសដែលទទួលបានការវាយតម្លៃខ្ពស់ខាងផ្នែកបច្ចេកវិទ្យា ក៏ដូចជាការអភិវឌ្ឍន៍ និងការកែលម្អផលិតផល។

មិនត្រឹមតែកំណត់ចំពោះផលិតផលឧស្សាហកម្មប៉ុណ្ណោះទេ យើងក៏បានកែលម្អអាហារ រួមទាំងផ្លែឈើផងដែរ ដែលធ្វើ​ឲ្យ​ផ្លែ​ឈើ​ទាំង​នោះ​មាន​គុណ​ភាព និងទទួលបានការចាប់អារម្មណ៍យ៉ាងខ្លាំងពីបណ្តាប្រទេសផ្សេងទៀត។

ទន្ទឹមនឹងនេះ តម្លៃទីផ្សារក៏ខ្ពស់ស្របនឹងគុណភាពផងដែរ។ យ៉ាងណាមិញ ផ្លែឈើទាំងនោះនៅតែទាក់ទាញភ្ញៀវបរទេស។ ចូរ​ក្រឡេក​មើល​ប្រភេទ​ផ្លែ​ឈើ​មួយ​ចំនួន​ខាង​ក្រោម។

ផ្លែប៉ោមផ្អែមឆ្ងាញ់

ប៉ោម​ជាប្រភេទផ្លែឈើដែលមិនមានប្រភពមកពីជប៉ុននោះទេ បន្ទាប់ពីនាំចូល​ពី​ចក្រភព​អាមេរិក ប្រជាជនជប៉ុន​ចាប់​​ផ្ដើម​​ដាំ​ដុះ​ និង​កែ​លម្អ​ផ្លែ​ប៉ោម។

ដោយធ្វើឲ្យផ្លែប៉ោមតូចទាំងនោះកាន់តែធំ និងមានជាតិទឹកច្រើន ផ្លែប៉ោមទាំងនោះទទួលបានការពេញនិយមនៅក្រៅប្រទេសព្រោះតែរស់ជាតិផ្អែមឆ្ងាញ់។

ប្រភេទផ្លែប៉ោមដែលពេញនិយមបំផុតនៅលើពិភពលោកមានឈ្មោះហៅថា “Fuji” ។ ទន្ទឹមនឹងនេះ ផ្លែប៉ោម Fuji ក៏​មាន​ចំណែក​ពាក់​កណ្តាល​នៃ​ផលិតកម្ម​ប៉ោម​សរុប​នៅ​ក្នុង​ប្រទេស​ចិន​ផង​ដែរ។ 

តាមរយៈឈ្មោះរបស់ផ្លែប៉ោមយើងអាចសម្គាល់បានយ៉ាងងាយថា នេះជាពូជផ្លែប៉ោមដែលត្រូវបានកែលម្អ និងដាំដុះ​នៅ​ជប៉ុន។

រដូវផ្លែប៉ោមផ្អែមចាប់ពីខែតុលាដល់ខែកុម្ភៈឆ្នាំក្រោយ។

ប្រសិនបើអ្នកមានឳកាសទៅលេងជប៉ុនក្នុងរដូវផ្លែប៉ោមទុំស្រស់ឆ្ងាញ់ សូមកុំភ្លេចភ្លក់មើលឲ្យសោះ។

ផ្លែស្ត្របឺរីស្រស់

ស្ត្របឺរីជាប្រភេទផ្លែឈើដែលមានទំហំតូច និងមានរសជាតិជូរខ្លាំង។ ដូច្នេះហើយ ភាគច្រើនគេយកទៅធ្វើជាភេសជ្ជៈ ឬតំណាប់។

មិនត្រឹមតែប៉ុណ្ណឹង ជប៉ុន​បាន​កែ​លម្អ​ចំណុច​នេះ។

តើអ្នកធ្លាប់ភ្លក់ប្រភេទផ្លែស្ត្របឺរីដែលមានរសជាតិផ្អែមជាងគេនៅលើពិភពលោកដែរទេ?

ប្រភេទផ្លែស្ត្របឺរីដែលមានឈ្មោះថា “Crimson Misuzu” ដែលគេដាំនៅខេត្ត Chiba ប្រទេសជប៉ុន។

“រសជាតិផ្អែមរបស់វានឹងធ្វើឲ្យអ្នកមានអារម្មណ៍ដូចជាកំពុងហូបស្ករ” ។

នៅ​ពេល​ដែល​ផ្លែស្ត្របឺរី​ដែលត្រូវបានគេចាត់ទុកថាមានរសជាតិផ្អែមធម្មតាមានកម្រិតជាតិស្ករ ១០% ចំណែកឯកម្រិតជាតិស្ករក្នុងប្រភេទផ្លែស្ត្របឺរីនេះបែរជាជាង ២០% ដែលមានកម្រិតទ្វេជាពីរ។

ខ្ញុំផ្ទាល់មិនទាន់ភ្លក់ប្រភេទផ្លែ​ស្ត្របឺរី​នេះនោះទេ ប៉ុន្តែបន្ទាប់ពីដឹងពីកម្រិតជាតិស្ករ ខ្ញុំស្រមៃគិតភ្លាមដល់ “ស្ករ​គ្រាប់​​រស​ជាតិ​​ស្ត្របឺរី​ផ្អែម​ឆ្ងាញ់” ប្រហែលជាវាមានរសជាតិដូចនេះជាជាងផ្លែឈើ។ ខ្ញុំក៏ចង់ភ្លក់រសជាតិផ្លែស្ត្របឺរីទាំង​នេះ​ដែរ។

រដូវផ្លែស្ត្របឺរីឆ្ងាញ់បំផុតចាប់ពីខែមីនាដល់ខែមេសាជារៀងរាល់ឆ្នាំ។ ទាំងនេះអាចជាបទពិសោធន៍ដ៏ល្អសម្រាប់ភ្ញៀវ​ទេស​ចរណ៍​ដែល​មានបំណងទៅលេងជប៉ុនក្នុងរដូវផ្ការីក មិនត្រឹមតែអាចគយគន់ផ្កាសាគូរ៉ារីកប៉ុណ្ណោះទេ ថែម​ទាំង​អាច​ភ្លក់​ផ្លែ​ស្ត្របឺរី​ស្រស់​ឆ្ងាញ់​ផង​ដែរ។

ផ្លែប៉េស

ផ្លែប៉េសក៏ជាប្រភេទផ្លែឈើដែលជប៉ុនកែលម្អផងដែរ ថែមទាំងធ្លាប់ល្បីនៅលើពិភពលោក។

ផ្លែប៉េសដែលដាំនៅបណ្តាប្រទេសផ្សេងទៀតមានកម្រិតជាតិស្ករទាប ដូច្នេះគេច្រើនតែត្រាំក្នុងទឹកស៊ីរ៉ូដើម្បីបង្កើនកម្រិត​ផ្អែម ប៉ុន្តែ​ផ្លែប៉េស​នៅ​ជប៉ុន​មាន​រស​ជាតិ​ផ្អែម​ធម្មជាតិ។

ផ្លែប៉េសជប៉ុនត្រូវបានដាក់លក់នៅអង់គ្លេសក្នុងតម្លៃប្រហែល ៥.០០០ យ៉េនក្នុងមួយផ្លែ។

ប្រហែលជាមូលហេតុដែលផ្លែប៉េសល្បីនៅអង់គ្លេសដោយសារព្រឹត្តិការណ៍កីឡាបេស្បលដែលប្រារព្ធធ្វើឡើងនៅខេត្ត Fukushima ។

អំឡុងពេលប្រកួត កីឡាកររំភើបយ៉ាងខ្លាំងនៅពេលដែលបានភ្លក់ផ្លែប៉េសផ្អែមឆ្ងាញ់ដែល​គេ​ដាំ​ក្នុង​ស្រុក។ បន្ទាប់​​មក​​​ពួក​​​គេ​​​បាន​​​បង្ហោះ​​​អត្ថបទ​​​ផ្ទាល់​​​ខ្លួន​​​លើ​​​បណ្ដាញ​​​សង្គម​​​ដោយ​​និយាយ​​ថា៖

“ខ្ញុំមិនដែលហូបផ្លែប៉េសដែលផ្អែមឆ្ងាញ់បែបនេះពីមុនមកទេ” 

ដោយចៃដន្យបានធ្វើឲ្យផ្លែប៉េសក្លាយជាប្រធានបទដែលទទួលបានការចាប់អារម្មណ៍នៅពេលនោះ។ 

រដូវផ្លែប៉េសផ្អែមឆ្ងាញ់ចាប់ពីខែមិថុនាដល់ខែកញ្ញាជារៀងរាល់ឆ្នាំ។ ហូបផ្លែប៉េសត្រជាក់ឆ្ងាញ់អាចជាមធ្យោបាយ​ជួយ​កាត់​បន្ថយ​កម្តៅ​នៅ​រដូវ​ក្តៅ​ស្អុះ​ស្អាប់។

ថ្វីត្បិតតែ ការកែលម្អផលិតផលកសិកម្មនៅជប៉ុនបានធ្វើឲ្យផ្លែឈើទាំងនោះខុសពីផ្លែឈើដើម ប៉ុន្តែទោះជាយ៉ាង​ណា ទាំង​នេះ​ជា​ការ​ផ្លាស់​ប្តូរ​វិជ្ជមាន​មិន​ថា​ទំហំ និង​​គុណ​ភាព។ ដូច្នេះយើងអាចរីករាយនឹងរសជាតិផ្អែមឆ្ងាញ់របស់ផ្លែ​ឈើ​ទាំង​នេះ។

Abe Kengo