នំ Taiyaki ៖ ធ្លាប់ជានំដែលមានរូបរាងដូចអណ្តើក និង​​បង្ហាញ​ពី​បុគ្គលិក​លក្ខណៈ​របស់​អ្នកទទួល​ទាន​នំ

ក្នុងចំណោមនំចំណីដែលល្បីនៅតាមដងផ្លូវជប៉ុនគឺនំត្រី Taiyaki ។

តើអ្នកទាំងអស់គ្នាធ្លាប់ភ្លក់រសជាតិដ៏ពិសេសនេះដែរទេ?

ជាមួយនឹងរូបរាងដ៏គួរឲ្យស្រលាញ់ និងរសជាតិផ្អែមឆ្ងាញ់ នាំមកនូវអារម្មណ៍សប្បាយរីករាយ ជាពិសេសនៅពេលដែល​ទទួល​ទាន​នំ​ក្តៅៗ ទើប​តែ​ចេញ​ពី​ឡ គ្រាន់​តែ​ស្រមៃ​គិត​ក៏​ធ្វើ​ឲ្យ​គ្រប់​គ្នា​ចង់​ភ្លក់​ទៅ​ហើយ។

គ្រឿងផ្សំសំខាន់ដែលគេយកទៅធ្វើនំ Taiyaki គឺសាមញ្ញណាស់ គ្រាន់តែលាយម្សៅមី និងស្នូលសណ្តែកក្រហមផ្អែមឆ្ងាញ់ “Anko” ប៉ុណ្ណោះ។

ស្នូលសណ្តែកក្រហមត្រូវបានបន្ថែមដោយស្រទាប់ម្សៅទន់ពិសេស បន្ទាប់មកត្រូវដុតនំ បង្កើតបានជារសជាតិឈ្ងុយ​ឆ្ងាញ់​មិន​អាច​ទប់​អារម្មណ៍​បាន។

នំ Taiyaki មានអាយុកាលជាង ១០០ ឆ្នាំមកហើយ ដោយបង្កប់នូវរឿងរ៉ាវដ៏គួរឲ្យចាប់អារម្មណ៍។

កាលដែលទើបតែផលិតដំបូង នំនេះធ្លាប់មានរូបរាងដូចអណ្តើក ប៉ុន្តែបែរជាមិនទាក់ទាញភ្ញៀវទេសចរណ៍ប៉ុន្មាន​ទេ។

ថ្វីត្បិតតែមិនច្បាស់ថា នំធ្លាប់ត្រូវបានគេហៅថា “នំអណ្ដើក” ដែរអត់ក៏ដោយ ប៉ុន្តែនៅពេលដែលផ្លាស់ប្តូររូបរាង ទើប​នំ​នេះ​ចាប់ផ្តើមល្បីខ្លាំង ហើយបានក្លាយទៅជានំចំណីតាមដងផ្លូវដែលពេញនិយមបំផុត។

ធម្មជាតិ និងការចិញ្ចឹម

នៅពេលដែលនិយាយពីត្រី យើងតែងតែបែងចែករវាងត្រីធម្មជាតិ (ចាប់នៅសមុទ្រ) និងត្រីចិញ្ចឹម (ចិញ្ចឹម​ក្នុងស្រះ) ។ ប៉ុន្តែ​តើ​អ្នក​ដឹង​ទេ​ថា សូម្បី​តែ​នំត្រី Taiyaki ក៏​មាន​ការបែងចែកស្រដៀងគ្នាដែរទេ?

ថ្វីត្បិតតែ នំ Taiyaki ត្រូវបានធ្វើឡើងដោយមនុស្ស ប៉ុន្តែរបៀបធ្វើនំបែរជាមានភាពខុសគ្នា។

នំ Taiyaki “ចិញ្ចឹម” ត្រូវបានដុតយ៉ាងច្រើននៅលើបន្ទះដែកធំ ចំណែកឯនំ Taiyaki “ធម្មជាតិ” ត្រូវបានដុតដោយ​ឡែក​មួយ​ៗ ឬ​ជា​គូ​នៅ​លើ​បន្ទះ​ដែក​តូច។ 

ស្រដៀងនឹងត្រីធម្មជាតិដែរ គេតែងតែនិយមចូលចិត្តជាងត្រីចិញ្ចឹម នំ Taiyaki “ធម្មជាតិ” ក៏ទទួលបានការវាយតម្លៃ​ខ្ពស់​ផង​ដែរ។

ចំណុចនេះអាចបណ្តាលមកពីដំណើរការផលិតដោយដៃ មានភាពល្អិតល្អន់ ដែលនាំមកនូវអារម្មណ៍ពិសេសសម្រាប់ផលិត​ផល។ 

នំធម្មជាតិត្រូវបានដុតយ៉ាង​យក​ចិត្ត​ទុក​ដាក់ ដោយនំនីមួយៗត្រូវបានត្រួតពិនិត្យយ៉ាងច្បាស់ ដើម្បីឲ្យស្រទាប់ខាង​ក្រៅ​ស្រួយ​ឆ្ងាញ់​តែ​មិន​ខ្លោច។

ដោយសារតែដំណាក់កាលដុតនំមានភាពល្អិតល្អន់​ ទើបប្រភេទនំនេះត្រូវបានគេចាត់ទុកជា​មុខ​ម្ហូប​ពិសេស​លំដាប់​ខ្ពស់។ 

ខ្ញុំពិតជាចង់ឲ្យអ្នកទាំងអស់គ្នាភ្លក់នំធម្មជាតិនេះម្តងណាស់ ដើម្បីមើលឃើញពីភាពខុសគ្នា។

តើអ្នកដឹងទេថា របៀបទទួលទាននំ Taiyaki អាចបង្ហាញពីអ្វីខ្លះដែលទាក់ទាញនឹងបុគ្គលិកលក្ខណៈរបស់មនុស្សម្នាក់ដែរ​ទេ? 

គេតែងតែនិយាយថា អ្នកដែលញ៉ាំនំ Taiyaki ពីក្បាលចុះមកក្រោមជាមនុស្សសុទិដ្ឋិនិយម មិនទាមទារភាពល្អឥត​ខ្ចោះ​ពេក​ទេ និង​ទៀង​ត្រង់។

ទន្ទឹម​នឹង​នេះ អ្នកដែលចូលចិត្តញ៉ាំពីក្រោមកន្ទុយឡើងលើជាមនុស្សដែលមានភាពប្រុង​ប្រយ័ត្ន។ 

ដោយសារតែរូបរាងពិសេសរបស់នំ Taiyaki ដូច្នេះឃើញថា ត្រង់កន្ទុយមិនអាចពេញទៅដោយស្នូលគ្រប់ពេលនោះទេ។

ដូច្នេះហើយ ការដែលទុកកន្លែងឆ្ងាញ់បំផុតទុកញ៉ាំចុងក្រោយបង្ហាញថា អ្នកដែលញ៉ាំ មានការប្រុងប្រយ័ត្ន និងដឹង​ពី​របៀប​ទទួល​ទាន​ដោយ​ភាព​រីករាយ។

របៀបបែងចែកនំ Taiyaki ជាពីរ និងលំដាប់លំដោយញ៉ាំក៏អាចបង្ហាញពីបុគ្គលិកលក្ខណៈរបស់អ្នកទទួលទានមួយផ្នែក​ផង​ដែរ។

អ្នកដែលទទួលទានត្រង់ផ្នែកកន្ទុយមុន ជាទូទៅជាមនុស្សដែលមានគំនិតគិតគូរ ពួកគេតែងតែចំណាយពេលស្វែង​យល់​ល្អិត​ល្អន់​មុន​ពេល​ធ្វើ​សកម្មភាព។

ការដែលតែងតែទទួលទានត្រង់ផ្នែកក្បាលនំ Taiyaki មុន អាចនឹងជាសញ្ញាបង្ហាញថា អ្នកកំពុងតែខំប្រឹងហួសកម្លាំង។ ចូរ​ចំណាយ​ពេល​សម្រាក​បន្ធូរ​អារម្មណ៍ ហើយ​ធ្វើ​ការ​ងារ​ដែល​ខ្លួន​ចូល​ចិត្ត។

តោះនរណាខ្លះចូលចិត្តញ៉ាំកន្ទុយនំមុន? ចុះអ្នកផ្សេងទៀត តើអ្នកចូលចិត្តញ៉ាំក្បាល ឬកន្ទុយមុន?

សូមកុំភ្លេច comment ប្រាប់ JAPO ទាំងអស់គ្នាណា! ដើម្បីពិនិត្យមើលថា នរណាខ្លះ Fan ផ្នែកក្បាល ឬកន្ទុយនំ Taiyaki ។

Abe Kengo