ជំនឿ និងទឹកចិត្តដ៏ល្អរបស់លោក​វេជ្ជបណ្ឌិត​ជន​ជាតិ​ជប៉ុន

តើអ្នកធ្លាប់ស្គាល់លោកវេជ្ជបណ្ឌិត Nakamura Tetsu ដែលជាវីរបុរសជនជាតិជប៉ុនដែរទេ?

លោកបានចំណាយពេលពាក់កណ្តាលជីវិតរបស់ខ្លួនដើម្បីជួយសង្គ្រោះប្រជាជន Afghanistan ជាប្រទេសដែលត្រូវសង្គ្រាម​បំផ្លាញ។

ដោយសារជំនាញ និងទឹកចិត្តសប្បុរសធម៌ លោកវេជ្ជបណ្ឌិត Nakamura បានជួយសង្គ្រោះជីវិតមនុស្សនៅទីនេះចំនួន ៦៥០.០០០ នាក់។

ពិតជាគួរឲ្យសោកស្តាយណាស់ពេលដឹងថា នៅទីបំផុតលោកបានទទួលមរណភាព។

រឿងរ៉ាវនិយាយពីលោកវេជ្ជមណ្ឌិត Nakamura ដែលជាគំរូនៃទឹកចិត្តមេត្តា និងភាពក្លាហាន ហើយគួរតែត្រូវបានចែក​រំលែក​ប្រាប់​អ្នក​ទាំង​អស់​គ្នា។

ទីកន្លែងកំណើតរបស់លោកស្ថិតនៅទីក្រុង Fukuoka ប្រទេសជប៉ុន បន្ទាប់ពីបញ្ចប់ការ​សិក្សា​ផ្នែក​វេជ្ជសាស្ត្រ លោកវេជ្ជបណ្ឌិត Nakamura បាន​​ចំណាយ​​ពេល​ជា​ច្រើន​​ឆ្នាំ​សម្រាប់​ព្យាបាល​​អ្នក​​ជំងឺ​នៅ​ក្នុង​ប្រទេស។

ដោយសារទឹកចិត្តសប្បុរស គាត់​បាន​សម្រេច​ចិត្ត​​ទទួលយកការអញ្ជើញពី​ក្រុមប្រឹក្សាសហប្រតិបត្តិការវេជ្ជសាស្រ្ត ហើយ​​ចេញ​​ដំណើរ​​ទៅ​កាន់​​ប្រទេស Pakistan ។

អំឡុងពេល​ពីរ​ទស្សវត្សរ៍​មក​ហើយ លោកបានខិតខំប្រឹងប្រែងព្យាបាល​អ្នក​ជំងឺ​ឃ្លង់​នៅ​ទីនេះ។

យ៉ាងណាមិញ ដោយសារផលវិបាកខាងផ្នែកនយោបាយ លោកត្រូវផ្អាកពីការងារជាបណ្តោះអាសន្ន ហើយផ្លាស់ទៅកាន់ប្រទេស Afghanistan ។

នៅពេលនោះប្រទេស Afghanistan កំពុងស្ថិតក្រោមស្ថានភាពវឹកវរនៃសង្គ្រាម ប្រជាជនរស់នៅក្នុងភាពក្រីក្រ និង​ខ្វះ​ទឹក​ស្អាត។

ក្រោមស្ថានភាពដ៏អាក្រក់បែបនោះ លោកវេជ្ជបណ្ឌិត Nakamura នៅតែបន្តនាំយកពន្លឺនៃក្តីសង្ឃឹមដល់ប្រជាជនដែល​អកុសល។ 

ដោយប្រឈមនឹងស្ថានភាពកុមារមានជំងឺព្រោះតែប្រភពទឹកកខ្វក់ លោកវេជ្ជបណ្ឌិត Nakamura បានផ្តួចផ្តើមគំនិត​ដ៏​អស្ចារ្យ​មួយ​គឺ៖ សាង​សង់​ប្រឡាយ​ដ៏​ធំ​មួយ។

លោកយល់ឃើញថា ការផ្គត់ផ្គង់ប្រភពទឹកស្អាតទើបជា​មធ្យោបាយជួយសង្គ្រោះ​ដែលមាន​ប្រសិទ្ធភាព​បំផុត។

លោកបានស្វែងយល់អំពីការសាងសង់ដោយខ្លួនឯង ហើយចាប់ផ្តើមអនុវត្តគម្រោងរបស់ខ្លួន។ ដោយផ្អែកលើដៃដែលក្រិន និងទឹកចិត្តមោះមុតរបស់ខ្លួន លោក និងប្រជាជនក្នុងតំបន់បានសាងសង់ប្រព័ន្ធប្រឡាយទឹកដែលមាន​ប្រវែង​ជាង ២០ គីឡូម៉ែត្រ ដោយបានផ្លាស់ប្តូរដីស្ងួតហួតហែងទៅជាវាលស្រែបៃតង។

អ្វីដែលគួរឲ្យភ្ញាក់ផ្អើលត្រង់ថា ក្នុងស្ថានភាពដែលខ្វះខាតគ្រឿងចក្រទំនើបៗ លោក Nakamura បានប្រើប្រាស់បច្ចេក​ទេស​​សាង​សង់​ប្រឡាយទឹកតាមបែបបុរាណរបស់ជប៉ុន។

អាស្រ័យហេតុនេះ គម្រោងមិនត្រឹមតែនាំមកនូវប្រភពទឹកស្អាតសម្រាប់ប្រជាជនប៉ុណ្ណោះទេ ថែមទាំងរួមចំណែកក្នុង​ការ​ស្តារ​បរិស្ថាន​អេកូឡូ​ស៊ី​ផង​ដែរ។

សេចក្តីស្រឡាញ់ និងការលះបង់របស់លោកបានបំផុសគំនិតដល់ប្រជាជន Afghanistan ជាច្រើននាក់។ 

ពួកគេបានចាប់ដៃគ្នា ចូលរួមចំណែក និងធ្វើឲ្យក្តីស្រមៃរបស់លោកក្លាយទៅជាការពិត។

មនុស្ស​ដែល​ធ្លាប់​កាន់​កាំភ្លើង​ក្នុង​ជួរ​កងទ័ព​ដើម្បី​រក​ប្រាក់ ឥឡូវ​នេះបានទម្លាក់អាវុធចុះដើម្បី​ចូលរួមការ​ងារ​សាង​សង់។

ដោយផ្អែកលើការចូលរួមចំណែករបស់ប្រជាជនជាច្រើននាក់ ប្រឡាយទឹកត្រូវបានសាងសង់ឡើងក្រោយរយៈពេល ៧ ឆ្នាំ។

ឥឡូវនេះ មនុស្សជាង ៦៥០.០០០ នាក់បានប្រើប្រាស់ប្រភពទឹកស្អាត ដែលធ្វើអោយជីវិតរបស់ពួកគេមានភាពប្រសើរ​ឡើង​គួរ​ឲ្យ​កត់​សម្គាល់។

រដ្ឋាភិបាលរបស់ Afghanistan ​ក៏​បាន​សរសើរ​ចំពោះ​ការ​រួម​ចំណែក​ដ៏​អស្ចារ្យ​របស់​លោក Nakamura លោក​បាន​ក្លាយ​​ជា​​ជន​បរទេស​​ដំបូង​​គេ​​ដែល​​ទទួល​​បាន​ងារ​ជា​ពលរដ្ឋ​កិត្តិយស ហើយកេរ្តិ៍ឈ្មោះរបស់លោកត្រូវបានផ្សាយតាមប្រព័ន្ធ​​ផ្សព្វ​ផ្សាយ​​ពិភព​លោក។

ពិតជាគួរឲ្យសោកស្តាយណាស់ដែលដឹងថា ខណៈពេលដែលកំពុងនាំយកជីវិតថ្មីដល់មនុស្សជាច្រើន លោកត្រូវក្រុមប្រដាប់​អាវុធ​បាញ់​ប្រហារ ហើយ​បាន​ទទួល​មរណភាព។

អាច​និយាយ​បាន​ថា ទង្វើរបស់លោកគឺ​ជា​ការ​កសាង​សន្តិភាព​ពិត​ប្រាកដ។ នៅតាមភូមិ Afghanistan មានប្រឡាយ​ទឹក ឥឡូវនេះប្រជាជនអាចធ្វើស្រែចម្ការបាន ហើយពួកគេមិនចាំបាច់ពឹងទៅ​លើកាំភ្លើងទៀតឡើយ។

លោក Nakamura បានបង្ហាញឲ្យយើងឃើញថា ដោយគ្រាន់តែមានជំនឿ និងការតស៊ូ បុគ្គលម្នាក់អាចបង្កើតការផ្លាស់​ប្តូរ​ដ៏អស្ចារ្យ​បាន។

មិនថាឆ្លងកាត់ការលំបាកប៉ុន្មាននោះទេ លោកនៅតែបន្តខំប្រឹង ហើយនៅទីបំផុតបានបំផុសគំនិតដល់​សហគមន៍​ទាំង​មូល។

ខ្ញុំជឿជាក់ថា ប្រឡាយទឹកដែលលោកបានសាងសង់នឹងក្លាយជានិមិត្តរូបនៃសន្តិភាព និងការអភិវឌ្ឍន៍ ដែលនាំ​មក​នូវ​ជីវិត​កាន់​តែ​ប្រសើរ​សម្រាប់​មនុស្ស​ជំនាន់​ក្រោយ។

ចូរយើងចាប់ដៃគ្នាកសាងពិភពលោកដែលមានសន្តិភាព ដោយចាប់ផ្តើមដោយរឿងតូចបំផុត។

ប្រហែលជាយើងមិនអាចធ្វើរឿងដែលអស្ចារ្យដូចលោកវេជ្ជបណ្ឌិត Nakamura បាន ប៉ុន្តែយើងគ្រប់គ្នាអាចចាប់ផ្តើមដោយការ​យក​ចិត្តទុកដាក់ចំពោះមនុស្សជុំវិញខ្លួន និងបង្កើតទំនាក់ទំនងល្អ។

ចូរចាប់ផ្តើមពីថ្ងៃនេះ ជាមួយនឹងសកម្មភាពតូចតាចរបស់ខ្លួន ដើម្បីរួមចំណែកធ្វើឲ្យពិភពលោកនេះកាន់តែប្រសើរ​​ឡើង។

Abe Kengo