តើ Sushi ដែលអ្នក​បរិភោគ​ជា “Sushi បែប​ជប៉ុន” មែន​ទេ? ចំណុច​ដ៏​គួរ​ឲ្យ​ចាប់​អារម្មណ៍​នៃ​ស៊ូសុី​ជប៉ុន

Sushi គឺជាមុខម្ហូបដែលពេញនិយមនៅទូទាំងពិភពលោក ហើយឥឡូវនេះមានលក់ស្ទើរតែគ្រប់ប្រទេសទាំងអស់។

យ៉ាងណាមិញ តើ Sushi ដែលអ្នកកំពុងទទួលទាននោះគឺជា “Sushi បែបជប៉ុន” ដែរទេ?

តើអ្នកគិតថាគ្រាន់តែបាយពូត​មួយ​ដុំ​លាយ​​ជា​មួយ​ទឹក​ខ្មេះ​ និងត្រីឆៅគឺអាចហៅថា Sushi ហើយមែនទេ? តាមពិតទៅមិន​ងាយ​ដូច្នេះ​នោះ​ទេ។

Sushi មិនត្រឹមតែជាមុខម្ហូបប៉ុណ្ណោះទេ ប៉ុន្តែជាស្នាដៃសិល្បៈដែលបង្កើតឡើងដោយដៃដ៏ប៉ិនប្រសប់របស់អ្នកចម្អិន។

ចំណិត Sushi នីមួយៗបង្កប់នូវរឿងរ៉ាវដោយឡែក ដែលជាខ្លឹមសារនៃមុខម្ហូបបានបន្តជាច្រើនជំនាន់។

នៅថ្ងៃនេះ យើងនឹងស្វែងយល់ពីលក្ខណៈពិសេសនៃ “Edomae Sushi” – ដែលជា Sushi បែបប្រពៃណីនៅទីក្រុង​តូក្យូ និង​ត្រូវ​បាន​អ្នក​ស្រុក​ចូល​ចិត្ត​យ៉ាង​ខ្លាំង។

អាថ៌កំបាំងនៃពណ៌ដ៏ពិសេសរបស់ Sushi 

អ្នក​ធ្លាប់​ឆ្ងល់​ទេ​ថា ​​ហេតុអ្វី​បានជា Sushi មួយចំនូនបែរជាមានពណ៌ពិសេសបែបនេះដែរទេ?

ចម្លើយស្ថិតនៅលើទឹកខ្មេះពិសេសមួយប្រភេទហៅថាទឹកខ្មេះក្រហម (Akasu) ។ 

ទឹកខ្មេះក្រហមត្រូវបានផលិតចេញពីសំណល់ស្រា Sake (Sakekasu) – ជាផលិតផលជំនួយដល់ដំណើរការផលិតស្រា Sake ។

មិនដូចជាទឹកខ្មេះអង្ករធម្មតានោះទេ ទឹកខ្មេះក្រហមមានរសជាតិយ៉ាងពិសេស ជូរស្រទន់ ស្រស់ស្រាយ និងនាំមកនូវ​រស​ជាតិ​បែប​ប្រពៃណី។

ថ្វីត្បិតតែ វត្ថុធាតុដើមជាសំណល់ស្រា Sake ដែលមានតម្លៃថោក ប៉ុន្តែដំណើរការផលិតទឹកខ្មេះក្រហមបែរជា​មាន​ការ​យកចិត្ត​ទុក​ដាក់ និង​ចំណាយ​ពេល​ច្រើន។

សិប្បករទឹកខ្មេះត្រូវគោរពតាមដំណើរការប្រពៃណី ដោយធ្វើឲ្យឡើងជូរទឹកខ្មេះក្នុងធុងឈើធំរយៈពេលយូរ។

ដូច្នេះហើយ បានជាទឹកខ្មេះក្រហមក្លាយជាគ្រឿងទេសកម្រ និង​មាន​តម្លៃ​ខ្ពស់។

ប្រឡាក់ (Zuke)

ត្រីធូណាជាប្រភេទអាហារសមុទ្រដ៏មានតម្លៃ តែងតែទទួលបានការនិយមចូលចិត្តព្រោះតែសាច់ណែនល្អ ស្រស់ឆ្ងាញ់។ យ៉ាងណាមិញ ត្រីប្រភេទនេះបែរជាឆាប់ខូចណាស់។

ដើម្បីបំបាត់ចំណុចខ្សោយមួយនេះ ប្រជាជនជប៉ុនបានបង្កើតវិធីសាស្រ្តរក្សាទុកយ៉ាងពិសេសនោះគឺ ប្រឡាក់ (Zuke) ។

ដោយ​ត្រាំ​ត្រីធូណា​ក្នុង​ល្បាយ​ទឹកសុីអុីវ ស្រា mirin និងពេលខ្លះគឺសារ៉ាយ ប្រជាជនជប៉ុន​មិន​ត្រឹមអាចរក្សា​អាហារ​ប៉ុណ្ណោះ​​ទេ ថែម​ទាំង​បង្កើត​បាន​ជា​មុខ​ម្ហូប​ពិសេស​មាន​​រស​ជាតិ​​ប្លែក។

បច្ចេកទេសប្រើកាំបិតយ៉ាងជំនាញ

បច្ចេកទេសប្រើកាំបិតនេះច្រើនតែប្រើសម្រាប់ប្រភេទអាហារសមុទ្រដែលរឹងដូចជាមឹក និងអាបាឡូន ដែលជួយឲ្យគ្រឿងទេសជ្រាបចូលបានយ៉ាងងាយស្រួល។

បច្ចេកទេសកាត់យ៉ាងប៉ិនប្រសប់ហៅថា “kazari-bocho” ឬ “kakushi-bocho” គឺជាអាថ៌កំបាំងដែលបង្កើតភាពទាក់ទាញសម្រាប់ Sushi ។

ស្នាមកាត់ទាំងនេះមិនត្រឹមតែជួយឲ្យមុខម្ហូបមើលទៅស្អាតប៉ុណ្ណោះទេ ថែមទាំងជួយឲ្យគ្រឿងទេសជ្រាបចូលចំណិត​សាច់​នីមួយៗ នាំ​មក​នូវ​រស​ជាតិ​ឆ្ងាញ់​ដែល​មិន​អាច​ប្រកែក​បាន។

នេះជាបច្ចេកទេសដែលទាមទារភាពប៉ិនប្រសប់ និងបទពិសោធរបស់ចុងភៅធ្វើ Sushi ហើយកម្រនឹងរកបាននៅ​ភោជនីយដ្ឋាន Sushi ក្រៅ​ប្រទេស​ណាស់។

ត្រី Anago 

ត្រី Anago គឺជាគ្រឿងផ្សំដែលមិនអាចខ្វះបានប្រើសម្រាប់ធ្វើ Sushi Edomae ប្រពៃណី។ 

សាច់ត្រីទន់ផ្អែម ហើយរួមបញ្ចូលយ៉ាងល្អឥតខ្ចោះជាមួយនឹងទឹកជ្រលក់ផ្អែមដែលភោជនីយដ្ឋានបានរៀបចំអស់​រយៈ​ពេល​ជា​ច្រើន​ឆ្នាំ។

ជាពិសេស ប្រភេទត្រី Anago ដែលនេសាទបានក្បែរតំបន់សមុទ្រ Tokyo ត្រូវបានគេហៅថា ត្រី Edomae ហើយល្បី​ថា​សាច់​ណែន​ល្អ និង​មាន​រស​ជាតិ​ឆ្ងាញ់។

តើអ្នកទាំងអស់គ្នាយល់យ៉ាងណា?

ជាចុងក្រោយ ចូរយើងស្វែងយល់ពីបែបបទ និងលំដាប់លំដោយនៃការទទួលទាន Sushi បែបជប៉ុន។

ចំណុចដំបូងដែលយើងគួរកត់សម្គាល់គឺថាមិនត្រូវប្រើទឹកអប់នោះទេ។ ក្លិនក្រអូបឆួលរបស់ទឹកអប់នឹងធ្វើឲ្យបាត់​បង់​រស​ជាតិ​របស់ Sushi ដែលប៉ះពាល់ដល់បទពិសោធនៃការទទួលទានរបស់លោកអ្នក និងភ្ញៀវដទៃទៀត ការជក់បារី​ក៏​គួរ​តែ​ជៀស​វាង​ផង​ដែរ។

ដូច្នេះតើលំដាប់លំដោយនៃការទទួលទាន Sushi យ៉ាងម៉េចវិញ?

ជាទូទៅ គេតែងតែចាប់ផ្តើមបរិភោគ Sashimi ជាមួយនឹងស្រា Sake បន្ទាប់មកទើបបរិភោគ Sushi ។

ថ្វីត្បិតតែ អ្នកអាចជ្រើសរើសមុខម្ហូប និងលំដាប់លំដោយនៃការបរិភោគតាមចំណង់ចំណូលចិត្តផ្ទាល់ខ្លួន ប៉ុន្តែបើតាមបទពិសោធរបស់អ្នកដែលបរិភោគ លំដាប់លំដោយដែលល្អបំផុតគឺ៖ សាច់ស -> អាហារសមុទ្រដែលមានសំបក និង​ត្រីធូណា -> ប្រភេទ Sushi មាន​រស​ជាតិ​សម្បូរ​បែប​ដូច​អន្ទង់។

របៀបទទួលទានបែបនេះ ជួយឲ្យអ្នកទទួលបានអារម្មណ៍ពេញលេញនៃរសជាតិនីមួយៗ ចាប់ពីរស់ជាតិល្មមរហូតដល់​ដិត​ខ្លាំង។

សង្ឃឹមថាលោកអ្នកអាចទៅកាន់ប្រទេសជប៉ុនដើម្បីភ្លក់រសជាតិ Sushi បែបជប៉ុន។

Abe Kengo