តើ​ម៉ូតូ Honda ពិត​ជា​ធន់​ល្អ​ដូច​ដែល​គេ​និយាយ​ដែរ​ទេ?

កម្ពុជាជាប្រទេសដែលប្រើម៉ូតូជាមធ្យោបាយធ្វើដំណើរច្រើន។

ក្នុងចំណោមម៉ាកម៉ូតូទាំងអស់ ម៉ូតូ Honda មាន​ចំណែក​ទីផ្សារ​យ៉ាងសំខាន់។

ដូច្នេះហើយ តើអ្នកដែលធ្លាប់ប្រើម៉ូតូ Honda នៅក្នុងប្រទេសកម្ពុជាយល់យ៉ាងណាចំពោះម៉ូតូ​ប្រភេទ​នេះ?

តើពួកគេវាយតម្លៃចំពោះគុណភាព កម្រិតធន់ និងមុខងាររបស់ម៉ូតូដូចម្តេចដែរ?

ខ្ញុំបានប្រើម៉ូតូអស់រយៈពេល ១៤ ឆ្នាំមកហើយ សរុបទៅខ្ញុំប្រើ Honda បាន ៩ ឆ្នាំ ហើយបច្ចុប្បន្នកំពុងប្រើ Yamaha ។ ក្នុង​អំឡុង​ពេល​នោះ ខ្ញុំ​មិន​ធ្លាប់​ជួប​បញ្ហា​ធ្ងន់​ធ្ងរ​អ្វី​ឡើយ។

ជាការពិតណាស់ បញ្ហាបែកកង់ម៉ូតូ ឬត្រូវប្តូរប្រេងម៉ាសុីនគឺជារឿងធម្មតា យ៉ាងណាមិញ ខ្ញុំមិនធ្លាប់ជួបបញ្ហាម៉ូតូមិន​ដំណើរ​ការ​នោះ​ទេ។

ក្នុងចំណោមម៉ាកម៉ូតូដែលផលិតនៅប្រទេសជប៉ុន Honda Cub ជាម៉ាកម៉ូតូដែលល្បីថាធន់ប្រើបានយូរ។

ពិតជាគួរឲ្យភ្ញាក់ផ្អើលណាស់នៅពេលដែលដឹងថា សរុបចំនួនម៉ូតូ Cub ដែលត្រូវបានលក់ចេញនៅទូទាំងពិភព​លោក​ជាង ១១០ លាន​គ្រឿង។

ជាមួយនឹងចំនួនប្រជាជននៅលើពិភពលោកប្រហែល ៨ ពាន់លាននាក់ ក្នុងនោះ Honda Cub អាចលក់បានជាង ១១០ លាន​គ្រឿង​គឺ​ជា​ចំនួន​ដែល​គួរ​ឲ្យ​ភ្ញាក់​ផ្អើល​ណាស់។

តើចំណុចអ្វីដែលធ្វើឲ្យម៉ូតូមួយនេះពេញនិយមដូច្នេះ? ចម្លើយយ៉ាងសាមញ្ញគឺថា៖ កម្រិតធន់ដែលមិនគួរឲ្យជឿ។

ព្រោះតែលក្ខណៈពិសេស “មិនដែលខូច” នេះហើយ ទើប Honda Cub ទាក់ទាញអតិថិជនរាប់លាននាក់នៅទូទាំងពិភព​លោក។

កម្មវិធីទូរទស្សន៍ដ៏ល្បីរបស់អាមេរិក Discovery Channel បានជ្រើសយកអាគុបជាម៉ូដែលម៉ូតូដែលធន់បំផុត។

អ្នកអាចរកមើលវីដេអូនេះនៅលើ YouTube សូមចុចតំណភ្ជាប់ខាងក្រោម។

https://clicccar.com/2011/08/24/54096/

Honda មានក្រុមវិស្វករយ៉ាងពិសេស។

ពួកគេមិនត្រឹមតែមានជំនាញបច្ចេកទេសខ្ពស់ប៉ុណ្ណោះទេ ថែមទាំងមានគំនិតខុសពីមនុស្សធម្មតា​ទៀត​ផង ពួក​គេ​តែង​តែ​រុក​រក និង​ស្វែង​យល់​អ្វី​ដែល​ថ្មី។

ចូរយើងក្រឡេកមកមើលការពិសោធន៍ពិសេសៗមួយចំនួនចំពោះ Honda ក្នុងកម្មវិធី Discovery Channel ទាំងអស់​គ្នា។

តើម៉ូតូអាចប្រើគ្រប់ប្រភេទប្រេងឬ?

ប្រាកដណាស់ក្រុមហ៊ុនផលិតមិនយល់ព្រមនោះទេ។

ក្នុងកម្មវិធីពួកគេបានសាកល្បងចំណុចដែលមិនគួរឲ្យជឿមួយ ចាក់ប្រេងឆាដែលប្រើរួចចូលម៉ាសុីនរបស់ម៉ូតូ។

ហើយអ្វីដែលគួរឲ្យភ្ញាក់ផ្អើលត្រង់ថា ម៉ូតូនៅតែអាចដំណើរការបាន។

ផ្ទុកបានច្រើននៅតែអាចដំណើរការ

ថ្វីត្បិតតែ ម៉ូតូមានទម្ងន់​ត្រឹមតែ ៥០ គីឡូក្រាម ប៉ុន្តែអាចផ្ទុកបាន​ដល់​ទៅ ២០០ គីឡូក្រាម ហើយនៅតែអាចធ្វើដំណើរ​បាន។

នៅកម្ពុជាអ្នកអាចនឹងមើលឃើញម៉ូតូ Honda ដឹក​ទំនិញយ៉ាងច្រើន ហើយម៉ូតូទាំងនោះនៅតែដំណើរការបានល្អ។

ទោះជាយ៉ាងណា ការដឹកជញ្ជូនធ្ងន់ពេកពិតជាគ្រោះថ្នាក់ណាស់ ដូច្នេះអ្នកមិនគួរធ្វើបែបនេះឡើយ។

ធ្លាក់ពីលើទីខ្ពស់

បន្ទាប់ពីធ្លាក់ពីលើអគារចុះ ម៉ូតូបានប៉ះទង្គិចនឹងផ្ទៃដីក្នុង​ល្បឿន ៨៥​ គីឡូម៉ែត្រ​ក្នុង​មួយ​ម៉ោង ។

ទោះបីជាកង់រងខូចខាតយ៉ាងធ្ងន់ធ្ងរ ប៉ុន្តែម៉ាសុីននៅតែអាចដំណើរការបាន។

នេះជាលទ្ធផលពិសោធន៍ដ៏គួរឲ្យភ្ញាក់ផ្អើល និងគួរតែស្រាវជ្រាវ។

កម្មវិធី​បានសន្និដ្ឋាន​ថា ម៉ូតូនេះពិតជាខ្លាំងណាស់។ ការរចនាមានលក្ខណៈសាមញ្ញ ធន់ ចំណុចនេះហើយ​ដែល​ជួយឲ្យម៉ូតូអាច​ប្រើ​ប្រាស់​បាន​យូរ។

ម៉ូតូត្រូវបានដាក់បង្ហាញនៅឆ្នាំ ១៩៥២ ហើយនៅតែរក្សាលក្ខណៈដើម ម៉ូតូប្រភេទនេះនៅតែទទួលបានការពេញនិយម​នៅ​ទូទាំង​ពិភព​លោក ជា​ពិសេស​នៅ​ប្រទេស​កម្ពុជា​ ដែល​គេ​តែង​តែ​ហៅ​ថា Dream ។

ម៉ូតូគឺជាមធ្យោបាយធ្វើដំណើរប្រចាំថ្ងៃ ដូច្នេះការជ្រើសរើសយានជំនិះដែលប្រើប្រាស់បានយូរ និងមានសុវត្ថិភាពពិត​ជា​សំខាន់​ខ្លាំង​ណាស់។

យើងមិនលើកទឹកចិត្តឲ្យបើកបរដោយគ្មានការប្រុងប្រយ័ត្ននោះទេ ប៉ុន្តែចង់ឲ្យអ្នកប្រើប្រាស់រីករាយនឹងការធ្វើដំណើរ​ប្រកប​ដោយ​សុវត្ថិភាព និង​រីក​រាយ​ជា​មួយ​នឹង​យាន​ជំនិះ​របស់​ខ្លួន។

យើងចង់​ឲ្យអ្នកប្រើប្រាស់ដឹងពីរបៀបថែទាំ និងស្រឡាញ់ម៉ូតូរបស់ខ្លួនតាមរយៈការត្រួតពិនិត្យជាប្រចាំ។

ការពិសោធដ៏គ្រោះថ្នាក់ដូចនៅលើកញ្ចក់ទូរទស្សន៍គួរតែមើលសម្រាប់កម្សន្តប៉ុណ្ណោះ សូមកុំធ្វើតាមនៅផ្ទះ។

Abe Kengo