មក​ស្គាល់​ពី​តួអង្គ​​ពិសេស​​នៅ​សម័យ​កាល​សាមូរ៉ៃ៖ តើ​បុគ្គល​ទាំង​នោះ​ជា​អ្នក​ផ្តួច​ផ្តើម​នៃ​ពិភព​លោក?

ក្រោមសម័យកាល Edo សន្តិភាពមានរយៈពេល ២៦៥ ឆ្នាំ បានបង្កើតលក្ខខណ្ឌសម្រាប់ជប៉ុនអភិវឌ្ឍយ៉ាងត្រចះត្រចង់។ 

អំឡុងពេលដ៏​រុងរឿង​នោះ ប្រទេសជប៉ុនបង្កើតបាន​ជា​បុគ្គល​ដែល​មាន​ទេព​កោ​សល្យ​​ពិសេស ក្រុមមនុស្សទាំងនេះផ្តួចផ្តើម​គំនិត​ប្លែកៗ ប៉ុន្តែ​បែរ​ជា​ទទួល​​បាន​​សមិទ្ធផល​​ដ៏​​អស្ចារ្យ។

អ្នកជឿទេថា គំនិតច្នៃប្រឌិតមួយចំនួនដែលហាក់ដូចជាសាមញ្ញបានក្លាយទៅជា “Brainchild” ដំបូងរបស់ប្រជាជន​ជប៉ុន។

ជនជាតិជប៉ុនដំបូងគេដែលហោះហើរ

ថ្វីត្បិតតែ ពិភពលោកបានទទួលស្គាល់ថាបងប្អូនគ្រួសារ Wright ជាមនុស្សដំបូងគេដែលហោះហើរលើមេឃ ប៉ុន្តែប្រវត្តិ​សាស្រ្ត​​អាកាស​ចរណ៍​របស់​ជប៉ុន​បែរ​ជា​បង្កប់​នូវ​រឿង​រ៉ាវ​ដ៏​គួរ​ឱ្យ​ភ្ញាក់​ផ្អើល​មួយ។

មុននោះជាងមួយសតវត្ស ក្នុងឆ្នាំ ១៧៨៥ បុរសម្នាក់ឈ្មោះ Ukita Kokichi បានសាកល្បងការហោះហើរដ៏អស្ចារ្យមួយ។

ជាមួយនឹងក្តីស្រមៃយ៉ាងខ្លាំងចំពោះផ្ទៃមេឃ លោកបានចំណាយពេលជាច្រើនឆ្នាំសម្រាប់ស្រាវជ្រាវ និង​បង្កើត​ស្លាបដែល​ធ្វើ​ពី​ឫស្សី ក្រដាស និង​​ក្រណាត់​ដែល​​មាន​​ប្រវែង ៩ ម៉ែត្រ និង​​ទទឹង ២ ម៉ែត្រ។

នៅលើស្ពានមួយ លោកបានលោតចុះបង្កើតបានជាប្រវត្តិសាស្ត្រ។ 

ថ្វីត្បិតតែ អាចហោះហើរបានត្រឹមរយៈពេល ១០ វិនាទី និងមិនមានម៉ាស៊ីនជំនួយ ប៉ុន្តែការហោះហើររបស់លោកបាន​កត់​សម្គាល់​នូវ​ព្រឹត្តិ​ការណ៍​ដ៏​សំខាន់​មួយ​ក្នុង​ប្រវត្តិសាស្ត្រ​អាកាស​ចរណ៍​របស់​ជប៉ុន។

លោកជាជនជាតិជប៉ុនដំបូងគេដែល​ហ៊ានប្រឈមនឹងទំនាញ​ផែនដី ហើយហោះហើរនៅលើផ្ទៃមេឃ។

បុរសដំបូងដែលសរសេរសៀវភៅណែនាំអំពីកន្លែងកម្សាន្តសម្រាប់មនុស្សពេញវ័យ (Fuzoku) 

នៅសម័យនោះ ជប៉ុនមានកន្លែងមួយចំនួនហៅថា Yukaku ដែល​មាន​ន័យ​ថា “តំបន់ភ្លើងក្រហម” ហើយនេះជាកន្លែង​សម្រាប់​ស្រ្តី​ផ្តល់​សេវាកម្ម​ដល់​ភ្ញៀវ​ប្រុស។

ស្រ្តីពេស្យា Oiran ជាស្រ្តីដែលធ្វើការនៅកន្លែងទាំងនេះ។

Hatakeyama Gizan ជាបុរសដែលពិសេសម្នាក់ លោកបានចំណាយមួយជីវិតរបស់ខ្លួនដើម្បីធ្វើដំណើរជុំវិញប្រទេស​ជប៉ុន ទៅ​កាន់ Yukaku ដែល​នៅ​គ្រប់​ទីកន្លែង បន្ទាប់​មក​បាន​ចង​ក្រង​បទ​ពិសោធន៍​របស់​លោក​ក្នុង​​សៀវ​​ភៅមួយ។

ទោះបីជាស្តាប់ទៅដូចជាមានសេរីភាព ប៉ុន្តែនៅសម័យនោះការធ្វើដំណើរជុំវិញប្រទេសគឺជារឿងដែលពិបាក។

ការតស៊ូ និងព្យាយាមរបស់ខ្លួនបានធ្វើឲ្យលោកក្លាយទៅជាបុគ្គលដែលពិសេសមួយរូប ជាមនុស្សដែលចម្លែកម្នាក់ក្នុង​ក្រសែ​ភ្នែក​របស់​មនុស្ស​ជា​ច្រើន។

សាមូរ៉ៃគូររូបគំនូរផ្កាព្រិល

Doi Toshitsura – គឺជាស្តេចក្រាញ់នៃតំបន់ទឹកដីបុរាណ ដែលសព្វថ្ងៃស្ថិតនៅភាគខាងជើងឆៀងខាងលិច Chiba បាន​រួម​បញ្ចូល​យ៉ាង​ប៉ិន​ប្រសប់​រវាង​វិទ្យាសាស្ត្រ និង​សិល្បៈ។

ទោះបីជាការងារមមាញឹក លោកនៅតែចំណាយពេលសង្កេតមើល និងស្រាវជ្រាវព្រិល។

បន្ទាប់ពីខិតខំប្រឹងប្រែងអស់រយៈពេល ២០ ឆ្នាំ លោកបានគូររូបភាពដ៏ស្រស់ស្អាតរបស់ព្រិល ហើយបានសរសេរ​សៀវ​ភៅ​និយាយ​ពី​ព្រិល។

រូបគំនូរព្រិលរបស់លោកទទួលបានការសរសើរចំពោះភាពប៉ិនប្រសប់ និងភាពស្រស់ស្អាត ដោយធ្វើឲ្យគំនូរក្លាយជាប្រធានបទល្បីក្នុងសង្គមនាសម័យនោះ។

គំនូរដ៏អស្ចារ្យទាំងនេះមិនត្រឹមតែជាសមិទ្ធិផលវិទ្យាសាស្ត្រប៉ុណ្ណោះទេ ថែមទាំងជាការបំផុសគំនិតដល់សិល្បៈ ជាពិសេស​ខាង​ផ្នែក​រចនា​ម៉ូដ។

តាំងពីពេលនោះមក រូបភាពផ្កាព្រិលបានក្លាយជាគំនូរតុបតែងដ៏ពេញនិយមនៅលើសម្លៀកបំពាក់ Kimono ។ 

សម័យកាលសន្តិភាពយូរអង្វែងបានបង្កើតឳកាសដល់បុគ្គលដែលមានទេពកោសល្យពិសេស អ្នកដែលមានចំណង់ចំណូល​ចិត្ត​ចម្លែក​បែប​នេះ​បាន​បង្ហាញ​ខ្លួន ហើយ​បង្កើត​បាន​ជា​លក្ខណៈ​វប្បធម៌​ថ្មី។

ទោះជាយ៉ាងណា ក្នុងសម័យកាលបច្ចុប្បន្ន ថ្វីត្បិតតែមិនមានសង្រ្គាម ប៉ុន្តែសម្ពាធសេដ្ឋកិច្ចពិតជាធ្ងន់ណាស់ ដែលធ្វើ​ឲ្យ​អ្នក​​មាន​បុគ្គលិក​លក្ខណៈ​ពិសេស​ពិបាក​នឹង​មាន​ឱកាស​បង្ហាញ​ពី​ខ្លួន​ឯង។

ប្រហែលជានៅពេលដែលសង្គមឈានចូលដំណាក់កាលថ្មីម្តងទៀត នៅពេលដែលគ្រប់យ៉ាងមិនអាចទៅរួចបាន​ក្លាយ​​ជា​ការ​ពិត ពិភពលោកនឹងពោរពេញទៅដោយរឿងដ៏គួរឲ្យចាប់អារម្មណ៍ឡើងវិញ។

Abe Kengo