វប្បធម៌​នៃ​ការ​ទទួល​ទាន Sushi ៖ រឿង​និយាយ​ពី​ពែង​​តែ​ធំ និង​វាំង​នន Noren នៅ​មុខ​ហាង

តើអ្នកធ្លាប់ឆ្ងល់ទេថា ហេតុ​អ្វីបានជា​ពែង​តែ​នៅហាង Sushi មាន “ទំហំធំ” បែបនេះដែរទេ?

យើងតែងតែហៅពែងទាំងនេះថា “Yunomi” ហើយពិតជាចម្លែកណាស់ដែលពែងតែទាំងនេះច្រើនតែមានទំហំធំ បើ​ប្រៀប​ទៅ​នឹង​ពែង​នៅ​ភោជនីយដ្ឋាន​ផ្សេង​ទៀត។

ជាពិសេសនៅហាង Sushi បែបប្រពៃណី ពែង Yunomi ធំជារបស់របរប្រើប្រាស់ដែលអ្នកតែងតែមើលឃើញក្នុង​ហាង។

ចំណុចនេះពិតជាគួរឲ្យចាប់អារម្មណ៍ណាស់ ព្រោះថាការដែលផឹកតែពេលបរិភោគ Sushi ក៏មិនខុសគ្នាប៉ុន្មានពេលទទួល​ទាន​ម្ហូប​ផ្សេង​ឡើយ។

ដូច្នេះហើយ តើអាថ៌កំបាំងនៃពែងតែ “ធំ” នេះជាអ្វី?

ហេតុអ្វីបានជាពែងធំសម្រាប់តែហាង Sushi ចម្លើយស្ថិតលើប្រវត្តិរបស់ហាង Sushi ទាំងនោះ។

តើអ្នកធ្លាប់ចាប់អារម្មណ៍ចំពោះ​វាំងនន Noren ដែលច្រើនតែព្យួរ​នៅ​មុខហាង Sushi ដែរទេ?

អ្វីដែលគួរឲ្យចាប់អារម្មណ៍ត្រង់ថា មនុស្សជាច្រើនគិតថា Noren នៅហាង Sushi ដែលរាងចាស់បន្តិចច្រើនតែលក់ Sushi ឆ្ងាញ់​ជាង។

ចំណុចនេះប្រហែលជាផ្ទុយនឹងគំនិតរបស់ប្រជាជនជប៉ុន ដែល​តែង​តែ​ផ្តោត​លើ​​អនាម័យ។ ដូច្នេះ​តើ​អាថ៌កំបាំងនៃ​​​​វាំង​​​នន Noren ទាំង​នេះ​ជា​អ្វី? ចូរ​យើង​ស្វែង​យល់​ទាំង​អស់​គ្នា។

ពែងធំប្រើសម្រាប់លាងដៃ

កាលពីសម័យមុន Sushi មិនមែនជាមុខម្ហូបសម្រាប់បរិភោគនៅផ្ទះដូចសព្វថ្ងៃនេះនោះទេ ប៉ុន្តែត្រូវបានលក់នៅតាម​ដង​ផ្លូវ។

អ្នកដែលលក់ Sushi ម្នាក់ឯងត្រូវធ្វើគ្រប់យ៉ាង ដូចជាឆុងតែរហូតដល់គិតលុយ។

ដូច្នេះហើយ ទើបគេចាប់ផ្តើមប្រើពែងធំព្រោះថាអាចសន្សំសំចៃពេលវេលា។

អ្វីដែលគួរឲ្យចាប់អារម្មណ៍ជាងនេះត្រង់ថា គេយល់ថា ពែងទាំងនេះអាចនឹងមានមុខងារមួយទៀត ពោលគឺសម្រាប់​ភ្ញៀវ​លាង​សម្អាត​ដៃ​បន្ទាប់​ពី​ទទួល​ទាន Sushi ។

នៅសម័យនេះកន្សែងជូតដៃបានក្លាយជាវត្ថុដែលគេប្រើច្រើនតាមហាង Sushi ។

យ៉ាងណាមិញ តើ​អ្នក​ដឹង​ទេ​ថា កាលពីមុនគេហូប Sushi ដោយដៃទទេ ហើយមិនមានកន្សែងជូតដៃនោះទេ។

ចំណុចនេះបានចោទជាសំណួរសួរថា៖ តើ​ធ្វើយ៉ាងណាអាចរក្សា​អនាម័យ​ពេល​ទទួលទាន?

ចម្លើយអាចនឹងធ្វើឲ្យអ្នកភ្ញាក់ផ្អើល៖ ទឹកតែដែលនៅសល់ត្រូវបានប្រើសម្រាប់លាងសម្អាតដៃ។

ទឹកតែមានផ្ទុកសារធាតុប្រឆាំងអុកស៊ីតកម្មហៅថា Catechin ដោយមិនត្រឹមតែល្អចំពោះសុខភាពប៉ុណ្ណោះទេ ថែម​ទាំង​មាន​មុខ​ងារ​កម្ចាត់​បាក់តេរី និង​បំបាត់​ក្លិន​មិន​ល្អ​ទៀត​ផង។

ទោះជាយ៉ាងណា ចូរចាំថា ការដែលប្រើតែសម្រាប់លាងដៃ​គ្រាន់​តែ​ជា​ទម្លាប់​កាលពីសម័យមុនប៉ុណ្ណោះ។

សព្វ​ថ្ងៃ​នេះ ទោះបីជាពែងតែនៅតែរក្សាទំហំដដែល ប៉ុន្តែគ្មាននរណាធ្វើដូច្នេះទៀតទេ។

អាថ៍កំបាំងនៃវាំងនន Noren ចាស់នៅហាង Sushi 

Noren គឺជាក្រណាត់បាំងផ្នែកខាងលើមុខច្រកចេញចូល។

សព្វថ្ងៃនេះ នៅតែមានហាង Sushi ជាច្រើនប្រើក្រណាត់ Noren ។

ទោះជាយ៉ាងណា កាលពីមុនគេគិតថា ហាងដែលមាន Noren កាន់​តែ​កខ្វក់​កាន់តែឆ្ងាញ់។

ចំណុចនេះស្តាប់ទៅដូចជាផ្ទុយនឹងទិដ្ឋភាពនៃប្រទេសស្អាតដូចជប៉ុន ប៉ុន្តែមូលហេតុដោយសារគេប្រើ Noren ជូត​ដៃ​បន្ទាប់​ពី​លាង​​ទឹក​តែ។

អាចនិយាយថា វាំងនន Noren កាន់តែកខ្វក់បង្ហាញថាហាងមានភ្ញៀវច្រើន។

ពិតជាគួរឲ្យភ្ញាក់ផ្អើលណាស់ដែលប្រទេសអនាម័យដូចជាជប៉ុនបែរជាមានទំនៀមទម្លាប់ទទួលទានអាហារប្លែកៗបែប​នេះ។

បានស្តាប់រឿងដ៏គួរឲ្យចាប់អារម្មណ៍​ទាក់​ទង​នឹង Sushi មិនត្រឹមតែជួយឲ្យអ្នកយល់កាន់តែច្បាស់ពីវប្បធម៌ជប៉ុនប៉ុណ្ណោះ​ទេ ថែម​ទាំង​ធ្វើ​ឲ្យ​​អ្នក​​កាន់​​តែ​​មាន​​ភាព​​ទាក់​​ទាញ​​ពេល​​សន្ទនា​​ផង​​ដែរ។

Abe Kengo