សាកល​វិទ្យាល័យ​និម្មិត៖ គំនិតលេងសើចរបស់អ្នកប្រើបណ្តាញសង្គម

នៅលើបណ្តាញសង្គមពេញទៅដោយសកម្មភាពបោកប្រាស់ និងពាក្យចចាមអារ៉ាមមិនពិតជាច្រើន ដែលធ្វើឲ្យមនុស្សជាច្រើនមានអារម្មណ៍ខឹងសម្បារ។

ទោះជាយ៉ាង​ណា មានរឿងដ៏គួរឲ្យអស់​សំណើច​មួយបានកើតឡើង ដែលធ្វើឲ្យអ្នកប្រើបណ្តាញសង្គមជប៉ុន “ភ្ញាក់ផ្អើល” យ៉ាង​ខ្លាំង។

ចូរយើងក្រឡេកមកមើលអ្នកប្រើបណ្តាញសង្គមជប៉ុនបានធ្វើអ្វីដែលបង្កការចាប់អារម្មណ៍ទាំងអស់គ្នា។

សាកលវិទ្យាល័យដែលបង្កើតឡើងដោយសារព័ត៌មានតាមអុីនធឺណេត

នៅលើវេទិកាបណ្តាញសង្គម ជាកន្លែងដែលគ្រប់គ្នាអាចលាក់បាំងឈ្មោះរបស់ខ្លួន បុរសម្នាក់បានផ្តួចផ្តើមគំនិតដ៏ចម្លែក​មួយ។

គាត់បានបបួលអ្នកទាំងអស់គ្នាបង្កើតសាកលវិទ្យាល័យ “និម្មិត” ឲ្យសប្បាយ។

គ្រប់គ្នាបញ្ចេញមតិយោបល់រួមគ្នា ដោយបញ្ចូលគំនិតបែបកំប្លែង និងច្បាស់លាស់ ដើម្បីបង្កើតសាកលវិទ្យាល័យដែល​ស្តាប់​ទៅ​ដូច​ជា​ពិត ប៉ុន្តែ​តាម​ពិត​ទៅ​គឺ “មិន​នឹក​ស្មាន” ដល់។

ជាដំបូងគឺឈ្មោះសាកលវិទ្យាល័យ។

ជាមួយនឹងគោលបំណងរកឈ្មោះដែលមានលក្ខណៈបែបអន្តរជាតិ ហើយបង្កើនការនឹករលឹកដល់​វប្បធម៌​ជប៉ុន ពួក​គេ​បាន​ដាក់​ឈ្មោះ​ថា “សាកល​វិទ្យាល័យ​​អន្តរ​ជាតិ Shinano” ។

ព័ត៌មានទាំងអស់ដែលទាក់ទងនឹងសាលារៀនដូចជា ទីតាំង បុគ្គលិក សុទ្ធតែត្រូវបានបង្កើតឡើងដោយផ្អែកលើ​ការ​ស្រមើល​ស្រមៃ។

ពួកគេថែមទាំងបង្កើតគេហទំព័រ “និម្មិត” សម្រាប់សាកលវិទ្យាល័យនេះផងដែរ។

គេហទំព័រនេះមើលទៅមានលក្ខណៈវិជ្ជាជីវៈ ប៉ុន្តែប្រសិនបើអានដោយយកចិត្តទុកដាក់ អ្នកមើលឃើញចំណុចចម្លែក​ជា​ច្រើន។ ឈ្មោះគ្រូបង្រៀនដំបូងដែលយើងមើលឃើញគឺ “吉村 コサックダンス” (Yoshimura Kosakku Dansu – Yoshimura រាំ Hopak) ។

ម្យ៉ាងវិញទៀត គ្រូបង្រៀនម្នាក់មានឈ្មោះថា Raigocho ដែលមានជំនាញខាងស្រាវជ្រាវបង្កង។

លោកគ្រូម្នាក់នោះបានរកឃើញចំណុចដ៏គួរឲ្យចាប់អារម្មណ៍មួយគឺ៖ នៅពេលដែលបង្កងញី ៣ ក្បាលនៅជាមួយគ្នា ពួក​វា​តែង​តែ​​ធ្វើ​​បាប​​គ្នា​​ទៅ​​វិញ​​ទៅ​​មក។ 

ចំណែកឯគ្រូបង្រៀនសិល្បៈបែរជាចូលចិត្តលួចថតរូប។

លោកគ្រូថែមទាំងបានសរសេរសារប្រាប់សិស្សទាំងអស់គ្នា ដោយសង្ឃឹមថា អាចលួចថតរូបជាមួយអ្នកទាំងអស់គ្នាទៀត​ផង។

រឿងពិតដែលបង្កប់នៅពីក្រោយពាក្យសម្តីរបស់នាយកសាលា

មានមួយទំព័របានកត់ត្រាពាក្យសម្តីរបស់នាយកសាលាដំបូង ប៉ុន្តែបែរជាមានប្រយោគជាភាសាបារាំងសរសេរថា៖ “Les choses sur cette page sont fictives” ។

មានន័យថា “”ខ្លឹមសារនៅលើទំព័រនេះសុទ្ធតែជារឿងប្រឌិតប៉ុណ្ណោះ” ។

ពិតជារឿងដ៏គួរឲ្យកំប្លែងណាស់!

នៅពេលដែលពិនិត្យមើលលម្អិតប្រវត្តិ​សាលាគេប្រទះឃើញថា មាននាយក​សាលាពីរនាក់ធ្លាប់ត្រូវចាប់ខ្លួន​ពី​បទ​បៀត​បៀន។

មិនត្រឹមតែជាសាកលវិទ្យាល័យ ហើយថែមទាំងផ្សាយលើទូរទស្សន៍

នៅលើ Twitter ម្ចាស់ភោជនីយដ្ឋានបានបង្ហោះដូចតទៅ “សាស្ត្រាចារ្យសាកលវិទ្យាល័យអន្តរជាតិ Shinano បាន​លុប​ចោល​ការ​កក់​កន្លែង។ នេះ​ជា​ការ​ខាត​បង់​ដ៏​ធំ” ។

ប្រជាជនជប៉ុនជាច្រើនមានការខឹងសម្បារយ៉ាងខ្លាំង ហើយរឿងនេះបានក្លាយជាប្រធានបទដ៏ក្តៅគគុកនៅលើបណ្តាញ​​​សង្គម។

រឿងនេះថែមទាំងត្រូវបានចុះផ្សាយលើកម្មវិធីសារព័ត៌មានតាមទូរទស្សន៍ ប៉ុន្តែតាមពិតទៅ ភោជនីយដ្ឋាននេះមិន​​​មាន​​ពិត​​នោះ​​ទេ ហើយ​នេះ​គ្រាន់​តែ​ជា​ការ​លេង​សើច​របស់​អ្នក​ដែលបានង្កើតគេហទំព័ររបស់សាកលវិទ្យាល័យ​តែ​​ប៉ុណ្ណោះ។

ភោជនីយដ្ឋានមានឈ្មោះថា Namazu-tei (ភោជនីយដ្ឋានខ្យង) ប៉ុន្តែគ្មានភោជនីយដ្ឋានឯណាដាក់ឈ្មោះចម្លែកបែប​នេះ​ទេ។

មិនមែនព័ត៌មានទាំងអស់នៅលើអុីនធឺណេត ឬព័ត៌មានលើទូរទស្សន៍សុទ្ធតែពិតនោះទេ។

ប្រហែលជាបុគ្គលរូបនោះចង់ឲ្យគ្រប់គ្នាផ្ទៀងផ្ទាត់ព័ត៌មានជាជាងការដែលជឿលើអ្វីដែលបានស្តាប់។

ឬប្រហែលនោះគ្រាន់តែជារឿងកំប្លែងប៉ុណ្ណោះ ទោះជាយ៉ាងណា ខ្ញុំគិតថា នេះជាការពិសោធន៍គួរឲ្យចាប់អារម្មណ៍សម្រាប់​ចោទ​ជា​សំណួរ​ទាក់ទងនឹង​ភាព​ជឿ​ទុក​ចិត្ត​ចំពោះ​ព័ត៌មាន។

គេហទំព័ររបស់សាកលវិទ្យាល័យនេះនៅតែកំពុងដំណើរការរហូតមកដល់សព្វថ្ងៃ ដូច្នេះប្រសិនបើអ្នកចេះភាសា​ជប៉ុន​អាច​ពិនិត្យ​មើល​បាន។

https://kokushin-u.jp

អ្នកដែលធ្វើបច្ចុប្បន្នភាព​ព័ត៌មានដោយយកចិត្តទុកដាក់ ទោះបីជាវាមិនមានប្រយោជន៍អ្វីខាងផ្នែកហិរញ្ញវត្ថុ ថែម​ទាំង​កំប្លែង ពិតជាគួរឲ្យសរសើរណាស់។

មិន​ត្រឹម​តែ​ខ្ញុំ​ប៉ុណ្ណោះ​ទេ ប៉ុន្តែប្រហែលជាគ្រប់គ្នាគិតថា ពួកគេគួរតែចំណាយពេលនោះដើម្បីធ្វើការងារដែលម៉ឺងម៉ាត់​ជាង​នេះ។

Abe Kengo