មូល​ហេតុ​ដែល​ភាគី Disney ខឹង​សម្បារ​យ៉ាង​ខ្លាំង​ចំពោះ​ជប៉ុន

តើអ្នកធ្លាប់វង្វេងក្នុងពិភពរឿងព្រេងនិទាននៃ Disneyland ដែរទេ? ជាពិសេសមិត្តនារីៗ នរណាមិនស្រមៃចង់ទៅកាន់កន្លែងបែបនេះ។

នៅតំបន់អាសុី Tokyo Disneyland គឺជាសួនកម្សាន្តដែលពេញនិយមបំផុត។

នៅជិតនោះថែមទាំងមាន Tokyo DisneySea ជាមួយនឹងល្បែងលេងគួរឲ្យចាប់អារម្មណ៍ និងពណ៌ចម្រុះជាច្រើនរាប់​មិន​អស់ តួអង្គ​ដ៏​គួរ​ឲ្យ​ស្រលាញ់ និង​សេវាកម្ម​យក​ចិត្ត​ទុក​ដាក់ ដែល​សក្ដិសម​ជា​ឋានសួគ៌​នៃ​កម្សាន្ត​ពិត​មែន។

តើអ្នកដឹងទេថា មុនពេលសាងសង់ Tokyo Disneyland ក្រុមហ៊ុន Disney ធ្លាប់ខឹងសម្បារយ៉ាងខ្លាំង ហើយបានប្រកាស​ថា៖

“យើងនឹងមិនធ្វើការជាមួយជនជាតិជប៉ុនទៀតឡើយ ពួកគេមិនគួរឲ្យទុកចិត្ត” ។

សូមកុំគិតថា Disney គ្រាន់តែខឹងព្រោះតែរឿងតូចតាច ដូចជារឿង Tokyo Disneyland ស្ថិតនៅ Chiba ជាប់នឹង Tokyo ប៉ុណ្ណឹង​សោះ។

រឿងធ្ងន់ធ្ងរជាងនេះទៅទៀត។

មិនមែន Disney ប៉ុន្តែគឺ Disneyland 

នៅពេលដែលភាពយន្តគំនូរជីវចលរបស់ Disney ល្បីនៅទូទាំងពិភពលោក ហើយ Disneyland នៅអាមេរិកពេញនិយម​យ៉ាង​ខ្លាំង នៅ​ជប៉ុន​បែរ​ជា​មាន​អ្នក​ចង់​សាង​សង់ Disneyland មួយ​សម្រាប់​ខ្លួន​ឯង។

ក្នុងឆ្នាំ ១៩៦១ លោក Matsuo Kunizo បានសាងសង់ Nara Dreamland នៅ Nara ជាសួនកម្សាន្តដែលចម្លងតាម Disneyland ព្រោះ​តែ​សកម្មភាព​នេះ​ហើយ​ដែលបង្កឲ្យមានចម្រូងចម្រាស​ជា​ច្រើន។

ដំបូងឡើយ លោក Matsuo បានទៅកាន់អាមេរិកដើម្បីជួបជាមួយ Disney ក្នុងគោលបំណងរៀនសូត្រតាមបទពិសោធន៍​ដែល​ជោគជ័យ​របស់​ពួក​គេ។

នៅពេលដែលជួបគ្នាលើកទីពីរ ដោយមើលឃើញពីការតាំងចិត្តរបស់លោក Matsuo លោក Walt Disney ដែលជាស្ថាបនិកក្រុមហ៊ុន Disney បានចែករំលែកចំណេះដឹងផ្នែកវិជ្ជាជីវៈ ហើយថែមទាំងបានបញ្ជូនវិស្វករទៅជួយផង​ដែរ។

ទំនាក់ទនងរវាងភាគីទាំងពីរបានបង្កើតភាពជឿទុកចិត្តគ្នា។

យ៉ាងណាមិញ ក្រោយមក ភាគីទាំងពីរបែរជាមានទស្សនៈខុសគ្នា។

ដំបូងឡើយ លោក Matsuo ពិតជាចង់សាងសង់ Disneyland ផ្លូវការមួយនៅក្នុងប្រទេសជប៉ុន។

ទោះជាយ៉ាងណា ភាគី Disney បែរជាយល់ខុសពីគោលបំណងរបស់លោក ពួកគេគិតថា លោកគ្រាន់តែចង់សហការ​សាង​សង់​សួនកម្សាន្តដែលមិនស្ថិតក្រោមឈ្មោះ Disney ។

នៅពេលដែលសួនកម្សាន្តបញ្ចប់ការសាងសង់ លោក Matsuo បានស្នើការប្រើប្រាស់ឈ្មោះ “Disneyland” សម្រាប់​សួន​កម្សាន្ត​របស់​ខ្លួន។

យ៉ាងណាមិញ សំណើមួយនេះបានធ្វើឲ្យគ្រប់យ៉ាងជាប់គាំង។ Disney បានបដិសេធតាមត្រង់។

នៅទីបំផុត សួនកម្សាន្តត្រូវបានបើកសម្ភោធដោយប្រើឈ្មោះថា “Nara Dreamland” ។

ទោះជាយ៉ាងណា លោក Matsuo នៅតែផ្សព្វផ្សាយយ៉ាងសកម្មថា Nara Dreamland គឺជា “Disneyland បែបជប៉ុន” ។

ចំណុចនេះបានធ្វើឲ្យ Disney ខឹងយ៉ាងខ្លាំង។

ម្យ៉ាងវិញទៀត ការរចនា និងល្បែងលេងក្នុងសួនកម្សាន្តក៏ស្រដៀងនឹង Disneyland ដែរ ចំណុចនេះបានធ្វើឲ្យ Disney កាន់​តែ​ខឹង។

តាមពិតទៅ អារម្មណ៍ខឹងសម្បាររបស់ Disney គឺជារឿងដែលអាចយល់បាន។

ដូច្នេះហើយ “Disneyland” ដែលចម្លងតាមត្រូវបានបង្កើតឡើងនៅក្នុងប្រទេសជប៉ុន។

ប្រជាជន​ជប៉ុន​តែង​តែ​រិះគន់​ជនជាតិ​ចិនចូលចិត្តចម្លងតាម យ៉ាងណាមិញ ចំពោះរឿងនេះ ប្រហែលជាយើងគួរ​តែ​ពិចារណា​ឡើង​វិញ។

រឿងនេះបានរារាំងដល់ការបើក Tokyo Disneyland

នៅពេលដែលការចរចាបើកសួនកម្សាន្ត Tokyo Disneyland ចាប់ផ្តើម ស្ថាបនិក Walt Disney បែរចាកចេញ។

ទោះជាយ៉ាងណា ជាពិសេសមតិដែលថា “ប្រជាជនជប៉ុនមិនគួរឲ្យជឿទុកចិត្ត ពួកគេនឹងមិនយកចិត្តទុកដាក់” ដែលលោកបានបន្សល់ទុកបានក្លាយទៅជាឧបសគ្គដ៏ធំមួយ ដែលធ្វើឲ្យដំណើរការបើកសួនកម្សាន្តត្រូវអូសបន្លាយ។

ចុងក្រោយ ភាគី Disney ត្រូវបង្ខំចិត្តអនុញ្ញាតឲ្យសាងសង់ Tokyo Disneyland ។

យ៉ាងណាមិញ ពួកគេមិនមានបំណងដំណើរការសួនកម្សាន្តដោយផ្ទាល់នោះទេ ប៉ុន្តែប្រគល់តួនាទីទាំងអស់ទៅឲ្យភាគី​ជប៉ុន។

មុននោះ Disney ធ្លាប់ចំអកថា “គ្មាននរណាទៅ Disneyland នៅជប៉ុនទេ ប្រាកដជាគ្មានអ្នកទៅឡើយ ហើយមិនចំណេញ” ។

ប៉ុន្តែលទ្ធផលបែរជាផ្ទុយទៅវិញ Tokyo Disneyland ទទួលបានប្រាក់ចំណូលលើសពីការរំពឹងទុក។

ដោយសារតែភាពជោគជ័យដែលមិននឹកស្មានដល់នេះហើយ ទើបសួនកម្សាន្ត Disney ក្រោយមកដូចជានៅប៉ារីស សៀង​ហៃ និង​ហុងកុង​ស្ថិត​ក្រោម​ការ​គ្រប់​គ្រង​របស់ Disney ដោយ​ផ្ទាល់។

ទស្សនៈវាយតម្លៃមិនល្អរបស់ភាគី Disney អាមេរិកចំពោះទីផ្សារជប៉ុនបានផ្លាស់ប្តូរទាំងស្រុងបន្ទាប់ពីជោគជ័យរបស់ Tokyo Disneyland ។

អ្វីដែលគួរឲ្យភ្ញាក់ផ្អើលគឺអំឡុងពេលចរចាដើម្បីបើក Tokyo Disneyland ភាគី Disney បែរជាស្នើសំណើដែលមិន​សម​ហេតុ​ផល​គឺ​បំផ្លាញ​ភ្នំ Fuji ។

ដោយសារទីតាំងរបស់សួនកម្សាន្ត ភ្ញៀវទេសចរណ៍អាចមើលឃើញផ្នែកតូចមួយនៃភ្នំ Fuji ។

Disney គិតថា ចំណុចនេះអាចនឹងធ្វើឲ្យប៉ះពាល់ដល់ការលេងកម្សាន្តរបស់ភ្ញៀវ ដូច្នេះពួកគេបានស្នើឲ្យបំផ្ទុះភ្នំមួយ​ផ្នែក​ដើម្បី​ធ្វើ​ឲ្យ​វា​ទាប​ជាង​មុន។

ទោះជាយ៉ាងណា ចំណុចនេះមិនអាចធ្វើទៅបាននោះទេ។

បន្ទាប់ពីចរចាច្រើនដង នៅទីបំផុតភាគី Disney បានយលព្រមរក្សាសម្រស់ធម្មជាតិរបស់ភ្នំ Fuji ។

ដោយ​បង្ក​បញ្ហា​ធំ​បែប​នេះ Nara Dreamland បានបិទទ្វារក្នុងឆ្នាំ ២០០៦ ។

ផ្ទុយទៅវិញ Tokyo Disneyland និង Tokyo DisneySea ត្រូវបានសាងសង់ឡើងដោយមានការអនុញ្ញាតផ្លូវការពីក្រុម​ហ៊ុន Disney បាន​ទទួល​ជោគ​ជ័យ​ជា​បន្ត​បន្ទាប់។

ការចុះហត្ថលេខាលើកិច្ចសន្យារវាងក្រុមហ៊ុន និងក្រុមហ៊ុនពិតជាសំខាន់ខ្លាំងណាស់។ ប្រសិនបើពីដំបូង ភាគីទាំងពីរ​ស្មោះ​ត្រង់​នឹង​គ្នា​ទៅ​វិញ​ទៅ​មក ប្រហែល​​ជា​រឿង​​នេះ​មិន​កើត​ឡើង​ឡើយ។

ទាំងនេះជាមេរៀនដ៏មានតម្លៃដែលយើងត្រូវចងចាំ។

Abe Kengo