ស្វែង​យល់​ពី​ចរិក​លក្ខណៈ​ពិសេស​នៃ​ប្រភេទ​ឈាម​នីមួយៗ

តើអ្នកដឹងថាខ្លួនមានប្រភេទឈាមអ្វីដែរទេ?

ជាទូទៅឈាមត្រូវបានបែងចែកជា ៤ ប្រភេទធំៗគឺ A, B, AB និង O ។ នៅជប៉ុនគេនិយមសង្កេតមើលប្រភេទ​ឈាម​ដើម្បី​ទស្សន៍​ទាយ​ពី​បុគ្គលិក​លក្ខណៈ​របស់​មនុស្ស​ម្នាក់ ដែល​ហៅ​ថា​ទស្សន៍​ទាយ​មើល​តាម​ប្រភេទ​ឈាម។

ថ្វីត្បិតតែ មានការបែងចែកលម្អិតជាងនេះ ដូចជាការរួមបញ្ចូលរវាងប្រភេទឈាម និងតារាវិទ្យា ប៉ុន្តែថ្ងៃនេះយើងគ្រាន់​តែ​ស្វែង​យល់​ពី​លក្ខណៈ​ទូទៅ​នៃ​ប្រភេទ​ឈាម​នីមួយៗ​ប៉ុណ្ណោះ។

ក្រុមឈាមប្រភេទ A 

អ្នកដែលមានឈាមប្រភេទ A ច្រើនតែជាមនុស្សល្អិតល្អន់ មានទំនួលខុសត្រូវខ្ពស់ តែងតែមានការព្រួយបារម្ភ យក​ចិត្ត​ទុក​ដាក់​ចំពោះ​គំនិត​របស់​អ្នក​ដទៃ មាន​ផែន​ការ ហើយ​ពេល​ខ្លះ​ក៏​រឹងរូសបន្តិចដែរ។

ចំពោះរឿងស្នេហា អ្នកដែលមានឈាមប្រភេទ A ច្រើនតែមិននិយាយចេញ ដូច្នេះហើយ ប្រសិនបើអ្នកចូលចិត្តបុគ្គល​ដែល​មាន​ឈាម​ប្រភេទ A អ្នកគួរតែជាអ្នកចាប់ផ្តើម។

នៅជប៉ុនក្រុមឈាមប្រភេទ A គឺសម្បូរបំផុត ដែលមានប្រហែល ៤០% ។ ដូច្នេះហើយ នៅពេលដែលរំលឹកដល់ “ប្រជា​ជន​ជប៉ុន” ក្រុម​អ្នក​ដែល​មាន​ឈាម​ប្រភេទ A ច្រើន​តែជាតំណាង។

ក្រុមឈាមប្រភេទ B 

អ្នកដែលមានឈាមប្រភេទ B ច្រើនតែជាមនុស្សចង់ដឹងចង់ឃើញ សុទិដ្ឋិនិយម ឆាប់អផ្សុក ត្រូវការកន្លែងផ្ទាល់ខ្លួន ច្រើន​តែ​ព្រងើយ​កន្តើយ​ចំពោះ​អ្វី​ដែល​មិន​ចាប់​អារម្មណ៍ ហើយត្រូវការពេលវេលាសម្រាប់បើកចិត្ត។

នៅជប៉ុនក្រុមអ្នកដែលមានឈាមប្រភេទ A ច្រើនតែត្រូវគេចាត់ទុកជាមនុស្សមានបុគ្គលិកលក្ខណៈខុសប្លែកនឹងអ្នក​ដទៃ​បន្តិច។

ទោះបីជាពេលខ្លះត្រូវគេវាយតម្លៃថាជាមនុស្សអាត្មានិយម ប៉ុន្តែក្រុមអ្នកដែលមានឈាមប្រភេទ B បែរជាមានភាព​ស្មោះ​ត្រង់ និងទៀងត្រង់។ ប្រសិនបើអ្នកយល់ពីបុគ្គលិកលក្ខណៈទាំងនេះ អ្នកអាចបង្កើតទំនាក់ទំនងល្អជាមួយ​នឹង​ក្រុម​អ្នក​ដែល​មាន​ឈាម​ប្រភេទ B ។

ក្រុមឈាមប្រភេទ AB

ក្រុមអ្នកដែលមានឈាមប្រភេទ AB ច្រើនតែមានបុគ្គលិកលក្ខណៈដូចខាងក្រោម។

បុគ្គលិកលក្ខណៈមានពីរគឺ ចូលចិត្តនៅម្នាក់ឯង ប៉ុន្តែក៏អាចនឹងមានអារម្មណ៍ឯកោផងដែរ ពូកែទាយដឹងពីស្ថាន​ភាព មើលទៅដូចជាមានភាពអាថ៌កំបាំង អារម្មណ៍តែងតែប្រែប្រួលខុសធម្មតា មិនពូកែណែនាំអ្នកដទៃនោះទេ ប៉ុន្តែ​មាន​ញ្ញាណ​ដឹង​មុន។

គេច្រើនតែយល់ថា អ្នកដែលមានឈាមប្រភេទនេះមិន​ស័ក្តិសម​ធ្វើ​ជាគ្រូបង្រៀននោះទេ ប៉ុន្តែបែរជាមានទេពកោ​សល្យ​​ខាង​សិល្បៈ។ ជា​ប្រភេទ​មនុស្ស​ដែល​មាន​ទេព​កោសល្យ។

នៅជប៉ុនអ្នកដែលមានក្រុមឈាមប្រភេទនេះមានប្រមាណ ១០% ប៉ុណ្ណោះ ពិតជាកម្រណាស់។

ក្រុមឈាមប្រភេទ O

ក្រុមឈាមប្រភេទ O ត្រូវបានគេចាត់ទុកថាមានបុគ្គិលលក្ខណៈដូចខាងក្រោម។

ជាមនុស្សដែលមានចិត្តល្អ ចិត្ត​ទូលាយ មានអំណោយផលធ្វើជាអ្នកដឹកនាំ នៅពេលដែលខឹងពិបាកនឹងគ្រប់គ្រងខ្លួន​ឯង ចូល​ចិត្ត​អារម្មណ៍​មាន​អ្នក​ដទៃ​ចូល​ចិត្ត​ខ្លួន និង​​មាន​​ការ​​ចង​ចាំ​​ល្អ។

ដោយសារតែជាមនុស្សចិត្តទូលាយ ទើបត្រូវបានគេចាត់ទុកថាស័ក្តិសមនឹងតួនាទីជាអ្នកដឹកនាំ ​គ្រប់​គ្រង​មនុស្សជា​​ជាង​​ការ​​ទទួល​​យក​ការ​ងារ​លម្អិត។

គូស្នេហ៍​ដែល​ត្រូវ​បាន​គេ​ចាត់​ទុក​ថាសមគ្នាបំផុតគឺ៖

ដំបូងគឺបុរសដែលមានឈាមប្រភេទ O និងនារីមានឈាមប្រភេទ A ។

ចំណាត់ថ្នាក់​ទី​ ២ គឺបុរស​មាន​ឈាម​ប្រភេទ B និងនារីមាន​ឈាមប្រភេទ O ។

បន្ទាប់​មក​គឺបុរស​ និងនារីមាន​ឈាម​ប្រភេទ A ដូចគ្នា។

ផ្ទុយទៅវិញ គូស្នេហ៍ដែលត្រូវបានគេចាត់ទុកថាមិន​ត្រូវ​គ្នា​គឺ៖ បុរស​មាន​ឈាម​ប្រភេទ B និងនារីមាន​ឈាម​ប្រភេទ A បុរស​​មាន​​ឈាម​ប្រភេទ AB និងនារីមាន​ឈាម​ប្រភេទ O ។

យ៉ាងណាមិញ បុគ្គលិកលក្ខណៈរបស់មនុស្សម្នាក់មិនត្រឹមតែអាស្រ័យលើប្រភេទឈាមរបស់ពួកគេប៉ុណ្ណោះទេ ប៉ុន្តែទទួលរងឥទ្ធិពលដោយកត្តាជាច្រើនផ្សេងទៀត។ ដូច្នេះហើយ យើងមិនអាចបញ្ជាក់បានទេថា គូស្នេហ៍សមគ្នាដោយ​ផ្អែកលើប្រភេទឈាមនោះទេ។

ពិតជាគួរឲ្យចាប់អារម្មណ៍ណាស់ប្រសិនបើអ្នកសាកល្បងស្វែងយល់ពីគូស្នេហ៍ដែលនៅជុំវិញខ្លួន ជាអ្នកដែលជោគ​ជ័យ ឬ​បរាជ័យ​ក្នុង​រឿង​ស្នេហា តើជា​បុគ្គល​ដែល​មាន​ឈាម​ប្រភេទ​អ្វី។

និយាយអញ្ចឹង ខ្ញុំធ្លាប់មានបទពិសោធន៍រៀបការជាមួយអ្នកដែលមានឈាមប្រភេទ A ដូចគ្នា។ ប្រហែលជាទស្សនៈ​សម​គ្នា​ដោយ​ផ្អែក​លើ​ប្រភេទ​​ឈាម​​មិន​​មែន​ត្រូវ​​គ្រប់​​ពេល​​នោះ​​ទេ មែន​ទេ?

នៅជប៉ុនគេតែងតែប្រើរបៀបនិយាយពីប្រភេទឈាមដើម្បីចាប់ផ្តើមការសន្ទនា។

ឧទាហរណ៍នៅពេលដែលឮនរណាម្នាក់និយាយថា ខ្ញុំមានឈាមប្រភេទ A គេនឹងនិយាយថា “អ៊ូ អ្នកប្រាកដជាជាមនុស្ស​ដែល​មាន​ភាព​ប្រុង​ប្រយ័ត្ន និង​ម៉ឺង​ម៉ាត់​ហើយ​មែន​ទេ?” 

ចំណុចនេះប្រៀបដូចជាវិធីសាស្រ្តចាប់ផ្តើមទំនាក់ទំនង ហើយស្វែងយល់ពីបុគ្គលិក​លក្ខណៈ​របស់​អ្នកដែលនៅចំពោះ​មុខ។

នៅប្រទេសរបស់អ្នកទាំងអស់គ្នា តើមានទម្លាប់ទស្សន៍ទាយដោយអាស្រ័យលើប្រភេទឈាមដែរទេ? សូមកុំភ្លេច​ចែក​រំលែក​ប្រាប់ JAPO ។

Abe Kengo